1. Jesusan jiwañapax jakʼankxäna uka qhipa arumanxa, ¿kunsa jupax uñachtʼayäna?

 ARKIRINAKAPAX sumak sarnaqasipxaspa ukwa Jesusax munäna, katuntapkäna uka arumaxa, akham sasaw jupanakatakix Diosar mayisïna: “Janiw mayksmati akapachat apsuñamataki, jan ukasti maysmawa Supayat imañamataki. Kunjamtï nayax jan akapachankirïktxa, ukhamarakiw jupanakax jan akapachankirïpkiti” sasa (Juan 17:15, 16). Ukham taqi chuyma mayisisaw arkirinakapar wal munasitapxa uñachtʼayäna. Ukat uka arumakiw mä qhawqhanir akham satayna: “[Jumanakax] janiw akapachankirïpktati” sasa, uka arunakax kunja wakiskirïnsa ukwa ukham taqi chuyma mayisisax uñachtʼayarakïna (Juan 15:19, MT). Arkirinakapax jan akapachan munañaparjam sarnaqapkaspati ukwa jupax wal munäna.

2. ¿‘Akapacha’ sasinxa kuns Jesusax sañ munäna?

² ‘Akapacha’ sasinxa Diosat jithiqtat jaqinakatwa Jesusax parlaskäna, mä arunxa khitinakatix Supayan amuyuparjam jachʼa jachʼa tukupki, taqi kunsa jupatakik munasipki ukat Supayan munañaparjam sarnaqapki ukanakat parlaskäna (Juan 14:30; Efesios 2:2; 1 Juan 5:19). Ukhamasti qhanwa Bibliax yatichi, “akapachampi [mä arunxa ukham jaqinakampi] sumankañax Diosampi jan [walinkañawa]” (Santiago 4:4). Niyakixay Diosan munasiñapan jakasiñ munstanxa, ukhamax kunjamatsa akapachan jakkasax jan akapachankirïksna, uka tuqit amuytʼasiñasawa. Ukatakix phisqa tuqit amuytʼañäni: Jesusar katuyatäki uka Diosan Apnaqäwipat janipuniw jithiqtañasäkiti ukat janirakiw politicarus mitisiñasäkiti, janiw akapachankir  jaqinakjam sarnaqañasäkiti, kunatï isisiñäki ukarjamakiw isisiñasa, janirakiw qullqi chuymäñasäkisa, ukatxa Jehová Diosax churkistu uka jarkʼaqasiñ yänakampiw uchantasiñasa.

3. 1) ¿Jesusax kunjam amuyunïnsa politic tuqitxa? 2) ¿Jesusan arkirinakapax kunatsa ‘jupa lanti khitatäpxiw’ sasin Bibliax yatichi? (Qhanañchäwit arstʼarakïta).

³ Jesusax janiw politicar mitisirïkänti, jan ukasti Diosan Apnaqäwipatwa suma yatiyäwinak yatiyirïna, jupaw apnaqirjam uttʼasiñapäna (Daniel 7:13, 14; Lucas 4:43; 17:20, 21). Ukatwa Poncio Pilator akham säna: “Nayan reinoxax janiw akapachankkiti” sasa (Juan 18:36). Chiqa chuyman arkirinakapax jupatwa yatiqasipxaraktanxa. Diosan Apnaqäwipatakix taqi chuymaw irnaqtanxa, Jesusarux taqi chuymaw arkaraktanxa ukat taqi chiqanwa uka Apnaqäwit yatiyaraktanxa (Mateo 24:14). Apóstol Pablox akham sasaw qillqatayna: “Criston sutiparu, jupa lanti khitäpxtwa [...]. Criston sutiparu achiktʼapxsma; Diosampi sumankthapipxam” sasa (2 Corintios 5:20, MT). a

4. ¿Chiqpach cristianonakax kunjamatsa Diosan Apnaqäwipatak taqi chuymäpxatap uñachtʼayapxi? (“ Nayrïr cristianonakax janiw politicar mitisipxirïkänti” sat recuadro uñxattʼarakïta).

