1, 2. ¿Kunsa Isaías profetajj visionan uñjäna, ukat kunsa ukajj Jehová Diosat yatichistu?

 ISAIASAJJ Diosaruw mä visionan uñjäna, uk uñjasajj walpun musparäna. Cheqpachapunis Diosar uñjkaspa ukhamänwa, ukatwa akham qellqäna: “Jehová Diosaruw nayajj jachʼa ukhamarak alto tronon qontʼat uñjta, uchtʼasitäkäna uka largo isipasti [Jerusalenankir] temploruw phoqantäna” sasa (Isaías 6:1, 2).

² Isaiasajj kuntï istʼkäna ukaw wal musparayarakïna. Jupajj mä qhawqha serafín sat angelanakaruw wali jachʼat cantir istʼäna, templon cimientonakapsa onjjtayapjjarakïnwa. Uka angelanakajja, chuymar purtʼkiri suma cancionwa akham sasin cantapjjäna: “Ejercitonakan Jehová Diosapajja santo, santo, santo Diosawa. Taqe oraqpachajj jachʼa chʼamapampi phoqantatawa” sasa (Isaías 6:3, 4). Santo sasajj kimsa kutiw uka angelanakajj cancionan arsupjjäna. Jehová Diosar ukham sasitapajj wali sumawa, kuna laykutejj taqe kunat sipansa jupajj jukʼamp qʼomawa jan qʼañuchatarakiwa (Apocalipsis 4:8). Biblianjja walja kutiw Diosan santötapat parlasi. Cheqansa, kawkjanakantï Jehová Diosan sutipajj uñstki uka cheqanakanjja, Diosajj kunja santosa uka toqetwa parlasiraki.

3. ¿Kunanak amuyasas jaqenakajj Diosar jan jakʼachasipki?

³ Jehová Diosajja santo Diosätap wal yatiñas muni. Ukampis walja jaqenakajja, santo arut mayj mayjwa amuyapjje. Santo jaqenakat parlkasajja, yaqhepanakajj  akham sapjjewa: ‘Uka jaqenakajj mayninakat sipans wali importantëpkaspas ukhamwa amuyasipjje, jan ukajj uka jaqenakajj Dios chuymaw tukupjjeʼ sasa. Yaqhepanakajj akham sapjjarakiwa: ‘Niyakejjay Diosajj santöchejja, nayajj janiw kunäkipans jupar jakʼachaskiristti, ni amigopäñs puedkiristtiʼ sasa. Ukatwa waljanejj Jehová Diosar jan jakʼachasipkiti, ukham pasatapajj wali llakkañapuniwa. ¿Kunatsa ukham sistanjja? Jehová Diosajj santökchisa, juparojj taqeniw jakʼachassna, jupar jakʼachasiñatakis walja razonanakaw utjaraki. Jichhajja santo arojj kamsañsa muni uk nayraqat yatjjatañäni.

4, 5. 1) ¿Santo siski uka arojj kamsañs muni, ukat kamsañs jan munkaraki? 2) ¿Kuna pä toqenakansa Diosajj jan jiwasjamäki?

⁴ Jehová Diosajj santo Diosätapatjja, janiw jachʼa jachʼa tukusajj jiwasar jiskʼachkistuti. Antisas jachʼa jachʼa tukurinakarojj uñisiwa (Proverbios 16:5; Santiago 4:6). Ukhamajja “santo” siski uka arojj ¿kamsañsa munpacha? Biblian hebreo arut tradusitäki uka “santo” arojja, “Diosatak yaqhachata” jan ukajj “Diosatak qʼomachata” sañwa muni. Diosar serviñ toqet parlkasajja, uka arojj taqe kunanakatï santompir sagradompir tukuyatäki uk sañwa munaraki. Ukatjja santo arojj kunanakatï jan qʼañuchatäki, qʼomäkaraki uka toqet parlañatakiw apnaqasiraki. Ukampis ¿kunatsa Jehová Diosarojj santo sasin saspacha? ¿Jupajj jiwasjam pantjasir jaqenakat wali jayankpachati?

