1-3. Jehová Diosat yateqasisin mayninakar munasiñäni ukhajja, ¿kunjamas jikjjatasiñäni?

 “KATOQAÑAT sipansa churañanwa jukʼamp kusisiñajj utji” (Hechos 20:35). Jesusan uka arunakapajj aka wakiskir yatichäwi qhanstayi: mayninakar cheqpach munasir jaqejja jupa pachpaw askinak jikjjati. Cheqas mayninakat munasiñ katoqañajj wal kusisiyistu, ukampis mayninakar munasiña uñachtʼayañajj jukʼampwa kusisiyistu.

² Diosajj uk sum yati. Kunjamtï aka seccionankir capitulonakapan yatjjataniwayktanjja, Diosjam munasir yaqhajj janiw utjkiti. Jupakiw cheqpach munasirïtap walja tiempo jan qarjtas uñachtʼayawayi, ukatwa Bibliajj ‘kusisiri Diosawa’ sasin qhanañchi (1 Timoteo 1:11).

³ Munasir Awkisajja taqe kunan jupat yateqasiñaswa muni, jukʼampis jupat yateqasisin munasiñampi yaqhanakar uñjañaswa muni. Ukatwa Efesios 5:1, 2 textojj akham sistu: “Diosan munat wawanakapjamajj jupat yateqasipjjam, munasiñan sarnaqasipkakim” sasa. Jiwasatï Jehová Diosat yateqasisin yaqhanakar munasiñat yanaptʼañäni ukhajja, wali kusisitapuniw jikjjatasiñäni. Ukat Diosar kusisiyatas yatisajja, jukʼamp kusisitäñäniwa, kuna laykutejj maynit maynikam munasipjjam sasaw Arupajj ewjjtʼistu (Romanos 13:8). Jichhajja, kuna razonanakatsa ‘munasiñan sarnaqaskakiñasa’ uka toqetwa yatjjatañäni.

4, 5. ¿Kunatsa jilat kullakanakar munasiñamp uñjañasa?

⁴ ¿Kunatsa jilat kullakanakar munasiñamp uñjañajj wali  wakiskirejja? Kuna laykutejj cheqpach cristianonakakiw munasiñ uñachtʼayapjje. Jiwasatï jan munasirïksna ukhajja, janiw jilat kullakanakasampejj sum apasksnati, janirakiw Jehová Diosatakejj valoranïksnati. ¿Kunatsa munasiñ uñachtʼayañasa? Uk amuyañatakejj kunjamsa Bibliajj yanaptʼistu uk yatjjataskakiñäni.

⁵ Janïr jiwayatäkäna uka qhep qhepa arumajja, Jesusajj akham sasaw discipulonakapar säna: “Nayajj mä machaq mandamiento churapjjsma: jumanakajj maynit maynikam munasipjjam. Kunjamtï nayajj munasipksmajja, ukhamarak jumanakajj maynit maynikam munasipjjam. Cheqpachans jumanakatejj maynit maynikam munasipjjätajja, taqeniw nayan discipulonakajäpjjatam yatipjjani” sasa (Juan 13:34, 35). “Kunjamtï nayajj munasipksmajja” sasin siskäna uka arunakampejja, Jesusajj jupjam mayninakar munasiñaswa mayiskistäna. Kunjamtï capítulo 29 ukan yatjjataniwayktanjja, kunjamsa jaqenakar cheqpachapun munasitas uñachtʼaysna ukwa Jesusajj yatichawayistu, jupajj askip thaqañat sipansa mayninakan askipwa nayraqatajj thaqerïna. Jiwasajj ukham munasiñwa uñachtʼayañasaraki, Diosar jan servipki uka jaqenakas kunja munasirïtansa uk qhanwa amuyapjjañaparaki. Kunapachatï Jesusjam cheqpachapun mayninakar munasktan ukhajja, cheqpach cristianonakätaswa uñachtʼayasktanjja.

6, 7. 1) ¿Kunatsa munasiñ uñachtʼayañajj wali importantejja? 2) 1 Corintios 13:4-8 textonjja, ¿kuna toqetsa Pablojj parlaskäna?

