SAMUEL tatar uñtam khä jaqin pʼiqiparuw aceitempi warxataski. Ukhamwa nayrax lurapxirïna mä jaqiru apnaqirjam ajlliñatakixa. Jehová Diosax Saular aceitempi pʼiqit warxatam sänwa Samueluruxa. Wali suma aceitïnwa.

Saulax janiw sum apnaqkiristi sasaw amuyasïna. Ukat akham Samuelur säna: ‘Nayax Benjamín tribunkirikïtwa, ukax Israel markan taqi tribunakat sipansa sinti jiskʼakiwa. ¿Kunatarak apnaqätaw sistasti?’ sasa. Janiw jachʼa jachʼa tukuñ munkänti ni aytatäñs munkänti ukatwa Jehová Diosax Saular munasïna. Ukatwa apnaqirïñapatak ajllïna.

Ukampis Saulax janiw pisinkirïkänsa jiskʼa jaqïkänsa. Familiapax qamirïnwa, jupas suma uñtan jachʼa jaqïnwa. ¡Israelitanakarux niya kimsa chhiy jilakipänxa! Saulax wali tʼijurïnwa, wali chʼaman jaqïnwa. Saular apnaqirïñapatak Jehová Diosax ajllïna ukhaxa jaqinakax wal kusisipxäna. Taqiniw apnaqiriru ‘¡Jallälla!’ sapxäna.

Israelitanakar uñisirinakaxa wakichrantasisipkakïnwa. Saular apnaqirjam uttʼayxapkäna uka qhipatxa, amonitanakaw jupanak contra jutapxäna. Ukampis Saulax walja soldadonak tantachthapisax amonitanakar atipjänwa. Saúl apnaqipanxa markpachaw wal kusisipxäna.

Walja maranakaw pasxäna, Saulampixa israelitanakax walja nuwasïwinakan atipapxäna. Ukat Saulax Jonatán sat jan axsartʼir yuqanïnwa. Jonatanax walja nuwasïwinak atipañwa yanaptʼäna. Ukampis filisteonakax israelitanakar uñisisipkakïnwa. Mä uruxa, waranq waranqa filisteonakaw Israel contra jutapxäna.

Ukat Samuelux suyitätaw sasaw Saular säna, nayaw jutasin Jehová Diosarux mä ofrenda luqtä sasa. Ukampis Samuelux janiw jankʼas purinkänti. Filisteonakax chhuktʼanipxaspaw sasaw Saulax axsarayasïna, ukatwa, jupapachpa ofrenda luqtañxa nayrtʼäna. Kunapachatï Samuelux purinxäna ukhaxa, janiw jumax istʼasirïktati sasaw Saular Samuelux säna. ‘Israel marka apnaqañapatakixa Jehová Diosax yaqha chacha ajllini’ sasa.

Ukatxa wasitampiw Saulax jan istʼaskänti. Ukat Samuelux akham sänwa: ‘Jehová Diosatakix jupar istʼañaw likʼi uwijanak luqtañat sipansa askixa. Kunjamtï arunakapar jan istʼktaxa, jupax reyïñatxa apaqätamwa’ sasa.

Aka sarnaqäwitxa suma yatichäw yatiqsnaxa. Wali wakisiripuniw Jehová Diosar sapüru istʼañaxa. Ukat suma jaqix mayjtʼaspawa, kunjamtï Saulax suma jaqïkasin jan wali jaqiptän ukhama. ¡Jiwasax janipun ukhamañäniti!, ¿janichä?