KUNAPACHATÏ aka Uraqiru jaqix mirantapxäna ukhaxa, niya taqiniw Cainjam jan walinak lurapxäna. Ukampis mä jaqiw utjäna, jupax janiw mayninakjamäkänti. Enoc satänwa. Jan axsarir jaqïnwa. Mitanakapax qhurukamakïnwa, ukampisa jupax Diosar yupaychaskakïnwa.

¿Kunatsa uka jaqinakax sinti jan walinak lurapxpachäna uk yattati? Ak amtañäni: ¿Khitis Adanampi Evampirux Diosar jan istʼayas juchar puriyänxa, ukat jan manqʼañ achutsa manqʼayänxa? Mä jan wali angelawa. Biblianxa Supaya satawa. Jupaw taqinirusa jan wali jaqinakaptayañ munistu.

Mä uruxa, kuntï uka jaqinakax jan istʼañ munapkäna uk yatiyanim satayna Jehová Diosaxa. Akham sañapänwa: ‘Mä uruxa Diosax jan wali jaqinakaruxa tukjaniwa’ sasa. Inas uka arunakax wal thithiychïna uka jaqinakaru. Inas Enoc tatar jiwayañ munapxchïna. Ukatwa, Enoc tatax jan axsaririñapänxa Diosax kuntï lurkani uka yatiyañatakixa.

Diosax janiw ukham jan wali jaqinak taypin Enoc tatarux jakayxänti. 365 marakiw jakäna. ¿Kunatsa “365 marakiw jakäna” sistanxa? Ukapachaxa jaqinakax wali chʼamanïpxänwa, walja maranakaw jakapxäna. ¡Jïsa; Enoc tatan Matusalén yuqapaxa 969 maraw jakatayna!

Enoc tatan jiwatapatxa, jukʼampi jan wali jaqinakaruw tukupxäna. ‘Jan wali lurañanakakwa amtasipkäna’ siwa Bibliaxa, ukat ‘aka Uraqix jan wali lurañanakampi phuqantatänwa’ sarakiwa.

¿Kunatsa uka urunakanxa ukham sinti jan waltʼäwinakax utjpachäna uk yattati? Supayaw yaqha tuqit jaqinakar ukham jan walir apatayna. Kunjamsa uk luräna, uk uñjañäni.