INASA phuqapunïwa sasa kuns arsurïsta ukat phuqañaxa chʼamäxirïchi. Ukaw aka jaqir pasatayna, ukatwa wali llakitäski. Jefté satawa, Israel markankir mä taripiriwa.

Jeftex jakkäna ukhaxa israelitanakaxa janiwa Jehová Diosaru yupaychxapxänti. Jan walinak lurapxäna. Ukhamaxa janiw amonitanakat Diosax jarkʼaqkxänti. Ukatwa akham sasa Jehová Diosar artʼasipxäna: ‘Juma contraw nanakax juchachasipxta. ¡Qhispiyapxita!’ sasa.

Jan wal lurapxatapatxa wal llakisipxäna. Ukxa wasitampi Jehová Diosar yupaychasaw uñachtʼayapxäna. Ukatwa Jehová Diosax mayamp yanaptʼäna.

Israelitanakaxa Jefté chacharuw amonitanakampi nuwasiñapataki ajllipxäna. Jeftexa Jehová Diosan yanaptʼapwa nuwasiñatakix wal munäna. Ukatwa Jehová Diosar akham säna: ‘Jumatix atipayitätaxa, kunapachatï nuwasïwit kuttʼanxä ukhaxa, khititï nayar katuqiri utajat nayraqata mistsunkani uka katuqiriruw churämaxa’ sasa.

Jehová Diosax iyaw sänwa Jeften arsutapxa, ukat atipjayänwa. Jeftexa utaparu kuttʼxäna ukhaxa, ¿khitisa katuqiri nayraqat mistunpachäna uk yattati? Jeften sapa imill wawapawa. Ukat akham sasaw Jeftex jachaqtʼasïna: ‘¡Ay, imill wawa, wal llakthapisiyista! ¡Nayax mä arsüwi Diosar lurta, jichhasti phuqañajawa!’ sasa.

Uka arsüwita yatxatasax Jeften phuchapaxa wal llaktʼasirakïna, awkipsa masinakapsa jaytjawayañapänwa. Ukat aksarux Silonkiri yupaychañ utan irnaqir sarxañapänwa. Ukat awkiparuxa akham sänwa: ‘Kuntï Jehová Diosaru arskta ukxa phuqañamawa’ sasa.

Ukhamasti Jeften phuchapaxa Siloruw sarxäna, Diosar yupaychañ utanwa jiwañapkam Jehová Diosaru luqtäna. Sapa maraw Israel warminakaxa pusüru jupampi parltʼiri qamartʼiri sarapxirïna. Jehová Diosan wali suma luqtiripänwa, ukatwa jaqinakaxa jupar wal munasipxäna.