⁶ ¿Munasiñajj jiwasan jan utjkaspa ukhajj kunas pasaspa? Uka toqet apóstol Pablojj akham sänwa: ‘Janitï munasiñajj nayan utjkaspa ukhajja, mä latar uñtataw tojjoqerista jan ukajj platillor uñtataw chholloqerista’ sasa (1 Corintios 13:1). Mä platillon chholloqetap istʼañasa, jan ukajj mä latan tojjoqetap istʼañas janiw khitirus gustkiti. Uka uñachtʼäwejj wali qhanapuniwa, kuna laykutejj khititï jan munasiñanïki ukajja, mä latar uñtataw tojjoqe, janirakiw khitis  jupar jakʼachasiñ munkaspati. ¿Khitinakatï ukhamäpki ukanakajj cheqpach amigonakanïpjjaspati? Janiwa. Uka toqet parlkasajj Pablojj akham sarakïnwa: “Qollunak onjjtayañatakis Diosar confiyatajajj wali jachʼarakïspa, ukampis janirak munasiñajj nayan utjkaspa ukhajja, janiw nayajj kunäkiristsa” sasa. Ukhamajj mä jaqejj kuna sumanaksa lurkchinejja, jupatï jan munasiñanïkani ukhajj ‘janiw kunatakis sirvkaspati’, janirakiw Jehová Diosatakejj valoranïkaspati (1 Corintios 13:2; nota). Ukhamasti, cheqpach munasiñ uñachtʼayañajj wali wakiskiripuniwa.

⁷ ¿Kunjamsa mayninakar munasitas uñachtʼaysna? Uka jisktʼar qhanañchañatakejja, kuntï Pablojj 1 Corintios 13:4-8 texton siskäna uka toqet amuytʼañäni. Uka versiculonakanjja, Pablojj janiw Diosan munasiñapatsa ni kunjamsa Diosar munasiñasa uka toqets parlkänti, jan ukasti kunjamsa maynit maynikamajj munasiñ uñachtʼayassna  uka toqetwa parlaskäna. Jiwasatï munasirïñäni ukhajj kunsa lurañäni, kunsa jan lurkarakiñäni uka toqetwa Pablojj wali sum qhanañchi.

8. ¿Kunjamsa paciencianïñajj mayninakamp sum apasiñatak jiwasar yanaptʼistaspa?

⁸ “Munasir jaqejj paciencianiwa”. Cheqpach munasir jaqëñatakejja, nayraqatajj pacienciampiw mayninakar aguantañasa (Colosenses 3:13). Cheqas taqeniw paciencianïñ muntanjja, ukampis Jehová Diosar servirinakajj janiw perfecto jaqenakäktanti, ukatwa awisajj jilat kullakanakar chuym ustʼaysna, jan ukajj jupanakaw chuym ustʼayapjjestaspa. Ukhamanakan uñjassna ukhajja, paciencianïñaw jilat kullakanakamp sum apasiskakiñatak yanaptʼistaspa, ukhamatwa congregación taypin sumankañajj utjaskakini.

9. ¿Kunjamanakatsa mayninakat khuyaptʼayasitas uñachtʼaysna?

⁹ “Munasir jaqejj [...] khuyapayasiriwa”. Mayninakar yanaptʼasa ukat suma arunak parlasaw khuyaptʼayasirïtas uñachtʼaytanjja. Jiwasatï munasirïñäni ukhajja, jaqe masisarojj kunjamats khuyaptʼayapuniñäniwa, pobrëpki ukanakarus yanaptʼarakiñäniwa. Sañäni, mä jilïr jilatasa jan ukajj kullakas sapakiw jikjjatasispa ukat visittʼatäñwa munarakispa. Mä kullakajj sapakiw wawanakapar uywaspa jan ukajj Diosar jan servipki uka familia taypinwa jakaspa, ukatjja yanaptʼatäñwa munarakispa. Maynejj wali usuntatäspawa jan ukajj jan walinakanwa uñjasispa, ukatwa mä suma amigon arunakap istʼañ munaspa (Proverbios 12:25; 17:17). Kunapachatï jiwasajj mayninakat khuyaptʼayasis yanaptʼtan ukhajja, jupanakar cheqpachapun munasitaswa uñachtʼaytanjja (2 Corintios 8:8).

10. ¿Kunjamsa munasiñajj cheq parlañatak yanaptʼistu?

