¿AKA kimsa waynitunakat amtasktati? Jïsa, Danielan wali munat masinakapawa, apnaqirin manqʼap jan manqʼañ munapkän ukanakawa. Babilonionakax Sadrac, Mesac ukat Abednego sasaw sutichapxäna. Ukampis jichhax uñtma. ¿Kunatsa mayninakjam aka jachʼa luratarux jan altʼasipkpacha? Uk yatxatañäni.

¿Jehová Diosan qillqata kamachinakapat amttati, Tunka Mandamientonaka satäkisa ukxa? Nayrïr kamachix akänwa: ‘Janiw nayat sipansa yaqha diosanakar yupaychätati’. Chʼamäkchisa uka kamachwa akan phuqasipki.

Babilonia apnaqiri Nabucodonosoraxa, taqi aytat jaqinakaruw jawsthapïna, jupan lurata diosapar altʼasipxañapataki. Ukat akham sasaw jaqinakarux säna: ‘Kunapachatï pututu, arpa, mayni tukañanakampi tuktʼasir istʼapxäta ukhaxa, altʼasisin aka lurataruw yupaychapxäta. Khititï jan altʼaskani jan yupaychkani ukasti mä pariptayat hornor jaquntatäniwa’ sasa.

Sadracampi, Mesacampi ukat Abednegompiw jan altʼasiñ munapkiti sasa Nabucodonosoraru yatiyapxäna ukhaxa, wal colerasïna. Ukat uka kimsa waynanakaruw irptayanïna. Nabucodonosorax mä kutimpiw altʼasipxam säna. Ukampis uka waynitunakax Jehová Diosaruw atinisipxäna: ‘Khitirutï nanakax yupaychapkta uka Diosaw qhispiyapxitani’ sapxänwa. ‘Janipuniw qurit lurata uka diosamarux altʼasipkiristi’ sasa.

Uk istʼasax Nabucodonosorax sint colerasïna. Mä hornow jakʼan utjäna, ukat akham sänwa: ‘¡Uka horno paqallq kuti pariptayanipxam!’ sasa. Ukat wali chʼaman soldadonakapampiwa uka kimsa waynitur ñachʼantayasin hornor jaquntayäna. Ukat hornox wali paripunïnwa ukatwa jaquntir chʼaman jaqinakax jiwarapxäna. Ukampis ¿uka hornor jaquntat kimsa waynitunakax kunjamasipkpachänsa?

Hornor uñantasax Nabucodonosorax wal sustjasïna. ‘¿Janit kimsaniruki jaquntktanxa?’ sasaw jisktʼäna.

‘Ukhamäskapuniwa’ sapxänwa yanapirinakapaxa.

‘Ninan pusi jaqinaka sarnaqaskir uñjta’ sänwa jupaxa. ‘Janiw ñachʼantatäxapxiti, ukampis janiw ninax kunsa kamachkiti. Ukat pusirïki ukasti diosäkaspas ukhamarakiwa’ sasa. Nabucodonosorax horno punkur jakʼachasisax akham sasaw artʼäna: ‘¡Sadrac! ¡Mesac! ¡Abednego! ¡Alaxpach Diosar yupaychirinaka, mistunipxam!’ sasa.

Mistunipxäna ukhaxa, jan kun kamachataw mistunipxäna, uksti taqi jaqinakaw uñjapxäna. Ukat Nabucodonosorax akham sänwa: ‘¡Sadrac, Mesac, ukat Abednego satäpki uka jaqinakan Diosapax yupaychatäpan! Jupaw angelap khitani aka yupaychirinakapar qhispiyañapataki, jupanakasti janiw yaqha diosanakar yupaychapkiti, jan ukasti Diosaparukiw yupaychapxi ukata’ sasa.

Jehová Dios saparukiw yupaychañasaxa, ¿aka sarnaqäwix janit uka tuqit wali suma uñachtʼaykistu?