1, 2. ¿Kuna imantat arunak yatjjatañatakis chʼamachasiñasa, ukat kunatsa?

 MAYNEJJ mä kuns sum yati ukhajja, janiw amukejj quedaskiti, jan ukasti ratukiw yaqhanakar yatiyi. Ukampis Bibliajj akham siwa: “Diosajj mä kuns jan yatiyki ukhajja jupajj jachʼañchatawa” sasa (Proverbios 25:2). Niyakejjay Jehová Diosajj Taqe Kunjjar Munañani Diosächejja, kunanakatï imantatäki ukanak jaqenakar yatiyaniti janicha uk amtañatakejj derechoniwa, ukampis mä kuns yatiyañ amtki ukhajj horasaparuw yatiyaraki.

² Bibliajj Jehová Diosan musparkañ ‘imantat mä amtapatwa’ parli (Efesios 1:9). Uka toqet wal yatjjatañ muntanjja. Cheqansa, Diosan imantat amtap sum amuyañajja, kunjamsa juchampit jiwañampit kutsuyatätan uk sum entiendiñatakiw yanaptʼistu, Diosan yatiñapajj kunja jachʼasa uk sum amuyañatakis yanaptʼarakistuwa.

3, 4. ¿Kuna suma suytʼäwi arunakas Génesis 3:15 texton utji, ukat Diosan kuna imantat amtapas uka texton utjaraki?

³ Adanampi Evampejj juchar purtʼasipkäna ukhajja, Jehová Diosajj kuntï aka oraqetak amtkäna ukajj janiw phoqaskaniti sañjamänwa. Aka oraqejj mä suma paraisor tukuspa ukat perfecto jaqenakajj ukan sum jakasipjjaspa ukwa jupajj munäna. Ukampis Diosajj jankʼakiw uka jan waltʼäw askichañ amtäna, jupajj akham sänwa: “Jumampi warmimpirojja enemigo tukuyapjjäma, juman wawamampi jupan wawapampirojja enemigo tukuyarakëjja. Warmin wawapajja  pʼeqetwa jumarojj takjjatätam, jumasti kayu talonatwa juparojj achjarakïta” sasa (Génesis 3:15).

⁴ ¿Uka arunakajj kamsañsa munäna? ¿Khitïpachänsa asirojja? ¿Asirun pʼeqepat takjjatkani uka wawajj khitïpachänsa? Taqe ukanakajj qalltan janiw amuyañjamäkänti, Adanampi Evampejj janirakiw yatipkänti. Ukampis uka arunakajja, Diosar taqe chuym adoriri Adanat jutir wawanakapatakejj wali askïnwa, kuna laykutejj jupanakarojj Diosan amtap phoqasir suytʼapjjañapatakiw yanaptʼäna. Jutïrinjja Jehová Diosajj taqe jan walinakwa chhaqtayani, kuntï qalltan amtkäna ukas phoqasirakiniwa. ¿Kunjamsa ukajj phoqasiñapäna? Ukajj qalltan janiw yatiskänti, ukatwa Pablojj akham säna: “Diosan imantat amtapatwa jiwasajj parltanjja, mä arunjja Diosan imantat yatiñapatwa parltanjja” sasa (1 Corintios 2:7).

5. ¿Kunatsa Diosajj imantat amtap jukʼat jukʼat qhanañchistu? Uk mä uñachtʼäwimp qhanañchtʼam.

⁵ Jehová Diosajj “secretonak qhanañchir” Diosawa (Daniel 2:28). Ukhamasti, jupaw kunjamas uka imantat amtapajj phoqasini uk tiempopar yatiyañapäna, ukampis jukʼat jukʼatwa uk lurañapäna. Uk amuytʼañatakejj aka toqet parltʼañäni: mä jiskʼa wawatï awkipar “papito, ¿kunjamatsa nayajj utjta?” sasin jisktʼaspa ukhajja, awkipajj kuntï wawajj yatiñapäki ukakwa saspa, ukatjja jiltataparjamaw tiempompejj qhan yatiyjjarakispa. Jehová Diosajj ukhamarakiw amtap jukʼat jukʼat yatiyistu, kunapachatï mä kun yatiñasajj wakisjje ukhaw sum qhanañchjjestu (Proverbios 4:18; Daniel 12:4).

6. 1) ¿Kuna amtampis pactonakajj lurasi? 2) ¿Kunatsa Diosajj jaqenakamp pactonak lurawayi?

