Munasitapäsna ukwa Diosax muni. Taqi kunxaru Munañani jachʼa Diosan munasitapäsmawa, ¿uk yatiyätati? Nayrapachan jakasiri Abrahanax Diosan munasitapa satänwa (Santiago 2:23, NM). Biblianxa Diosan munasita yaqha chachanakat warminakat qillqatawa, jupanakasti jachʼa bendicionanakwa katuqapxäna. Jichhurunakanxa, waljanirakiw uraqpachan Diosan munasitanakapäpxi. Jumax Diosan munasitaparakïsmawa.

Jaqin munat masipäñat sipansa Diosan munasitapäñaxa jukʼampi khusawa. Diosax janipuniw jaytjkaspati taqi chuyma luqtir munasitanakaparuxa (Salmo 18:25). Diosan munasitapäñaxa qamirïñat sipansa jukʼampi askiwa. Kunapachatix qamirinakax jiwxapxi ukhaxa, yaqhanakaw qullqipxa katuntasxapxi. Ukampisa, Diosan munasitanakapaxa jan khitins apaqkañ aski churäwinipxiwa (Mateo 6:19).

Inas yaqhipanakax Diosat yatiqañamxa jan munapkchispati. Munat masinakamampi familiaranakamampiwa jan munapkaspati (Mateo 10:36, 37). Larchʼukipxätam jan ukax axsarayapxätam ukhaxa, jisktʼasiñamawa: “¿Khitirus kusisiyañ muntxa, jaqi masijaruti jan ukax Diosarucha?” sasa. Amuytʼasma: Maynitix jan manqʼxamti siristam ukhaxa, ¿janit mayampis manqʼxasma?, ¿manqʼaskakismaxaya? Jakañatakixa manqʼañasapuniwa. Ukhamaxa, Diosax wiñay wiñayatakiw jakayiristma. Ukatwa, kunjamsa Diosan munasitapäsma ukxa yatiqaskakiñamaxa, jan yatiqamti sirinakaruxa janirak istʼamti (Juan 17:3).