Kusipachax janiw akapachjamäkaniti. Diosax janipuniw jan waltʼäwinaksa, usuñanaksa ukat tʼaqhisiñanaksa utjañapxa munkänti. Jutïr urunakanxa, Diosax aka Uraqxa kusipachtayaniwa. ¿Kunjamänisa? Bibliax kamspachasa uk uñxattʼañäni.

Suma jaqinaka. Diosan munasitanakapaxa kusipachanwa qamasipxani. Jupanakkamax munasiñampiw taqi kunsa lurapxani ukat Jehová Diosan chiqa kamachinakaparjamaw sarnaqapxarakini (Proverbios 2:21).

Manqʼax waljäniwa. Kusipachanxa, janiw khitisa manqʼat awtjata sarnaqxaniti. Bibliax siwa: “Trigox [jan ukax manqʼaxa] yapunakan jilarkir utjpan” (Salmo 72:16).

Suma utanaka, suma irnaqäwinaka. Kusipach Uraqinxa, sapa familiawa utanïxapxani, ukatxa taqiniw kusisiykiri suma irnaqäwinïxapxani (Isaías 65:21-23).

 Uraqpachana sumankaña. Janipuniw mayampis chʼaxwäwinakanxa jaqinakax nuwasxapxaniti janirakiw jiwxapxarakinisa. Diosan Arupax siwa: “[Diosax] nuwasiñ tʼakurayi” (Salmo 46:8, 9).

Kʼumar jakäwi. Biblianxa jutïr urunakatakix siwa: “Janiw khitis [Kusipachanxa] siskaspati: ‘Usutätwa’ sasaxa” (Isaías 33:24). Janiw khitis kujüxaniti, juykhüxanisa, uqaräxanisa amutüxarakinisa (Isaías 35:5, 6).

Janiw llakisiñas usuntañas jiwañas utjxaniti. Diosan Arupax siwa: “Janirakiw jiwañas, jachañas utjkxaniti, warariñasa ni usuyasiñasa. Taqi kunanakatï nayrax utjkän ukanakax tukusxiwa” (Apocalipsis 21:4).

Janiw ñanqha jaqinakax utjxaniti. Jehová Diosax jutïritakix siwa: “Jan wali sarnaqir jaqinakasa, jan sum phuqhasa sarnaqirinakasa, aka uraqitxa apanukuta tukjatäpxaniwa” (Proverbios 2:22).

Jaqinakax maynit maynikamaw munasisipxani yäqasipxarakini. Janiw kʼarimpi aynachtʼayirinakasa tʼaqhisiyirinakasa utjxaniti, janirakiw michʼanakasa uñisirinakasa utjxaniti. Taqinisa mayakïxapxaniwa ukatxa Diosan chiqa kamachinakapar istʼasaw jakasxapxani (Isaías 26:9).