¹⁰ “Munasir jaqejj [...] kunatejj cheqäki ukatwa kusisi”.  Munasir jaqejja kunatï cheqäki ukar arjjatasajj kusisiwa, ukatjja cheqa arunakampipuniw kuns parli (Zacarías 8:16). Amuytʼañataki, mä munat familiarasatï jan ukajj mä munat amigosatï mä jachʼa jucha lurani ukhajja, janiw uka juchap imtʼkañäniti. Antisas alajjpachankir Awkisaru ukat jucha lurir amigosar munasitas laykojj Diosan leyinakapwa arjjatañäni, janiw jucha luririn juchap imtʼkañäniti ni kʼariskañänisa. Cheqas munat familiarasana jan ukajj munat amigosan juchap arsuñajj chʼamakïspawa, ukampis jucha luririr munasitas laykojj Diosasan cheqañchäwip katoqañapwa muntanjja, ukatjja ukarjam sarnaqañapwa munaraktanjja (Proverbios 3:11, 12). Cheqpach cristianonakjamajja, “taqe kunansa honrado chuymampiw sarnaqañ” muntanjja (Hebreos 13:18).

11. Mayninakajj pantjasipjje ukhajja, ¿kunsa lurañasa?

¹¹ “Munasir jaqejj taqe kunansa amukiw tʼaqesi”. Uka arunakajja, “taqe kun imjjataña jan ukajj chhaqtayaña” sañwa muni. Ukatwa 1 Pedro 4:8 textojj akham saraki: “Khititejj munasirïki ukajja walja juchanakwa perdoni” sasa. Jiwasatï jilat kullakanakasar cheqpachapun munasiñäni ukhajja, janiw jupanakan pantjasitanakap taqenir yatiykañäniti. Jilapartejja, jilat kullakanakan pantjasitanakapajj janiw jachʼa juchanakäkiti, ukhamajj kunapachatï perdontan ukat janirak uka toqet mayninakar parlktan ukhajja, cheqpach munasirïtaswa uñachtʼaytanjja (Proverbios 10:12; 17:9).

12. ¿Kunjamsa Pablojj Filemón jilatar confiyatap uñachtʼayäna, ukat kunsa jiwasajj jupat yateqassna?

¹² “Munasir jaqejj [...] taqe kun creyiraki”. Kunatejj sumäki uka toqetwa munasir jaqejj piensi sasaw yaqha Bibliajj saraki. Ukhamajja, jilat kullakanakasajj kuntï lurapki, kuntï amuyapki uka toqenakat janiw payachasktanti, jan ukasti munasiñajj kunatï jupanakat sumäki uk amuyañataki ukat taqe chuyma jupanakar confiyañatakiw yanaptʼistu. a  Pablojj Filemonar qellqkäna uka cartanwa ukhamätapajj qhan amuyasi. Uka cartarjamajja, Onésimo chachajj Filemonat escapjjäna uka qhepatwa cristianor tukjjäna, ukatwa Pablojj Filemonar akham sasin ruwtʼäna: “Kunjamtï nayar katoqkitasma ukhamarak juparojj wali munasiñampi katoqtʼam” sasa. Pablojj Onesimor katoqam sasajj janiw Filemonar obligkänti, jan ukasti munasiñampiw sumat ruwtʼäna. Ukatjja akham sasaw sarakïna: “Nayajj wal jumar confiysma, kuntï nayajj mayksma uk jumajj phoqätawa. Nayajj yattwa, kunanaktï sisksma ukanakat sipansa jukʼampwa jumajj luräta, ukatwa nayajj qellqansma” sasa (Filemón 21). Kunapachatï munasiñat jilat kullakanakasar confiytan ukhajja, jukʼamp suma cristianöpjjañapatakiw jupanakar yanaptʼtanjja.

13. Jilat kullakanakasatak taqe kunas sumar sarañap munatasjja, ¿kunanak lurasas uñachtʼaysna?

¹³ “Munasir jaqejj [...] taqe kun suytʼi”. Jiwasatï munasir jaqëñäni ukhajja, janiw jilat kullakanakasat kunatï sumäki ukanakak suykañäniti, jan ukasti jupanakatak taqe kunas sumar sarañapwa munarakiñäni. Amuytʼañataki, mä jilatasa jan ukajj mä kullakas “jan amuyasisaw jan wali thakir saranukuspa”. Kunapachatï ukajj paski ukhajja, jupar munasiñamp cheqañchapki uka jilatanakar istʼañapwa suytanjja (Gálatas 6:1). Khitinakatï Diosar serviñan aynachtʼatäpki ukanakan suma saytʼatäpjjañapsa suyaraktanwa. Jupanakarojj pacienciampiw uñjtanjja, Diosar jukʼamp confiyapjjañapatakis yanaptʼaraktanwa (Romanos 15:1; 1 Tesalonicenses 5:14). Mä munat familiarasa jan ukajj amigosas Diosat jitheqtjje ukhajja, herencia tukuntir  waynjam Jehová Diosar kuttʼanjjañapwa suyaraktanjja (Lucas 15:17, 18).

