PÄ ARUMAW saraqxäna, jichhax jueves arumäxänwa. Jesusampi 12 apostolanakapampixa aka altus utaruw makatanipxäna Pascuan manqʼasiñataki. Mistusk uka jaqix Judas Iscariotewa. Kunjams Jesusar katuntapxaspa uk sacerdotenakamp parliriw saraski.

Uküru nayrakiw Judasax sacerdotenakampi parlatayna akham sasa: ‘¿Jesusar katuntañ yanaptʼapxäma ukhax kunsa churapxitätaxa?’ sasa. ‘Kimsa tunka qullqi churapxäma’ sapxänwa. Jichhaxa jupanakampi jikisiriw saraski Jesusar katuntayañataki. ¡Ukax wali jachʼa juchapuniwa!, ¿janichä?

Pascua manqʼäwixa tukuyxänwa. Ukampis Jesusax yaqha manqʼäw qalltäna. Apostolanakaparuw mä tʼantʼa churäna, akham sasa: ‘Aka tʼantʼa manqʼapxma, akax nayan janchij sañwa muni, jumanak layku churatäniwa’ sasa. Ukatxa, vino astarakïna akham sasa: ‘Umtʼapxma, akax wilaj sañ muni, jumanak layku wartatäniwa’ sasa. Biblianxa uka manqʼäwixa ‘Santa Cena’ satarakiwa.

Kunapachatï Diosan angelapax egipcionakan jilïr wawanakapar jiwaraykäna ukwa israelitanakax Pascua manqʼäwinxa amtapxäna. Ukampis jichhax jupar amtapxañapwa Jesusax munäna, kunattix jupaw arkirinakap laykux jiwani. Ukatakiw aka manqʼäwix uttʼayasïna sapa mara amtasiñapataki.

‘Santa Cenan’ manqʼasinxa, Jesusax jan axsarapxamti iyawsäwinakam chʼullqiñchasipxam sänwa. Ukatxa Diosaruw qʼuchupxäna ukat mistupxäna. Inas chika pasaxchïna. ¿Kawkirus sarapxäna?