WALI chʼamani jaqiw utjäna, ¿uka jaqin sutip yattati? Israel markan mä taripirïnwa, Sansón satänwa. Jehová Diosaw Sansonar chʼamap churäna. Janïra Sansonaxa utjkäna ukhaw Jehová Diosaxa taykapar akham säna: ‘Niyawa mä wawanïyäta. Jupaw Israel markxa filisteonakat qhispiyani’ sasa.

Filisteonakax Canaananwa jakapxarakïna, wali qhuru jaqinakänwa. Walja soldadonakanipxänwa, israelitanakar wal tʼaqhisiyapxäna. Mä uruxa Sansonax Filistea saraskäna, ukat mayak mä leonax warartʼasis thakir misttanïna. Sansonax amparampikiw leonar jiwayäna. Ukatxa walja qhuru filisteonakaruw jiwarayäna.

Dalila sata mä warmiruwa Sansonax munäna. Ukat filisteonakan jilïrinakapaxa, 1.100 qullqi sapa maynix churapxäma kunjamatsa Sansonax chʼamani uk sapxitäta ukhaxa sasaw Dalilar sapxäna. Dalilax qullq munäna. Janiwa chiqpachapuni Sansonarusa, Diosan markaparusa munaskänti. Kunatsa wali chʼamanïta sasaw Dalilaxa Sansonar jisktʼäna.

Dalilaxa arsuyañkamapuniwa jisktʼäna. Ukat Sansonax akham säna: ‘Janiw khitis ñikʼut mururkituti. Nayasti asutpach mä nazareo jaqjama Diosar luqtatätwa. Ukampis ñikʼut mururapxitaspaxa janiw chʼamanïxiristti’ sasa.

Dalilaxa uk istʼasaxa jarphiparuw iktʼayäna. Ukatxa mä tata irpantasinwa ñikʼut mururayäna. Sansonax sarthapïna ukhaxa janiw chʼamanïxänti. Ukat filisteonakaxa mantanisin katuntapxäna. Nayranakap Sansonat apsupxäna, tʼaqhisiyañatakiw apapxäna.

Mä uruxa Dagón sata diosaparu yupaychañatakiwa filisteonakax mä jachʼa fiesta fiestachapxäna, ukatxa Sansonaruw irpsunipxi jupat larusiñataki. Ukäñkamaxa Sansonan ñikʼutapaxa jilsxänwa. Sansonaruxa mä wawaw amparat irpnaqäna, ukat uka wawaruwa akham säna: ‘Irpita uta machonanakat katthapisiñ munta’ sasa. Ukatxa Sansonaxa Jehová Diosatwa chʼam mayisïna, ukat uta katxäsirinakat kattʼasi. Ukat mayak jachʼat artʼasïna akham sasa: ‘Filisteonakamp chika jiwayita’ sasa. Uka fiestanxa 3.000 filisteonakaw ukankasipkäna, Sansonax taqi chʼamapampi purapar nuktʼän ukhaxa taqi uka jan wali jaqinakaruw utax allxattäna.