⁴ Kunapachatï mä markatxa mä jaqir yaqha markan irnaqañapataki khitapki ukhaxa, janiw uka khitat jaqix uka markanxa politicar mitiskiti ni kunans mitiskarakiti. Ukampis kunatï markapan apnaqäwipatakix askïki ukakwa thaqhi. ‘Alaxpachar’ sarir jilat kullakanakax ukhamäpxarakiwa akapachanxa, janirakiw kunarus mitisipkiti (Filipenses 3:20). Chiqpachansa, taqi chuymaw Diosan Apnaqäwipat yatiyasipki. Criston  “yaqha ovejanakapa” sat walja jaqinakaruw Diosamp sumthapiñ yanaptʼapxi (Juan 10:16; Mateo 25:31-40). Uka “yaqha ovejanakax” Jesusamp chik alaxpachan apnaqapkani ukanakampi pʼiqtʼataw irnaqapxaraki. Yaqha uwijanakas jawtʼatanakas mä tamakïpxiwa, Diosan Apnaqäwipatakiw irnaqapxi,  ukatxa janipuniw akapach politicanakarux mitisipkiti (Isaías 2:2-4).

5. ¿Nayra Israel markanxa kunjamsa jakasipxäna, ukat kunjamsa cristianonakax jakastanxa? ¿Kunjamatsa cristianonakax jan israelitanakjamätas uñachtʼaytanxa?

⁵ Chiqpachansa Cristor taqi chuym arkatas laykuw akapacharux jan mitisktanti, ukampis yaqha amtanakaw utjaraki. Jiwasax janiw mä markanak jakktanti, kunjamtï nayra israelitanakax Diosan churat uraqin jakasipkäna ukhama. Jan ukasti, uraqpachanwa jilat kullakanakasax utji (Mateo 28:19; 1 Pedro 2:9). Ukhamasti, mä markan utjki uka politiconak tuqit saytʼassna ukhaxa, ¿kunas kamachaspa? Jan walinakaw utjaspa, jiwaskam jan waltʼayasiñaw utjaspa. Ukat niyakixay kunayman jaqinakaru Diosan Apnaqäwipat yatiystanxa, janiw istʼañ munxapxaspati (1 Corintios 1:10). Ukat chʼaxwañax utjaspa ukhaxa, jilat kullakanakampi nuwasiñaw utjaspa, mä arunxa khitinakarutix munasiñasäki ukanakampiw nuwassna (Juan 13:34, 35; 1 Juan 3:10-12). ¡Ukatwa Jesusax janiw nuwasipxätati sänxa, jan ukasti uñisirinakamarus munasipxañamawa sasaw säna! (Mateo 5:44; 26:52; “ ¿Janit akapachar mitisktxa?” sat recuadro uñxattʼarakïta).

6. Diosar katuyatjamaxa, ¿kunjamsa Cesarar uñjañasa?

⁶ Ukat Jehová Diosaruw cristianonakax jakäwip katuyasipxi, janiw mä chacharus, warmirus ni jaqinakan uttʼäwiparus ni mä markan uttʼäwiparus katuyasipkiti. Ukatwa 1 Corintios 6:19, 20 jiskʼa tʼaqanakax akham qhanañchistu: “Janiw jumanakpachata munañanïkxapxtati, jan ukasti Diosaw jumanakarux jila alampi alapxtam” sasa. Ukhamasti, kuntï “Cesararu” churapxañapäki ukxa churapxiwa; impuesto qullqsa churapxi, yäqapxi, ukat kamachinaksa walïskchi ukhax istʼapxi ukhamawa. Ukat kunatï “Diosankki uksti [Diosarurakiw churapxi]” ukatakiw taqi chuyma kunsa lurapxi (Marcos 12:17; Romanos 13:1-7). ¿Kunanaksa Diosar churañasa? Juparux yupaychañasawa ukat taqi chuymaw munasiñasaraki, ukatsti istʼasir chuymanïñasawa, janipuniw jupat jithiqtañasäkiti, ukat wakisispa ukhaxa jakañassa churañasawa (Lucas 4:8; 10:27; Hechos 5:29; Romanos 14:8).

