7 YATICHÄWI
¿Kunas Diosan Reinopajja?
1. ¿Kunas Diosan Reinopajja?
¿Kunatsa Jesusajj wali suma apnaqeripuniniw sasajj sissna? (MARCOS 1:40-42)
Alajjpachankir mä gobiernowa, ukarakiw taqe akapachankir gobiernonak lanti uttʼayasini ukat Diosan munañap phoqhayani aka oraqensa ukhamarak alajjpachansa. Cheqpachansa, Diosan Reinopat yatiyäwinakajj wali askipuniwa. Uka Reinopawa, mä arunjja uka gobiernowa taqe akapachankir jaqenakar mayachthapini. ¿Janit ukajj suma yatiyäwiki? Daniel 2:44; Mateo 6:9, 10 ukat 24:14 liytʼäta.
Cheqasa, mä gobiernonjja, mä pʼeqtʼiriw utjañapa, Diosajj Reinop apnaqañatakejja, Wawaparuw uttʼayi, mä arunjja, Jesucristo Yoqapaw Reyjam apnaqani. Apocalipsis 11:15 liytʼäta.
¿Kunas Diosan Reinopajja? sat video uñtasma.
2. ¿Kunatsa Jesusajj suma apnaqerejja?
Jesusajj suma Apnaqeriwa, jupajj wali munasiri, khuyaptʼayasiri ukat taqe kuns cheqapar luririwa (Mateo 11:28-30). Ukat jaqenakar yanaptʼañatakisa chʼamaniwa, uka chʼamapampiw alajjpachat aka Oraqjjar apnaqanini. Jesusajj jaktkasinjja, alajjpacharuw makatjjäna, ukanwa taqe munañanïñ katoqäna, Jehová Dios Awkipan kupïjjapan suyäna (Hebreos 10:12, 13). Ukat Jehová Diosajj taqe munañanïñwa juparojj churarakïna. Daniel 7:13, 14 liytʼäta.
3. ¿Khitinakas Jesusamp chik apnaqapjjani?
Diosan mä qhawqha yupaychirinakapaw Jesusamp chika apnaqapjjani sasaw Bibliajj qhanañchi, ukat Daniel 7:27, (NM) jiskʼa tʼaqanjja, jupanakajj qollana satapjjewa, Jesusan apostolanakaparuw qollanäpjjañapatak nayraqat ajllisiwayi. Jichhürunakanjja, ukhamarakiw Jehová Diosajj walja iyawsiri chachanakaru ukat warminakar qollanäpjjañapatak ajlliskaraki. Jesusjamarakiw uka ajllitanakajj jiwjjasin alajjpachan mä ajayjam jaktjjapjje. Juan 14:1-3 ukat 1 Corintios 15:42-44 liytʼäta.
¿Qhawqhanis alajjpachar sarapjjani? Bibliarjamajj mä jiskʼa tamakïpjjewa, jupanakat parlkasajja, Jesusajj akham sänwa: “jiskʼa tama” sasa (Lucas 12:32). Alajjpachat Jesusamp chika apnaqerinakajja, 144.000 ajllitanakapjjewa. Apocalipsis 14:1 liytʼäta.
4. Jesusajj Reyjam utʼayatäjjäna ukhajja, ¿kunas pasäna?
Jesusajj 1914 maranwa reyit uttʼayatäjjäna, uka qhepatjja, Supayaru ukat sajjranakapampiruw alajjpachat aka Oraqer jaqoqanïna. * Ukatwa Supayajj wali colerata aka Oraqen jan walinak luraski (Apocalipsis 12:7-10, 12). Ukatwa jaqenakajj jan walinakar jukʼamp sarasipkaki. Ukat oraq khathatinakasa, jachʼa chʼajjwäwinakasa, usuñanakasa ukat manqʼa pistʼañanakasa, Diosan Reinopajj niyaw aka Oraqjjar apnaqjjäni uk uñachtʼayistu. Lucas 21:7, 10, 11, 31 liytʼäta.
5. ¿Kunsa Diosan Reinopajj jichhürunakan luraski, ukat kunsa jutïrin luräni?
Oraqpachanwa Diosan Arupat yatiyasiski, ukhamatwa Jupajj “walja jaqenakar” taqe markanakat apthapiski. Cheqansa, millón millón chacha warminakaw Jesusamp apnaqayasipjje ukat istʼapjjaraki. Ukat kunapachatï Diosajj akapachankir jan wali jaqenakar tukjani ukhajja, jupanakajj qhespipjjaniwa. Ukhamajj jiwasatï Diosan gobiernopat askinak katoqañ munstan ukhajja, Jesusaruw istʼañasajja. Apocalipsis 7:9, 14, 16, 17 liytʼäta.
Kuntï Diosajj qalltatpach amtkäna, ukwa Reinopajj waranq maranakan phoqhani. Aka Oraqejj mä suma paraisöjjaniwa. Ukat tiempompejja, Jesusajj Awkiparuw Reinop kuttʼayjjäni (1 Corintios 15:24-26). ¿Janit uka suma Reinot yaqhanakar yatiyañ munkasma? Salmo 37:10, 11, 29 liytʼäta.
^ Párrafo 6 Khä 1914 maran Jesusajj apnaqañ qalltjje siski uka profeciat jukʼamp yatjjatañatakejja, ¿Kunsa Bibliax chiqpachapuni yatichi?, sat libron 215 janat 218 janakam uñjjattʼäta.
