Supay Satanasawa Diosaru uñisiñxa pʼiqinchi. Jupax Jehová Diosaru kutkatasiri mä ajayuwa. Satanasaxa Diosaru chʼaxwaskakiwa ukat jan waltʼäwinakampiw jaqinakarux tʼaqhisiyi. Satanasaxa kʼarinak parliri, jaqi jiwayiri ukat ñanqha ajayuwa (Juan 8:44).

Yaqha angelanakaw Satanasampi mayachasipxatayna Jehová Diosaru kutkatasiñataki. Biblianxa uka ñanqha ajayunakaxa saxranaka satäpxarakiwa. Uka saxranakaxa Satanasjama jaqinakaru uñisirinakawa. Jaqinakaru tʼaqhisiyañ munirinakawa (Mateo 9:32, 33; 12:22). Satanasampi saxranakapampiruxa Jehová Diosaw wiñayataki tukjani. Mä jukʼa tiemponikïxapxiwa jaqinakaru tʼaqhisiyañatakixa (Apocalipsis 12:12).

Diosan munasitapäñatakixa, Satanasan munañapxa janiw lurañasäkiti. Satanasampi saxranakampixa Jehová Diosaruw uñisipxi, ukatxa, jupanakjama Diosaru uñisisksna uk munapxaraki. Ukatpi sum amuytʼasiñasaxa: ¿Khitirus kusisiyañ muntxa, Supay Satanasaruti jan ukax Jehová Diosarucha? sasa. Wiñay jakañ munasaxa, Diosan munañapwa lurañasa. Satanasaxa, kunaymani tuqitwa jaqinakarux sallqjañ mä arunxa engañjañ yati, ukatakixa walja sipitanakaniwa. Ukhamatwa waljaninakaru sallqji (Apocalipsis 12:9).