1, 2. ¿Kunanakansa Diosan wali suma chuymanïtap qhan uñjtanjja, ukat Bibliajj uka toqet kamsisa?

 INTEJJ wali musparkañ jalantaski ukhajja, mä qhawqha amigonakaw uta anqan manqʼasisipki. Jupanakajj intin jalantatap uñjasajja, wal larurtʼapjje ukat wali sumwa parltʼasipjjaraki. Yaqha cheqansti, wali kusisitaw mä yapuchirejj jallu purjjatipan lartʼasiraki, kuna laykutejj yapupan qʼala wañsutätapat yatisajj wal jupajj uk pasañap suyäna. Ukat yaqha cheqanjja, mä awk taykaw wawapar uñjasajj wal kusisipjjaraki, uka jiskʼa wawapajj ukhapuniw sapak chellqtasin sarnaqañ yateqaski, ukatwa jupanakajj chuymas chuyma jikjjatasipjje.

² Taqe ukanakajja Diosan wali suma chuymanïtapwa uñachtʼayistu. Religionar sarir yaqhep jaqenakajja, sapa kutiw “Tatitojj suma Diosawa” sasin sapjje. Ukampis Bibliajj janiw ukak siskiti, jan ukasti akham sarakiwa: “Khuyapayasiñapajj kunja jachʼasa” sasa (Zacarías 9:17). Uka arunakajj kamsañs muni ukjja, mä qhawqha jaqenakakiw sum amuyapjje. Ukhamajj ¿kunjam toqenakatsa Jehová Diosajj munasirïtapsa khuyapayasirïtapsa uñachtʼaypacha? ¿Diosan ukham chuymanïtapajj kunjamsa sapa maynirojj yanaptʼistu?

3, 4. 1) ¿Khuyapayasiri arojj kamsañs muni? 2) ¿Kunatsa Diosajj munasirïtap laykuw khuyapayasiri chuymanejja sasin sistanjja?

³ Jichha tiemponjja walja jaqenakaw khuyapayasiña aru kunaymaninakat parlañatakejj apnaqapjje. Ukampis uka arojj kamsañsa muni uk Bibliaw sum qhanañchistu. Bibliarjamajja  uka arojj khititï suma chuymanïki, taqe kunans qʼom sarnaqañatak chʼamachaski uka toqet parlañatakiw apnaqasi, ukatwa Jehová Diosarojj wali suma Diosawa sasejja. Ukhamajj chʼamapasa, cheqaparjam taqe kun uñjatapasa, yatiñapasa wali sumapuniwa. Ukatjja wali munasirïtap laykuw Diosajj khuyapayasir chuymanirakejja. ¿Kunatsa ukham sistanjja?

⁴ Khititejj khuyapayasir chuymanïki ukajj luratanakapampiw uñachtʼayi. Apóstol Pablojja maynejj cheqapar sarnaqer mä jaqe layku jiwañat sipansa, suma chuyman jaqe laykuw jiwañ munaspa sasaw säna (Romanos 5:7). ¿Kunatsa ukham sispachäna? Cheqapar sarnaqer jaqejja, kuntï Jehová Diosan leyinakapajj siski ukarjamapuniw taqe kuns phoqe. Ukampis suma chuyman jaqejj janiw leyinakak phoqkiti, jan ukasti chuymapatwa jukʼamp lurañanak amti, yaqhanakar yanaptʼañatakis jupaw nayrankaraki. Kunjamtï aka capitulon yatjjatkañänejja, Jehová Diosajj ukham suma chuymanirakiwa, taqe kunsa munasiñatwa jupajj luri.

5-7. ¿Kunatsa Jesusajj “Suma Yatichiri” sayasiñ jan munkäna, ukat kunsa ukampejj yatichäna?

⁵ Jehová Diosjam suma chuymanejj janiw yaqhajj utjkiti. Jesusan jiwañapajj wali jakʼankjjäna ukhajja, mä jaqew jupar jakʼachasisajj “Suma Yatichiri” sasin säna. Uk satajj akham sasaw Jesusajj sarakïna: “¿Kunatsa suma Yatichiri sista? Janiw khiti jaqes sumäkaspati, jan ukasti Diosakiw sumajja” sasa (Marcos 10:17, 18). Kunatsa Jesusajj ukham säna uk amuyañajj chʼamakïspawa, kuna laykutejj cheqpachapuniw jupajj suma yatichirïna. Ukhamajj ¿kunatsa Jesusajj uka jaqer cheqañchpachäna?

