¿AKA tawaq uñtʼtati? Rebeca satawa. Uka tatax Isaac satarakiwa. Isaacan warmipäniw uka tawaquxa. ¿Kunjamatsa?

Abraham tataxa, mä suma warmi yuqapatakix munäna. Janiw munkänti Canaán markankir warmimpi casarasiñapxa, kunattix uka jaqinakax yaqha diosanakaruw yupaychapxäna. Ukatwa Abrahamax yanapiripar jawsasax akham säna: ‘Harán markar sarasin familiaranakaj taypit mä warmi yuqajataki irptanirapita’ sasa.

Ukaratpachawa Abrahaman yanapiripaxa tunka camellompi wali jaya Harán uraqkam saräna. Abrahaman familiaranakapax utjasipkäna uka uraqir purisaxa, mä phuju jakʼaruw samartʼäna. Niyaw jaypʼuntxäna, walja tawaqunakarakiw uka markat um waytasir mistunipxäna. Ukatxa, Abrahaman yanapiripax Jehová Diosat akham sasaw mayisïna: ‘Khiti tawaqutï um churitani ukhamaraki camellonakajarus umtʼayarakini uka tawaquruw Isaacan warmipäñapataki jumax ajllïta’ sasa.

Ukatxa, Rebeca sata tawaquw um waytir jutäna. Uka tawaqur um waxtʼit säna ukhaxa, mäkiw um churäna. Ukatxa umat wañjata camellonakarusa ukhamarakiw umarayäna. Camellonakax wal umapxi, ukhamaxa uma churasax wal qarpachänxa.

Rebecax um churañ tukuyxäna ukhaxa, Abrahaman yanapiripaxa, khitin phuchapätasa sasaw jisktʼäna. Ukatxa utamar aka arumax qurpachtʼitasmati sasarakiw jisktʼäna. Rebecax akham sänwa: ‘Betuelan phuchapätwa, utajanxa utjiw mä chiqax qurpachasiñatakixa’ sasa. Abrahaman yanapiripaxa, Betuelax khitïnsa ukxa yatïnwa, Abrahaman Nacor sat jilapan yuqapänwa. Abrahaman familiaranakapan utapar puritapatwa Jehová Diosar qunqurtʼasisin yusparäna.

Abrahaman yanapiripaxa kunarus sartʼäna ukxa uka arumpachaw Betuel tatarusa Labán sata Rebecan jilaparusa yatiyänxa. Jupanakasti Rebecax Isaacampi casarasirix saraspaw sapxänxa. Rebecax jisktʼataxa, ¿kamsänsa? Jïsa, saräw sänwa. Ukatwa, qhipürpachax camellot Canaán uraqiru kuttʼxapxäna.

Arumaw purinipxäna. Ukat Rebecax mä waynaruw pampan sarnaqaskir uñji. Isaacänwa. Isaacax wal kusisïna Rebecar uñjasaxa. Sara mamitapax niy kimsa marakiw jiwataskäna, ukatwa jupax wali llakita sarnaqaskäna. Ukampisa jichhax Rebecaruw wal munasïna, ukat wasitampiw kusisitäxäna.