1-3. 1) Nabalan utapanjja, ¿kunatsa chachanakajj jan walin uñjasipjjäna? 2) ¿Kunsa Abigailat yatjjatañäni?

WALI llakitapuniw uywatapajj Abigailar parljjayaskäna. Uka waynajj wali sustjatapunïnwa. Pusi patak soldadonakaw uywiripan utapar taqpach chachanakaru jiwarayir sarasipkäna. ¿Kunatsa?

² Nabal chachan juchapata. Jupajj wali qhoru ukat jiskhisir jaqënwa. Jichhajj mä jan waliruw purtʼasïna, jan jaytanukusipjjeri ukat nuwasiñatak wali yatsuta soldadonakan pʼeqtʼiriparuw qallasitayna. Uk uñjasaw Nabalan mä irnaqeripajj Abigailar yatiyir saräna, inas uka uywatajj uwij awatiripächïna. Jupach aka jan waltʼäwinak askichaspa sasaw saräna. Ukampis ¿kunsa mä warmejj uka taq jaqempejj luraspäna?

³ Janïr uk yatjjatkasajj Abigailar sum uñtʼapjjañäni. ¿Abigailajj kuna kasta warmïpachänsa? ¿Kunatsa uka jan waltʼäwejj utjpachäna? ¿Ukat iyawsäwipajj kunsa yatichistu?

4. ¿Nabalajj kunjam jaqënsa?

⁴ Abigailampi Nabalampejj janiw kunans kikpäpkänti. Nabalatakejj ukham warminïñajj wali askïnwa, ukampis Abigailatakejj ukham chachanïñajj janiw walïkänti. Cheqas Nabalajj wali qamirïnwa ukatwa wali aytat jaqëkaspas ukham amuyasïna. Ukampis taqeniw Nabalarojj jan wali jaqet uñtʼapjjäna. Bibliajj jan wali jaqenakatsa parlarakchejja, Nabalatwa jukʼamp jan wal parli. Sutipajja, “jan amuytʼani” jan ukajj “jan yatiñani” sañwa muni. Naskäna ukhatpun uka suti uskupjjchïna, jan ukajj jan wali jaqëtap layku ukham sutiñchapjjchïna, ukajj janiw yatiskiti. Ukampis uka sutejj jupatakjamapunïnwa. Nabalajj “qhoru jan wali jaqënwa”. Qallasiri, machiri, ajjsarkaña ukat taqenin uñisit jaqënwa (1 Sam. 25:2, 3, 17, 21, 25).

5, 6. 1) ¿Kunjam jaqënsa Abigailajja? 2) ¿Kunatsa Abigailajj jan wali jaqemp casaraspachäna?

 ⁵ Abigailajj janiw ukhamäkänti. Sutipajja “Awkijajj Walpun Kusisi” sañwa munäna. Awk taykanakajj imill wawapan suma uñnaqtʼanïtapatjja wal kusisipjje, ukampis suma awk taykanakajja, wawanakapan yatiñanïpjjañapwa jukʼamp munapjje. Cheqas khitinakatï suma uñnaqtʼanïpki ukanakajj suma amuytʼanïñata, yatiñanïñata, jan ajjsarirïñata ukat iyawsäwinïñatsa janiw llakisipkiti. Ukampis Abigailajj janiw ukhamäkänti. Jupajj wali suma uñnaqtʼanïkchïnsa, ‘wali chʼikhïnwa’ sasaw Bibliajj qhanañchi, mä arunjja, wali amuytʼasir warmïnwa (1 Samuel 25:3 liytʼasiñapawa).

⁶ Ukham wali amuytʼasir warmïsajja, ¿kunatarak uka jan wali jaqemp casaraspachänsti? Khä tiemponakanjja awk taykaw khitimpis wawapajj casarasini uk amtapjjerïna. Abigailajj janis ukhaman jikjjataskchïnjja, inas Nabalamp casarasiñapatak awk taykapajj amuytʼayapjjchïna. Wali qamirïtapata, wali aytat jaqëtapata, jan ukajj pisin jakasipjjatap laykuw ukham lurapjjpachäna. Cheqas wali qamirïkchïnsa janiw mä suma chachäñatakejj walïkänti.

7. 1) Jaqechasiñar respetomp uñjapjjañapatakejja, ¿kunsa awk taykanakajj jan lurapjjañapäki? 2) ¿Kunjam jaqëñatakis Abigailajj wal chʼamachasïna?