⁵ Jehová Diosajj janiw jiwasanakat jayankkiti. ¿Kunatsa ukham sistanjja? Kuna laykutejj “Israelan Santo Diosapajj” markap taypinkapunïnwa, markapankirinakajj juchararäpkchïnsa janipuniw kunäkipans jupanakar  jaytjkänti (Isaías 12:6; Oseas 11:9). Ukhamasti, Jehová Diosajj janiw santötap laykojj jiwasanakat wali jayankkiti. Ukampis jupajj janiw jiwasjamäkiti, kuna laykutejj taqe luratanakapat sipansa jupakiw Jachʼa Diosajja (Salmo 40:5; 83:18). Maysa toqetjja, jupajj janiw jiwasjam juchararäkiti, uk yatiñajj jupar jukʼamp confiyañatakiw yanaptʼistu. ¿Kunatsa ukham sistanjja?

6. ¿Kunanaksa Jehová Diosajj janipun lurkaspa?

⁶ Aka mundonjja, kunatï qʼomäki uk jikjjatañajj janiw faciläkiti. Kuna laykutejj aka mundojj jucha lurañampi phoqantatawa, taqenirakiw imperfectötas laykojj jan walinak lurtanjja. Ukatwa juchanak jan lurañatakejj chʼamachasiñasa, jan chʼamachasksna ukhajj jucharuw purtʼassna (Romanos 7:15-25; 1 Corintios 10:12). Ukampis Jehová Diosampejj janiw ukajj paskiti, kuna laykutejj jupajj juchat wali jayankiwa. Ukatwa juparojj taqe chuyma confiysna, wali suma Awkisarjamas uñjaraksna. Imperfecto awk taykanakasajj chuymwa ustʼayistaspa, ukampis Jehová Diosajj janipuniw kunapachas chuym ustʼaykistaniti. Jupajj janipuniw jan walinak lurkaspati, ni munañaparjamakis apnaqkistaspati. Cheqansa, santötap laykojj cheqaparjamapuniw taqe kuns luri, promesanakapsa arsuraki (Amós 4:2). Uk yatiñajj walpun chuymachtʼistu.

7. ¿Kunatsa Jehová Dios sapakiw santojja sasin sissna?

⁷ Jehová Diosajj santowa sasajj ¿kunatsa sistanjja? Uk amuytʼañatakejj jaqenakat parltʼañäni. Jaqenakajj nasktan ukhatpachaw imperfectötanjja, ukatwa taqe kuns jan cheqaparjam lurktanti. Jichhajj Jehová Diosat amuytʼarakiñäni, jupajj santo ukat perfecto Diosawa, ukatwa jupajj taqe kunan qʼomajja, cheqaparjamarakiw taqe kuns luri. Ukhamasti, Jehová Diosajj kunjam Diosasa  uk yatiñatakejja, santo arojj kamsañsa muni uk sumwa amuyañasa.

8, 9. ¿Kunjamsa Diosajj mä jukʼa santöñatak yanaptʼistu?

⁸ Niyakejjay Jehová Diosajj santöchejja, kunatï santöki jan ukajj sagradöki ukajj jupatwa juti sasaw sissna. Ukampis jupajj jiwasan santöñaswa munaraki. Kunatsa ukham sistan uk amuytʼañatakejja, Moisesat parltʼañäni. Kunapachatï jupajj mä ángel toqe Jehová Diosamp parläna ukhajja, Moisesajj saytʼatäskäna uka oraqejj sagradoruw tuküna (Éxodo 3:5).

⁹ ¿Imperfecto jaqenakajj santöpjjarakispati? Jehová Diosan yanaptʼapampejja, taqe jaqenakaw mä jukʼa santorakïsna. Diosajj Israel markaparojj akham sänwa: ‘Jumanakajja nayatakejj mä sagrado markaruw tukupjjätaʼ sasa (Éxodo 19:6). Diosajj markapar bendisïnwa, jupar qʼom adorapjjañapatakis yanaptʼarakïnwa. Ukatwa Moisés toqejj qʼom sarnaqapjjañapatak Leyip churäna, uka Leyinjja walja kutiw santöñat parlasi. Amuytʼañataki, jachʼa jilïr sacerdotejj turbante patjjarojj qorit lurat mä placa uchasiñapäna, ukajj israelitanakan qhana uñjkayäñapänwa. Uka placa patjjarojj akham sasin qellqtʼatäñaparakïnwa: “Jehová Diosajj santo Diosawa” sasa (Éxodo 28:36). Ukhamajja, Jehová Diosajj israelitanakan qʼom sarnaqapjjañapa, juparus cheqaparjam adorapjjañapwa munäna. Diosajj jupanakar akham sänwa: “Naya Jehová Diosamajj santo Diosätwa, ukatwa jumanakajj santo jaqëpjjañamajja” sasa (Levítico 19:2). Israelitanakatï taqe kunan Diosar istʼañatak chʼamachasipjjaspäna ukhajja, Jehová Diosajj santo jaqenakarjamaw jupanakar uñjaspäna.

