Kunapachatï mä familiaras jan ukax mä munat masis juchanakapat jan arrepentisitap layku tama taypit jaqsuta uñjasi ukhaxa wal chuym ustʼayastanxa. Ukampis uka tuqit Biblian kamachinakaparjam kunjamxay jayschiñäni, ukarjamaw Diosar munatassa jan munatassa, ukat kamachinakapar taqi chuyma istʼatassa uñachtʼayañäni. a Ukhamasti, uka tuqit kunayman jisktʼanakar qhanañchañataki amuytʼañäni.

¿Kunjamsa mä jaqsutar uñjañasa? “Jan chikachasipxamti khititix iyawsirïkasina wachuqa juchan sarnaqaski, michʼasiski, idolonakar yupaychaski, arunak apnaqaski, machaski, lunthatasiski ukanakampixa. Janirakiw ukanakampix manqʼapxañamäkisa” sasaw Diosan Arupax iwxtʼistu (1 Corintios 5:11). Ukat akham saskakiwa: “[Khititix jan] Tatit Jesucriston yatichäwiparjam sarnaqki  [...] ukaruxa, jan utanakamar katuqapxamti, ni aruntapxamsa [ukaxa kjáiro sataw griego arunxa]. Khititix aruntani ukïrixa, jan wali luräwinakaparu mayachaskaspas ukhamawa” sasa (2 Juan 9-11). Khä 1981 marana, noviembre phaxsin 15 urun apsuta La Atalaya revistaxa akham sasaw 19 jananxa qhanañchäna: “Kamisaki sasin aruntasisakiwa maynimpix parlthapsna, inas ukhamataki yaqhampi sum uñtʼasiraksna. ¿Tama taypit jaqsutanakampix ukham qalltañ munsnati?” sasa. Ukhamasti kunapachatï maynix tama taypit jaqsutäki ukhaxa janipuniw uka jaqimpix yupaychañ tuqitsa yaqha tuqinakatsa parlktanti ni chikachasxtansa.

¿Ukhamax janipunit jupanakampi parlañasäkaspa? Jïsa, ukhamäñapawa, ukatakix walja amtanakaw utji. Nayraqatxa Diosar ukat Aruparuw taqi chuyma istʼañasa. Wal Jehová Diosar munastanxa, ukatwa arunakaparjam sarnaqañ muntanxa, chʼamäkipansa kamachinakapxa phuqapuniñäniwa. Ukat Jupax wali munasirirakiwa, kamachinakapax jiwasan askisatakiwa (Isaías 48:17; 1 Juan 5:3). Maysa tuqitsti, juchapat jaqsutampi sarnaqañax janiw walïkaspati, jan waliruw puriyistaspa. Ukhamasti uka jaqsutanakampi jan chikachasisax Diosar  yupaychañ tuqitsa sum sarnaqañ tuqitsa sumakiw uñjastanxa, ukhamatwa tamarus sum uñjayaraktanxa (1 Corintios 5:6, 7). Ukatsti, kunapachatï maynix jaqsutäki ukhaxa, pachpa juchanin askipatakirakiwa. ¿Kunatsa ukham sistanxa? Jaqsutäñkamaw juchanix irpir chuymaninakan yanaptʼap jan istʼkiti, ukhamasti jiwasax Diosan kamachinakapsa ukat taripañataki tantachasipki uka irpir chuymaninakan amtapsa taqi chuymaw katuqañasa, mä arunxa istʼañasa, ukhamatwa uka jaqsutanakasa amuytʼasipxarakispa. Chiqpachansa, juchanix Diosan iwxanakaparjam sarnaqatas laykuw chuym chʼallxtayasispa ukat jan wali amuyunakap apanukxaspa. Familiampi jan sum apasirjamäxasaxa inas jan wali luratanakapat “wal amuytʼas[chispa]”, ukat Jehová Diosar kuttʼxañataki askinak lurxchispa (Lucas 15:17).

¿Mä familiarax jaqsut uñjasispa ukhax kamachsnasa? Mä familiarax juchapat jaqsuta uñjasispa ukhaxa, Jehová Diosar taqi chuyma istʼañax wali chʼamäspawa. Ukampis ¿kunjamsa juchanir uñjañäspa? Janiw taqi kunat parlksnati, ukhamasti pä tuqit amuytʼañäni.

Awisaxa, pachpa familiapanwa jaqsutax jakasipxi. Kunapachatï maynix tama taypit jaqsutäki ukhaxa janiw familia taypitxa jaqsutäkarakispati, ukhamasti kunatï utan lurañäki ukanakxa juchanix luraskaspawa. Ukampis niyakixay jaqsutax cristianjam mayachtʼat jakañ tuqit saraqxchixa, ukhamax Jehová Diosar taqi chuyma istʼañ laykuxa, janiw yupaychañ tuqitxa jaqsutampix kunsa lurañasäkiti. Inas familiax Bibliat yatiqki ukar saraskchispa, ukampis janiw kunsa arsuñapäkiti. Maysa tuqitxa, jaqsutax sullkäskaspa ukhaxa, awk taykax jupar Bibliat yatichasipkañapakiwa (Proverbios 6:20-22; 29:17). b

Ukampis ¿jaqsutax yaqha utan jakaspa ukhax kunjam uñjañasasa? Ukhaman uñjasisax taqi chuyma Diosar yupaychir cristianonakax wakiski ukhakiw jaqsutampix jikisipxi, mä arunxa janiw jupanakampix parlxapxiti. Janiw sapa kuti parlaskañatakix  kuns thaqhapkiti. Jehová Diosan yatichäwinakapsa markapan iwxanakapsa taqi chuymaw istʼapxi. Chiqpachansa jaqsut familiarax amuytʼasispa ukwa munapxi, ukatwa Diosan Aruparjamapunix kunsa lurapxi (Hebreos 12:11). c