⁷ Wali amuytʼan awk taykanakajj jaqechasiñar respetomp uñjapjjañapatakiw wawanakapar yatichapjje. Ukatwa qollqe layku jan jaqechasipjjañapataki, ukat janïr sinti wayn tawaqökasin maynimp uñtʼasipjjañapatak jan amtayapkiti (1 Cor. 7:36, NM). Abigailajj casaratäjjänwa, ukhamajj janiw kunas lurañjamäjjänti, ukatwa mä suma warmïñatak chʼamachasjjäna.

8. ¿Khitirus Nabalajj chuyma ustʼayäna, ukat kunatsa ukajj jan walïnjja?

⁸ Mä jachʼa jan waltʼäwiw utjäna. Nabalaw Davitan chuymap ustʼayäna. Davitajj Diosan ajllitapänwa, Samuel profetaw juparojj Saúl lanti reyjam uttʼayäna (1 Sam. 16:1, 2, 11-13). Uka qhoru Saúl reyejj Davitaruw jiwayañ munäna, ukatwa Davitajj 600 chachanakampejj wasarar imantasir jaltjjapjjäna.

9, 10. 1) Davitasa ukat jupamp chik sarir jaqenakasa, ¿kunjamanakansa jikjjatasipjjäna? 2) ¿Kunatsa Nabalajj Davitaru ukat jupamp chik sarir jaqenakarojj yuspärañapäna? (10 tʼaqan qhanañchäwip uñjjattʼäta.)

⁹ Nabal chachajj Maón sat markanwa jakasïna, ukampis Carmelo marka jakʼanwa uywanakanïna ukat inas mä qawqha oraqenakanïchïna. * Uka cheqajj Nabalan 3.000 uwijanakap awatiñatakejj  wali sumäpachänwa, paypach markanakaw uywa awatiñatak suma pastonakan qollunakanïna. Yaqha cheqanakajj waña wasar pampakïnwa. Uka marka aynach toqenjja, Parán sat wasar pampaw jikjjatasïna. Ukat inti jalsu toqerojja, qollunakan waña oraqenak pasasaw mar Salado sat qotajj jikjjatasïna. Uka qollunakan pʼiyanakapanwa Davitampi uywatanakapampejj imantasipjjäna, ukat kuntï jikjjatapkäna ukakwa manqʼasipjjäna. Nabal chachan uywa awatirinakapampis sapa kutiw jikisipjjpachäna.

¹⁰ ¿Kunjamasa Davitan servirinakapajj Nabal chachan awatirinakapar uñjapjjäna? Jupanakajj sapa kutiw uwijanak apaqasipjjasapäna, ukampis uk lurañat sipansa, Nabalan uywanakaparu ukat awatirinakaparuw jan walinakat jarkʼaqapjjäna (1 Samuel 25:15, 16 liytʼasiñapawa). Awisajj jan walinwa uka awatirinakajj jikjjatasipjjäna. Uka cheqanakanjja, uywa manqʼer animalanakaw utjäna, ukat niyakejjay Israel marka aynach toqenjja yaqha markanakajj utjchïnjja, sapa kutiw lunthatanakajj uywanakap lunthatapjjerïna. *

11, 12. 1) ¿Kunjamsa Davitajj respetompi ukat suma arunakampi Nabalar parljjayäna? 2) ¿Kunatsa Nabalan luratapajj jan walïkäna?

¹¹ Uka wasar oraqen walja chachanakar manqʼa churañajj Davitatakejj wali chʼamäpachänwa. Ukatwa mä urojj yanap mayipjjañapatak tunka chachanakar Nabalan ukar khitäna. Uwijanakat tʼawra yawiñ horasäkäna ukhajja, walja manqʼañanakwa wakichapjjerïna, ukat jaqenakas wali kusisita, wajjtʼasiri ukhamäpjjänwa, ukhaw Davitajj servirinakapar khitäna. Sum amuytʼasisa ukat suma arunakwa Nabalar parlañatakejj ajllïna. Sullkätap laykojj awkipäkaspas ukhamwa Nabalarojj uñjäna, ukat respetompiw akham säna: “Nayasti juman wawamarakïtwa” sasa. ¿Nabalajj kamspachänsa? (1 Sam. 25:5-8.)

