Warminakax Jehová Diosar luqtañatakixa awisax pʼiqi chʼuqtʼasipxañapa sasaw Pablox qhanañchäna. Ukampis ¿Jehová Diosar jachʼañchañatakix kunapachas chʼuqtʼasipxañapa? Uk amuytʼañatakix 1 Corintios 11:3-16 qillqatan utjki uka yatichäwinak uñxattʼañäni. Pablox kimsa tuqit amuytʼayistu: 1) kunanak lurañatakis warminakax pʼiqi chʼuqtʼasipxañapa; 2) ukanak lurkasax kunapachas chʼuqtʼasipxañapa, ukat 3) kuna amtampis chʼuqtʼasipxañapa, uka tuqinakatwa amuytʼayistu.

Kunanak lurañatakis chʼuqtʼasipxañapa. Yatichañataki ukat Diosar mayisiñampitakiw chʼuqtʼasipxañapa sasaw Pablox qhanañchi (4 ukat 5 jiskʼa tʼaqanaka). Kunjamtï yatktanxa Diosar mayisktan ukhaxa, Juparus yupaychksna ukhamawa; ukat Diosan arunakap parlaña siski ukaxa, kunjamsa chachas warmis Diosan arunakapat yatichapxi uk sañ muni. Ukhamasti, ¿kullakanakax Diosar mayisiñatakis jan ukax Bibliat yatichañatakis pʼiqi chʼuqtʼasipxañapapuniti? Janiw Pablox uk sañ munkiti. Kunapachas chʼuqtʼasipxañapa ukarjam jichhax amuytʼañäni.

Kunapachas chʼuqtʼasipxañapa. Familia taypin jan ukax tama taypin chʼuqtʼasipxañapa sasaw Pablox qhanañchi. Akham sasaw qillqatayna: “Chachasti warmin pʼiqiparakiwa, [...] mä warmitix jan pʼiqi chʼuqtʼasisa oración lurchi jan ukax Diosan arunakapsa parlchi ukaxa, jan chʼuqtʼasitapax pʼinqarakikiwa  chachapatakixa” sasa (3 ukat 5 jiskʼa tʼaqanaka). Familianxa chacharuw Jehová Diosax warmin pʼiqtʼiripat uttʼayi. Ukampis ¿mä warmix kuntï chachax familian lurañapäki uk lurañ munaspa ukhaxa kunsa kamachaspa? Chachaparuw jan yäqas uñjasax phinqʼachaspa. Uka tuqit amuytʼañäni. Mä kullakax chachap jakʼan Bibliat yaqhar yatichañapäspa ukhaxa, ¿kun lurañapasa? Chachapar pʼiqtʼiriparjam uñjasax pʼiqi chʼuqtʼasiñapawa. Chachapax bautisatäskpas janisa jupaw familia pʼiqtʼirixa. a Ukat mä kullakax bautisat sullka jiskʼa yuqap jakʼan Bibliat yaqhar yatichaspa jan ukax Diosar mayispa ukhaxa, ¿kunsa lurañaparaki? Uka wawapax janis familia pʼiqtʼirïkchixa, ukampis uka kullakax pʼiqi chʼuqtʼasiñaparakiwa. ¿Kunatsa? Mä yuqall wawax bautisatjamax tama taypinxa pʼiqtʼirjam uñjatarakiwa.

Ukat Pablox tama tuqitwa parlaraki, ukat akham siwa: “Maynitix aka tuqit chʼaxwañ munchixa yatiñapawa, janiwa jiwasas ni Diosan [tamanakapasa, NM] yaqha luräwxa uñtʼktanti” sasa (16 jiskʼa tʼaqa). Cristiano tama pʼiqtʼañapatakixa bautisat chachanakaruw Jehová Diosax uttʼayi (1 Timoteo 2:11-14; Hebreos 13:17). Ukhamasti, chachanakakiw tama uñjapxañaptakix irpir chuymaninakjamas jan ukax yanapirinakjamas uttʼayatäpxi (Hechos 20:28). Ukampis awisax kullakanakaw kuntï bautisat ukat yatxattʼat chachanakaki lurapxañapäki uk lurapxaspa. Sañäni, yatxattʼat mä jilata jan utjipanxa, inas yatiyir mistuñataki tantachäwi sarayapxchispa. Chiqasa, uka tantachäwi sarayañaxa, kunatix tama taypin yatichäwinakax utjki uka taypinkarakiwa, ukhamasti, mä jilataw ukxa sarayañapa. Ukatwa kullakanakax uk lurkasax pʼiqi chʼuqtʼasipxañapa. Ukat kunapachatï mä kullakax mä jilat jakʼana yaqhar Bibliat yatichani ukhaxa, pʼiqi chʼuqtʼasiñaparakiwa.