10. ¿Kunjamsa israelitanakajj Diosar adorapjjäna, ukat jupanak jakʼankir markanakajj kuna diosanakarus adorapjjäna?

 ¹⁰ Israelitanakatakejja Diosar qʼom adorañasa taqe kunan qʼom sarnaqañas wali importantënwa. Ukampis jupanak jakʼan jakir markanakajja, falso diosanakaruw adorapjjäna. Uka falso diosanakajja wali tʼaqesiyirïpkaspasa, jupanakatakik taqe kun munirïpkaspasa, qʼañu amtanakar puriyirïpkaspas ukham uñjatäpjjänwa. Ukhamarus uka diosanakajj janipuniw akchʼas qʼomäpkänti, ukatwa uka diosanakar adoririnakajj qʼañut uñjatäpjjarakïna. Jan jupanakjam uñjatäpjjañapatakejja, Jehová Diosajj servirinakaparojj akham sänwa: ‘Jan jumanakajj ukanak lurasajj qʼañuchasipjjamtiʼ, ‘janirak falso diosanakarus adorapjjamti, ni qʼañunaks lurapjjamtiʼ sasa (Levítico 18:24-28; 1 Reyes 11:1, 2).

11. Angelanakasa, serafín angelanakasa, Jesusasa, ¿kunjamsa Jehová Diosan santötap uñachtʼayapjje?

¹¹ Jehová Diosan ajllit nayra Israel markajja, Diosjam santöñatakiw chʼamachasïna. Ukampis Israel markankirinakajja, qʼom sarnaqañataki ukat Diosar cheqaparjam adorañatak wal chʼamachaskasas janipuniw alajjpachankirinakjamajj santöñ puedipkänti. Alajjpachankirinakat parlkasajja, Bibliajj “waranqa waranqa angelanakaw” Diosampïsipkäna sasaw qhanañchi, uka angelanakajj taqe chuymaw Diosar servipjje (Deuteronomio 33:2; Judas 14). Khitinakatï alajjpachankapki ukanakajja, Diosjam santöpjjatapwa uñachtʼayapjje. Maysa toqetjja, Isaiasajj visionan uñjkäna uka serafín angelanakat amuytʼañäni, kuntï jupanakajj cantapkäna ukajj wali importante luräwimp phoqapjjatapwa uñachtʼayistu, jupanakajj alajjpachansa aka oraqensa Jehová Diosan santötapwa qhanañchapjje. Ukampis taqe uka angelanakat sipansa, Diosan Jesús Yoqapaw jukʼamp jilanki.  Kuna laykutejj Jehová Diosajj kunja santosa ukjja Jesusakiw qhan uñachtʼayaspa, ukatwa Biblian ‘Diosan Santo Serviripaʼ sasin Jesusat qhanañchasi (Juan 6:68, 69).

12, 13. 1) ¿Kunatsa Diosan sutipajj santowa sasin sistanjja? 2) ¿Kunatsa Diosan sutip qʼomachañajj wakisi?