¹² ¡Wal colerasïna! Abigailar yatiyir sarkäna uka waynan arsutaparjamajja, jan wali arunakampiw Davitan uywatanakapar toqjjäna. Jan walinak lurasina uywiripan utapat kʼithäkaspas ukhamwa Davitat parläna, ukat manqʼañsa, umsa, aychsa janiw churañ munkänti. Davitajj janis kunatak askïkaspa ukhamwa jupat sawkasïna. ¡Sauljamaw uka chachajj Davitar uñisirakpachäna! Kuntï Jehová Diosajj Davitat amuykäna uk janiw uka pä chachanakajj amuyapkänti. Diosajj wal Davitar munasïna, mä jan istʼasir uywatarjam uñjañat sipansa, Israel markan reyiparjamaw uñjäna (1 Sam. 25:10, 11, 14).

13. 1) Nabalan arunakap istʼasajja, ¿kunsa Davitajj luräna? 2) Santiago 1:20 qellqatarjamajja, ¿kuntï Davitajj amtkäna ukajj walikïskänti?

 ¹³ Nabalan jan wali luratapat Davitar yatiyapkäna ukhajja, wali colerataw akham säna: “¡Taqeni armanakam katusipjjam!” sasa. Jupajj waktʼayasisajj kawkïr juramenttï arsuwaykäna uk phoqhañatakiw 400 chachanakampi Nabalan utapankiri taqpach chachanakar jiwarayir sarapjjäna (1 Sam. 25:12, 13, 21, 22). Davitajj colerañatwa colerasiskäna, ukampis kuntï lurañ amtkäna ukajj janiw walïkänti. Uka toqet Bibliajj akham siwa: “Colerat jaqesti janiw kunatejj Diosatakejj sumäki ukjja lurkiti” sasa (Sant. 1:20). ¿Kuns Abigailajj utapankirinakar qhespiyañatakejj luräna?

14. 1) Kuna jan waltʼäwtï Nabalajj lurkäna uk askichañatakejja, ¿kunsa Abigailajj nayraqat luräna? 2) Nabalampi Abigailampejj janiw kikpäpkänti, ¿kunatsa ukham sissna? (Qhanañchäwip uñjjattʼäta.)

¹⁴ Kunjamtï qalltan yatjjataniwaytanjja, Abigailajj Nabalan jan wali luratapjja ratukiw askichañ qalltäna. Chachapajj jan khitirus istʼirïnwa, ukampis jupajj istʼir warmïnwa. Jan waltʼäwit yatiyir waynajja, janiw Nabalan ukar sarkänti. Kunjamtï jupapachpajj siskänjja, Nabalajj ‘wali qhorupunïnwa’ ukat ‘jan parljjayañjamänwa’ (1 Sam. 25:17). * Nabalajj wali mintat jaqëkaspas ukham tuküna, ukatwa jan khitirus istʼkänti. Jichhürunakansa ukham jaqenakajj waljaw utjaraki. Ukampis Abigailajj janiw ukhamäkänti, ukatwa uywatapajj jupan ukar saräna.

15, 16. 1) ¿Kunjamsa Abigailajj Proverbios librojj parlki ukham warmïtap uñachtʼayäna? 2) Abigailajj chachapar respetänwa sasajja, ¿kunatsa sissna?

¹⁵ Ukhaman uñjasisajj ‘Abigailajj jankʼakiw’ sartasïna. ¡Ratuk amuytʼasir warmïnwa! Aka sarnaqäwinjja, jankʼakiw kuns luräna sasajj pusi kutiw qhanañchasi. ¿Kunsa lurpachäna? Tʼantʼa, vino, uwij aycha, grano jampʼi, uva pasasampi ukat higo pasasampi lurat tortanakwa Davitataki ukat uywatanakapatak apäna. Utap sum uñjir warmjamajj kunatï utapan utjkäna ukanak sum yatïna. Proverbios librojj mä suma warmitwa parli, ukajj qhepatsa qellqaskchïnjja, Abigailajj uka suma warmjamänwa (Pro. 31:10-31). Ukat uywatanakaparuw nayraqat uka regalonakamp khitäna ukat jupajj qhepatwa saräna. Ukampis ‘chachaparojj janiw yatiykänti’ sasaw Bibliajj qhanañcharaki (1 Sam. 25:18, 19).