⁶ Amuyatajja Jesusar jachʼañchañatakiw uka jaqejj “Suma Yatichiri” sasin säna. Ukampis Jesusajj humilde chuymanïnwa, taqe jaqenakajj alajjpachankir Awkipar jachʼañchapjjañapwa munarakïna, kuna laykutejj Diosjam suma  chuymanejj janiw yaqhajj utjkiti (Proverbios 11:2). Ukatjja kuntï Jesusajj siskäna ukajj aka wakiskir yatichäwi qhanstayarakïna: Jehová Diosakiw jukʼamp autoridadanejja, ukhamajj kunatï sumäki jan sumäkaraki uk amtañatakejj jupakiw derechoni. Adanampi Evampejj Dios contra saytʼapkäna, walimpi jan walimpi yatiñ churir qoqan achup manqʼantapkarakïna ukhajja, kunatï walïki ukat jan walïkaraki uk jupanakpachpa amtañ munapjjatapwa uñachtʼayapjjäna. Ukampis Jesusajj janiw ukhamäkänti, kunatï walïki ukat jan walïkaraki uk amtañatakejj Diosakiw derechoni sasaw säna.

⁷ Ukhamarusa taqe kunatï sumäki ukanakajj Jehová Diosat jutatapwa Jesusajj yatïna. Santiago 1:17 textojj akham siwa: “Taqe suma regalonakasa perfectöki taqe uka regalonakasa alajjpachatwa juti, mä arunjja alajjpachankki uka  qhananakan Awkipatwa juti” sasa. Kunanaksa suma Diosajj churistu ukanakatwa jichhajj yatjjataskañäni.

8. ¿Kunjamsa Jehová Diosajj suma chuymanïtap taqe jaqenakar uñachtʼayi?

⁸ Taqe jaqenakaw jakkasajj Diosan suma bendicionanakap katoqawayapjje. Salmo 145:9 textojj “Jehová Diosajj taqenimpis suma Diosawa” sasaw qhanañchi. Uka toqet parlkasajja, Bibliajj akham siwa: “Jupajj suma luräwinak lurasaw jupa pachpat qhanañchasïna, alajjpachat jallunaka apayanisa, suma cosecha tiemponak churasa,  manqʼañanakampi sistʼayasa, chuymanakams wal kusisiyasa” sasa (Hechos 14:17). Amuytʼañataki, awisajj mä suma manqʼa manqtʼasisajj wali kusisitaw jikjjatastanjja, kuna laykutejj Diosaw aka oraqsa taqe kunanakatï utjki ukanaks wali sum lurtʼawayi. Ukatwa jallojj tiempopar purjjatanki ukhajj aka oraqen walja manqʼañanakajj utji. Diosajj kunatï sumäki ukanak janiw servirinakaparukejj churkiti, jan ukasti taqeniruw churi. Jesusajj uka toqet akham sänwa: “Jupajj jan wali jaqetakisa suma jaqetakisa taqenitakiw intip jalsuyani, cheqapar sarnaqeritakisa jan cheqapar sarnaqeritakisa ukhamarakiw jallu puriyani” sasa (Mateo 5:45).

9. Manzanan utjatapajja, ¿kunjamsa Jehová Diosan suma chuymanïtap uñachtʼayistu?

⁹ Diosan uka suma regalonakapatjja janiw jaqenakajj yuspärapkiti, intisa, jallusa, suma cosecha tiemponakas ina chʼusataksa utjkaspa ukhamwa amuyapjje. Amuytʼañatakejj manzanat parltʼañäni, uka wali uñtʼat frutajj juntʼu cheqanakan waljapuniw yapuchasi, wali munkaña, mojjsa, walja jugoni, walja vitaminanakani ukhamarakiwa. Ukampis aka oraqen janiw mä kasta manzanakejj utjkiti, jan ukasti mä 7.500 ukha kastanakaw utji, ukanakat yaqhepajj wila, qʼellu, chʼojjña coloranïpjjewa. Jachʼan jiskʼani kunaymaninakaw utjaraki, yaqhepajj uvasanak ukchʼakiwa, yaqhepasti jachʼa toronjanakar uñtasitarakiwa. Ukat manzanan jathapajj jan yäqañjam jiskʼakïkchisa, tiempompejj wali munkañ suma qoqaruw jilsjje (El Cantar de los Cantares 2:3). Ukatjja tiempoparuw (primavera tiempon) wali sum panqartʼi, tiempoparurakiw (otoño tiempon) manzana achunakajj wali sum warkurtani. Uka manzana qoqanakajj mä 75 maranakaw jakaspa, ukhamarusa mä qoqajj 400 kilonakaw sapa marajj churarakispa.

