Jiwañaxa janiw jakawjamäkiti. Ikimpi sasiwa (Juan 11:11-14). Jiwatanakaxa janiw istʼapkaspati, uñjapkaspasa, parlapkaspasa, janirakiw lupʼipkarakispasa (Eclesiastés 9:5, 10). Kʼari yupaychäwinakaxa, jiwatanakaxa ajayjamaw sarxapxi nayra jiwatanakampi jikisiñataki sasaw yatichapxi. Ukampisa, janiw Bibliax ukham yatichkiti.

Jiwatanakaxa janiw yanapkistaspati, janirakiw ñanqhach­karakistaspasa. Taqiwjanakanwa, jiwatanakampi sumankañatakixa kunayman lurapxi ukat waxtʼanaksa luqtapxaraki. Ukampisa, aka luräwinakaxa Diosatakix janiw walïkiti, Satanasan kʼari yatichäwinakapawa. Janirakiw jiwatanakarus kusisiykaspati, jiwatäxapxchixaya. Jiwatanakaruxa janiw axsarañasäkisa yupaychañasäkisa. Diosarukipuniw yupaychañasa (Mateo 4:10).

Jiwatanakaxa jaktanipxaniwa. Jutïrinakanxa, Jehová Diosax kusipach Uraqin jakapxañapatakiw jiwatanakaruxa sartayani (Juan 5:28, 29; Hechos 24:15). Kunjamtï ikiskirinakaru sartayksna, ukhamwa Diosaxa jiwatanakarux sartayani (Marcos 5:22, 23, 41, 42).

Jiwatanakax jakaskakiw sañax kʼariwa, Supay Satanasawa jaqinakaru ukham amuyayi. Jiwatanakan ajayupax jakaskakispasa, usunaksa jan waltʼañanaksa apankaspa ukhamwa Satanasampi saxranakapampix jaqinakaruxa amuyayapxi. Satanasaxa, samkanakampi uñstäwinakampiwa jaqinakarux sallqji. Ukatwa jiwatanakampi parlañ munirinakaruxa Jehová Diosax juchañchixa (Deuteronomio 18:10-12).