1, 2. Suma Oraqer niya mantañampïsipkäna ukhajja, ¿kuna jan walinakansa israelitanakajj uñjasipjjäna, ukat kunjamsa Diosajj jupanakar chuymachtʼäna?

 KUNAPACHATÏ israelitanakajj 1513 antes de Cristo maran Suma Oraqer mantañatak sarasipkäna ukhajja, jupanakajj jachʼa ukhamarak ajjsarkañ wasarnamaw sarapjjañapäna, uka wasarajja venenon asirunakampi escorpionanakamp phoqantatänwa (Deuteronomio 8:15). Ukhamarusa, wasarankir thak sarkasajj enemigonakapamp atacataw jupanakajj uñjasipjjaspäna. Ukampis ¿kunjamsa Jehová Diosajj jupanakar wasaran jan walinakat jarkʼaqpachäna?

² Jehová Diosajja markaparojj aka arunakampiw chuymachtʼäna: “Kuntï nayajj egipcionakar lurkta ukanakjja, jumanak pachpaw uñjapjjtajja. Nayasti mä pakar uñtasitaw jumanakarojj chheqanakaj patjjar nayan ukar apanipjjsma” sasa (Éxodo 19:4). Kunjamsa Egipto markat qhespiyäna ukwa Jehová Diosajj israelitanakar amtayäna, kunjamsa mä pakar uñtatajj jupanakarojj Egipto markat salväna uksa amtayarakïnwa. Cheqansa, ‘pakanakan chheqanakapat’ parlasitapajja, Jehová Diosajj kunjamsa markapar jarkʼaqäna uk sum amuyañatakiw yanaptʼistu. Kunatsa ukham sistan uk jichhajj yatjjatañäni.

3. ¿Pakan chheqanakapat parlasitapajj kun amuyañatakis yanaptʼistu?

³ Pakanakajj wali jachʼa chheqanakaniwa, niya pä metronakaw medirakispa. Mä urun kuna horatï wali juntʼüki ukhajja, pakanakajj wawanakapar jarkʼaqañatakiw chheqanakap janatatapjje, ukhamat mä paraguar uñtat  wawanakapar lupit jarkʼaqañataki. Kunjamtï pakajj wawanakapar jarkʼaqkejja, ukhamarakiw Jehová Diosajj israelitanakarojj jan walinakat jarkʼaqäna. Ukampis ukham jarkʼaqatäñatakejja, jupanakajj janiw Diosat jitheqtapjjañapäkänti (Deuteronomio 32:9-11; Salmo 36:7). ¿Diosajj jichha tiempon markapar jarkʼaqaskakpachati?

4, 5. ¿Kunatsa Jehová Diosaw jan walinakat jarkʼaqestani sasajj confiytanjja?

⁴ Jehová Diosajja servirinakapar jarkʼaqañatakejj wali chʼamaniwa. Cheqansa, jupajj “Taqe Chʼamani” Diosawa, mä arunjja jupajj kuntï lurañ amtki uk janiw khitis ni kunas jarkʼkaspati (Génesis 17:1). Jehová Diosan chʼamapajj lamar qotankir jachʼa oladanakjamawa, uka chʼamapampejj kuntï jupajj lurañ munki ukanakwa luraspa. Ukampis ¿uka chʼamapampejj jarkʼaqestaspati?

⁵ Jïsa, Jehová Diosajj servirinakapar jarkʼaqañwa arsuwayi. Salmo 46:1 textojj akham siwa: “Diosaw jiwasan imantasiñasasa, chʼamasasa, llakisiñ tiemponakanjja jankʼakiw jupan yanaptʼap jikjjatsna” sasa. Ukhamajj Jehová Diosaw cuidaskistani sasajj taqe chuymaw confiysna, kuna laykutejj jupajj “jan kʼarisir” Diosawa (Tito 1:2). Jehová Diosajj kunar uñtatas servirinakapar jarkʼaqaraki uk jichhajj yatjjatañäni.