¹⁶ ¿Ukham lurasajj chachapar janit respetkpachäna? Janiw uk  sañ munkiti. Nabalajj Diosan ajllitaparuw jiskʼachäna, ukatwa jan juchani walja jaqenakajj jupan juchapat jiwarapjjañapäna. Abigailatï jan kuns lurkasapäna ukhajja, chachapjam jachʼa juchanirakisapänwa. Abigailatakejj chachapar istʼañat sipansa, Jehová Diosat jan jitheqtaña ukat Jupar istʼañaw jukʼamp wakiskirïna.

17, 18. ¿Kunjamsa Abigailajj Davitar parljjayäna, ukat chuymapar purtʼañatakejj kamsänsa?

¹⁷ Davitaru ukat uywatanakapar uñjäna ukhajja, ratukiw Abigailajj asnopat saraqasajj Davitan nayraqatapan altʼasïna (1 Sam. 25:20, 23). Altʼat chuymampiw disculptʼasïna, chachajatsa ukat utajankirinakatsa khuyaptʼayasikimaya sasaw taqe chuyma mayisïna. Kuna arunakampis Davitan chuymap llampʼuptayäna uk jichhajj amuytʼañäni.

¹⁸ Nayraqatjja, kuna juchtejj Nabalajj lurki ukajj nayjjankpan sasaw säna, ukat jumaruw pampachtʼañamatak achiktʼassma sasaw Davitar mayisïna. Ukat chachajajj kunjamäkitejj sutipajj ukarjamaw parlaraki sasaw sarakïna. Uka arunakampejja, ukham jan kunatak servir chachajar castigañajj inamayäniwa sañwa munaskpachäna. Jumajj Jehová “Tatitutaki chʼama tukutam layku” sasin Davitar siskäna ukajja, Diosan khitataparjam uñjatapwa uñachtʼayäna. Ukat ‘Jehová Tatitojj Israelan jilïripat uttʼaykarakïtamʼ sasin siskäna ukajja, Diosajj Davitar reyjam uttʼayañap yatitapwa uñachtʼayarakïna. Ukat jan juchar purimti, ukhamat chuymamajj jan mayjtʼañapataki, mä arunjja, concienciamajj jan tʼaqhesiñapataki sasaw säna (1 Samuel 25:24-31 liytʼasiñapawa). ¡Wali suma arunakapunïnwa!

19. ¿Kamsänsa Davitajj Abigailarojja, ukat kunatsa jachʼañchäna?

¹⁹ ¿Davitajj kamspachänsa? Abigailan suma regalonakap katoqasaw akham säna: “Israelan [Jehová] Tatitu Diosapasti qollanäpan. Jupaw jumaru nayampi jikisiñataki khitantam. Ukhamaraki jumas qollanarakïman suma amuytʼani warmïtamata. Cheqpachansa jumaw nayarojj jaqe jiwayañata qhespiyarakista” sasa. Ukat jan ajjsarasa jankʼak thaqher jutatapatsa jachʼañchänwa, ukat jumaw jachʼa juchar jan mantañatak yanapistajja sasaw säna. “Jichhajj jan kuna llakiniki utamar kuttawayjjam” sänwa. Ukat “arunakamjja istʼsmawa” sasaw Davitajj wali llampʼu chuymampi sarakïna (1 Sam. 25:32-35).

20, 21. 1) ¿Kunatsa Abigailan chachapan ukar kuttʼatapajj wali muspharkañajja? 2) ¿Kunjamatsa Abigailajj yatiñanïtapsa ukat jan ajjsarirïtapsa chachapamp parlkasajj uñachtʼayäna?

²⁰ Abigailajj utapar sarkasaw kuntï Davitampi parlkäna ukanakat lupʼpachäna. Diosat jan jitheqtiri Davitajj suma jaqënwa,  ukampis Nabal chachajj janiw ukhamäkänti. Janiw kunas lurañjamäjjänti, ‘Abigailajj utaparuw kuttʼanjjäna’ sasaw Bibliajj qhanañchi. Mä suma warmikïskakiñatakiw chachapan ukar kuttʼjjäna. Ukat “chachanakar jan jiwayañapatakiw Davitataki ukat uywatanakapataki mä regalo aptjja” sasaw Nabalar yatiyañapäna. Kuntï warmipajj lurkatayna ukanak yaqha jaqeruk parlir istʼasapäna ukhajja, wali jiskʼachataw Nabalajj uñjasisapäna, jan ukhamar purtʼasiñatakiw Abigailajj yatiyañ munäna. Ukampis janiw ukürpachajj yatiykänti, Nabalajj mä jachʼa manqʼäwi luräna ukat wali machantatänwa (1 Sam. 25:36).

