JUKʼAMPI YATXATAÑATAKI
Kunjamsa masturbación satäki uka qʼañu luräwir atipsna
Uka qʼañu luräwix janiw Diosatakix walïkiti, ukanak luririx jan walinakwa amuyxaspa ukat ukakwa thaqhaskaspa. a Chiqansa, masturbasir jaqix yaqhanakarus uka amtampikiw uñchʼukiskaspa, anatasiñäkaspas ukhama. Chacha warmi munasiñax janis kunäkaspa ukhamwa uñjapxi, mä arunxa chiqa munasiñxa maysaruw apanukupxi, ukat jañchi tuqin kusistʼañatakikiw uka jan wal lurapxi. Ukampis mä qhawqha tiempokiw sum jikxatasipxi. Inas maynix yaqhanakampi wachuq jucha lurirjamächi, ukampis masturbasisax janiw jañchin uka munañanakapar atipkaspati, jan ukasti jukʼampwa uka jan walinak munayi (Colosenses 3:5).
Akham sasaw Pablox qillqatayna: “Munat jilatanaka, [...] taqi kunatix qʼañuchkistaspa ukatxa jithiqtañasaxa, ukatsti qʼuma sarnaqañasawa janchisansa, ukhamaraki ajayusansa. Diosar axsarasarakiw juparux taqi katuyasxañasaxa” sasa (2 Corintios 7:1). Ukhamasti, yaqhipatakix uka arunak phuqañax wali chʼamäspawa; ukampis janiw uka jan wali luräwimpix atipayasiñasäkiti, kuna laykutix Jehová Diosax ‘juch pampachañatakix’ jankʼakiwa, ukat yanaptʼarakistaspawa (Salmo 86:5; Lucas 11:9-13). Inas masturbación armañax wali chʼamächispa, ukampis maynix uk jan mayampi lurxañataki taqi chuyma chʼamachasini ukat arrepentisini ukhaxa, wali askïniwa. Ak amtañasapuniwa, “Diosax jukʼamp jachʼawa chuymasat sipansa, jupasti taqi kunwa yatiraki” (1 Juan 3:20). Jupax uñtanistu ukhaxa, janiw juchanakas thaqkiti, jan ukasti kunjam chuymanïtansa ukwa uñjistu. Ukat niyakixay wali sum uñtʼchistuxa, khuyaptʼayita sas achikastan ukhaxa, wal khuyaptʼayistu. Ukhamasti altʼat chuymampiw mayisiñasa, kunjamtï mä wawax awkipamp yanaptʼayasiñatakix taqi chuyma mayiskixa ukhama. Jupaw chuymas qʼumachistaspa (Salmo 51:1-12, 17; Isaías 1:18). Ukampis janiw Diosar mayisiñasakïkiti, jan ukasti ukarjam sarnaqañasarakiwa, ukat janirakiw qʼañu luraskirinaksa uñchʼukiñasäkiti, ni jan wali jaqinakampis chikachasiñasäkiti. b
Ukampis maynix masturbación jan armirjamäkani ukhaxa, awk taykapampiw uka tuqit parlaspa, maysa tuqitxa, yanaptʼañ muniri amuytʼasir mä jilatampis jan ukhax mä kullakampis parltʼarakispawa (Proverbios 1:8, 9; 1 Tesalonicenses 5:14; Tito 2:3-5). c
a Chachatsa warmitsa majtayasiñkamaw chhuxurasiñ llawqʼasiñ yatipxi, ukaw masturbación sataxa.
b Waljaniw computadorxa taqinin uñjañ chiqanakar utan uchapxi, ukhamatwa kunsa maynix uñchʼukiski ukxa yatipxaspa. Yaqhipasti uka jan walinakat jarkʼaqir programanakwa uchapxaraki. Ukampis janiw taqi uka jan walinakatxa qʼal jarkʼaqkapunispati.
c Masturbación jaytañatakix kun lurañas wakisispa uka tuqit jukʼamp yatxattʼañatakix akïr qillqatanak uñxattʼasma: “Los jóvenes preguntan... ¿Cómo puedo superar este hábito?” ukax ¡Despertad! noviembre 2006 ukankiwa, ukat Kunsa wayn tawaqunakax yatiñ munapxi siski ukwa mayïr libropan uñxattʼarakisma, 205 janat 211 janakama. Uka qillqatanakaxa Jehová Diosan Qhanañchirinakapan luratawa.
