¿AKAN luqchʼukiski uka warawar uñjtati? Jerusalenat mistunipkän ukhaw uñstäna. Jupanakax Inti jalsu tuqit jutapxäna warawaranakat yatxatirinakäpxänwa. Aka jan uñtʼat warawarax mä aski jaqiruw irpkatistani sapxänwa.

Jerusalenar aka jaqinakax puripkän ukhaxa, akham sasaw jisktʼapxäna: ‘¿Kawkinkis judionakan apnaqiripäkani uka wawaxa?’ sasa. “Judionaka” sutix israelitanakan yaqha sutipawa. ‘Inti jals tuqinwa warawarap nayraqata uñjapxta, ukat jichhax yupaychiriw jutapxta’ sapxänwa uka jaqinakaxa.

Jerusalén apnaqir Herodesax uk istʼasax wal colerasïna. Janiw munkänti jupa lanti yaqha apnaqirin uttʼasiñapxa. Ukhamasti aytat sacerdotenakaruw jisktʼäna: ‘¿Kawkin yuriñapas apnaqirixa?’ sasa. Ukat jupanakax ‘Biblianxa Belén markanwa yurini siwa’ sapxänwa.

Ukhamasti Herodesax Inti jalsu tuqit jutir jaqinakaruw akham säna: ‘Uka wawar thaqtanipxma, jikxatapxäta ukhaxa yatiyanipxitätawa. Nayax yupaychir sarañ munaraktwa’ sasa. Ukampisa, ¡Herodesax wawar jiwayañwa munäna!

Ukhamasti warawarax jupanak nayraqatwa saräna Belenar puriñkama, ukat kawkjankkänti wawax uka chiqaruw saytʼäna. Kunapachatï uka jaqinakax utar mantanipkäna ukhax Mariampiru Jesús wawapampiruwa jikxatapxäna. Jesusar regalonak churapxäna. Ukat Herodesar yatiyir jan sarapxañapatakix Jehová Diosaw mä samkan arxayäna. Ukatwa yaqha thaknam markapar kuttʼxapxäna.

Herodesaxa, uka jaqinakan sarxatapat istʼasaxa, wal colerasïna. Ukat Belenan pä maranit aynachar wawanak jiwthapiyanipxam sänwa. Ukampis Jehová Diosaw uka tuqit Joseyar mä samkan yatiyäna, ukat Joseyax Egiptoruw familiapampi sarxäna. Ukat kunapachatï Joseyax Herodesan jiwatapat yatïna ukhaxa Mariampi Jesusampi irptʼasitaw Nazaretar kuttʼanxäna. Ukhamasti Jesusax Nazaretanwa jilsüna.

¿Khitiw uka jan uñtʼat warawar kʼajtayän sasmasa? Amtañäni, warawarax Jerusalenaruw nayraqat uka jaqinak irpäna. Supayaw Diosan Wawapar jiwayañ munäna, ukat Herodesax jiwayapuniniw sasaw sispachäna. Ukhamax Supayaw uka warawar kʼajtaypachäna.