Asiriankiri Nínive markanjja, sinti jan wali jaqenakaw jakapjjäna. Ukatwa Jehová Diosajj jan ukhamäpjjañapatakejj Jonás profetar khitäna. Jonasajj uka markar sarañat sipansa, yaqha toqenkir markaruw sarjjäna, Tarsis markar sarir barcotwa escapjjäna.

Barcojj qotan saraskäna ukhajja, jachʼa thayaw oladanakampi sartäna, barco apirinakajj wal sustjasipjjäna, diosanakaparuw orasipjjäna, ‘¿kunatsa akajj pasistu?ʼ sasaw jisktʼasipjjarakïna. Jonasajj akham sasaw qhepat arsjjäna: ‘Nayaw juchanïtjja. Jehová Diosan mayitapar jan phoqañatakiw escapanta. Umar jaqontapjjetäta ukhaw thayajj tʼakurjjani’ sasa. Barco apirinakajj janiw jaqontañ munapkänti. Ukampis Jonasajj ‘jaqontapjjeta’ saskakïnwa. Ukatwa qotar jaqontapjjäna, ukhamat jachʼa thayajj tʼakurjjäna.

Jonasajj ‘akanjjay jiwjjchï’ sasaw säna. Uma manqhar chhaqantaskäna ukhajj Jehová Diosaruw orasïna. Diosajj mä jachʼa chawlla apayanisaw Jonasar manqʼantayäna. Ukampis Jonasajj janiw jiwkänti. Chawlla purakanjja akham orasïna: ‘Jichhat uksarojj taqe kunan istʼjjäma’ sasa. Jehová Diosajj kimsa uruw chawlla manqhan Jonasar jakayäna, ukatjja waña oraqeruw jaqsuyanjjäna.

Ukhamaw Jehová Diosajj Jonasar salväna, ¿jichhajj janit Nínive markar sarañapäjjäna? Diosajj wasitat khitäna. Jonasasti Diosar istʼasaw saräna. Jan walinak lurir jaqenakarojj akham sasaw yatiyäna:  ‘40 urunakatjja, aka markarojj Jehová Diosaw tukjani’ sasa. Ukampis jan piensañjamäki ukaw pasäna. Ninivitanakajj istʼasipjjänwa, jan wali lurañanakapsa apanukupjjänwa. Nínive markan reyipajj akham sasaw jaqenakar säna: ‘Diosar mayisipjjam, arrepentisipjjarakim. Inach ukhamat jan tukjatäkañäni’ sasa. Jehová Diosajj arrepentisipjjatap uñjasajj janiw jiwarayjjänti.

Jehová Diosan uka markar jan tukjatapatjja Jonasajj wal colerasïna. Amuytʼañäni: Jehová Diosajj pacienciampiw Jonasar uñjäna, wal khuyaptʼayasirakïna. Ukampis Jonasajj janiw ninivitanakat khuyaptʼayaskänti. Ukat sipansa, marka anqäjjar mistusajj colerataw calabaza vinatera sat ali chʼiwir qontʼasïna. Qhepatjja, uka alejj wañsjjänwa, uk uñjasajj wal colerasïna. Ukatwa Jehová Diosajj säna: ‘Jumajj ninivitanakat llakisiñat sipansa uka alitwa jukʼamp llakistajja. Ukampis nayajj ninivitanakat wal khuyaptʼayasta, ukatwa salvasipjjaraki’ sasa. ¿Kuns Diosajj Jonasar yatichañ munäna? Mä alit sipansa ninivitanakaw jukʼampi valoranïpjjäna.