WALJA maranakaw pasxäna. Noé tatan wawanakapax walja wawanakanïxapxänwa. Wawanakapas jilarxasin wawanakanïxapxarakïnwa. Aka Uraqin jaqix wal mirantxäna.

Ukapachax Nimrod sata mä jaqiw utjäna, Noé tatan yuqapan allchhipänwa. Jupax wali qhurünwa, jaqinaka, animalanaka katusin jiwayirïna. Nimrodax jaqinak apnaqañatakiw apnaqirjam uttʼasirakïna. Diosax janiw Nimrodar munaskänti.

Khä tiemponxa mä aruki parlasipxirïna. Nimrodax uka jaqinakar apnaqañatakixa mäwjarukiw tantachañ munäna. ¿Ukatakix kuns luräna uka yattati? Jachʼa torreni mä jachʼa marka lurapxam sataynawa. Aka manqhan ladrillonak lurasipki.

Jachʼa torre lurapkatayna ukaxa Diosatakix janiw walïkänti. Diosax janiw mayawjan jakasipxañap munkänti jan ukasti aka uraqpachar phuqantapxañapwa munäna. Ukampisa jupanakax akham sapxänwa: ‘¡Jina! Mä jachʼa marka saytʼayañäni, ukhamarak torrepas alaxpachar purirkama lurapxañäni. ¡Ukat wali uñtʼatäñäniwa!’ sasa. Diosar jachʼañchañat sipansa jupanakakiw jachʼañchayasiñ munapxänxa.

Ukatwa uka torre jan tukuyapxañapatakixa Diosax jarkʼtʼäna. ¿Kunjamsa uka luräwi jarkʼtʼpachäna uk yattati? Nayrax mä arukxay parlasipxirïchïnxa, ukampis mayak jaqinakax yaqha arunak parlxapxäna. Janiw kuna parlatanakapsa jupanakkam amuyasxapxänti. Ukatwa uka markaxa Babel jan ukax Babilonia sataxa, ukaxa ‘mayjtʼayaña’ sañwa muni.

Ukhamax Babel markat sarxapxänwa. Pachpa aru parlirinakkamawa tantachasisin yaqha chiqanakar sarxapxäna.