6, 7. 1) Bibliajj qellqaskäna uka tiemponjja, ¿kunjamsa mä awatirejj ovejanakapar jan walinakat jarkʼaqerïna? 2) Jehová Diosajj kunjamsa servirinakapar jarkʼaqe yanaptʼaraki uk qhanañchañatakejja, ¿kuna toqetsa Bibliajj parli?

⁶ Jehová Diosaw Awatirisajja, “jiwasajj jupan markapätanwa, pastopankir ovejanakarakïtanwa” (Salmo 23:1;  100:3). Ovejanakajj janiw jupanak pachpajj jarkʼaqasiñ puedipkiti, ukatwa Bibliajj qellqaskäna uka tiempon mä awatirejj leonanakata, qamaqenakata, osonakata ukat lunthatanakat jan ajjsaras jarkʼaqañapäna (1 Samuel 17:34, 35; Juan 10:12, 13). Ukampis mä awatirejj wali munasiñampiw ovejanakar uñjañapäna. Amuytʼañataki, mä ovejajj tamapat jayan wawachasïna ukhajja, jan walinakanwa uñjasïna. Ukatwa awatirejj uka ovejar jarkʼaqañatakejj uka cheqan quedasirïna, uka qhepatjja jiskʼa ovej qallur ichjjarusajj mayni ovejanakan ukaruw apjjerïna.

⁷ Jehová Diosajj uka awatirjamarakiw taqe chuyma jarkʼaqañ munistu (Ezequiel 34:11-16). Kunjamtï aka libronkir capítulo 2 ukan yatjjataniwayktanjja, Isaías 40:11 textojj Jehová Diosat akham siwa: “Jupajj mä awatirjamaw uywanakap sum uñjani. Amparapampiw corderonakarojj juntthapini, ichjjartʼasaw aparakini” sasa. ¿Kunjamatsa mä jiskʼa ovejitajj awatiripamp ichjjaruyasi? Nayraqatajj awatiriparuw jakʼachasi ukat awisajj kayupatwa moqtaraki, ukhamat awatiripamp ichjjaruyasiñataki. Ukampis uka jiskʼa ovejar ichjjaruñatakejja, awatirejj qonqortʼasisaw munasiñamp pechop jakʼar ichjjarusi. Uka uñachtʼäwejja, qhawqsa Jehová Diosajj munasistu, qhawqsa yanaptʼañ munarakistu ukwa uñachtʼayistu.

8. 1) ¿Jehová Diosajj khitinakar jarkʼaqañsa arsuwayi, ukat Proverbios 18:10 textojj kamsisa? 2) ¿Diosan sutipar imantasiñatakejj kunanaksa lurañasa?

⁸ Jehová Diosajj jupar jakʼachasirinakarojj jarkʼaqañwa arsuwayi. Proverbios 18:10 textojj akham siwa: “Jehová Diosan sutipajja mä jachʼa torrewa, cheqapar sarnaqer jaqejja ukar tʼijusaw jarkʼaqasi” sasa. Bibliajj qellqaskäna uka tiemponjja, jan walinakat imantasiñatakejj torrenakaw  wasaran lurasirïna. Maynitï jan walin uñjasisin jarkʼaqatäñ munäna ukhajja, uka torrenakaruw escapapjjañapäna. Khitinakatï jichha tiempon Jehová Diosan sutipar imantasiñ munapki ukanakajja, uka pachparakwa lurapjjañapa, ukampis janiw Diosan Jehová sutip mä amuletor uñtatajj aleqak aytasipjjañapäkiti. Antisas juparojj sumwa uñtʼapjjañapa, taqe chuymaw confiyapjjañapa ukat cheqap leyinakaparjamaw sarnaqapjjañaparaki. Jiwasatï Jehová Diosar taqe chuyma confiyañäni ukhajja, mä torrer uñtataw jupajj jan walinakat jarkʼaqestani.

9. ¿Kunjamsa Jehová Diosajj servirinakapar jarkʼaqawayi?