10, 11. Diosan wali suma chuymanïtapjja, ¿kunjamsa cuerposan wali suma lurtʼatätapajj uñachtʼayi?

 ¹⁰ Jichhajj cuerposat parltʼarakiñäni, Jehová Diosajj suma chuymanïtapatwa ‘wali musparkañ lurtʼawayistu’. Jiwasan cuerposajj Diosan luratanakapat jukʼamp yateqañataki ukat ukanakamp kusisit jakasiñasatak lurtʼatawa (Salmo 139:14). Aka capítulo qalltan parlaniwayktan uka toqet parltʼaskakiñäni. Jiwasan nayranakasampejja, lartʼasir wawan ajanupwa uñkatsna, jallun oraqer purintirsa, qʼelluru wilaru ukat yaqha ukham coloranakar tukusin intin jalantatapsa uñjaraksnawa ukat ukanak uñjasajj walpun kusissna. Cheqansa, Diosajj kunayman coloranak uñjañatakiw nayranakas lurawayi, mä arunjja nayranakasajj mä 10.000 millón coloranakwa uñjaspa. ¿Jiñchunakasat kamsaraksnasa? Jiñchunakasampiw mä munat familiarasana ukat amigonakasan arunakap istʼtanjja, jiñchusampirakiw wawanakan lartʼasitanakapsa thayajj kunjamsa qoqanak taypi phustʼasajj suynayi uks istʼtanjja. Ukampis ¿khitis wali sum istʼiri ukat kunayman coloranak uñjir lurawayistu? Bibliajj uka toqet akham siwa: “Istʼir jiñchusa uñjir nayrasa, Jehová Diosan luratawa” sasa (Proverbios 20:12). Kunja suma lurtʼatätansa uka toqet parltʼaskakiñäni.

¹¹ Jehová Diosajj suma chuymanïtap laykuw nasani lurtʼawayistu, ukhamat uka toqe muktʼañasataki. Jaqen nasapajj mä billón oloranakwa muktʼaspa. Cheqansa taqeniruw mä suma manqʼa jayat muktʼañasa, panqaranakan suma oloranakap muktʼañasa, qoqanakat jalaqtir laphinaka jan ukajj hojanak muktʼañas wal gustistu, ukatjja kunsa ninampi nakhayapjje ukanak muktʼasaw yatiraktanjja. Maysa toqetjja, llamktʼasaw mä frutan jasätapsa manqʼañjamäjjatapsa amuytanjja. Ukatjja mä suma thayajj ajanut phustʼistu ukhasa mä munat amigosajj qhomanttʼistu ukhasa chuymas chuyma wali kusisitaw jikjjatastanjja.  Ukatsti, malltʼasarakiw mä frutan mojjsätapsa, chʼapaqätapsa, kʼallkʼütapsa yattanjja. Kunapachatï lakasar mä fruta apanttan ukhajja, kunja sumasa uk lajjrasampiw amuytanjja. Ukhamajj Jehová Diosar akham sasin jachʼañchañatakejj walja razonanakaw utjistu: “¡Kunja jachʼasa suma chuymanïtamajja! Jumar ajjsarapktam ukanakatakiw uk imtajja” sasa (Salmo 31:19). Ukampis ¿kunjamsa taqe chuym servirinakapatakejj impacha?

