ANQÄXANXA, jaqinakaxa nayrjam sarnaqasipkakïnwa. Janiw Uma Juiciox jutkaspati sapxänwa. Wal larusipxpachäna. Uka qhipatxa janiw khitis larusxänti.

Akatjamatwa jallux wal purintäna. Mä yurutjamwa umax alaxpachat waraqtanïna. ¡Chiqpunwa Noé chachax parlaskäna! Ukampisa janiw khitis jichhax arkarux mantxasapänti. Jehová Diosaw arkan punkupxa sum jistʼantxäna.

Niyawa pampa uraqinakasa chhaqtxäna. Umax wali jachʼa jawiranakjamaw sartäna. Umax quqanak qalanak apäna ukax wali jayat istʼasïna. Jaqinakax wal sustjasipxäna. Jachʼa qullunakaruw makatapxäna. Wal amtasipxpachäna, ¡Noé tatan arunakap istʼakisän kunapachatix arkan punkupax jistʼarataskäna ukhaxa!, sapxpachänwa. Inaw wararisipkäna, janiw arkar mantxapkasapänti.

Umax jitkattaskakïnwa. 40 uruy arumaw alaxpachat umax waraqtanïna. Qullunakaruw umax jitkattäna, jachʼa qullunaksa chhaqtayänwa. Jan arkankir taqi jaqinakaw jiwarapxäna animalanakas ukhamaraki, kunjamtï Diosax siskatayna ukhama. Arka manqhankirinakakiw qhispipxäna.

Noempi yuqanakapampix ark lurapxatayna ukaxa wali askipunïnwa. Umax arkarux tuytayxänwa. Ukhamasti mä uruxa, kunapachatï jan jallux purxäna ukhaxa, Intiw wali sum qhantʼanïna. ¡Muspharañjamäpachänwa! Taqi chiqasa umakamakïnwa. Arka mayakiw uma patan tuyuskäna.

Janiw jachʼa jaqinakas utjxänti. Janiw uka jaqinakax kawkits kuttʼanipkasapänti jaqinakar thʼaqhisiyañatakixa. Taqiniw jiwarapxäna, mamanakapas yaqha jan wali jaqinakasa ukhamaraki. ¿Ukat jachʼa jaqinakan tatanakapasti kamachapxänsa?

Jachʼa jaqinakan tatanakapax janiw jiwasjam jaqinakäpkänti. Angelanakaw aka Uraqir saraqanipxatayna jaqinakjam jakañataki. Ukatwa Uma Juicionxa jan jiwarapkänti. Jan ukasti, lurasipkatayna uka cuerponak jaytasaw alaxpachar angelanakjam kutkatxapxäna. Ukampisa Diosax janiwa familiap taypirux katuqxänti. Supayan angelanakapäxapxänwa. Biblianxa uka angelanakax supayanak jan ukax saxranak satawa.

Diosax thay thaytʼayanïna, ukhamatwa umax chikantxäna. Phisqa phaxsitxa mä qullu pataruw arkax saytʼäna. Walja urunakaw ukatxa pasxäna, arka manqhatxa uñtapxänwa kunjamsa jachʼa qullunakax uñstxäna ukanaka. Umax jukʼat jukʼat chikantaskakïnwa.

Ukatxa Noé chachax cuervo sat mä chʼiyar jamachʼi khitäna. Uka jamachʼix muytanisinxa kuttʼanxänwa, kunattix janiw kawkinsa jakañax jupatak utjkänti. Sapa kutiw ukham jaläna, ukat jan kawkins jakañ utjipanxa arka patxaruw kuttʼanxäna.

Noé chachaxa, wañantxpachati uk yatiñwa munäna, ukatwa mä paloma khitarakïna. Palomax kuttʼanxarakikïnwa, janipï kawkjansa jakañjamäkantixa. Ukat Noé chachax wasitampiw paloma khitäna, ukatxa palomax olivo laphis achtʼasitaw kuttʼanïna. Umax wañantxataynawa. Noé chachax wasitampiw palomarux khitäna, akampix kimsa kutiw khitxäna, palomax janiw kuttʼanxänti, kunattix jakañjamäxänwa.

Jichhax Noé tataruw Diosax arxayäna. Akham sänwa: ‘Arkat mistxma, familiamampi, animalanakampi’ sasa. Mara jilaw arkankapxatayna. ¡Amuytʼasim künja kusisitaki jikxatasipxänxa, jakasipkänwa, wasitampiw uraqir purxapxäna!