⁹ Jehová Diosajj jarkʼaqapjjämawa sasajj janiw aleq ukhamak arsuwaykiti. Bibliajj qellqaskäna uka tiemponjja, Diosajj markapar jarkʼaqañatakejj walja milagronakwa luräna, ukhamatwa jupajj qhawqha chʼamanisa uk uñachtʼayäna. Sañäni, wali chʼamani enemigonakapatjja, Jehová Diosajj chʼamapampiw Israel markaparojj jarkʼaqäna (Éxodo 7:4). Maysa toqetjja, Jehová Diosajj sapa mayni servirinakaparuw jan walinakat jarkʼaqarakïna.

10, 11. ¿Kunjamsa Jehová Diosajj servirinakapar jarkʼaqäna? Uk mä qhawqha uñachtʼäwinakamp qhanañchtʼam.

¹⁰ Mä kutejj wali chʼamani Nabucodonosor reyejja, Sadrac, Mesac ukat Abednego waynanak contraw wal colerasïna, kuna laykutejj uka kimsa waynanakajj janiw qorit lurat jachʼa estatuar altʼasiñ munapkänti. Ukatwa reyejj “jumanakatï jan adorañ munapkätajja, ukaratpachaw nina aqaskir hornor jaqontatäpjjäta” sasin amenazäna, ukatjja burlasisaw akham sarakïna:  “¿Kawkïr diosaraki jumanakarojj amparanakajat salvapjjeristamsti?” sasa (Daniel 3:15). Ukampis uka kimsa waynanakajja, Jehová Diosaw jarkʼaqestani sasaw confiyapjjäna, ukatwa akham sapjjäna: “Jachʼa rey, ukhamatï pasañapächejja, nanakajj servipkta uka Diosaw nina aqaskir hornotsa amparanakamatsa salvapjjetaspa” sasa (Daniel 3:17). Uka hornojj paqallq kuti juntʼuchatäsajj wali paripunïnwa, ukampis Taqe Chʼamani Diosatakejj janiw kunäkänsa. Jehová Diosajj kunjamsa uka kimsa serviripar jarkʼaqäna uk uñjasajja, Nabucodonosor reyejj akham sänwa: “Janiw aka Diosjamajj yaqha salviri diosajj utjkiti” sasa (Daniel 3:29).

¹¹ Jehová Diosan Yoqapajj María virgen tawaqon purakapankkäna ukhajja, ukhamarakiw chʼamapamp jarkʼaqäna. Mä angelajja María tawaqorojj akham sänwa: “Jumajj usuriptätawa, mä yoqall wawa ususïta” sasa. Ukjjarojja “espíritu santow jumjjar jutani, Jachʼa Diosan chʼamapaw chʼiwipamp imjjatätam” sasaw sarakïna (Lucas 1:31, 35). Diosan Yoqapajj Marian purakapankkäna ukhajja, kunayman jan walinakan uñjasirjamänwa. ¿Kunatsa ukham sistanjja? Nayraqatajja, taykapan juchanïtap laykojj juchanirakiw Diosan Yoqapajj nasispäna, maysa toqetjja Supayajj janïr naskipanwa jiwayaspäna. Ukampis jan ukanak pasañapatakejja, Jehová Diosaw Mariarojj usuriptkäna ukhatpachajj jarkʼaqäna, mä arunjja Yoqapar jan walinakat jarkʼaqañatakejj mä jachʼa perqampis muyuntaykaspäna ukhamänwa. Ukhamatwa Diosan Yoqapajj jan juchanïkänti, janirakiw demonionakasa ni jaqenakas jan waltʼayapkänti. Jesusajj waynäjjäna ukhakamas Diosajj jan walinakat jarkʼaqaskakïnwa (Mateo 2:1-15). Cheqansa, Jesusajj vidap aptʼaskäna ukhakamaw Jehová Diosajj jarkʼaqäna. 

