CARCEL punku katxasiski uka angelar uñtma. Jesusan apostolanakaparuw irpsuski. Kunatsa carcelankapxpachäna uk yatxatañäni.

Jesusan arkirinakapar qullan ajayux churatäkäna ukatxa mä qhawqha urunakakiw saraqaskäna. Ukat akaw pasäna: mä jaypʼux Pedrompi Juanampiw Jerusalén Diosan utapar sarapxäna. Ukat uka uta punkunxa, wawatpach usuta mä suchʼu jaqiw mayjasiskäna. Sapüruw uka jaqirux apapxäna Diosan utapar mantirinakaru qullq mayjasiñataki. Pedrompiru Juanampiru uñjasaxa, mayirakikïnwa. ¿Jupanakax kamachapxänsa?

Saytʼasin uñkatapxäna. Pedrox akham sänwa: ‘Janiw qullqinïkti, ukampis utjkitu uk churäma. ¡Jesusan sutipar saytʼma, sartarakim!’ sasa. Ukat Pedrox kupi amparapat waytäna, ukat ukaratpachaw sartäna, saytʼasinsti sarnaqañwa qalltäna. Uka milagro uñjasax wal muspharapxäna ukat wal kusisipxäna.

‘Jesusar jaktayki, uka Diosan chʼamapampiw uka milagro lurapxta’ sänwa Pedroxa. Juanampi yatiyasipkäna ukhasti judionakan yupaychäwip irpirinakaw wali colerata jutapxäna. Kunattix Pedrompi Juanampix Jesusax jaktxiw sasaw yatichapxäna. Ukhamasti katuntasinwa carcelar apantapxäna.

Qhipürusti judionakan yupaychäwip irpirinakaw mä jachʼa tantachäwiru aywthapipxäna. Pedrompi Juanampiru ukat qullatäkan uka jaqimpiruw irptanipxäna. ‘¿Khitin chʼamapampis uk lurapxta?’ sasaw jisktʼapxäna.

Jesusar jaktayki uka Diosan chʼamapampiw lurapxta sänwa Pedroxa. Sacerdotenakax janiw kuns kamsirjamäpkänti, ‘uka milagrox janiw utjkänti’ sasax janiw sapkasapänti. Ukatwa, Jesusat jan jukʼampi parlapxañapataki iwxsusin khitxapxäna.

Walja urunakaw saraqxäna, apostolanakax Jesusat yatichasipkakïnwa usutanakarus qullasipkakïnwa. Uka milagronakatxa taqi chiqanwa yatisïna. Ukatwa apostolanakan qullapxañapataki walja jaqinakax Jerusalén jakʼa markanakat usutanakapar apanipxäna. Ukanak uñjasaw judionakan yupaychäwip irpirinakax uñisiñat apostolanakarux katuntayapxäna. Ukampis akaw pasäna.

Diosan angelapax arumaw carcel jistʼaräna, kunjamtï akan uñjaski ukhama. Ukat angelasti akham sänwa: ‘Diosan utapar sarapxma, purisinsti jaqinakar yatiyasipkakim’ sasa. Qhipärmanthi alwaxa, kunapachatï judionakan yupaychäwip irpirinakax apostolanakar irptanipxañapataki khitäna ukhaxa janiw carcelankxapxänti. Ukatxa Diosan utapanwa jikxatapxäna ukat Sanedrinan tantachasiñ utaparuw apapxäna.

‘Janipuniw Jesusxat yatichapxätati sarakis sapxayäsmaxa. Ukampis yatichäwinakamampiw Jerusalenxa phuqtʼayapxta’ sapxänwa judionakan yupaychäwip irpirinakaxa. Ukat apostolanakapax akham sapxänwa: ‘Diosar nayraqat apnaqirirjam istʼapxañajaw wakisi, jaqinakar sipansa’ sasa. Ukat yatiyir sarasipkakïnwa. ¡Aka sarnaqäwit wal yatiqsnaxa!