12. Kunanaktï Jehová Diosajj churkistu ukanakat sipansa, ¿kawkïrinakas jukʼamp wakiskirejja?

¹² Mä kutejja Jesusajj akham sänwa: “Qellqatawa: ‘Jaqejj janiw tʼantʼa sapampikejj jakañapäkiti, jan ukasti Jehová Diosan lakapat mistki taqe uka arunakampi jakañapawa’ sasa” (Mateo 4:4). Ukajj cheqäskapuniwa, Jehová Diosajj jañchi toqen askinak churkistu ukat sipansa, Bibliankki uka Diosan arunakapaw jukʼamp suma regalojja, kuna laykutejj ukaw wiñay jakañ jikjjatañatakejj yanaptʼistaspa. Kunjamtï capítulo 8 ukan yatjjataniwayktanjja, Jehová Diosajj aka qhepa urunakan mä paraisonjam jupar adorasiñapatakiw servirinakapar yanaptʼawayi, ukanjja Diosar serviñatak yanaptʼanakajj waljapuniw utji.

13, 14. 1) ¿Kunsa Ezequiel profetajj mä visionan uñjäna, ukat uka visionajj kamsañsa muni? 2) Servirinakapan wiñay jakapjjañapatakejja, ¿kuna yanaptʼanaksa Jehová Diosajj churi?

¹³ Kunjamsa Diosarojj mayamp cheqaparjam adorasjjañapäna uka toqet parlir profecianak taypinjja, kuntï Ezequiel profetajj mä visionan uñjkäna ukaw ukankaraki. Uka visionanjja, Ezequielajj mayamp saytʼayat mä suma templo uñjäna. Uka templotjja mä jukʼa umaw jalsüna, ukatjja uka umajj jan pasañjam mä jachʼa jawiraruw tukjjäna. Jawirajj paskäna uka jakʼanakanjja, kunayman fruta alinakaw utjäna, sapa phajjsirakiw frutanakajj achoqäna,  laphinakapas qollasiñatakiw servirakïna. Uka jawirajj Mar Muerto qotar purisajj suma umaruw tukuyäna, ukatjja jakañ vida utjayäna, chawllanakas waljaw utj-jjarakïna (Ezequiel 47:1-12). ¿Kunsa uka visionajj sañ munpachäna?

¹⁴ Ezequielajj uñjkäna uka templojja, kunjamsa Jehová Diosajj jupar cheqaparjam mayamp adorasjjañapatakejj taqe kuns askichañapäna, kunjams servirinakapajj cheqap leyinakaparjam sarnaqjjapjjañapäna ukwa uñachtʼayäna. Mä jawirar uñtatwa Jehová Diosajj servirinakapar walja yanaptʼanak churañapäna, ukatjja ukajj sapürutjamarakiw jukʼamp jiljjattañapäna. Cheqansa, 1919 marat aksaruw Jehová Diosarojj cheqaparjam mayamp adorasiñajj qalltasiwayjje, uka marat aksaruw Diosan markapas walja bendicionanak katoqawayaraki. Ukanakat yaqhepajj Biblianaka, Bibliat apstʼat qellqatanaka, tantachäwinaka ukat asambleanakawa. Ukanak toqerakiw walja millón jaqenakajj cheqa yatichäwinak yateqawayapjje, Jesucriston jaqenak layku jiwatapats yateqawayapjjarakiwa. Khitinakatejj Jehová Diosar cheqpachapun munasipki ukat respetapkaraki ukanakajja, Jesusan jiwas layku jiwatapatwa qʼoma conciencianïpjjaspa, wiñay jakañsa katoqapjjarakispa. a Ukhamasti, aka jan wali pachankir Diosan markapankirinakajj wali kusisitäpjjewa, kuna laykutejj Jehová Diosar jakʼachasiñatakejj walja yanaptʼanakwa katoqawayapjje (Isaías 65:13).

15. Jesusajj 1.000 maranak apnaqkani ukhajja, ¿kunjamsa Diosan suma chuymanïtap servirinakapajj uñjañäni?

¹⁵ Ezequielajj visionan uñjkäna uka jawiran walja umanakapajja, akapachajj tʼunjatäjjani uka qhepat utjaskakiniwa.  Jesusajj 1.000 maranak apnaqkani uka tiemponjja, uka jawirajj jukʼampwa jiljjattani. Jehová Diosajj Jesusan apnaqat Reinop toqejja, servirinakaparojj Jesusan jiwatapat beneficionak katoqapjjañapatakiw yanaptʼani, ukhamat jukʼat jukʼata perfecto jaqenakar tukjjapjjañapataki. ¡Jehová Diosajj khuyapayasiñapat kunanaktï lurkani uk uñjasajj walpun kusisiñäni!

