AKANKASKI uka jaqix Jesusawa Olivos sat qullunkaskiwa. Jupampi chikäski uka jaqinakax apostolanakapawa. Andrés, Pedro jila sullkampi ukat Santiago, Juan jila sullkampiwa. Khurinkaski uka utaxa Jerusalenankir Diosan utapawa.

Jerusalenar Jesusax asnor latʼxatat mantankäna uka urutxa pä uruw saraqxäna. Martesäxänwa. Uka uruxa Jesusax nayraqat Diosan utaparuw saräna. Ukansti jiwayañwa sacerdotenakax yantʼapxäna. Ukampis axsarayasipxänwa, kunattix jaqinakax Jesusarux munasipxänwa.

‘¡Asirunaka, asir kasta jan wali jaqinaka!’ sasaw Jesusax uka uñisir jaqinakarux säna. Jan wali lurapxatamatxa Diosaw juchañchapxätam sasaw säna. Ukatxa, Jesusax Olivos sat qulluruw makatäna, ukatwa aka pusi apostolanakapax Jesusar jisktʼapxäna. ¿Kuna tuqitsa jisktʼapxpachäna uk yattati?

Apostolanakapax kunas jutïrin utjani ukanakatwa jisktʼapxäna. Jesusaw jan walinak aka Uraqitxa chhaqtayxani ukxa yatipxänwa. Ukampis kunapachas ukax phuqasini ukwa yatiñ munapxäna. ¿Kunapachas Jesusax Apnaqirjam jutpachäni?

Aka Uraqinkir arkirinakapax janiw Jesusar uñjapkaniti kunapachatï wasitampi kuttʼankani ukhaxa, ukxa Jesusax yatïnwa. Kunattix jupax alaxpachankaniwa. Ukatwa, jupax alaxpachan apnaqxani ukhaxa aka Uraqin kunas utjani ukanakxa apostolanakaparux qhanañchäna. ¿Kunanakas pasañapäna?

Jesusax nuwasiñanakaw utjani sänwa, walja jaqinakaw usuntata manqʼat awtjata sarnaqapxani sänwa, jaqi jiwayirinaka ukat uraq khatatinakaw utjani sarakïnwa. Ukhamarakiw Diosan apnaqäwipat suma yatiyäwinakax aka Uraqpachan yatiyasini sänwa. ¿Ukanak uñjtanti? ¡Jïsa! Ukhamasti Jesusaw alaxpachan apnaqxi. Ukat niyaw aka Uraqit jan walinakxa chhaqtayxani.