7, 8. ¿Kunas ‘akapachankir ajayuxa’ ukat kunjamsa jaqinakar chʼamañchi?

⁷ Maysa tuqitxa, janiw akapachankir ajayumpi, mä arunxa akapachankir jan wali amuyunakampix apayasiñasäkiti, ukhamatwa akapachat jithiqtaraktanxa. Pablox akham sänwa: “Jiwasasti janiw akapachankir ajayu katuqktanti, jan ukasti Diosan Ajayupwa katuqapxtanxa” sasa (1 Corintios 2:12). Ukat Efesonkirinakarux akham sarakïnwa: “Akapachan sarnaqäwinakaparjamaw jakasipkäyäta, kawkïri ajayutix ñanqha ajayunakaru apnaqki, ukhamarak chʼamañchki Diosar jan istʼirinakarusa, uka ajayun munañap lurasina” sasa (Efesios 2:2, 3).

⁸ Ñanqha ajayunakaru apnaqki, ukat Diosar jan istʼirinakar chʼamañchki, ¿uka “ajayux” kunasa? Janiw pachpa Supayäkiti. Jan ukasti, jupan apnaqata akapachan jan wali amuyunakapawa, ‘janchin jan wali munañanakapampi, ukat kuntï nayrax uñjki ukanakampiw’ jaqinakar Diosat jithiqtayi (1 Juan 2:16; 1 Timoteo 6:9, 10). ¿Kunatsa uka ajayux jaqinakar ‘apnaqi’, mä arunxa jaqinakxar chʼamañchi? Niyakixay juchanïstanxa, ukhamax uka tuqit aynachtʼayañ munistu, kunjamatsa apnaqañ munakipunistuwa, samanäkaspas ukhamaw taqi chiqanki. ¿Ukat kunjamatsa jaqinakar ‘chʼamañchiʼ? Kuntï cristianjamax jan lurañasäki ukanak luras sarnaqañaswa muni; jiwasak taqi kunsa munasksna, jachʼa jachʼa tukusksna, jan wal sarnaqasksna, janirak khitirus istʼksnati, ukham jaqïñasatakiw chʼamañchistu. b Ukhamasti, Supayax kunjam chuymanis ukat kuna amtanis ukham jaqiruw jukʼat jukʼata puriyañ munistu (Juan 8:44; Hechos 13:10; 1 Juan 3:8, 10).

9. ¿Kuna tuqinakatsa akapachankir ajayux chuymarus amuyurus mantistaspa?

⁹ ¿Akapachankir ajayux amuyusarus chuymasarus mantaspati? Jïsa, mantaspawa. Ukampis jan amuyaskañäni ukhakiw mantaspa (Proverbios 4:23). Qalltanxa jan amuykañakwa  mantaspa. Sañäni, inas Jehová Diosar jan yupaychir jaqinakax suma jaqir tukupxchispa, ukhamatwa jiwasar mantaspa (Proverbios 13:20; 1 Corintios 15:33). Maysa tuqitxa, kunayman jaqinak tuqiw jan ukax yänak tuqiw akapachankir ajayux jiwasar mantistaspa, inas jan wali libronak liysna, jan ukax qʼañu luräwinak ukat Diosat saranukut jan wali jaqinakan luratanakap internetan uñjsna, jan wali luräwinakat kusissna, jan ukax atip atipa anattʼañanakan anatsna, ukhamanakatwa akapachankir ajayux jiwasar mantistaspa.

