NOÉ tatax mä warmini kimsa yuqanïnwa. Yuqanakapaxa Sem, Cam, Jafet satäpxänwa. Kimsanpachaw warminipxäna. Ukhamasti Noen familiapanxa kimsaqallqunipxänwa.

Diosax Noerux mä jachʼa arka luram sänwa, ukax janiw uñtʼatäkänti khä tiemponxa. Uka arkax wali jachʼa botjamänwa, mä jachʼa cajar uñtasitänwa. ‘Kimsa altusan luräta, ukat jiskʼa utanakaruw jalanuqäta’ sataynaw Diosaxa. Uka utanakaxa, Noempi familiapampitaki, animalanakataki, manqʼa imañataki jalanuqatänwa.

Uka arkxa, jan umansa mantkañwa luräta sataynawa Diosaxa. ‘Mä jachʼa jallwa apayanï jan wali jaqinakaru tukjañataki. Khititï jan arkankkani ukaxa jiwaniwa’ sänwa.

Noempi yuqanakapampix iyaw sasaw ark lurañ qalltapxäna. Ukampis yaqha jaqinakax larusipxänwa. Jan walinak lurasipkakïnwa. Diosan arunakap yatiykän ukhaxa janiw khitis Noerux istʼañ munkänti.

Wali jachʼänaw arkaxa, ukatwa mara mara lurapxänxa. Walja maranakatwa tukuyxapxäna. Ukatxa, Diosax animalanak arkar anantam sataynawa Noeruxa. Qachun urquni paris parisa ukar anantäta, ukat yaqha animalanaksti paqallqkam anantarakïta, sataynawa Diosaxa, ukat kunayman kasta jamachʼinakampi. Diosax kunjamtï siskän ukarjamaw Noex luräna.

Ukatxa, Noempi familiapampix arkaruw mantxapxäna. Ukatsti Diosaw punkxa jistʼantxäna. Noempi familiapampixa uka manqhanwa suyasipkäna. Jumax ukansa suyaskasma ukham amuytʼasma. ¿Diosax jalluw purintani siskäna ukax utjpachäniti?