¹² Jichhajj Diosan sutipat parltʼarakiñäni, Bibliajja ‘sutipajj santowaʼ sasaw qhanañchi (Isaías 57:15). Kunjamtï aka libronkir nayrïr capitulon yatjjataniwayktanjja, Diosan Jehová sutipajj janiw aleq sutikïkiti, jan ukasti Diosajj kuna cualidadanakanisa ukwa uñachtʼayi. Moisesar churaskäna uka Leyirjamajja, khititï Jehová Diosan sutip maldiskäna uka jaqejj jiwayatäñapänwa (Levítico 24:16). Maysa toqetjja, kuntï Jesusajj oración toqet yatichkäna uk amtañäni, kunsa oracionan nayraqat mayiñasa uka toqet parlkasajj jupajj akham sänwa: “Alajjpachankir nanakan Awkija, sutimajj jachʼañchatäpan” sasa (Mateo 6:9). Niyakejjay santo siski uka arojj “Diosatak yaqhachata” jan ukajj “Diosatak qʼomachata” sañ munchejja, ¿kunatsa Diosan sutipar santot uñjaskakiñasa?

¹³ Diosan enemigonakapajja, Jehová Diosan santo sutipat kʼarinak parlasaw qʼañuchawayapjje. Amuytʼañataki, Edén jardinanjja Supayajj Dios contraw kʼarinak parläna, jupajj janis suma apnaqerïkaspa ukhamwa parlarakïna (Génesis 3:1-5). Uka urut aksarojja, Supayan apnaqat aka mundon jukʼamp kʼarinakaw Dios contrajj parlasiwayi, Supayas ukham lurapjjañapatakiw jaqenakar chʼamañchawayaraki (Juan 8:44; 12:31; Apocalipsis 12:9). Maysa toqetjja Diosajj janis sinttʼasirïkaspa, janis cheqaparjam uñjkaspa, janis jiwasanakat llakiskaspa, ina chʼusatsa tʼaqesiykistaspa, guerranakan jupas  yanapkaspa ukhamwa religionanakajj jaqenakar yatichapjje. Ukhamarus taqe luratanakapat Jehová Diosar jachʼañchañat sipansa, walja jaqenakajj evolucionarukiw creyipjje. Enemigonakapajj kunayman kʼarinakwa Dios contrajj parlawayapjje, ukatwa Diosan Jehová sutip santor tukuyañasa ukat qʼomachañas wali wakiskirejja. Ukampis Jehová Diosajj niyaw sutip wiñayatak qʼomachani, mä arunjja Jesusan apnaqat Reinop toqew qʼomachani. Uka urun puriniñap walpun suytanjja, taqe chuymarakiw ukar apoyatas uñachtʼaytanjja.

14. 1) ¿Kunatsa Diosan chʼamaparojj “santo” sasejja? 2) ¿Kunatsa espíritu santo contra parlañajj wali jachʼa juchajja?

¹⁴ ¿Jehová Diosan espiritupat kamsaraksnasa? Uka espiritojj Diosan chʼamapawa, espíritu santo sasin uñtʼatarakiwa (Génesis 1:2). Jehová Diosajj uka espíritu santon chʼamapampiw taqe amtanakap phoqe, kuna laykutejj uka espiritojj taqe kunat sipans jukʼamp chʼamaniwa. Taqe kuntï Diosajj lurki ukajj santo, qʼoma, jan qʼañuchata ukhamawa, ukatwa Diosan chʼamapajj “espíritu santo” jan ukajj “santo” sasin uñtʼatajja (Lucas 11:13; Romanos 1:4). Ukampis espíritu santo contra jan wal parlir jaqenakaw utji sasaw Bibliajj qhanañchi. Khitinakatï espíritu contra parlapki ukanakajj Diosan voluntadap contraw saytʼasipki. Cheqansa, espíritu santo contra parlañajj wali jachʼa juchapuniwa (Marcos 3:29).

15. Jehová Diosan santötap yatisajja, ¿kunatsa jupar jakʼachasiñ jan ajjsarañasäki?

¹⁵ Bibliarjamajja, Diosar ajjsarañampi santöñampejj niya igualakiwa. Amuytʼañataki, 2 Corintios 7:1 textojj uka toqet akham siwa: “Kunanakatï cuerporusa amuyurusa  qʼañuchki ukanakat qʼomachasipjjañäni, ukhamat Diosar ajjsarasajj jukʼamp santöñasataki” sasa. Diosar ajjsarañajja, juparu ukat sutipar respetaña sañwa muni. Jehová Diosar ukham respetañasajj wali wakiskiriwa, kuna laykutejj jiwasat sipans jupajj wali jachʼawa, santo ukat qʼoma ukhamawa, jachʼañchatäñatakis jupakiw derechoni. Taqe ukanak yatisajj jukʼampiw Jehová Diosar jakʼachastanjja, jupa jakʼapankañs wal munaraktanjja. ¿Kunatsa ukham sistanjja?