10. ¿Kunjamatsa akapachankir ajayumpi jan atipayasksna?

 ¹⁰ ¿Kunjamatsa uka jan wali ajayumpix jan atipayasksna, ukat kunjamatsa Diosan munasiñapan jakasiskaksna? Kunanakampitï Jehová Diosax yatichkistu ukanakampi chʼamañchasiñasawa, janiw qhiparañasäkiti ukat qullan ajayup mayiñasarakiwa. Supayampi ukat jupan apnaqata akapachax chʼamanïpkchisa, Diosax jukʼamp chʼamaniwa (1 Juan 4:4). Ukhamasti, Jupar mayisiñasapuniwa, ukhamatwa jupa jakʼankañäni, ukax wali wakiskiripuniwa.

11. ¿Akapachankir ajayux kunjamsa isisiñ tuqit jan waltʼayi?

¹¹ Mä jaqix kunjam amuyunis ukaxa kunayman tuqit amuyañjamawa. Mayax isisiñ tuqitäspawa, ukhamax qʼuma sarnaqañ tuqit ukat yäpar isisiñ tuqit parltʼañäni. Yaqhip chiqanakanxa jan walik isisxapxi. Ukat televisionan mä irnaqirix akham sasaw säna: “Ukham jan waliru saraskakiñäni ukhaxa, qʼañu lurir warminakax janiw uñtʼañjamäxaniti” sasa. Ukat yaqhip yatiyäwinakanxa akham sasaw mä qhawqha arunakan sapxi: “Jukʼa isini ukat jan phinqʼani” sasa. Ukhamaw jiskʼa imill wawanakas sarnaqxapxi. Yaqhipax jan yäqasirïtap uñachtʼayañatakix mayja jan walinakampiw isisipxaraki, janis jupa pacha munaskaspa ukhamwa jan wali isinakampi uchasipxi.

12, 13. ¿Kuna kamachinakarjamas isisiñasa?

¹² Jehová Diosar luqtirinakjamax suma uñtanïñasawa, qʼuma isinakampi isthaptʼata ukhamäñasawa, kawk sarañatakis yäpar isthaptʼasiñasawa. Chachatsa warmitsa “kunatix isisiñäki” ukarjamaw taqi chiqansa isisiñasa, ukat “suma luräwinakampi” lurañäni ukhaxa, “Diosar katuyata” jaqinakätaswa uñachtʼayañäni. Janiw jiwasaki sum uñjayasiñ munktanti, jan ukasti “Diosan munasiñapan [jakasiñ]” muntanxa (1 Timoteo 2:9, 10; Judas 21). Chiqpachansa, ‘suma chuymanïñaw Dios nayraqatanxa wali askixa’, ukhamax ukaw jiwasatakix jukʼamp askixa (1 Pedro 3:3, 4).

¹³ Maysa tuqitxa ak amtañasarakiwa, kunjamxay isischiñäni jan ukax kʼachachaschiñäni ukarjamaw jaqinakax chiqa  yupaychäwitxa walsa jan walsa amuyapxani. “Kunatix isisiñäki” siski uka aruxa suma sarnaqañ tuqir uñtayatawa griego arunxa, yaqhanakax kunjam amuyunïpxisa ukar respetañäkaspas jan ukax yäqañäkaspas ukham sañ muni. Ukhamaxa, munañasar isisiñat sipansa yaqhanakax kamsapxis ukarjam isisiñasawa, uk lurañax wali askiwa. Jehová Diosampir markapampiruw jachʼañchañ muntanxa, ukat Diosan irnaqiripjamaw sarnaqañ munaraktanxa. Chiqpachansa ‘Diosar jachʼañchañatakiw taqi kuns lurañ’ muntanxa (1 Corintios 4:9; 10:31; 2 Corintios 6:3, 4; 7:1).

14. ¿Kunjam uñtanïtansa uka tuqit kunanaksa jisktʼasiñasa?

