ISRAEL markampi nuwasiñatakiw Canaanankir markanakax wal wakichasipxäna. Atipapxañäniw sapxänwa. Ukampis Gabaón markankirinakax atipapxistaniw kunattix Diosaw israelitanakarux yanapi, Diosampis nuwasksna ukhamäspawa sasaw sapxäna. Ukhamaxa, ¿gabaonitanakax kamachapxänsa uk yattati?

Wali jayansa jakassna ukham sarañäni sasaw amtapxäna. Ukhamasti thantha isinakampi thantha wiskhunakampi uchantasisaw sarapxäna. Asnonakapar thantha costalanak khumxatawayapxäna, qurwantat tʼantʼanak apxarusiwayapxäna. Ukat Josué tatax utjaskäna ukaru purisax akham sapxänwa: ‘Nanakax wali jayat jutapxta. Jehová Diosaman jachʼa chʼamanïtap yatipxtwa. Kuntï Egipton jumanak layku lurkatayna uksa yatipxaraktwa. Ukatwa nanakan jilïrinakajax sapxitu: “Sarapxma, thakitak manqʼa apasipxam ukat akham sapxätawa: ‘Nanakasti jumanakan yanapirinakamäxapxäwa, jichhasti sumankañaruya mantañani jan nuwasiñataki’ sasa”. Jumanakax uñjapxam jutkäwinwa isinakajas thantsusxi, tʼantʼas qurwantxi’ sasa.

Josué tatampi mayni pʼiqtʼirinakampixa chiqäpachaw sasaw sapxäna. Ukatwa, janiw nuwaskañäniti sas amtawayapxäna. Ukampis gabaonitanakax jakʼan jakasipkäna, ukxa kimsürut amuyasipxäna.

‘¿Kunatsa wali jayat jutapxta sapxista?’ sasaw Josué tatax jisktʼäna.

Gabaonitanakax akham sapxänwa: ‘Nanakasti yatipxtwa kuntix jumanakan Diosamax Canaán uraq katuqapxäta sawaykatayna ukxa. Jiwayapxistaniw sasaw sapxta ukatwa jutapxtxa’ sasa. Ukampis israelitanakax arsutaparjamaw phuqapxäna, janiw gabaonitanakar jiwarayapkänti. Jan ukasti, yanapirinakaparuw tukuyapxäna.

Jerusalén apnaqirixa wal colerasïna uk yatisaxa. Ukatwa yaqha pusi apnaqirinakar akham säna: ‘Gabaón markampi nuwasiñ yanaptʼapxita’ sasa. Ukat phisqanpachaw Gabaón contra saytʼapxäna. ¿Gabaonitanakax walikti lurasipkpachäna Israel markampi sumar mantasaxa? Uk yatxataskakiñäni.