PARAÍSO oraqenkkasmas ukham amuytʼañäni, mä qoqat mä suma manzana apaqtʼasaw kunja sumasa uk muktʼtajja. Alwatpachaw manzananak apthapisktajja, ukampis janiw kuna qaritäktasa, ukatwa jukʼamp irnaqtʼañ muntajja. Ukat uka jakʼanwa mamamajj yanaptʼir jutawayapki uka familiaranakapampi ukat amigonakapampejja, wali kusisit parltʼasisajj manzananak apthapiskaraki. ¡Jupajj janiw chuymankipstatäkisa, tawaqokïskiwa! ‘Supayan ñanqhapachapanwa jupajj chuymankipstawayi’ sasajj janiw sañjamäkiti. Kunjamsa mamamajj usuntas jukʼat jukʼat aynachtʼawayi ukat juman uñjkat jiwawayi, ukwa amtastajja. Allintapkäna ukhajj wal jumajj jachayätajja. Ukampis jichhajja, yaqha jaqenakamp chikaw mamamajj kʼumara ukat wali kusisit juman jakʼaman irnaqtʼaski.

¡Uka urojj purinipuniniwa! Janiw uka toqet pächasktanti, ¿kunatsa? Diosajj kuntï arski uk phoqapuniwa. Jutïr urunakana ukat Armagedón chʼajjwäwi janïr qalltkipanjja, Diosajj kuntï arsuwayki uk kunjamsa Reinop toqejj phoqani ukwa aka jaljan yatjjataskañäni. Armagedón chʼajjwäwi pasatatsa, kuna arsutanakapas phoqasini ukwa mä qawqhanak uñjarakiñäni. Mä jukʼa tiempotjja, Diosan Reinopajj aka Oraqpachwa apnaqjjani ukat taqe kunwa machaq lurani. ¡Uk uñjañajj wali kusiskañapunïniwa!