14. ¿Congregacionan kunanak aguantañas chʼamakïspa, ukat kunjamsa munasiñajj yanaptʼistaspa?

¹⁴ “Munasir jaqejj [...] taqe kun aguanti”. Aguantañajja jan walinakaru ukat llakinakar saykatañatakiw yanaptʼistu. Awisajj congregación taypinsa jan walinakaw utjarakispa, niyakejjay taqenis juchararästanjja jilat kullakanakasajj mä akatjamatwa chuyma ustʼayapjjestaspa. Sañäni, maynejj jan sum amuytʼasis arsusaw chuym ustʼayistaspa (Proverbios 12:18). Jan ukajj congregacionan mä jan walejj janiw kunjamtï munktan ukhampun askichaskaspati, maysa toqetjja khitirutï wal respetktan uka jilatan sarnaqatapaw jan gustkistaspati, ukatwa akham sasin jisktʼassna: “¿Mä cristianojj uka jan walinak luraspati?” sasa. Jiwasatï taqe ukanak pasir uñjañäni ukhajja, janiw congregacionatsa Jehová Diosatsa jitheqtañasäkiti. Kunapachatï munasir chuymanïktan ukhajja, janiw jilat kullakanakan luratanakapat colerasktanti, antisas kuna sumanaksa lurtʼañ yatipjje kunja suma chuymanïpjjesa uk uñjañatakiw chʼamachastanjja. Ukhamajj jiwasjam pantjasir jaqejj kunsay lurkchini, jan ukajj kunanaksay parlkchinejja, cheqpach munasiñ uñachtʼayañatakiw chʼamachasiñasa, ukaw Jehová Diosata ukat congregacionat jan jitheqtas serviñatak yanaptʼistani (Salmo 119:165).

15. ¿Kunatsa envidiasiñajj jan walïki, ukat munasirïñajj kunjamsa yanaptʼistaspa?

¹⁵ “Munasir jaqejj janiw envidiasirïkiti”. Munasir jaqejj janiw mayninakan kunanakapatï utjki ukanakatsa, kunanaktï sum lurañ yatipki ukanakatsa, jan ukajj kuna bendicionanaktï Diosat katoqapki ukanakats envidiaskiti. Jiwasantï envidiasiñajj utjaspa ukhajja, jiwas pachpatakwa  llakisjjsna, janirakiw congregacionan sumankañ utjañapatakejj yanaptʼkistaspati. Ukampis ¿kunas jan envidiasiñatakejj yanaptʼistaspa? (Santiago 4:5). Munasir chuymanïñaw yanaptʼistaspa, ukhamatwa kuna sumanakatï mayninakan utjki ukanakat jan envidiaskañäniti, antisas kusisitaw jakasiñäni (Romanos 12:15). Mayninakajj mä kun luratapat jachʼañchatäpkani ukhas sumakiw jikjjatasirakiñäni.

16. Jilat kullakanakasar cheqpachapun munasiñajja, ¿kunjamsa jiwas pachpa jan jachʼañchasiñatak yanaptʼistu?

¹⁶ “Munasir jaqejj [...] janiw jachʼa jachʼa tukurïkiti, janiw wali wal tukurïkiti”. Jiwasatï munasir chuymanïñäni ukhajja, kunanaktï sum lurañ yatktan jan ukajj jikjjatktan ukanakat janiw jachʼañchaskañäniti. Kuna askinaksa predicacionan jikjjattan, kuna luräwinaksa congregacionan katoqtan ukanakats janirakiw jilat kullakanakar jiskʼachañatak parlkañäniti. Jiwasatï ukanakat wal jachʼañchasjjsna ukhajja, mayninakaruw jan waltʼaysna, jiwasat sipans janis kunäpkaspa ukhamaw amuyasjjapjjarakispa. Ukhamasti, jilat kullakanakasar cheqpachapun munasiñatak chʼamachasipjjañäni, ukhamatwa kuna bendicionanaktï Diosat katoqktan ukanakat jan pʼeq waytkañäniti (1 Corintios 3:5-9). Ukhamarusa, khititï munasirïki ukajj janiw jachʼa jachʼa tukkiti, janirakiw mayninakat jilankkaspas ukham amuyaskiti. Cheqansa, munasiñaw jan jiwas pachpat jachʼañchasiñatak jarkʼistu (Romanos 12:3).