⁶ ¿Kunjamsa Jehová Diosajj imantat amtap qhanañchawayi? Jupajj walja pactonaka jan ukajj contratonak toqew qhanañchawayi. Amuytʼañataki, jumajj inas mä uta alasasa, qollqe maytʼasisasa, jan ukajj qollqe maytʼasas mä contrato lurirïsta. Uka contratonwa kunanakas amtasi ukajj  qhan qellqtʼasi, kunjamsa ukarjam sapa maynejj phoqani ukas qellqtʼasirakiwa, ukhamatwa ukajj mä garantiyjam servispa. Ukampis ¿kunatsa Diosajj jaqenakamp pactonak lurawaypacha? Cheqansa, Diosajj mä kuns arsu ukhajja, ukajj cheqpachapuniw phoqasi. Ukhamäkchisa, Jehová Diosajj promesanakapar confiyañaswa muni, ukatwa kunjamsa arunakapajj phoqasini uk uñachtʼayañatakejj pactonak lurawayi (Hebreos 6:16-18).

7, 8. 1) ¿Kuna promesas Abrahanampi luraskäna uka pacton utjäna? 2) Abrahanampi luraskäna uka pactompejja, ¿kunas Diosan imantat amtapat qhanstayasïna? 3) “Warmin wawapajj” kuna familiatsa jutañapäna ukjja, ¿kunjamsa Jehová Diosajj jukʼat jukʼat qhanstayäna?

⁷ Adanampi Evampejj Edén jardinat jaqsutäpkäna uka urut 2.000 jila maranak qhepatjja, Jehová Diosajj Abrahán serviriparojj akham sänwa: “Wawamarojj alajjpachankir warawaranakjama ukhamarak lamar qota lakankir chʼallar uñtataw waljar tukuyäjja [...]. Wawam taypirakiw oraqenkir taqe markanakajj bendición katoqapjjani, nayar istʼatam layku” sasa (Génesis 22:17, 18). Cheqansa, Diosajj janiw mä promesak arskänti, jan ukasti phoqapunïwa sañatakejj mä contratwa juramentomp lurarakïna (Génesis 17:1, 2; Hebreos 6:13-15). Taqe Kunjjar Munañani Diosan ukham pacto luratapajja, wali musparkañapuniwa.

⁸ Abrahanampi luraskäna uka pactorjamajja, Génesis 3:15 qellqatan parlki uka ‘warmin wawapajj’ Abrahanan wawanakapatwa jutani sasaw Jehová Diosajj qhanstayäna, ukhamajj uka wawajj jiwasjam mä jaqëñapänwa. Ukampis khitïñapänsa ukjja walja maranak qhepatwa Jehová Diosajj qhanañchäna. Abrahanan wawanakapatjja, Isaac sat wawapatwa  jutañapäna ukat Isaacan pä yoqanakapatjja Jacobutwa jutañaparakïna (Génesis 21:12; 28:13, 14). Mä qhawqha maranak qhepatjja, Jacob chachajj mä yoqapat parlkasajj aka profecía arunakwa arsüna: “Reyit apnaqañatak cetrojj janiw Judá chachat apaqatäkaniti, janirakiw apnaqañatak thujrupas apaqatäkaniti, Siló [ukajja, ‘khititï ukatak derechonïki’ sañ muni] satäki ukan jutañapkama, juparuw taqe markanakajj istʼapjjarakini” sasa (Génesis 49:10; nota). Ukhamajj uka arunakarjamajja, ‘warmin wawapajj’ Judá tributwa jutañapäna ukat mä reyïñaparakïnwa.

9, 10. 1) ¿Kuna pactsa Jehová Diosajj Israel markamp luräna, ukat kunjamsa ukajj israelitanakar jarkʼaqawayi? 2) ¿Kunjamsa Diosan Leyipajj mä salvirin wakisitap uñachtʼayäna?

⁹ Khä 1513 antes de Cristo (a.C.) maranjja, Abrahanat jutir Israel markampejj Leyirjam lurat pacto Jehová Diosajj luräna, ukhamatwa imantat amtapajj jukʼamp qhanañchasïna. Jichha tiemponjja, janiw Leyirjam lurat pactojj utj-jjeti, ukampis uka pactojj Diosan amtap phoqasiñapatakiw yanaptʼawayi. ¿Kunatsa ukham sistanjja? Nayraqatajja, leyinakajj ‘warmin wawapar’ jarkʼaqañatak mä perqäkaspas ukhamänwa (Efesios 2:14). Kuna laykutejj Diosan leyinakapajja, yaqha markanakat jitheqtapjjañapatakiw judionakar yanaptʼäna. Ukhamatwa ‘warmin wawapajj’ kuna markattï jutañapäkäna ukajj jarkʼaqasïna. Kunapachatï Mesiasajj Diosan profeciaparjam naskäna ukhajja, Israel markankir Judá tribujj janïraw chhaqtkänti.

