¡UÑTAM akan wal irnaqtʼasipki! Jerusalén markan uyupwa uyuchasipki. 152 maranak nayraxa, kunapachatï Nabucodonosorax Jerusalén mark katuntkän ukhaxa, Jerusalenan uyunakap allinuqawayapxäna punkunakap phichkatawaypxäna. Ukat israelitanakax Babiloniat kuttʼanxasaxa janiw uyuchrantapkänti.

¿Jan uyunix kunjamakis jakasipxpachänxa? Axsarasaw utjasipxpachänxa. Uñisirinakapansa katuntañjamäpxpachänwa. Ukampis akankaski uka Nehemías tataw Jerusalenan uyup wasitamp uyuchañ yanaptʼäna. ¿Nehemiasax khitïpachas uk yattati?

Mardoqueompi Esterampi jakasipkäna uka Susa markatwa jutäna, Nehemiasax israelitawa. Jupax apnaqirin utapanwa irnaqäna, ukhamasti Mardoqueorusa Esterarus sum uñtʼpachäna. Ukampis Biblianxa janiw Asuero sat apnaqiri Esteran chachapatakiw irnaqäna siskiti. Asuero lantix Artajerjesaw apnaqxäna, jupatakiw Nehemiasax irnaqäna.

Amtañäni, Artajerjesax suma jaqïnwa, juparakis Esdrasarux Jerusalenar apañapataki Diosan utapa lursuñapatakix qullqxa churänxä. Esdrasax janïraw markan uyup saytʼaykänti. Ukat kunjamatsa Nehemiasax uk yanapir sarpachäna uk uñjañäni.

Artajerjesax Esdrasar Diosan utap lurañatak qullq churkäna uka maratxa 13 maraw saraqxäna. Ukat Nehemiasax Artajerjesan vino askatiripänwa. Vinox jan kunanïñapataki malltʼasinwa Nehemiasax apnaqirir vino askatirïna. Wali wakiskirïnwa apnaqiritak ukham irnaqañaxa.

Mä uruxa Nehemiasan Hanani sat jilapampi mä qhawqha israelitanakampiwa Nehemiasar uñanttʼiri sarapxäna. Kunjamas israelitanakax jakasisipkäna uk yatiyapxäna, janïraw Jerusalenas uyunïkiti sapxänwa. Nehemiasax wal llakisïna, ukat Jehová Diosaruw uka tuqit mayisïna.

Mä uruxa, Artajerjesaw Nehemiasan llakisitap amuyäna, ukat ‘¿kunatsa wali llakitäta?’ sasaw jisktʼäna. Jerusalenaw jan walinkkiti, janïraw uyunakapas saytʼayatäkiti ukaw llakisiyitu sänwa Nehemiasaxa. ‘¿Kuns jumatak luriristxa?’ sasaw apnaqirix säna.

‘Tata, Jerusalenar khitita, uyunakap saytʼayaniñajataki’ sänwa Nehemiasaxa. Artajerjesax suma jaqïnwa. Ukhamax sarmay sänwa, ukat uyuchañatak lawanak apasiñapatakiw yanaptʼäna. Jerusalenar purintäna ukat mä qhawqha urutwa markpacharu kunjam uyuchatänisa uk yatiyäna. Jupanakatakix wali askïnwa, ukatwa ‘uyuchrantañ qalltapxañäni’ sapxäna.

Israelitanakan uñisirinakapax Jerusalén uyu uñstipanxa, akham sapxänwa: ‘Makatapxañäni jiwarayanipxañäni, lurasipki ukxa saytʼayapxañäni’ sasa. Nehemiasax uk istʼasax irnaqirinakarux espadanak lanzanak lakiräna, akham sasa: ‘Jan axsarapxamti. Nuwasipxam jilat kullakanakam layku, wawanakama, warminakam layku, utanakam laykuraki’ sasa.

Janiw axsarapkänti. Arumay uruw espadas lanzas aptʼat irnaqapxäna. Ukatwa 52 urunaki uyuchañ tukuyapxäna. Ukatx janiw kuns axsarxapxänti. Nehemiasampi Esdrasampix Diosan kamachinakap yatichapxäna, ukat taqiniw kusisit jakxapxäna.

Ukampisa, janiw nayrjam utjasxapxänti. Persia mark apnaqiriw jupanakar apnaqaskäna, ukat jupatakiw israelitanakax irnaqapxäna. Ukampis Jehová Diosax mä machaq apnaqir apayanï sänwa, ukat uka apnaqiristi sumankañwa apanini sänwa. ¿Khitïpachas uka apnaqirixa? ¿Kunjamatsa aka Uraqir sumankañ apanini? Uka apnaqiritxa janiw sum yatiskänti, ukhamasti 450 maraw pasxäna. Ukhaw mä wawax utjäna. Ukasti yaqha sarnaqäwixarakiwa.