17. Jiwasatï munasirïñäni ukhajja, ¿kunjamsa mayninakar uñjañäni, ukat kunsa jan lurkañäni?

¹⁷ “Munasir jaqejj [...] janiw kunatï jan lurañäki ukanak lurkiti”. Kunatï jan lurañäki ukanak lurir jaqejja, mayninakar jan respetatapwa uñachtʼayi, janirakiw munasiñsa uñachtʼaykiti. Kuna laykutejj khitinakatï ukham jaqëpki ukanakajja, janiw mayninakan askip thaqapkiti, ni jupanakajj kunjamäsipkisa uka toqets llakisipkiti. Ukampis munasir jaqejja, munasiñampiw mayninakar uñji ukat  cheqpachapuniw llakisiraki. Ukhamarusa lurañanakap sum phoqañataki ukat suma conciencianïñatakiw chʼamachasi, jilat kullakanakarus respetompiw uñji, sarnaqatapampis Jehová Diosarojj wal kusisiyi. Maysa toqetjja, munasir chuymanïñajj “jan phenqʼani jan walinak” jan lurañatakiw yanaptʼistaspa, mä arunjja kunanakatï jilat kullakanakasar jan waltʼaykaspa ukanak jan lurañatakiw yanaptʼistaspa (Efesios 5:3, 4).

18. Cheqpachapun munasir jaqejja, ¿kunatsa mayninakarojj munañaparjam jan apnaqki?

¹⁸ “Munasir jaqejj [...] janiw kunatï jupatak walïki ukak thaqkiti”. Yaqha Bibliajj akham sarakiwa: “Munasir jaqejj janiw mä kuns munañaparuk lurayañ munkiti” sasa. Khititejj munasirïki ukajja, janiw jupan amtaparuk lurayañ munkiti, janirakiw mayninakarojj munañap lurapjjañapatak obligkiti, ni jupjam amuyapjjañapatakis engañomp parlkiti. Cheqas khititejj mayninakar amtaparjam apnaqañ munki ukajja, jachʼa jachʼa tukurïtapwa uñachtʼayaski, uka toqet parlkasajj Bibliajj akham siwa: “Jachʼa jachʼa tukuñajja tukjatäñaruw api” sasa (Proverbios 16:18). Kunapachatï jilat kullakanakasar cheqpachapun munasktan ukhajja, kuntï jupanakajj amuyapki ukar respettanwa, wakischi ukhas amtanakaparjamaw kuns luraraktanjja. Jiwasatï ukham chuymanïñatak chʼamachasiñäni ukhajja, Pablon ewjjtʼaparjam sarnaqataswa uñachtʼayañäni, jupajj akham sänwa: “Jan khitis jupan askipak thaqpanti, jan ukasti mayninakan askip thaqpan” sasa (1 Corintios 10:24).

19. Chuym ustʼayapkistu ukhajja, ¿kunjamsa munasiñajj jan colerasiñatak yanaptʼistaspa?

¹⁹ “Munasir jaqejj [...] janirakiw jankʼak coleraskiti. Kuna jan wal luratas janiw amjjäskiti”. Mä munasir jaqejja, maynin kun satasa jan ukajj kun luratas janiw jankʼak coleraskiti. Cheqas mayninakajj chuym ustʼayapjjestu ukhajja, colerasiñatakejj razonanïsnawa, ukampis cheqpach  munasiñaw jan coleratakïskañatak yanaptʼistaspa (Efesios 4:26, 27). Janirakiw yaqhanakan pantjasitanakap mä librorus qellqantksna ukham chuymasan imjjasiñasäkiti, antisas Jehová Diosat yateqasisajj munasiñatwa mayninakan pantjasitanakap armasjjañasa. Kunjamtï capítulo 26 ukan yatjjataniwayktanjja, juchanakas perdonañjamäki ukhajj taqe chuymaw Jehová Diosajj perdonistu. Ukatjja perdonkistu ukhajj juchanakasat armasjjewa, janirakiw qhepat ukanak kutin kutin amtaykistuti. ¿Janit uk yatisajj alajjpachankir Awkisar wal yuspärktanjja?

