¡KUNAS akan pasaski! Wila Lamar Qut tuqir thujru aytʼaski ukaxa Moisesawa. Jupamp chika quta lakankxapxi uka jaqinakax israelitanakawa. Ukampis Faraonampi soldadonakapampix uman jiwarasipki. Kunjamatsa ukax pasatayna uk yatxatañäni.

Kunjamtï yatiqktanxa, tunkïr jan waltʼäwi pasxipanxa Faraonax israelitanakarux Egiptot khitsunxänwa. Mä 600.000 israelit chachanakaw mistsxäna, warminakasa, wawanakasa ukhamaraki. Ukatxa, Jehová Diosar iyawsir jaqinakaw israelitanakamp chika mistxapxarakïna. Uwijanakas cabranakas vacanakapas antʼataw mistxapxäna.

Janïr mistkasaxa, israelitanakax isinaka, qurit qullqit luratanakampwa egipcionakat mayipxatayna. Egipcionakax tunkïr jan waltʼäw uñjasax wal axsarapxäna. Ukhamasti kuntï israelitanakax mayipkän ukanakwa churapxäna.

Mä qhawqha urutxa Wila Lamar Qutaruw israelitanakax puripxäna. Ukawjaruw samarapxäna. Ukäñkamasti, Faraonampi markachirinakapampixa, janik israelitanakar khitkasänti sasaw amtasipxäna. ‘¡Irnaqirinakasaw sarxapxi, kamacharakiñäni!’ sapxänwa.

Ukhamasti Faraonax wasitampiw mayjtʼxäna. Ukaratpachaw nuwasiñ carropsa ukhamaraki soldadonakapsa wakichäna. Ukat 600 wali suma carronakampi ukat taqpach Egipto carronakampiw israelitanakan qhipap arkapxäna.

Ukatxa, israelitanakax Faraonampir soldadonakampir uñjasaxa wal sustjasipxäna. Janiw kawkir qhispiñjamäkänsa. Mä tuqitxa Wila Lamar Qutänwa, mayni tuqitsti egipcionakarakiw jutäna. Ukampisa Jehová Diosax markaparux mä qinayampiw egipcionakat jarkʼaqäna. Egipcionakax janiw kunjamat israelitanakar jakʼachasiñsa yatipkänti.

Jichhax Jehová Diosax Wila Lamar Quta tuqir thujrum aytam sasaw Moisesar säna. Kunapachatï Moisesax iyaw sas ukham luräna ukhaxa, Jehová Diosaw inti jalsu tuqit jachʼa thay sartayäna. Ukat uka quta umsti payaruw jaljtayäna, aksat uksat umax saytʼäna.

Ukatsti israelitanakax waña uraqnamwa lamar quta tayp makatapxäna. Walja tiempow munaspachäna waranq waranqa jaqinaka ukhamaraki animalanakapan makatapxañapatakixa. Ukat jaya qhipatwa egipcionakax israelitanakar uñjapxäna, ukat qutaruw arkantapxäna.

Ukham arkantapxatapatxa, Diosax carronakapan llantanakapwa jalsurayäna. Egipcionakax walpun sustjasipxäna ukat akham sasaw warartatapxäna: ‘Jehová Diosaw jupanakat saytʼani. ¡Kuttʼxapxañäni!’ sasa. Ukampis janiw tiempox utjxänti.

Jehová Diosax Moisesarux thujrum Wila Lamar Quta tuqir aytam sänwa, aka qhipäxankki uka dibujonwa Moisesax thujrup aytaski. Ukatxa pirqjam saytʼat umanakax kutxattxänwa, egipcionakampi carronakapampiruw umax chhaqtayäna. Egipcionakax taqiniw qutar mantanipxäna, ukhamasti, ¡janiw ni mä egipcios qhispkänti!

¡Ukham qhispisaxa Diosan markapax wal kusisïna! Chachanakax Jehová Diosar yuspärañ qʼuchunakwa qʼuchuntapxäna, akham sasa: ‘Jehová Diosaw atipixa. Caballonakaparusa jaqinakaparusa qutaruw jiwarayi’ sasa. Moisesan María kullakapaxa, chhulluchhullu (pandereta) apsusaw tukantäna, ukat mayni warminakasti juparuw arktʼayapxäna. Thuqtʼasisaw akham warurtʼapxäna: ‘Jehová Diosaw atipixa. Caballonakaparusa jaqinakaparusa qutaruw jiwarayi’ sasa.