²¹ Wali amuytʼasir warmjamajj qheparmanthi alwakamaw apjtayasiñapkam suyäna. Ukat jan ajjsarirïtapjja mayampiw uñachtʼayäna, jan umatäjjasajj chachapajj istʼasapänwa, ukampis niyakejjay qorüchïnjja wal colerasirakisapäna. Ukhampachaw kuntï lurkatayna ukanak yatiyäna. Ukampis uk istʼasajj Nabal chachajj “jan sartkiriw lurasiwayäna” (1 Sam. 25:37).

22. ¿Kunas Nabalar pasäna, ukat familiar tʼaqhesiyapki ukanakar kunjamsa Diosajj uñji?

²² ¿Kunas Nabalar paspachäna? Bibliajj akham siwa: “[‘Chuymapajj’, NM] jan sartkiriw lurasiwayäna” sasa. Inas chuymapajj mä akatjamat saytʼchïna, ukampis niya tunka uru pasatatwa jiwjjäna, jupan jiwatapat parlkasajj Bibliajj akham siwa: “Tatitojj Nabal jaqerojj wasitatwa castigäna, ukampiw Nabalajj jiwjjäna” sasa (1 Sam. 25:38). Ukhamajj janiw usutätap laykukejj jiwkänti, jan ukasti Abigailan jan tʼaqhesjjañapatakiw Diosajj Nabalar castigäna. Jichhürunakanjja, Diosajj janiw ukham castigjjeti, ukampis janiw familian khitin tʼaqhesiñapsa munkiti, qhoru jaqenakarojj uñisiwa ukat wakiskani ukhaw tʼaqhesitanakarojj arjjatani, ukwa aka sarnaqäwejj uñachtʼayistu (Lucas 8:17 liytʼasiñapawa).

23. ¿Kuna yaqha bendicionsa Abigailajj katoqäna, ukat kunjamsa altʼat chuymanïtap uñachtʼayaskakïna?

²³ Abigailatakejj uka jan wali chachampi jan jakjjañajj mä bendicionänwa, ukampis Jehová Diosajj yaqha bendicionwa jupatak wakichäna. Nabalan jiwatapat Davitajj yatjjäna ukhajja, servirinakaparuw Abigailan ukar khitäna, jupampi casarasiñapataki. ¿Abigailajj kamspachänsa? ‘Nayajj jupan mä serviripakïtwa. Esclavonakapan kayunakap jariñatakis jankʼakirakïtwa’ sasaw säna. ¡Wali altʼat chuymanipunïnwa! ‘Esclavonakaman kayunakap jarï’ sasajja, llampʼu chuymanïtapwa uñachtʼayäna ukat Davitan esposapäjjaw sasajj janirakiw jachʼa  jachʼa tukkänti. Abigailajj jankʼakiw wasitat sartasïna ukat Davitan ukar saräna (1 Sam. 25:39-42).

24. Davitamp casarasisajja, ¿kuna jan waltʼäwinakansa Abigailajj uñjasïna, ukat kunjamsa juparojj chachapas ukat Jehová Diosas uñjapjjäna?

²⁴ ¿Ukham casarasisajj jan kuna llakinit jakasjjpachäna? Janiw ukhamäkänti, Davitan esposapäñajj chʼamakïnwa. Uka tiemponjja, chachanakajj walja warminïpjjänwa. Ukhamasti Davitajj yaqha warminïnwa, ukasti Ahinoam satänwa, kunjamtï Diosar servir warminakajj chachapan walja warminïpjjatap laykojj jan waltʼäwinakar saykatapkänjja, ukhamarakiw Abigailajj jan waltʼäwinakar saykatpachäna. Davitajj janïr reyïkasajj kunayman jan waltʼäwinakaruw saykatañapäna. Ukhampachasa, Abigailajj Davitarojj yanaptʼapunïnwa, ukat mä wawanïpjjänwa. Abigailaruw Davitajj munasïna ukat jarkʼaqarakïnwa. Mä kutejj jan wali jaqenakaw Abigailar katuntasin apapjjatayna, ukatsa qhespiyarakïnwa (1 Sam. 30:1-19). Jïsa, Davitajj Abigailan suma amuytʼirïtapata, jan ajjsarirïtapatjja wali sumwa uñjäna. Jehová Diosajj ukham yupaychir warminakarojj wali sumwa uñjaraki.