¹⁴ Tantachäwinakarus jan ukax Diosan arunakap yatiyañatakis jukʼamp qʼuma isinakampi isthaptʼat sarañasawa. Ukat akham jisktʼasiñasawa: “¿Jaqin uñchʼukiyasiñjamat qʼañu, jan suma isthaptʼata sarnaqtxa? ¿Nayat phinqʼasipxituti? ¿Kunjam isisiñas nayataw sistti, jan ukax taman suma luräwinak katuqañatakjamach suma isthaptʼata sarnaqtxa?” sasa (Salmo 68:6; Filipenses 4:5; 1 Pedro 5:6).

15. Isisiñ tuqita, qʼum sarnaqañ tuqita ukat yaqha tuqinakatsa, ¿kunatsa Jehová Diosax Biblian walja kamachinaka jan churkistu?

¹⁵ Kunjam isimpis uchasiñasa, qʼumat sarnaqañasa jan ukax kunjamsa kʼachachasiñasa uka tuqinakatxa janiw Jehová Diosax walja kamachinak churkistuti. ¿Kunatsa? Jiwaspach amuytʼasiñaswa muni. Yatxattʼat cristianjamax Biblian yatichäwinakapat sum amuytʼsna, “kunatix walïki, jan walïkaraki uk  uñtʼañsa [yatiraksna]” ukwa muni (Hebreos 5:14). Jupar munatas laykus ukat jaqi masisar munatas laykus sum sarnaqañas muni (Marcos 12:30, 31). Kunayman suma isinakaw utji, ukat kunayman tuqitwa yäpar sum isthaptʼasiraksnaxa. Ukax wali sum Jehová Diosan Qhanañchirinakapar jachʼa tantachäwinakapanxa uñjasi, kawkinsa kunayman wali suma isinakampi isthaptʼata, wali kusisita ukhamaw tantachasipxi.

16. ¿Kuna tuqitsa Jesusan yatichäwipax akapachat sipansa mayjaxa, ukat kun jisktʼasiñasasa?

¹⁶ Akapach ajayux wali sallqawa. Qullqinsa jan ukax yänakansa kusisiñax utjkaspa ukhamwa waljanir amuyayi, ukatwa jaqinakax qullqi ukat yänak wal thaqhapxi. Ukampis Jesusax akham sänwa: “Jaqin jakañapasti janiw kunatix utjarapki uka walja yänakapankkiti” sasa (Lucas 12:15). Jesusax janiw jilamp parlkänti, janirakiw jan kunani ukham wali pisin jakañassa  munkänti. Ukampis “khitinakatix ajay tuqin aynachtʼatäpxatap amuyasipxi [ukanakampi]” ukat ‘qʼuma nayraninakampiw’, mä arunxa jan qullqi chuymanakampiw kusisit sarnaqapxani sasaw säna, khitinakatï, Jehová Diosamp sum apasiñ nayraqat thaqhapkani ukanakaw kusisit sarnaqasipxani sänwa (Mateo 5:3; 6:22, 23, MT). Ukatwa akham jisktʼasiñasaxa: “¿Kuntï Jesusax yatichkäna ukxa chiqapunit iyawstxa, jan ukax ‘kʼarin awkipach’ mayjtʼayaskitu?” (Juan 8:44). “¿Arunakajasa amtanakajasa sarnaqatajasa ukat luräwinakajasa kawksar uñtayatasa?” sasa (Lucas 6:45; 21:34-36; 2 Juan 6).

