Jaqichasiñ urux kuntï chacha warmix arsupki uk phuqapxaspa ukwa Jehová Diosax muni. Nayra chacha warmir jaqichkäna ukhax akham sänwa: ‘Chachax warmipampiw mayachasxani’, “panpachanisti mä sapa jaqikïpkaspasa ukhamäpxaniwa” sasa. Uka qhipatxa uka arunakat parlkasax akham sasaw Jesusax sarakïna: “Ukhamax jaqix janiw jaljtaykaspati kuntix Diosax mayachkis ukxa” sasa (Génesis 2:24;  Mateo 19:3-6). Ukhamasti, Jehová Diosatakis Jesusatakis jaqichäwix wiñayatakiwa, mayni jiwxi ukhakiw tukusxaspa (1 Corintios 7:39). Niyakixay Diosan uttʼayatächixa, ukhamax janiw jaljtañax janis kunäkaspa ukham uñjañasäkiti. Chiqpachasa, jan Biblian yatichäwiparjam divorciasirinakarux Jehová Diosax uñisiwa (Malaquías 2:15, 16).

Bibliarjamaxa, ¿kunatsa mä chacha warmix divorcior puripxaspa? Amuytʼañäni, jaqichatäkasin yaqhampi ikintasiñax janipuniw Jehová Diosatakix walïkiti (Génesis 39:9; 2 Samuel 11:26, 27; Salmo 51:4). Walpun uka qʼañu luräwirux uñisi, ukhamatakwa mä chacha warmix jaljtaspa sasaw qhanañchi. (Biblian wachuq jucha siski ukax kamsañs muni ukaxa 9 yatichäwinwa 7 tʼaqan qhanañchasi.) Ukampis ¿khitis divorciasiñsa jan ukax chacha warmjam jakaskakiñsa amtañapa? Ukxa jan juchanïki ukaw amtañapa sasaw Jehová Diosax yatichi (Mateo 19:9). Ukhamasti, jan juchanïki ukax divorciasiñ amtani ukhaxa, janiw kuna jan walsa lurkiti. Ukampis janiw khiti jilat kullakas ukham amtañapatakix chʼamachañapäkiti. Maysa tuqitxa, inas jan juchanix chacha warmjam jakaskañ amtchispa, ukatakix walja amtanakaw utjaspa, mayaxa akäspawa, inas juchachasirix taqi chuyma arrepentischispa. Ukampis jan juchaniw divorciasiñsa, jan divorciasiñsa amtxañapa, jupaw walinsa jan walinsa uñjasiskani (Gálatas 6:5).

Maysa tuqitsti, yaqhip jilat kullakanakax yaqha sinti jan walinakan uñjasisaw jaljtañ amtapxaraki, ukat jan wachuqa juch utjkipansa inas divorcior kun puripxchispa. Ukampis ukham jaljtañax utjani ukhaxa “sapakiw jakxañapa, jan ukax pachpa chachapampiw wasitat chikxañapa” sasaw Bibliax qhanañchi, mä arunxa janiw jaljtir cristianox yaqhampi sarnaqañapäkiti ni jaqichasiñapäkisa (1 Corintios 7:11; Mateo 5:32). Kuna sinti jan walinakan uñjasisas yaqhipax jaljtañar puripxi, uka tuqit jichhax sum amuytʼañäni.

Chachax familiar jan uñjañ munxaspati. Yaqhip chachanakax janiw kunjamtï Bibliax yatichki ukhamarjam familiarux kunsa churapkiti, janiw ukham phuqañ munapkiti; ukhaman uñjasisax wawanakas warmis kunayman jan walinakan  uñjasipxi. ¿Bibliax uka tuqit kamspachasa? “Maynitix [...] pachpa familiapar yanaptʼañatsa jan llakiskchi ukïrixa, iyawsäwxa jan uñtʼiriwa tuku, mä jan iyawsirits jukʼampiwa” sasaw qhanañchi (1 Timoteo 5:8.) Mä chachax ukhamakïskaspa ukhaxa, warmiw kamachinakarjam jaljtañ amtaspa, ukhamata wawanakapar sum uñjañataki, ukhamata jupas sum jakañapatakiraki. Ukampisa, mä jilatattï ukhamaw sasa parlapxani ukhaxa irpir chuymaninakax wali sum yatxatapxañapa, chiqpachansa ukham sarnaqatap laykuxa tama taypit jaqsut kunaw uñjasispa.

Maynix wali nuwasirïspa. Yaqhip chachanakax wali nuwasirïpxiwa ukat warmirus jiwayirjamäpxiwa. Nuwasirix cristianüchi ukhaxa, irpir chuymaninakax sum yatxatapxañapa, colerampi atipayasirinakasa jan ukax nuwasirinakasa tama taypit jaqsutäpxañapawa (Gálatas 5:19-21).

Maynix Diosar yupaychañwa chacharus jan ukax warmirus jarkʼaspa. Yaqhipax janipuniw kunäkipansa chachaparus jan ukax warmiparus Jehová Diosar yupaychañapxa munapkiti, ukatxa Diosan kamachinakap pʼakintayañwa wal munapxi. Ukhaman uñjasisax mä jilatas jan ukax mä kullakasa, kunjamatsa “Diosar nayraqat istʼa[spa], jaqinakar sipansa” ukwa amuytʼasxañapa, inas jaljtañax wakischispa (Hechos 5:29).

Ukampis amtapuniñäni, janiw khitis ukhaman uñjasirirux jaljtañapatakis jan jaljtañapatakis wiytañapäkiti. Inas irpir chuymaninakas jan ukax yaqha jilat kullakanakas iwxtʼapxchispa, ukampis kunjamas chacha warmix jikxatasi ukxa Jehová Diosakiw sum yati. Mä kullakas jan ukax mä jilatas jaljtañatakik jilamp jilampi parlaspa ukhaxa, janiw Diosan uttʼayat jaqichäwirus ni pachpa Jehová Diosarus sum uñjkiti. Inas yaqhipax iyawsañjama kʼarimp kʼarimpi parlapxchispa, ukampis Jehová Diosax sum yati. Chiqpachansa, “taqi kunaw [Diosatakix] qhanstayata, ukhamarak jistʼarata khitirutix [cuenta, MT] churkañäni ukan nayraqatapanxa” (Hebreos 4:13). Ukampis cristianox jan walinpun uñjasxani ukhaxa, inas jaljtañakipuni wakisxchispa, ukampis janiw khitis kʼumiñapäkiti. “Taqi maynipï Diosarux luräwinakasat cuenta churañänixa.” (Romanos 14:11, 12.)