APÓSTOL Pablompi chikäski uka waynax Timoteo satawa. Timoteox Listra markanwa jakasïna. Mamapax Eunice satänwa awichapasti Loida satarakïnwa.

Pablox Listra markarux kimsa kutiw sarxäna. Niya mä mara nayraw Pablompi Bernabeyampixa Diosat yatichasax Listra markar puripxäna, jichhax Pablox Silasampiw wasitat kuttʼapxäna.

¿Pablox kamspachänsa Timoteor uk yattati? ‘¿Nanakampi chik sarañ munasmati?’ sasaw jisktʼäna. ‘Yaqha markanakan utjasir jaqinakaru yatiyiriw sarsna’ sasaw säna.

‘Jïsa sarañ muntwa, sarañäni’ sänwa Timoteoxa. Ukatwa, mä qhawqha urutxa familiapa jaytjawayasin Pablompi Silasampi chika sarxäna. Ukampis janïr saräwipat parlkasaxa, nayrax Pablox kunjamas sarnaqaskän uk uñjañäni. Damasco thakin Jesusax uñstkäna uka maratxa 17 maraw saraqxäna.

¡Amtañäni, Pabloxa, Jesusan arkirinakapar jan walinak lurañatakiw Damascor saraskäna, ukampis jupax Jesusan arkiripäxarakïnwa! Uka qhipatxa, Pablor jiwayañatakiw uñisirinakapax thaqhapxäna, ukampis arkir masinakapaw qhispiñ yanaptʼapxäna. Mä jachʼa canastatwa, uyu patnam markat anqar warkuqanipxäna.

Ukatxa, Antioquía markaruw Pablox yatiyir saräna. Ukanwa Jesusan arkirinakaparux cristianjam sutit uñtʼxapxäna. Ukatxa yaqha markanakar yatiyir sarañataki khitatäpxänwa Pablompi Bernabeyampixa. Ukatwa Timoteox jakaskän uka Listra markarux puripxänxa.

Niya mä mara pasxäna, ukhawa Pablox wasitampi Listra markar payïr saräwipana kuttʼäna. Kunapachatï Timoteox Pablompi Silasampi chika sarxäna ukhaxa, ¿kawkirus sarapxpachäna uk yattati? Mapa uñxatañäni, ukatwa sum yatiqañäni.

Nayraqatxa, jakʼankir Iconio markaruw sarapxäna, ukatxa Antioquía markaruw sarapxarakïna. Antioquiatxa Troas markaruw sarapxäna, ukat Filipos markaru, Tesalónica markaru ukat Berea markaruw sarapxarakïna. ¿Mapan Atenas markax kawkjankisa? Pablox ukanwa yatichäna. Ukatxa, mara chikataniw Corinto markankapxarakïna. Niy tukuyxasaxa Éfeso markaruw puripxarakïna. Ukatxa Cesarea markaruw jachʼa botet kuttʼxapxarakïna, ukat Pablox qurpachatäkan uka Antioquía markaruw makatapxarakïna.

Ukhamasti “suma yatiyäwinak” yatiyañ Pablor yanaptʼasaxa, ukat machaq tamanak uttʼayañ yanaptʼasaxa Timoteox wali jayanakpun saräna. Jilsxäta ukhaxa, ¿Timoteo waynat yatiqasirakïtati?