Satanasampi saxranakapampixa janiw Diosaru luqtañasxa munapkiti. Qhawqhanirusa Diosat jithiqtayañxa munasipkakiwa. ¿Kunjamsa? Mä tuqitxa kʼari yupaychäwinakampiwa (2 Corintios 11:13-15). Bibliata jan chiqa yatichiri yupaychäwinakaxa kʼariwa. Kʼari yupaychäwixa laqʼuntata chʼuqimpi sasiwa, uñxatataxa suma chʼuqjamaspawa, ukampisa manqhatxa suxuki, jan kunataki. Ukatxa jan waltʼañanakaruwa puriyistaspa.

Chiqakankañani Jehová Diosax kʼari yupaychäwinakaruxa janiw iyawskaspati. Kunapachatix Jesusax aka Uraqinkkäna ukhaxa, kʼari yupaychäwi irpirinakaw Jesusarux jiwayañ munapxäna. Jupanakaxa chiqampisa Diosaru yupaychapkaspa ukham amuyasipxäna. “Mä sapa awkinikïpxtwa, ukasti Diosawa” sapxirïnwa. Ukampisa, ¿Jesusax walikiw sänti? Janiwa. Jupaxa ukxaruxa sarakïnwa: “Jumanakan awkimax Supayawa” sasa (Juan 8:41, 44). Jichhürunakanxa, waljaninakaw Diosarus yupaychasipkaspa ukham amuyasipxi. Chiqpachansa, Satanasampiru saxranakapampiruw yupaychasipki (1 Corintios 10:20).

 Mä ñusat alixa jan wali achunakaniwa, uka kikparakiwa kʼari yupaychäwinakax jan wali lurir jaqinakaptayi. Jan wali lurir jaqinak utjatapatwa akapachax jan waltʼañanakampi phuqhantataxa. Utjiwa qʼañu sarnaqañanaka, nuwasiñanaka, lunthatasiñanaka, tʼaqhisiñanaka, jiwayasiñanaka, violacionanaka. Aka jan walinak lurir jaqinakaxa yupaychäwinakarux sarapxiwa, ukampisa uka yupaychäwinakaxa jupanakarux janiw askinak lurapxañapataki yanapapkiti. Janitï jan wali luräwinaka jaytapkani ukhaxa, janiwa Diosan munasitapapkaspati (Mateo 7:17, 18).

Kʼari yupaychäwinakaxa lurat diosanakaru mayisiñwa yatichapxi. Diosax sistuwa, janiw lurat diosanakarux mayisipxätati. Ukhamaskapuniwa. ¿Maynitix jiwasampi jan parlkaspa, ukat fotosarux arxayarakispa, walikiw sasmati? ¿Uka jaqix munat masisäspati? Janiwa. Jehová Diosax janiw lurat uñnaqanakaru arxayañasxa munkiti jan ukasti Juparuki arxayapxaspa ukwa muni (Éxodo 20:4, 5).

Kʼari yupaychäwinakaxa, chʼaxwäwinakan jaqi jiwayañaxa walikiw sasaw yatichapxi. Jesusax sänwa, Diosan munasitanakapaxa jupanakkamaw munasisipxani sasa. Munat masinakasarux janiw jiwayksnati (Juan 13:35). Janirakiw ñanqha jaqinakaru jiwayañas walïkiti. Kunapachatix Jesusaru uñisirinakapaxa katuntapkäna ukhaxa, janiw arkirinakapampix jarkʼaqayaskänti (Mateo 26:51, 52).

Kʼari yupaychäwinakaxa, ñanqha jaqinakax infiernon tʼaqhisipxani sasaw yatichapxi. Ukampisa Bibliax yatichiwa, juchaxa jiwañaru apirïtapa (Romanos 6:23). Jehová Diosax munasiriwa. ¿Ukham munasiri Diosax jaqinakaru wiñayataki tʼaqhisiyaspati? ¡Janiwa! Kusipachanxa Jehová Diosan iyawsata mä sapa yupaychäwikiw utjxani (Apocalipsis 15:4). Satanasan kʼarinakapampi sarayata yupaychäwinakaxa chhaqtayatäxapxaniwa.