¿KHITÏPACHAS aka wawaxa uk yattati? Jïsa, Jesusawa. Mä uywa ikiñ utanwa Mariax Jesusar ususïna. Mariax uywa liwañaruw Jesusar iktʼayaski. Ukampis Mariampi Joseyampixa, ¿kunatsa uywanak chikäpacha? Janiw mä uywa ikiñ utan ususiñax askïkaspati, ¿janichä?

Jïsa, janiw askïkaspati. Ukampis ¿kunatsa ukankapxäna? Roma marka apnaqir Augusto Cesaraw mä kamach apsuyäna, sapa jaqix markapar qillqayasiri sarapxañapataki. Joseyan yurïw markapax Belén markänwa. Ukat kunapachatï Mariampi Joseyampi Belenar puripxäna ukhaxa, janiw qurpachasiñataki utax utjkänti. Ukatwa uywanakan ikiñ utaparux sarapxäna. ¡Uka uruw Mariax Jesusar ususïna! Uñtma, Jesusax walikïskiwa.

¿Jesusar uñanttʼir jutasipki uka awatirinakarux uñjtati? Uka arumax pampankasipkänwa ukhaw mä qhanax wal kʼajtäna. ¡Mä angelänwa! Awatirinakasti wal sustjasipxäna. Ukampis angelax akham sänwa: ‘¡Jan axsarapxamti! Suma yatiyäwinak apanta. Jichhüruxa, Belenanxa, Cristow yuri. ¡Jupaw markarux qhispiyani! Uywa liwañan wawa isinakampi llawuntataw ikiski’ sasa. Ukat walja angelanakaw uñstäna ukat Diosaruw jachʼañchapxäna. Ukat jankʼakiw awatirinakax Jesusar thaqtir sarapxäna, jichhaw purisipki.

¿Kunatsa Jesusax jan yaqha wawanakjamäkpachänxa? ¿Khitipunïpachas uk yattati? Amtañäni, aka libron qillqata nayrïr sarnaqäwinwa Diosan jilïr Wawapat parlayätanxa. Jupax Jehová Diosampiwa alaxpachsa aka Uraqsa ukat taqi kunsa luräna. ¡Uka jilïr wawax Jesusawa!

Jïsa, Jehová Diosaw alaxpachankir Wawapan jakäwipxa Marian purakapar uchäna. Ukat Marian purakapanwa uka wawax jilsüna, kunjamtï taqi wawanakax taykapan purakapan jilski ukhama. Ukampis uka wawax Diosan Wawapänwa. Ukat aka uywa ikiñ utanwa Belén markan Jesusax yurïna. ¿Angelanakaxa jaqinakar Jesusan yurïwipat yatiyasax kunatsa wal kusisipxäna uk amuyxtati?