JERUSALENAN Davitax apnaqxän ukhaxa, Jehová Diosax walja nuwasïwinakan atipjañ yanaptʼäna. Jehová Diosaw israelitanakarux Canaán churapxäma sataynaxa. Jichhasti, Jehová Diosan yanaptʼapampixa Canaanax jupanakankxänwa.

Davitax wali sum apnaqäna. Jehová Diosarus munasïnwa. Ukatwa Jerusalenan apnaqxasaxa, Jehová Diosampi arustʼäwir mantat arkxa Jerusalenar apxäna. Diosatak mä ut lurañ munäna uka utar arka uchañataki.

Mä qhawqha maratsti, Davitax jachʼa jucharuw purtʼasïna. Jaqit apaqañax juchawa, ukxa yatiskänwa. Ukampis mä arumaxa, apnaqirinakan utap patxatwa manqha tuqir uñtasaxa mä suma warm uñjäna. Betsabé satänwa, ukat chachapax Urías satänwa Davitan soldadopänwa.

Davitax wal Betsaberux munäna ukatwa uka utar irptayanïna. Chachapax nuwasiriw jay saraskäna. Ukat Davitax Betsabempiw ikintasïna ukat usurïptayäna. Uk yatisax Davitax wal llakisïna ukatwa Uriasar jiwayapxañapatakixa, soldadonakapar pʼiqtʼir Joab sat tatarux akham säna: Uriasax nayr sarañapaw sasa. Jiwxipansti Davitax Betsabempiw casarasxarakïna.

Jehová Diosax Davitatakix wal colerasïna. Natán sat profetaparuw Davitan juchanakap qhanañchañataki khitäna. Davitampi Natanampiw akankasipki. Davitax jucha luratapatxa wal amtasïna, ukatwa Jehová Diosax jan jiwaykänti. Ukampis akham sänwa: ‘Kunatsa ukham jan walinakxa lurtaxa, utamanxa jan waltʼäwinakaw utjani’ sasa. ¡Davitax sinti jan waltʼäwinakanwa uñjasïna!

Nayraqatxa, Betsaben wawapaw jiwxäna. Ukatxa Davitan Amnón sat jilïr yuqapaw Tamar sat kullakapampi munkir jan munkir ikintasïna. Ukat colerasisaw Davitan Absalón sat mayni yuqapax Amnonar jiwayäna. Ukatxa, Absalonarakiw apnaqirïñatak jaqinakampi munayasïna, ukat juparuw apnaqirit uttʼayapxäna. Ukat Davitax Absalonampiw nuwasiñar puripxäna, ukanwa Absalonax jiwxäna. Jïsa, Davitax walja jan waltʼäwinakaruw purtʼasïna.

Ukäñkamasti, Betsabex Salomón sata yaqha wawanïnwa. Ukat Davitax chuymanïxäna, usutäxäna ukhaxa, Adonías yuqapaw apnaqirïñ munäna. Davitax Sadoc sat sacerdotempiw Salomonar pʼiqipat aceitempi warxatayäna ukhamata Salomonaw apnaqirïni sasa uñachtʼayañataki. Ukat mä qhawqharuxa 70 maraniw Davitax jiwxäna. 40 maraw apnaqawayäna. Ukat Salomonaw apnaqirïxäna.