16. Bibliarjamajja, ¿suma chuymani Awkisajj kunjam Diosasa?

¹⁶ Jehová Diosajja janiw kunanakatï sumäki ukanak churasakejj khuyaptʼayasirïtap uñachtʼaykistuti. Jupa pachpaw Moisesarojj akham säna: “Nayajj juma nayraqatamwa pasäjja, suma chuyman Diosätajsa uñjarakïtawa, nayan Jehová sutijsa juma nayraqatanwa yatiyarakëjja” sasa. Ukatjja Bibliajj akham sarakiwa: “Jehová Diosajja Moisés nayraqatan uksar aksar pasakipasajj akham sasaw qhanañchäna: ‘Jehová, Jehová, jupajj khuyaptʼayasiri, sinttʼasiri, pacienciani, wali munasiri ukhamarak jan jaytjasiri, arupar phoqeri [Diosawa]’” sasa (Éxodo 33:19; 34:6). Ukhamasti, suma chuymanïtap kunayman toqetwa Jehová Diosajj uñachtʼayistu.

17. ¿Kunjamsa Jehová Diosajj wali suma chuymanïtap jucharar jaqenakar uñachtʼayistu?

¹⁷ Kunjam chuymampis Jehová Diosajj jaqenakar uñji ukwa Bibliajj qhanañcharaki. Autoridadanïpki uka jaqenakat waljanejja, wali qala chuymanïpjjewa, jan sinttʼasisarakiw mayninakarojj wal tʼaqesiyapjje. Ukampis Jehová Diosajj janiw ukhamäkiti, jupajj wali sinttʼasiñampi ukat munasiñampiw taqenir uñji. Mä kutejja, jupajj akham sasaw Abrahanar säna: “Mirä amp suma, kawkjantï jumajj saytʼatäkta uka cheqatjja alay toqeru, aynach toqeru, inti jalsu toqeru, inti jalanta toqer uñtam” sasa (Génesis  13:14). Walja Biblianakanjja, janiw “mirä amp suma” sasin qellqatäjjeti. Biblia toqet yatjjattʼat jaqenakajja, ‘uka cheqajj hebreo arun kunjam qellqatäkäntï ukarjamajj suma chuymampiw Diosajj ruwtʼasiskäna, janiw ak luram sasakejj ordenkänti’ sasaw sapjje. Uka toqetjja walja ejemplonakaw utji (Génesis 31:12; Ezequiel 8:5). ¿Amuytanti? Taqe Kunjjar Munañani Diosajj “mirä amp suma” sasaw jucharar jaqenakarojj awisajj kuns mayi. Akapachankir jaqenakajj jan sinttʼasisaw kuns mayipjje, awisajj obligasakiw kuns lurayapjjaraki. Ukampis Jehová Diosan jan ukhamätap yatisajj walpun kusistanjja.

18. Jehová Diosajj kunja suma chuymanisa uk yatiñajja, ¿kunjamsa jiwasanakarojj yanaptʼistu?

¹⁸ Jehová Diosajj kunatï cheqäki ukampi phoqtʼatänwa sasaw Bibliajj qhanañcharaki. Akapachanjja janiw kunas cheqaparjam lurasjjeti, kʼarisiñajj kunjamatsa utjapuniwa. Ukampis “Diosajj janiw kʼarinak parlir jaqjamäkiti” (Números 23:19). Ukatwa Tito 1:2 textojj ‘jan kʼarisir Diosawa’ sasin qhanañchi. Cheqas jupajj suma chuyman Diosawa, janipuniw kunatï jan cheqapäki uk arskaspati, kunanaktï arsuwayki ukanakas cheqpachapuniw phoqasini. Jupajj kunjamats arsutap phoqapuniwa, ukatwa “cheq parlir Dios” sasin uñtʼatajja (Salmo 31:5). Ukatjja kunatejj cheqäki uk jan imantasaw servirinakapar yatiyistu, kunanaktï yatki ukanaks mä qhanäkaspas ukhamwa kunayman toqet yatichistu. b Kunjamsa “cheqa yatichäwinakarjam” sarnaqsna uksa yaticharakistuwa (3 Juan 3). Ukhamajj ¿janit suma chuyman Diosatakjam sarnaqañajj wakiskaspa?