¹⁰ Payïrirjamajja, kunatsa jaqenakarojj juchampit jiwañampit kutsuyasiñapa ukwa Leyirjam lurat pactojj qhanstayäna. Niyakejjay Diosan Leyipajj perfectöchïnjja, israelitanakarojj ak amuyapjjañapatakiw yanaptʼäna: imperfecto jaqenakat janiw khitis ukarjamajj sum phoqkaspati. Ukhamatwa uka pactojj ‘juchanak qhanstayañatak lurasïna’,  ukampis “kawkïr wawatakitejj promesajj arsusiwaykäna uka wawan puriniñapkamakiw uka Leyejj utjañapäna” (Gálatas 3:19). Ukhamarus Leyirjam lurat pactojj akwa qhanstayarakïna: israelitanakajj juchanakapat perdonatäñatakejj animalanaksa sacrificiot loqtapkchïnjja, uka sacrificionakajj janiw wiñayatakejj jupanakar qʼomachkänti, jan ukasti Jesusan jiwatapakiw wiñayatak jupanakar qʼomachaspäna. Ukatwa Pablojj akham säna: “Toronakana cabranakana wilapajj janiw juchanak apaqkaspati” sasa (Hebreos 10:1-4). Ukhamajj Jehová Diosar taqe chuyma serviri judionakatakejja, Leyirjam lurat pactojj “Criston ukar irpañatakejj mä uywiriruw” tuküna (Gálatas 3:24).

11. Leyirjam lurat pactojj ¿kuna suma suytʼäwsa israelitanakar churäna, ukat kunsa jupanakajj lurapjjäna?

¹¹ Kimsïrirjamasti, Leyirjam lurat pactojj mä suma suytʼäwi israelitanakar churäna. Jehová Diosajj jumanakatï nayan arunakaj taqe kunan istʼapjjäta ukhajja, “nayatakejj reyinakjam apnaqer sacerdotenakaru ukhamarak mä sagrado markaruw tukupjjäta” sasaw israelitanakar säna (Éxodo 19:5, 6). Alajjpachar sarañatak ajllit nayrïr sacerdotenakajja, Israel markatpunwa mistusipkäna. Ukampis Israel markankirinakajja, Jehová Diosan Leyip contraw saytʼapjjäna, janirakiw Mesiasarus katoqapkänti, ukatwa Diosajj jupanakar apanuküna. Ukhamajj ¿khitinakarus uka qhepat Jehová Diosajj reyinakjam apnaqer sacerdotëpjjañapatak ajllpachäna? ¿Kunatsa jutañapäkäna uka Wawat parlkasajj sacerdotenakat parlasiraki? Diosajj uka imantat amtap qhepatwa yatiyaskäna.

12. Jehová Diosajj Davidamp mä pacto lurkäna ukanjja, ¿kuna promesanakas utjäna, ukat kunjamsa ukanakajj Diosan imantat amtap qhanstayäna?

¹² Niya 1000 a.C. maranjja, Jehová Diosajj Davidampiw mä pacto luräna, ukhamatwa Diosan imantat amtapajj jukʼamp  qhanañchasïna. Diosajj akham sasaw Davidar säna: “Juma lantejj wawamaruw saytʼayäjja, [...] reinopankir tronop wiñayatakiw sum uttʼayäjja” sasa (2 Samuel 7:12, 13; Salmo 89:3). Uka arunakarjamajja, ‘warmin wawapajj’ Davidan familiapatwa jutañapäna. Ukampis ¿kunjamsa jiwasjam mä jaqejj reyjam wiñayatak apnaqaspäna? ¿Kunjamsa juchampit jiwañampit jaqenakar salvarakispäna? (Salmo 89:20, 29, 34-36).

13, 14. 1) Salmo 110 qellqatarjamajja, ¿Jehová Diosajj ajllit Reyipat kunsa arsüna? 2) ¿Kunanaksa Diosan profetanakapajj Mesiasat qhanañchapjjarakïna?