16. 1) ¿Kunatsa kunatï santöki ukajj wali sumarakiwa sasin sissna, ukat kuna uñachtʼäwis uk sum amuyañatak yanaptʼistu? 2) ¿Kunjamsa Bibliajj Diosan santötap qhanañchistu?

¹⁶ Bibliajja kunatï santöki ukajj wali sumarakiwa sasaw qhanañchi, Diosajj kawkjantï jakki uka cheqat parlkasajj akham sarakiwa: “Santöki, wali sumäki, wali altonkkaraki uka utjäwimatpach uñtanim” sasa (Isaías 63:15). Kunatï wali sumäki ukajj taqeniruw gustistu. Amuytʼañataki, página 39 ukan utjki uka foto uñjjattʼasajj wal muspartanjja, ukan umajj wali qʼomaw saraski, climapajj wali sumawa, alajjpachas wali qʼomaw uñjasi. Ukampis umatï basuranakamp phoqantatäspa, qalanakas qoqanakas pinturanakamp qʼala pintsutäspa, climapas qʼala contaminatäspa ukhajja, janiw ukan jakañ munjjsnati. Mä cheqajj qʼomäki, jan contaminatäki, wal llijkaraki ukhajja, ukankañ wal muntanjja. Jehová Diosajj kunja qʼomasa uka toqet parlañatakejja, niya uka pachpa arunakaw apnaqasiraki, ukatwa jiwasajj jupar jakʼachasiñ wal muntanjja. Sañäni, tronopan qontʼat santo Diosat parlkasajja, llijkir qoriru, llijkir qollqeru, wali suma qalanakaru ukat ninar uñtataw kʼaji sasaw Bibliajj qhanañchi. Taqe ukanakajja Diosajj kunja musparkañasa ukwa uñachtʼayistu (Ezequiel 1:25-28; Apocalipsis 4:2, 3).

17, 18. 1) ¿Kunjamakis Isaiasajj mä visión uñjasajj jikjjatasïna? 2) ¿Kunjamsa Jehová Diosajj mä serafín ángel toqe Isaiasar chuymachtʼäna?

 ¹⁷ Jehová Diosan santötap yatisajja, ¿jupa nayraqatan janis kunäksna ukhamti amuyasiñasa? Cheqansa Jehová Dios nayraqatan janiw kunäktansa, ukampis janiw uka laykukejj jupat jitheqtañasäkiti. Kunatsa ukham sistan uk sum amuytʼañatakejja, Isaiasajj kunjamas serafín angelanakar istʼasajj jikjjatasïna uka toqet parltʼañäni, uka angelanakajj Jehová Diosarojj santötapatwa jachʼañchapjjäna, uk istʼasajj Isaiasajj akham sänwa: “¡Ay nayat kunakïkani! ¡Jichhajj cheqpachapuniw jiwäjja, kuna laykutejj nayajj jucharar jaqëtwa, kunatï jan qʼomäki ukwa parlarakta, kunatï jan qʼomäki uk parlir marka taypinwa jakarakta, nayranakajajj Reyiruw uñjapjje, ejercitonakan pachpa Jehová Diosaparuw uñjapjje!” sasa (Isaías 6:5). Kunjamtï uñjktanjja, Jehová Diosajj kunja santosa uk sum amuyäna ukhajja, Isaiasajj wali imperfectötapa wali juchararätapwa amtäna. Qalltanjja jupajj wali aynachtʼataw jikjjatasïna, ukampis Jehová Diosaw chuymachtʼäna.

¹⁸ Kunjamsa Diosajj mä ángel toqe chuymachtʼäna uka toqet parlkasajja, Isaiasajj akham sänwa: “Serafín angelanakat mayniw nayan ukar jutäna, amparapanjja mä nina sankʼaw utjäna, ukjja altaratwa tenazanakamp apanitayna. Jupajj lakajatwa llamktʼitäna, akham sarakïnwa: ‘¡Uñtam! Aka nina sankʼampiw nayajj lakamat llamktʼsma. Juchamajj chhaqtayatäjjewa, juchanakamjja Diosajj perdonjjewaʼ sasa” (Isaías 6:6, 7). a Cheqansa, Isaiasajj mä visión toqew taqe ukanak uñjäna,  ukanak uñjasajj akwa amtarakïna: Jehová Diosajja jucharar jaqerojj qʼomata ukat santot uñjañatakejj dispuestokiwa.