17. Kunatsa qʼuma nayranïñax wakisi uk qhanañchtʼma.

¹⁷ ‘Yatiñanïñax luräwinak tuqiw uñachtʼayasi’ sasaw Jesusax säna (Mateo 11:19). Chiqpachansa, ¿kunatsa qʼuma nayranïñax wali aski? Qʼuma nayraninakax Diosan Apnaqäwipatakiw jan inaktʼasa irnaqapxi, ukat wali sum jikxatasipxi (Mateo 11:29, 30). Llakinakatsa jan walinakatsa jarkʼaqasipxiwa (1 Timoteo 6:9, 10). Kunatï chiqpachapuni wakiski ukanakampikix kusisit jakasipxchisa, familiatakis jilat kullakanakatakis tiemponikïpxiwa. Ukatxa wali sum arumanakas samartʼapxi (Eclesiastés 5:12). Yaqhanakataki tiempo apstʼasisasa jan ukax yaqhanakar yanaptʼasasa wal kusisipxi (Hechos 20:35). Ukat ‘suytʼañansa phuqtʼatäpxarakiwa’, chuymas phuqtʼata ukhamaw wali sum jakasipxi (Romanos 15:13; Mateo 6:31, 32). Chiqansa, janiw qullqimpix uka askinak alksnati.

18. ¿Uñisirinakasatsa, kunjamsa aynachtʼayañ munapxistu ukat kunjamsa nuwastanxa uka tuqit kamsis Bibliaxa?

¹⁸ Wali llakit sarnaqsna ukat wiñay jakañsa aptʼassna ukwa Supayax muni, ukampis Diosan munasiñapan jakasiñäni ukhaxa, uka jan walinakatwa jarkʼaqasiñäni (1 Pedro 5:8). Pablox akham sasaw säna: “Janiw wilampi janchimpi contrati nuwasiñanïpktanxa; jan ukasti jilïrinak contrawa, munañaninak contra, akapach apunak contra, aka chʼamakan apnaqirinakap contra, laqapachankiri ñanqha aphallanak contra” sasa (Efesios 6:12, MT). “Nuwasiña” sas jaqukipatäki uka griego  aruxa wali jakʼapura, amparampi nuwasiñäkaspas ukham sañ muni, janiw jan usuchjayasiñatakix jayat imantasis nuwasiñäkaspas ukham sañ munkiti. Ukatxa, khitinakatix akapach apnaqapki ukanakat Pablox parlaraki; “jilïrinaka”, “akapach apunaka” ukat “apnaqirinaka” sasaw parli. ¿Ukhamax kunsa ukax uñachtʼayistu? Chiqpachansa, uka ñanqha ajayunakax wali suma uttʼayatäpxiwa, ukhamatwa aynachtʼayañ munistu.

19. Kunas Diosankiri taqpach jarkʼaqasiñ yänakaxa, uk qhanañchtʼma.

¹⁹ Jaqjamax janiw chʼamanïktanti, ukatxa pantjasirirakïtanwa, ukampis Supayar atipsnawa. ¿Kunjamatsa? “Diosankiri taqpach jarkʼaqasiñ yänaka” katuqañasawa (Efesios 6:13, MT). Uka jarkʼaqasiñ yänakax Efesios 6:14-18 uka jiskʼa tʼaqanakan sum qhanañchasi, akham siwa: “Chʼamani saytʼasipxam, chiqa kankañampi wakʼantata, ukatsti chiqa sarnaqañampi imtʼatäpxarakim kunjämtix mä soldadox armadurampi pechopat imtʼaskix ukhama. Sumankañ arunak parlañatak wakichasipxam, kunjamtix mä soldadox wakichasi [wiskhu] uskusisinxa ukhama. Ukatsipansa, iyawsañanakamax mä escudjamäpan, Supayan aqkir flechanakapat jarkʼaqasiñataki. Qhispiyasiñampisti mä cascompjam pʼiqir uskusipxam, Diosan arupsti katxarupxarakim mä espadar uñtata kuntix Qullan Ajayux churapktam uka. Akanaksti oracionampipuni lurapxam, Diosar mayisina Qullan Ajayu tuqi” sasa.

20. ¿Chiqa soldadonakat sipansa kunjamsa jiwasax nuwastanxa?

