¿KUNAMPIS akan utjixa? Jïsa, pä jaqimpiw utji. Nayrïr chachampi nayrïr warmimpiwa. ¿Khitis jupanakar luratayna? Diosawa. ¿Diosan sutip yattati? Jehová satawa. Ukat uka chachaxa Adán satänwa, warmisti Eva satarakïnwa.

Jehová Diosax Adanarux akham luratayna: uraqit laqʼa aptasinwa mä chacha sum lurtʼatayna. Ukatxa nasapatwa phusantäna, ukhamatwa Adanax jakxäna.

Adanaruxa taqi kasta animalanakaruw suti apxatäta sataynaw Diosaxa. Inas Adanax animalanakar suma suti apxatañatakixa walja tiempo yatxatchïna. Ukat sutinak apxataskasaxa, Adanax may amuyasïna. ¿Kuns amuyaspachäna uk yattati?

Animalanakaxa panin paninkamäpxänwa. Uwijanakas elefantenakas qachun urqunïpxänwa. ¿Adanasti?, sapakïnwa. Ukatwa Jehová Diosax Adanarux jiw iktʼayatayna, mä jaraphi apsuñataki. Uka jaraphitwa Jehová Diosax Adanatakixa mä warmi luratayna warmipäñapataki.

¡Wali kusisitaw Adanax jikxatasïna! ¡Ukat Evax wali kusisitarakiw jikxataspachäna ukham suma huertan jakasiñ yatisaxa! Jichhax wawanixapxasapänwa ukat wali kusisitaw jakasipxasapäna.

Adanampi Evampixa wiñay jakasipxaspa ukwa Jehová Diosax munäna. Edén huertjama aka Uraqpach sumaptayapxañapwa Diosax munäna. ¡Uk lurañ yatisax Adanampi Evampix wal kusisipxpachäna! ¿Ukan yanaptʼañ jumax munasmänti? Ukampisa Adanampi Evampixa janiwa kusisita jakasxapxänti. ¿Kunatsa?, uk jichhax uñjañäni.