12. Bibliajj qellqaskäna uka tiemponjja, ¿kunatsa Diosajj milagronak toqe yaqhep servirinakapar jarkʼaqäna?

 ¹² ¿Kunatsa Jehová Diosajj yaqhep servirinakapar milagro toqe jarkʼaqpachäna? Amtanakap phoqañatakiw Diosajj servirinakapar jarkʼaqäna, cheqas ukaw jupatakejj taqe kunat sipans jilanki. Sañäni, Diosan amtanakap phoqasiñapatakisa jaqenakajj wiñay jakañ katoqapjjañapatakisa, Jesusar jiskʼatpach jarkʼaqañajj wali importantënwa. Maysa toqetjja, kunjamsa chʼamap toqejj markaparusa jan ukajj servirinakaparus jarkʼaqawayi ukanakwa Jehová Diosajj Bibliar qellqayawayi. Taqe ukanakajja, “jiwasar yatichañatakiw qellqasiwayi, ukhamat kuntï Diosajj jutïrin churkistani uk suytʼañasataki. Uka Qellqatanakaw aguantañasatak yanaptʼistu, chuymachtʼarakistu” (Romanos 15:4). Kunatï Biblian qellqatäki uka sarnaqäwinakajja, Taqe Chʼamani Diosasar jukʼamp confiyañatakiw yanaptʼistu. Ukampis ¿kunjamsa jichha tiempon Jehová Diosajj jarkʼaqestu?

13. Jehová Diosajj milagronak toqew jan walinakat jarkʼaqestani sasajj ¿kunatsa jan suyañasäki?

¹³ Jehová Diosajj jan walinakat jarkʼaqapjjämawa sasinsa arsuwaykchejja, milagronak toqew jupajj jarkʼaqestani sasajj janiw suyañasäkiti. Jichha tiemponjja, Jehová Diosan servirinakapajj jan walinakan uñjasikipuniñäniwa. Inas jan kunani, guerranakamp jan waltʼayata, usunakamp aynachtʼayata ukat jiwayat uñjaschiñäni. Jesusajj discipulonakaparojj akham sänwa: “Jaqenakajj tʼaqesiyapjjätamwa, jiwayapjjarakïtamwa” sasa. Ukatjja “khititejj tukuykam aguantki ukaw salvatäni” sasaw sarakïna (Mateo 24:9, 13). Jehová Diosatï servirinakapar sapa kuti jan walinakat jarkʼaqestaspa ukhajja, interés  laykukis Jehová Diosar sirvksna ukhamwa Supayajj amuyaspa (Job 1:9, 10).

14. Diosajj taqe servirinakaparojj janiw mä igualak jarkʼaqkiti sasajj ¿kunatsa sissna?

¹⁴ Nayra tiemponjja, Jehová Diosajj janiw servirinakaparojj jiwañat salvkapunïnti. Sañäni, apóstol Santiagojj 44 mara jakʼanakan Herodes reyimp jiwayataw uñjasïna. Mä qhawqha tiempotjja, apóstol Pedrojj ‘Herodesan amparapat’ salvataw uñjasirakïna (Hechos 12:1-11). Ukampis Santiagon Juan jilapajja, uka pä apostolonakat sipans jukʼamp maranakaw jakawayäna. Cheqas Diosajj janiw taqe servirinakapar mä igualak salvkapuniti, taqenirakiw “akatjamat jan waltʼäwinakan” uñjastanjja (Eclesiastés 9:11). Ukhamajj ¿kunjamsa Jehová Diosajj jichha tiempon jarkʼaqestu?

15, 16. 1) ¿Kunjamsa Jehová Diosajj servirinakapar jarkʼaqatap uñachtʼayi? 2) Jehová Diosaw jichhasa “jachʼa tʼaqesiñ” tiemponsa jarkʼaqestani sasajja, ¿kunatsa taqe chuyma confiytanjja?

¹⁵ Kunjamsa Diosajj vidanakas jarkʼaqestu uka toqet nayraqat amuytʼañäni. ‘Aka mundo apnaqer’ Supayajja, Jehová Diosan servirinakaparojj qʼal tukjañwa muni. Ukhamajj Diosatï jan jarkʼaqkistaspajja, Supayajj qʼalwa chhaqtayistaspa (Juan 12:31; Apocalipsis 12:17). Wali chʼamani yaqhep gobiernonakajja, jan predikjjañasatakejj kunayman toqetwa jarkʼawayapjjestu, jiwasar chhaqtayañatakis wal chʼamachasiwayapjjaraki. Ukhampachas janiw jiwasajj aynachtʼawayktanti, jan ukasti jan ajjsartʼasaw predicaskaktanjja. Jehová Diosan servirinakapajj janis jarkʼaqerinïksna ukhamwa markanakajj amuyapjje, ukampis Jehová Diosaw chʼamapampejj jarkʼaqaskistu, ukatwa jupanakajj predicación jarkʼtañ jan puediwayapkiti (Salmo 17:7, 8).