19. ¿Kunjamatsa juchararäkasas Dios nayraqatan santot uñjatäsna?

¹⁹ Jichhürunakanjja, Jehová Diosajj ukhamarakwa jiwasar uñjistu. Jerusalenankir altaran ofrendanakajj loqtaskäna ukajja, kunjamsa Jesusajj 33 maran perfecto vidap churañapäna ukwa uñachtʼayäna (Hebreos 9:11-14). Jiwasatï juchanakasat taqe chuyma arrepentisiñäni, cambionaks lurarakiñäni, Jesusan jiwas layku jiwataparus confiyarakiñäni ukhajja, Jehová Diosajj perdonistaniwa (1 Juan 2:2). Ukhamasti Diosajj taqeniruw santot uñjistaspa, ukatwa apóstol Pedrojj akham säna: “Qellqatanjja siwa: ‘Nayajj Santo Diosätwa, jumanakajj santo jaqëpjjañamarakiwaʼ sasa” (1 Pedro 1:16). Jehová Diosajj janiw nayjam wali santöpjjañamawa sasin siskistuti, cheqas janiw kunapachas ukhamäñas maykistaspati (Salmo 103:13, 14). Jan ukasti, nayan santo Diosätaj laykuw jumanakajj santo jaqëpjjañama sasaw sistu. Jucharar jaqëkasas “munat wawanakapjamajja”, jupat  yateqasis santöñatakiw chʼamachasiñasa (Efesios 5:1). Ukhamtï sapürojj lurañänejja, ‘jukʼamp santöñäniwaʼ (2 Corintios 7:1).

20. 1) ¿Kunatsa Dios nayraqatan qʼomat uñjatäñajj wali importantejja? 2) Juchapan perdonatäjjatap yatisajj ¿kunjamas Isaiasajj jikjjatasïna?

²⁰ Kunatejj cheqapäki qʼomäkaraki ukarojj Jehová Diosajj wal munasi, kunatï jan walïki qʼañükaraki ukarojj uñisirakiwa. Ukampis jiwasarojj janiw uñiskistuti (Habacuc 1:13). Jiwasajj Diosjamarakiw kunatï jan walïki ukar uñisiñasa, kunatï walïki ukarojj munasiñasarakiwa, wali amuyumpiw Jesusan kayups arkapjjañasa. Ukham lurasakiw juchanakasat perdonatäsna (Amós 5:15; 1 Pedro 2:21). Ak amtañajj walpun chuymachtʼistu: jiwasan santo Diosas nayraqatan taqeniw qʼomat uñjatäsna. Kunjamtï yatjjatawayktanjja, Jehová Diosan santötap yatisajj jucharar jaqëtapwa Isaiasajj amtasïna, ukatwa “¡ay nayat kunakïkani!” sasin säna. Ukampis kunjamsa Diosajj juchanakap perdonäna uk yatisajj janiw ukham amuyjjänti, ukatwa Jehová Diosajj mä voluntario maykäna ukhajj jupajj akham säna: “¡Nayajj akankasktwa! ¡Nayar khitita!” sasa (Isaías 6:5-8).

21. ¿Dios nayraqatan santot uñjatäsnawa sasajj kunatsa sissna?

²¹ Jiwasajj santo Diosar uñtasit luratätanwa, ukhamat jupat yateqasiñasataki, jupampis suma amigöñasataki (Génesis 1:26). Taqeniw Dios nayraqatan santot uñjatäsna. Jiwasatï santöñatak chʼamachasiñäni ukhajja, Jehová Diosajj taqe chuymaw yanaptʼistani, juparus jukʼampiw jakʼachasiñäni. Jutir capitulonakan Diosan cualidadanakapatwa yatjjataskakiñäni, kuna importante razonanakas jupar jakʼachasiñatak utji uka toqenakatsa yatjjataskarakiñäniwa.