¿AKA lawar muyuntat jachʼa asirux chiqa asirüpachati? Janiwa. Broncet luratakiwa. Jehová Diosaw Moisesar uk lurayatayna, jaqinakax uka jachʼa asirur uñtasin jan jiwapxañapataki. Ukampis uraqinkaski ukanakax chiqa asirunakawa. Jaqinakar achjasin usuntayi. ¿Kunatsa uka asirunakax utjäna uk yattati?

Kunattix Diosataki Moisesatakiw israelitanakax arusipxäna. Akham sasa: ‘¿Kunatsa jumanakax Egiptot irpsunipxista, aka pampan jiwarapxañajatakiti? Janiw umas manqʼas utjkiti. Maná manqʼampix amjayasxapxtwa’ sasa.

Ukampis manäx wali suma manqʼänwa. Jehová Diosaw uk churäna. Umsa churäna, jupanak laykuw ukham milagronak luräna. Ukampis ukanak katuqkasas israelitanakax janiw Diosarux yuspärapkänti. Ukatwa Jehová Diosax jiwayir asirunak apayanïna. Uka asirunakasti jupanakaruw achjäna, ukat waljaniw jiwarapxäna.

Ukatwa Moisesar sartʼasax akham sapxäna: ‘Jehová Dios contra parlasasa, juma contra parlasasa, juchachasipxtwa. Diosaruy mayim aka asirunak apaqxañapataki’ sasa.

Ukatwa Moisesax jupanak layku mayïna. Ukatwa Jehová Diosax mä jachʼa asiru broncet luram sänxa. Ukat lawaruw saytʼayäta, asirun achjatax ukar uñtañapataki sasa. Moisesax Diosan aruparjamaw luräna. Asirun achjatanakax broncet lurat asiruruw uñtapxäna ukatxa waliptxapxänwa.

¿Akat kunsa yatiqsna? Taqiniw asirun achjat israelitanakjamätanxa. Taqiniw chuymankiptapxi, usuntapxi, jiwapxi. ¿Kunatsa? Adán nayrïr chachampi Eva nayrïr warmimpiw Jehová Diosat jithiqtapxatayna, ukan wawanakapätanwa ukatwa ukhamar purtʼastanxa. Ukampis Jehová Diosax wiñay jakañasatakiw mä thak uñachtʼayistu.

Jehová Diosax Jesucristo Yuqaparuw aka Uraqir khitanïna. Janis suma jaqïkaspa ukham amuyasinwa Jesusarux mä lawar jiwayapxäna. Ukampis Jehová Diosaw Jesusarux jiwasar qhispiyañatak khitanïna. Ukat juparutï uñtañäni ukat arkañäni ukhaxa, wiñayaw jakasiñäni. Mayanwa wiñay jakañ tuqit jukʼampi yatxataskañäni.