20. Mä cristianotï juchar puritapat tʼaqesiskchi ukhajja, ¿kunsa jiwasajj munasiñat lurañasa?

²⁰ “Munasir jaqejj [...] kunatï jan cheqapäki ukatjja janiw kusiskiti”. Yaqha Biblianakajj akham sarakiwa: “Munasir jaqejj janiw mayninakan juch lurapjjatapat kusiskiti”, jan ukajj “janiw mayninakan pantjasitanakapat kusiskiti”. Niyakejjay munasir jaqejj kunatï jan cheqapäki ukanakat jan kusiskchejja, jiwasajj janipuniw mayninakan jan wali luratanakap imtʼañasäkiti. Janirakiw mä cristianojj jucha luratapat tʼaqeski ukhajj kusisiñasäkiti, jiwasatï munasirïñäni ukhajj janiw akham sasin amuykañäniti: “Yatpanaya, khitirak jupar uk luram sisti” sasa (Proverbios 17:5). Ukampis pantjaski ukatï Diosar kuttʼjjañatak chʼamachasiskchi ukhajja, munasiñat wal jiwasajj kusisiñasa.

21-23. 1) “Munasiñajj janipuniw tukuskiti” sasajja, ¿kamsañsa Pablojj munäna? 2) ¿Kuna toqetsa qhep qhepa capitulon yatjjatañäni?

²¹ “Munasiñajj janipuniw tukuskiti”. Uka texto jakʼankir mayni versiculonakarjamajja, nayrïr cristianonakajj kuna milagronaksa espíritu santon yanaptʼatajj lurapjjerïna uka toqetwa Pablojj parlaskäna. Kunatï uka tiempon paskäna ukajja, kunjamsa Diosajj machaq congregacionar yanaptʼaskäna ukwa qhan uñachtʼayäna. Ukampis mä cristianojj  espíritu santo katoqatapat janiw mayninakat sipans jilankkaspas ukham amuyaskänti, kuna laykutejj janiw taqenipunejj milagronak toqe qollapkänti, ni profecianaksa arsupkänti, ni kunayman arunaksa parlapkänti. Milagronak lurañat sipansa Pablojj “jukʼamp suma thaki[twa]” parläna, taqe cristianonakaw uka suma thakin sarnaqañatak wal chʼamachasiñasa (1 Corintios 12:31). Uka suma thakejj munasiñan sarnaqañawa.

²² Pablojj “munasiñajj janipuniw tukuskiti” sasin arskäna uka arunakajja, kunjamsa munasiñajj cristianonak taypin jan tukuskirïki ukwa uñachtʼayi. Nayrat jichhakamajja, cheqpach cristianonakajj jupanak pura taqe chuyma munasipjjatapwa uñachtʼayawayapjje, cheqas oraqpachanwa uka munasiñajj Diosan markapan qhan uñjasi. Ukat niyakejjay  Jehová Diosan servirinakapajj wiñayatak jakapjjchinejja, uka munasiñajj wiñayarakiw jutïrin utjani (Salmo 37:9-11, 29). Ukhamajj munasiñ thakin sarnaqañatak chʼamachasiskakiñäni. Jiwasatï uk lurañäni ukhajj cheqpach kusisiñwa jikjjatañäni, kuna laykutejj Jesusan arunakaparjamajja, “katoqañat sipansa churañanwa jukʼamp kusisiñajj utji”. Ukatjja wiñayatakiw jutïrin jakañ puediñäni, Diosat yateqasisas wiñayarakiw munasiñ uñachtʼayarakiñäni.

²³ Aka libronjja, Jehová Diosan pusi cualidadanakapatwa wali sum yatjjatawaytanjja. Kunaymanitwa jupajj munasiñap uñachtʼayistu, wali chʼamanïtapsa, cheqaparjam taqe kun lurirïtapsa, wali yatiñanïtapsa kunayman toqetwa uñachtʼayarakistu. Kunjamtï aka capitulon yatjjatawayktanjja, kunayman toqetwa maynit maynikam munasitas uñachtʼaysna, ukampis ¿kunjamatsa Jehová Diosar taqe chuym munasitas uñachtʼaysna? Uka toqetwa qhep qhepa capitulon yatjjatarakiñäni.