¹³ Diosan amuytʼayatajj akham sasaw Davidajj qellqäna: “Jehová Diosajj akham sasaw Tatitujar säna: ‘Kupëjjajar qontʼasim, enemigonakamaru kayunakamampi takjjataykäma ukapachkama’ sasa”. Ukatjja akham saskakïnwa: “Jehová Diosajj janiw amtap mayjtʼaykaniti, jupajj akham sasaw mä juramentomp arsüna: ‘¡Jumajj wiñayatak sacerdotëtawa, Melquisedecjam sacerdotëtawa!’ sasa” (Salmo 110:1, 4). Uka arunakajja, jutañapäkäna uka Mesiasatwa parlaski (Hechos 2:35, 36). Jupajj janiw Jerusalenatak apnaqañapäkänti, jan ukasti alajjpachatwa Jehová Diosan ‘kupëjjapan’ apnaqañapäna. Mä arunjja, Jehová Diosajj aka oraq apnaqañapatakiw autoridad churañapäna (Salmo 2:6-8). Ukat kuntï Jehová Diosajj arskäna ukarjamajja, Mesiasajj ‘Melquisedecjam sacerdotëñapänwa’. Abrahanajj jakkäna uka urunakanjja, Melquisedec reyejj sacerdotetwa servirakïna. Mesiasajj ukhamarakiw Diosan uttʼayatäsajj Reyjama ukat Sacerdotjam serviñapäna (Génesis 14:17-20).

¹⁴ Uka qhepatjja, Jehová Diosajj imantat amtap profetanakap toqew jukʼamp qhanstayaskakïna. Sañäni, Isaías profetan arunakaparjamajja, Mesiasajj juchanak layku jiwayataw uñjasiñapäna (Isaías 53:3-12). Miqueas profetan arunakaparjamasti, Mesiasajj Belén Efrata markanwa nasiñapäna (Miqueas 5:2). Ukatjja Mesiasajj kunapachas predicañ  qalltañapäna, kunapachas jiwañaparakïna ukwa Daniel profetajj qhanañcharakïna (Daniel 9:24-27).

15, 16. 1) ¿Kunjamatsa Diosan Yoqapajj mä warmi toqe nasïna? 2) ¿Kunsa Jesusajj awk taykapat katoqäna, ukat kunapachas Mesiasjamajj uñstäna?

¹⁵ Kunapachatï Mesiasajj purinjjäna ukhajja, kunjamsa Diosan profecianakapajj phoqasini ukajj jukʼamp qhanaw yatisjjäna. Gálatas 4:4 textojj akham siwa: “Señalat tiempojj phoqasjjäna ukhajja, Diosajj Yoqaparuw khitanïna. Jupajj mä warmitwa nasïna” sasa. 2 a.C. maranjja, mä angelajj Judá markankir María sat tawaqorojj akham sänwa: “Jumajj usuriptätawa, mä yoqall wawa ususïta, Jesús sasaw sutiyäta. Jupasti wali jachʼäniwa, Jachʼa Diosan Wawapa satarakïniwa. Jehová Diosaw juparojj David awkipan tronop churani” sasa. Ukatsti uka angelajj akham saskakïnwa: “Espíritu santow jumjjar jutani, Jachʼa Diosan chʼamapaw chʼiwipamp imjjatätam. Ukatwa naskani uka wawajj santo ukhamarak Diosan Yoqapa satäni” sasa (Lucas 1:31, 32, 35).

¹⁶ Uka qhepatjja, Jehová Diosajj Marian purakaparuw Yoqapan vidap usküna, ukhamatwa jupajj mä warmi toqe nasiwayi. Niyakejjay Jesusajj ‘Diosan Yoqapächïnjja’, jupajj janiw imperfecto jaqjamajj naskänti. Ukampis awk taykapajj Davidat jutirïpjjatap laykojja, jupajj Davidat jutirjamaw nasirakïna, ukatwa jupa sapakejj Davidan tronop katoqañatakisa Reyjam apnaqañatakis derechonïnjja (Hechos 13:22, 23). Kunapachatï Jesusajj 29 maran bautisasjjäna ukhajja, Jehová Diosajj espíritu santopamp ajllisajj akham sänwa: “Jupajj wali munat Wawajawa” sasa (Mateo 3:16, 17). Ukhamaw Mesiasajj uñstäna (Gálatas 3:16). Jehová Diosan imantat amtapajj ukhaw jukʼamp qhanstarakïna (2 Timoteo 1:10).

17. ¿Kunjamsa Génesis 3:15 textojj qhanañchasiwayi?

 ¹⁷ Diosan arunakap yatiykäna ukhajja, Génesis 3:15 texton parlki uka asirojj Supayawa, uka asirun wawanakapajj Supayan arkirinakapawa sasaw Jesusajj qhanañchäna (Mateo 23:33; Juan 8:44). Uka qhepatjja, kunjamas jupanakajj tukjatäpjjani ukwa Jehová Diosajj qhanstayäna (Apocalipsis 20:1-3, 10, 15). Ukatjja Génesis 3:15 texton parlki uka warmejj ‘alajjpachankir Jerusalenawa’ sasaw qhanañcharakïna, mä arunjja organizacionapat mä partejj alajjpachankki uka toqetwa Jehová Diosajj parlaskäna, jupat jan jitheqtiri angelanakas uka taypinkapjjarakiwa (Gálatas 4:26; Apocalipsis 12:1-6). a

18. ¿Kuna amtampis machaq pactojj lurasiwayi?