Ukampis kullakanakax janiw Diosar yupaychañatakix taqi kunan pʼiqi chʼuqtʼasipxañapäkiti. Sañäni, tantachäwinakan arstʼañatakix janiw chʼuqtʼasiñapäkiti ukat chachap jakʼansa jan ukax bautisat yaqha jilat jakʼansa Diosan arunakapatxa jan chʼuqtʼasisa yatiyaskaspawa, ukat jan bautisat yuqall wawanakaparus  Bibliat yatichaskarakispawa, jan ukax jupanak jakʼansa Diosat jachʼat mayisiskarakispawa. Ukampis ¿payachasiñ utjaspa ukhax kun lurañas wakisispa? Nayraqatxa sum amuytʼasiñapawa. b Ukampis payachasiñax utjaskakini ukhaxa pʼiqi chʼuqtʼasisipkaspawa, ukax janiw kuna juchäkisa.

Kuna amtampis chʼuqtʼasipxañapa. Kuna amtampis kullakanakax pʼiqi chʼuqtʼasipxañapa ukxa 10 jiskʼa tʼaqaw qhanañchistu, ukanxa akham siwa: “Warmix pʼiqipxaruxa mä jachʼa kankañjama apañapaxa, [...] angelanak layku” sasa. Nayraqatxa “jachʼa kankañjama apañapa”, mä arunxa “pʼiqtʼirïnïtap uñachtʼayañapa” siski uka arunakat amuytʼañäni. Niyakixay Jehová Diosax tama taypin bautisat chachanakar pʼiqtʼirit uttʼaychixa, ukhamax ukwa kullakanakax pʼiqi chʼuqtʼasisax uñachtʼayapxi. Ukhamatwa Jehová Diosar taqi chuym munasitap uñachtʼayapxaraki. ¿Ukat kuna yaqha amtampis pʼiqi chʼuqtʼasipxañaparaki? Kunjamtï 10 jiskʼa tʼaqax siskixa “angelanak laykuw” uk lurapxañaparaki. Ukampis ¿warminak pʼiqi chʼuqtʼasir uñjasax kunsa uka wali chʼamani angelanakax jikxatapxaspa?

Angelanakax kunatï Diosan markapanxa, alaxpachansa aka Uraqins lurasiski ukxa wali sum uñjapxi, ukat Diosan kamachinakapxa kunjamsa phuqasktan uksa sum uñjapxaraki. Ukat kunapachatï pantjasir jaqinakax Diosar taqi chuyma istʼtan ukhaxa, jupanakatakix wali askiwa ukat yatiqasipxarakispawa. Chiqpachansa, jupanakax Jehová Diosar istʼapxañaparakiwa, ukampis janiw taqinis ukham istʼapkiti (Judas 6). Kunapachatï mä kullakax wali chʼikhïkasinsa jan ukax wali yatxattʼatäkasinsa bautisat mä jilatar taqi chuyma istʼi ukhaxa  wali askipuniwa jupanakatakixa. Ukat alaxpachar sarir kullakanakax ukhamaraki istʼasipxi ukhaxa wali muspharkañaw jupanakatakixa. ¿Kunatsa? Uka kullakanakax Cristomp chikaw alaxpachan mayni jawtʼat jilatanakamp chika apnaqapxani, mä arunxa angelanakat sipansa jilankapxaniwa. Ukhamasti kullakanakax mä aski lurañwa Jehová Diosat katuqapxi. Taqi chuyma istʼasisaxa, altʼat chuymanïñampi ukat istʼasirïñampwa angelanakar yatichapxi.