 ¹⁶ “Jachʼa tʼaqesiñ” tiemponjja, Jehová Diosajj jan wali jaqenakaruw qʼal tukjani. Taqe ukanak uñjasajj janiw kunäkipans ajjsarayasiñasäkiti, uka toqet parlkasajj Bibliajj akham siwa: “Jehová Diosajja, yantʼan uñjasipki uka Dios chuyma jaqenakarojj kunjam salvañsa yatiwa, jan wali jaqenakar imañsa yatirakiwa, ukhamat juicio urun tʼunjatäpjjañapataki” sasa (Apocalipsis 7:14; 2 Pedro 2:9). Uka uru janïr purinkipanjja, aka pä toqet janiw payachasktanti. Maya, Jehová Diosajj jupat jan jitheqtir servirinakaparojj arjjatapuniniwa, janiw Supayan servirinakapar tukjañap dejkaniti. Paya, Diosajj taqe chuyma servirinakaparojj wiñay jakañwa paraison churani, jiwatäjjapjjchi ukhasa mayampiw jaktayani. Cheqansa, khitinakatï jiwatäjjapjje ukanakat Jehová Diosajj janipuniw armaskaniti (Juan 5:28, 29).

17. ¿Kunjamsa Jehová Diosajj Arup toqejj jan walinakat jarkʼaqestu?

¹⁷ Jichha tiemponjja, Jehová Diosajj Biblia toqew jarkʼaqarakistu. Cheqas Diosan Arupajj “jakkiriwa, wali chʼamanirakiwa”, cambionak lurañatakisa ukat kusisit jakasiñatakis yanaptʼistuwa (Hebreos 4:12). Biblian wiñay yatichäwinakaparjam (principios bíblicos) sarnaqañäni ukhajja, jan walinakarojj janiw purtʼaskañäniti. Isaías 48:17 textojj akham siwa: “Naya Jehová Diosajj juman Diosamätwa, khititï juman askimatak yatichktam ukajj nayätwa” sasa. Jiwasatï Diosan Aruparjam sarnaqañäni ukhajja, wali sumaw jakasiñäni, jutïrinsa wiñayatakiw jakasirakiñäni. Amuytʼañataki, Diosar jan istʼir jaqenakajj qʼañu juchanak lurasajj kunayman jan walinakanwa uñjasipjje. Ukampis jiwasajj Biblian yatichäwinakaparjam sarnaqasajja, janiw qʼañu jucha lurañanakarojj purtʼasktanti (Hechos 15:29; 2 Corintios 7:1). Cheqansa, Biblian ukham yanaptʼatapat walpun Jehová Diosar yuspärtanjja.

18. Jupar serviskakiñasatakejj ¿kunjamsa Jehová Diosajj yanaptʼistu?

¹⁸ Jehová Diosajja, taqe kunat sipans jupamp sum apasiñatakiw yanaptʼistu. Jan walinakan uñjasktan ukhajja, aguantañasatakejj kunatï wakiski ukanakwa churistu, jupamp suma amigöskakiñatakis yanaptʼarakistuwa. Taqe ukanak luratapatjja, wali suma jichha tiempon jakastanjja, jutïrinsa wiñayatakiw jakasirakiñäni. Jehová Diosajj jupar serviskakiñatakejj kuna yanaptʼanaksa churistu ukanakatwa jichhajj yatjjatañäni.

19. ¿Kunjamsa Diosan espíritu santopajj yantʼanakar saykatañatak yanaptʼistaspa?

