¿AKAN kuns aka lulumpi masinakapampix liyisipkpacha uk yattati? Jïsa, kuntï jumax liyiskta uka pachpa libro liyisipki... Bibliat apstʼata sarnaqäwinaka sat libro. Ukatxa “kunjamatsa wiñay jakasipxsna” uka chiqwa liyiskaraki.

¿Kunsa yatiqasipki uk yattati? Nayraqatxa ak yatiqasipki, Jehová Diosata ukhamaraki Jesús Yuqapat yatiqasinwa wiñay jakañ katuqsnaxa. Bibliax akham siwa: ‘Sapa chiqpach Diosat ukhamaraki Jesucristo Yuqapampita yatxatañamawa, ukaw wiñay jakañaru irpätamxa’ sasa.

¿Kunjamatsa Jehová Diosampita Yuqapampit yatxatsna? Mä tuqitxa, Bibliat apstʼata sarnaqäwinaka sat aka libro qalltat tukuykama liytʼasaw yatxatsna. Aka libroxa Jehová Diosatsa ukhamaraki Jesucristotsa wali sumxay yatichchistuxa. Ukatxa kunsa lurapxäna ukat kunsa lurapxani uka tuqitsa yaticharakistuwa. Ukampis yaqha librompwa liyipxañasaxa.

¿Pampankaski uka libro uñjtati? Bibliawa. Aka libron qillqatäki uka sarnaqäwinakax Bibliat apstʼatawa, ukanak Bibliat uñxattʼañatakixa yaqhanakampiw liytʼayasisma. Jehová Diosatakjam sum irnaqañatakisa wiñay jakañ katuqañatakisa Biblianwa uka tuqinakat yatichistu. Ukatwa sapüru Bibliat yatxatañaru tirañasaxa.

Ukampis janiw Jehová Diosampita Jesucristompit aliq yatxatañakïkiti. Inaw jupanak tuqita ukat kuns yatichapxi uka tuqitsa yatisksnaxa, ukampis janiw wiñay jakañ katuqsnati. ¿Kunamp lurañas wakispacha uk yattati?

Jïsa, yatiqatarjamaw sarnaqañasa. ¿Judas Iscariotet amttati? Jupax Jesusan 12 ajllit apostolanakap taypin jakhutänwa. Judasax Jehová Diosatsa Jesús tuqitsa wal yatïna. Ukampis ¿kamachänsa? Tiempompix uñisqʼaraptänwa, Jesusarux 30 qullqiruw aljantäna. Judasax janiw wiñay jakañ katuqkaniti.

¿Giezi sat jaqit 69 sarnaqäwin mä jukʼa yatxataniwaytan uk amttati? Yaqha jaqin isipa qullqip munäna. Ukanak katuntasiñatakixa kʼarisïnwa, ukatwa Jehová Diosax castigäna. Jiwasatï Diosan arunakaparjam jan sarnaqkañänixa ukhamwa castigarakistaspa.

Ukampis walja suma jaqinakaw Jehová Diosar sum yupaychapxarakïna. ¿Jupanakjamäñxay jiwasax muntanxa? ¿Janichä? Jiskʼa Samuelutwa yatiqassnaxa. Amtañäni, kunjamtï 55 sarnaqäwin uñjaniwayktanxa, niya phisqa maranïxän ukhaw Jehová Diosatak irnaqiri sarxäna, tabernáculo sat yupaychañ utaru. Ukatpï, jumax wawäskstasa, Diosatakix irnaqarakismawa, janiw wawäsktwa sañamäkiti.

Jïsa, taqiniw Jesusjam lurañ muntanxa. Kunjamtï 87 sarnaqäwin uñjktanxa, Jesusax wawäkasinsa Diosan utapan yaqhanakar alaxpach Awkipat arxayäna. Jupat yatiqasipxañäni. Jehová suma Diosasat ukat Jesucristo Yuqapat taqinir yatiyaskakiñäni. Ukhamti luraskañänixa, wiñayan wiñayapatakiw aka Uraqin machaq kusipachan jakasiñäni.