Waranq waranq jaqinakaw Babiloniat Jerusalenar sarxapxäna. Jerusalenar purisaxa ina chʼusaki, laqayak jikxatapxäna. Janiw khitis ukan jakkänti. Ukhamasti israelitanakax wasitamp utachapxañapänwa.

Nayraqatxa mä altarwa lursupxäna. Ukanwa Jehová Diosatak ofrenda jan ukax waxtʼa luqtapxirïna. Ukat mä qhawqha phaxsi pasatatwa Diosan utap utachañ qalltapxäna. Ukampis Jerusalén jakʼa yaqha markanakaw jan utachapxañapatakix axsarayapxäna. Ukatxa Persia yaqha apnaqirimpiw mä kamach apsuyapxäna jan utachapxañapataki.

Walja maranakaw pasxäna. Babiloniat Jerusalenar purxapxäna ukapachatxa 17 maraw saraqxäna. Diosax Hageo sat Zacarías sat profetanakapwa ‘wasitampi utachasipkakiñäni’ sañapatakix khitäna. Jaqinakax Diosar atinisisaxa iyaw sasaw lurañ qalltapxäna, jan lurapxämti sas qillqat kamachix utjaskchïnsa lurasipkakïnwa.

Ukatwa, Tatnai sat persa gobernadorax israelitanakar akham säna: ¿Kunatsa aka uta wasitat lurapxta? sasa. Babilonia Ciro sat apnaqiriw akham sapxitu: ‘Jehová Diosaman utapa luriri Jerusalén markar sarapxam’ sasa.

Tatnai tataxa Babiloniaruw mä carta apayäna, jiwatäxi uka Ciro apnaqirix ukhampunti sispachän uk yatxatañataki. Ukat Persiankir apnaqirixa jankʼakiw carta apayanirakïna. Ukansti ukhamäskapuniw sänwa. Akham sasaw qillqanïna: ‘Diosapan utapa lurañxa jan israelitanakar jarkʼapxamti. Yanaptʼapxam’ sasa. Pusi maratwa Diosan utap lurañxa tukuyapxäna, ukat wal israelitanakax kusisipxäna.

Ukat walja maranakaw pasxäna. Diosan utapa tukuyxapxäna uka maratxa 48 maraw saraqxäna. Jerusalén markan utjasiri jaqinakax pisin sarnaqapxäna, markasa Diosan utapasa janiw sumäkänti. Diosan utapax askichañawa sas parlirwa Esdras sat israelitax istʼäna. ¿Ukat kamachpachänsa uk yattati?

Persia marka Artajerjes sat apnaqiri uñjiriw saräna, ukat uka apnaqirixa suma jaqïnwa ukatwa walja waxtʼäwinak churaniwayäna Jerusalenar apañapataki. Babiloniankaskir israelitanakaruw yanaptʼapxita sas Esdrasax säna, ukat 6.000 jaqinakaw sarapxañäni sapxäna. Qullqi, quri, ukat suma yänakas aptʼasitaw sarapxäna.

Ukampis thakin jan wali jaqinakaw utjäna ukatwa Esdrasax llakisïna. Uka jaqinakax qullqi quri aparasin jiwarayapxasapänwa. Ukatwa Esdrasax taqinir jawsthapïna, akan uñjaski ukhama. Ukat Jehová Diosatwa mayisipxäna Jerusalenar sumak puripxañapataki.

Jehová Diosax jan walinakat jarkʼaqänwa. Ukat pusi phaxsit Jerusalenar purintapxäna. Diosax jan walinakat jarkʼaqistaspawa, ¿janit uk aka sarnaqäwix uñachtʼaykistu?