¹⁹ Jehová Diosajj oracionanak istʼir Diosawa (Salmo 65:2). Jan walinakan uñjasisajj wali aynachtʼatäktan ukhajja, Jehová Diosamp parltʼasiñaw sum jikjjatasiñasatak yanaptʼistaspa (Filipenses 4:6, 7). Diosajj problemanakas janis mä milagro toqe chhaqtaykchinejja, oracionanakasar jaysanisaw yatiñ churistani (Santiago 1:5, 6). Ukatjja espíritu santwa churarakistani (Lucas 11:13). Cheqansa, espíritu santojj jan walinakar saykatañatakiw yanaptʼistu, ukhamatwa jan walinak aguantañatakejj chʼamanïtanjja. Jehová Diosajj niyaw taqe jan walinak chhaqtayjjani (2 Corintios 4:7).

20. ¿Kunjamsa Jehová Diosajj jilat kullakanakas toqejj jan walinakat jarkʼaqestu?

²⁰ Awisajja, jilat kullakanak toqew Jehová Diosajj jan walinakat jarkʼaqestu. Cheqansa, jupajj taqe servirinakaparuw mayachtʼawayi (Juan 6:44; 1 Pedro 2:17). Jilat kullakanakajj qhawqsa munasistu uk amuytan ukhajja, espíritu santojj Jehová Diosan markap taypinkatapwa qhan amuyaraktanjja. Uka espíritu santojj munasirïñataki,  suma chuymanïñataki ukat khuyapayasirïñatakiw yanaptʼistu (Gálatas 5:22, 23). Ukatwa jilat kullakanakasan ewjjtʼanakapatsa, chʼamañchtʼir arunakapatsa Jehová Diosar wal yuspärañasa. Kuna laykutejj jilat kullakanakas toqew Diosajj cuidistu, ukatjja jupanak toqerakiw jan walinakatsa jarkʼaqestu.

21. 1) ¿Kunjamsa Diosajj “suma phoqeri amuyasir” esclavo toqejj tiempopar yanaptʼanak churistu? 2) Jehová Diosajj kunanaktï churawayktam ukanakampejj ¿kunjamsa yanaptʼasiwayta?

²¹ Ukatjja Jehová Diosajj Bibliat apstʼat qellqatanak toqew jan walinakat jarkʼaqarakistu. Jupajja, “suma phoqeri amuyasir” esclavoruw tiempopar manqʼa jiwasar churañapatak uttʼayawayi. Uka esclavojja Bibliarjamaw Diosar serviñatak yanaptʼanak wakichi, ukanakaw jan aynachtʼañatakejj yanaptʼistu. Ukampis ¿kunjamsa Diosar serviñatak yanaptʼanak tiempopar katoqtanjja? (Mateo 24:45). Suma phoqeri amuyasir esclavojja, Yatiyañataki ukat ¡Sartapjjañäni! sat revistanakwa wakichi, yaqha ukham qellqatanaksa, Internetankir jw.org cheqsa, tantachäwinaksa, asambleanaksa wakicharakiwa. Cheqansa, taqeniw awisajj tantachäwinakan mä discurso toqesa, comentarionak toqesa, jan ukajj mä oración toqes chʼamañchtʼat jikjjatastanjja, taqenirurakiw Bibliat apstʼat mä qellqatan yatichäwipas yanaptʼawayistu. Taqe uka yanaptʼanakjja, Jehová Diosaw jupar serviskakiñatak churistu.

22. ¿Kunatakis Jehová Diosajj chʼamap uñachtʼayi, ukat kunatsa ukajj jiwasatak wali askejja?

²² Jehová Diosajja, “taqe khitinakatï jupar imantasipki ukanakatakejj mä escudowa” (Salmo 18:30). Kunjamtï yatjjatawayktanjja, Diosajj janiw taqe jan walinakat jarkʼaqkapunistuti. Ukampis jupajj amtanakap phoqañatakiw chʼamap uñachtʼayi, kunanaktï lurawayki  ukanakas markapar wal yanaptʼawayi. Jiwasatï jupar jakʼachasiñäni ukat jupamp sum apasiñatak chʼamachasiñäni ukhajja, wiñayatakiw jutïrin wali sum jakasjjañäni. Ukhamajja, jan walinakan uñjaskasajj aguantasipkakiñäni, kuna laykutejj “tʼaqesiñajj mä qhawqha tiempotakikiwa, janirakiw kunäkisa” (2 Corintios 4:17).