²⁰ Taqpach jarkʼaqasiñ uka yänakax wali wakiskiripuniwa, Diosaw uk churistu. ¿Ukat kunatsa ukanakampi uchasiñasapuni? Jiwasax janiw chiqa soldadonakjamäktanti, jupanakax mä chʼaxwäwir sarasax walja tiempow yaqha chʼaxwäwir sarañatakix samarapxi, ukampis cristianonakax taqi chʼamaw sapür nuwastanxa. Ukampis Diosax niyaw Supayan apnaqat akapach tʼunjxani ukat jupas ñanqha ajayunakapas mikʼayar jaquntatäpxaniwa, ukhamax janiw jupanak contra nuwasxañäniti (Apocalipsis 12:17; 20:1-3). Ukhamax jichhatï jan walinak jan lurañataki chʼamachasiskstan ukhaxa, janiw qariñasäkiti. Jehová Diosat jan jithiqtañatakix taqiniw jañchisan  munañanakapar atipañasa (1 Corintios 9:27). Jan chʼamachasxsna ukhaxa janipuniw walïkaspati.

21. ¿Kunjamatsa Supay contra nuwasiñanxa atipsna?

²¹ Ukampis janiw chʼamasampikix atipksnati. Ukatwa Pablox akham sistu: ‘Oración lurapxapunim Diosar mayisina, qullan ajayu tuqi’ sasa. Ukatxa Diosar istʼañasarakiwa. Ukampis ¿kunjamatsa Diosar istʼsna? Arupat yatiqañasa ukat khitinakatï jiwasamp chika nuwasipki uka masinakasampix tantachasiñasapuniwa. Ukhamasti janiw sapakïktanti (Filemón 2; Hebreos 10:24, 25). Taqi ukanak phuqapuniñäni ukhaxa, janiw aliqaki atipkañäniti, jan ukasti kunapachatï Diosan yatichäwinakap jiskʼachañ munapkani ukhaxa arxatapuniñäniwa.

22, 23. 1) ¿Iyawsäwi arxatañatakix kunatsa wakichtʼatäñasapuni, ukat kuna tuqitsa jisktʼasiñäspa? 2) ¿Jutïr yatichäwinxa kuna tuqitsa yatiqañäni?

²² Jan akapachankirïpxatam laykuw “akapachax uñisipxtam” sasaw Jesusax säna (Juan 15:19). Ukhamasti iyawsäwis arxatañatakix wakichtʼatäñasawa, ukampis respetompi ukat llampʼu chuymampiw arxatañasa (1 Pedro 3:15). Akham jisktʼasiñäni: “¿Kunatsa awisax Jehová Diosan Qhanañchirinakapax kuntï jaqinakax lurapki uk jan lurapki, uk sumti amuytxa? Mä yatichäwi tuqit saytʼaskta ukhaxa, ¿Bibliasa, Amuyasiri Chiqapa Uywatasa ukhampun chiqapar yatichaski sistti? (Mateo 24:45; Juan 17:17). Ukat Jehová Dios tuqit saytʼaskta ukhaxa, ¿yaqhanakat sipansa mayjätaj uñachtʼayañatakikit wakichtʼatätxa jan ukax taqi chuymach Jupan qhanañchiripätaj uñachtʼaytxa?” sasa (Salmo 34:2; Mateo 10:32, 33).

²³ Chiqpachansa, janipuniw Supayan apnaqat akapachar mitisiñ munktanti, ukampis jupax kunayman tuqit sallqjañ munistu. Kusistʼañ jan ukax uñtasiñ tuqinakatwa jan wali luräwinakampi sallqjañ munistu. Ukampis ¿kunas suma kusistʼäwinak ajlliñ yanaptʼistaspa, kuna kusistʼäwinakas chʼamañchtʼistaspa ukat kunanakas suma chuymanïñ yanaptʼistaspa? Jutïr yatichäwin uka tuqit yatxataskañäni.