JOSEYAX 17 maranikïskänwa Egipto markar apapkäna ukhaxa. Ukat Potifar sat jaqiruw aljapxäna. Uka Potifar chachasti Faraón sata Egipto apnaqiritakiw irnaqäna.

Joseyax uywiripatakix taqi chuymaw kuns luräna. Ukatwa jilsxän ukhaxa, Potifarax utap uñjirit uttʼayxäna. ¿Jichhax kunatsa Joseyax katuntataxa? Potifaran warmipan juchapatwa.

Joseyax jilsxän ukhaxa suma uñtani waynänwa, ukatwa Potifaran warmipax jupamp ikintasiñ munäna. Ukampis Joseyax janiw munkänti, kunattix uk lurañax jan walïtap yatïnwa. Jan munipanxa uka warmix wal thithïna. Ukatwa, chachapax utar purinïn ukhaxa, akham sasa kʼarisïna: ‘¡Uka jan wali waynax nayamp ikintasiñ muni!’ sasa. Potifarax warmipar istʼasaxa Joseyatakix wal colerasïna. Ukatwa carcelar katuntayäna.

Carcel uñjirix Joseyan suma jaqïtapwa uñjäna. Ukatwa carcelankiri jaqinak uñjirit uchäna. Ukatxa, vino askatiripampi ukat tʼantʼa luriripampiw Faraonar colerayapxäna, ukatwa carcelar katuntayäna. Mä arumaxa, uka jaqinakaw samkasipxäna, ukampis kun sañs munpacha uk janiw yatipkänti. Ukatwa Joseyax qhipüruxa: ‘Samkanakam yatiyapxita’ sänxa. Joseyasti Diosan yanaptʼapampiwa uka samkanak qhanañchäna.

Vino askatirirusti Joseyax akham sänwa: ‘Kimsürut mistxäta, wasitampiw Faraonar vino askatxäta’ sasa. Ukatxa sarakïnwa: ‘Mistusaxa, Faraonar nayat yatiyätawa, carcelat mistuñ yanaptʼita’ sasa. Ukampis tʼantʼa luririrux Joseyax akham sarakïnwa: ‘Akat kimsürutsti Faraonax jiwayätamwa’ sasa.

Kunjamtï Joseyax siskäna ukhamaw kimsürutxa phuqasïna. Tʼantʼa luririruxa Faraonax jiwayänwa. Ukat vino askatirirusti carcelat apsxänwa ukat wasitampiw Faraonar vino askatxäna. ¡Ukampis janiw Joseyat amtaskänti! Janiw Faraonarux yatiykänti, Joseyax carcelankaskakïnwa.