19, 20. 1) ¿Kunjamatsa Supayajj suma chuyman Diosjjat Evar pächasiyäna, ukat ukham luratapat kuna jan walinakas utjawayi? 2) ¿Jehová Diosan suma chuymanïtap yatisajj kunjamas jikjjatastanjja, ukat kunatsa?

¹⁹ Supayajj Edén jardinan Evar yantʼkäna ukhajja, Jehová Diosajj janis suma chuymanïkaspa ukhamwa parläna. Uka nayrajja, Jehová Diosajj Adanar akham sänwa: “Jardinan utjki taqe uka qoqanakan achupjja, sistʼasiñkamaw manqʼasma” sasa. Edén jardinanjja, walja waranq waranqa suma qoqanakaw manqʼasiñatakejj utjäna, mayni sapa qoqatakwa Adanampi Evampejj jan manqʼapjjañapäkänti. Ukatwa Supayajj akham sasin Evar jisktʼäna: “¿Cheqapunit Diosajj jardinankir taqe qoqanakan achupat janiw manqʼapjjätati sasin sapjjtamjja?” sasa (Génesis 2:9, 16; 3:1). Ukham sasajja, Jehová Diosajj kunatï sumäki ukats jarkʼaskaspa ukhamwa Supayajj Evar amuyayäna. Ukatwa Evajj suma chuyman Diosat payachasjjäna, uka qhepatjja ukhamarakiw walja jaqenakajj taqe kun churir suma Diosat payachasjjapjjäna.

²⁰ Diosat ukham payachasipjjatapajj janipuniw akchʼas walïkänti, ¡jupanak laykuw jichhakamas kunayman tʼaqesiñanakan uñjastanjja! Ukampis Jeremías 31:12 textojj akham siwa: “Jupanakajj kʼajtapjjaniw Jehová Diosan munasiñapatsa” sasa. ¿Kunsa uka arunakajj yatichistu? Jehová Diosan munasiñapajja, wali kusisiñampi kʼajtañatakiw yanaptʼistu, ukatwa Jehová Diosajj kuna amtanakanisa uka toqet janipun payachasiñasäkiti. Antisas taqe chuymaw jupar confiyañasa, kuna laykutejj suma chuymanïtapatwa jiwasan sum jakasiñas muni.

21, 22. 1) ¿Kunjamanakatsa Jehová Diosarojj suma chuymanïtapat yuspärsna? 2) ¿Kuna toqetsa jutir capitulon yateqaskañäni?

²¹ Ukatjja suma chuyman Diosat jaqenakar parlasajj wali kusisitaw jikjjatastanjja. Diosan servirinakapat parlkasajja,  Salmo 145:7 textojj akham siwa: “Jupanakajj suma chuyman Diosätamatwa yatiyapjjani” sasa. Jehová Diosajj suma chuymanïtap kunayman toqetwa uñachtʼayistu, ukatwa kuna sumanaktï jupajj churkistu ukanakat sapüru yuspärañasa, yaqhanakarus taqe chuymarakiw jupajj kunja suma chuymanisa uk yatiyañasa, ukhamatwa jupat yateqasitas uñachtʼayañäni. Ukatjja jupjam suma chuymanïñatak chʼamachasiñäni, yaqhanak laykus kunatï sumäki ukanak lurañatak chʼamachasiñäni ukhajja, jukʼampiw jupar jakʼachasirakiñäni. Apóstol Juanajj akham sasaw qellqäna: “Munat jilata, kunatï jan walïki ukjja jan yateqasimti, antisas kunatï walïki uk yateqasim. Kunatï walïki uk lurirejja, Diosatwa juti” sasa (3 Juan 11).

²² Jehová Diosajj kunja suma chuymanisa ukajj mayni cualidadanakaparuw yanaptʼaraki. Amuytʼañataki, Éxodo 34:6 textojja Diosajj “wali munasiri ukhamarak jan jaytjasiri” ukhamawa sasaw qhanañchi. Jehová Diosajj suma chuymanïtap taqeniruw uñachtʼayi, ukampis wali munasirïtapsa jan jaytjasirïtapsa servirinakaparukiw uñachtʼayi. Kunjamsa uk luri uka toqetjja, jutir capitulonwa jukʼamp yateqaskañäni.