¹⁸ Jesusajj janïr jiwayatäkäna uka arumajja, jupat jan jitheqtiri discipulonakaparojj ‘machaq pactotwa’ parläna, ukhamatwa Diosan imantat amtapajj jukʼamp qhanstarakïna (Lucas 22:20). Machaq pactojja Leyirjam lurat pactjamarakïnwa, mä arunjja “reyinakjam apnaqer sacerdotenakaru” ajlliñatakïnwa (Éxodo 19:6; 1 Pedro 2:9). Ukampis machaq pactompejj janiw yaqha cheqpach markajj ajlliskänti, jan ukasti Jehová Diosar servirinakapaw ‘Diosan Israelapjam’ ajllitäpjjäna, mä arunjja alajjpachar sarañatak ajllit cristianonakaw uka taypinkapjjäna (Gálatas 6:16). Uka ajllit cristianonakajj Jesusamp chikaw trabajipjjani, Jehová Diosar taqe chuyma servirinakajj aka oraqen jakapkani ukanakarus bendicionanak katoqapjjañapatakiw yanaptʼapjjani.

19. 1) Reyinakjam apnaqer sacerdotenakarojja, ¿kunjamsa machaq pactompejj ajllisiwayi? 2) ¿Kunatsa ajllit cristianonakarojj “Diosan machaq luratapawa” sasin uñtʼasi, ukat qhawqhanis Jesusamp chikajj apnaqanipjjani?

 ¹⁹ Ukampis reyinakjam apnaqer sacerdotenakarojja, ¿kunjamsa machaq pactompejj ajllisiwayi? Machaq pactojja, janiw Criston arkirinakaparojj jucharar jaqenakarjamajj uñj-jjeti, jan ukasti jupanakan juchanakapajj Jesusan sacrificiopampiw wiñayatak qʼomachatäjje (Jeremías 31:31-34). Ukatjja Jehová Diosajj cheqap sarnaqer jaqenakat uñjasajj familiap taypiruw katoqjje, espíritu santopampiw jupanakar ajlliraki (Romanos 8:15-17; 2 Corintios 1:21). Ukhamatwa jupanakajj machaqat nasipjje, ukatjja alajjpachan jupanakatak imatäkäna ukwa katoqapjjaraki (1 Pedro 1:3, 4). Alajjpachar sarañ toqetjja janiw uka nayrajj parlaskänti, janirakiw jaqenakajj kunjamas alajjpachan jakañajja uk yatipkänti, ukatwa uka ajllit cristianonakarojj “Diosan machaq luratapawa” sasin uñtʼasi (2 Corintios 5:17). Bibliajja 144.000 cristianonakaw alajjpachar sarapjjani, jupanakaw alajjpachat jaqenakar apnaqanipjjani sasaw qhanañchi (Apocalipsis 5:9, 10; 14:1-4).

20. 1) ¿Kunas 36 maran Diosan imantat amtapat jukʼamp qhanañchasïna? 2) Abrahanarojj kuna promesatï arsuskäna ukarjamajja, ¿khitinakas bendicionanak katoqapjjani?

²⁰ Jesusampi ukat alajjpachar sarir ajllit cristianonakampejja, ‘Abrahanan wawanakapa’ sasin uñtʼatäpjjewa (Gálatas 3:29). b Nayraqatajj judionak taypitwa jupanakar ajllisiwayi. Ukampis 36 maranjja, Diosan imantat amtapajj jukʼampiw qhanañchasïna. Ukarjamajja, jan judiöpki uka jaqenakas Jesusamp chikaw apnaqanipjjarakini (Romanos  9:6-8; 11:25, 26; Efesios 3:5, 6). Abrahanarojj kuna promesatï arsuskäna ukarjamajja, ¿alajjpachar saririnakakit bendicionanak katoqapjjañapäna? Janiwa, kuna laykutejj taqe jaqenak laykuw Jesusajj jiwawayi (1 Juan 2:2). Mä qhawqha maranak qhepatjja, jan jaktʼkañ ‘walja jaqenakaw’ Supayan apnaqat jan wali pachapat salvasipjjani sasaw Jehová Diosajj qhanañchäna (Apocalipsis 7:9, 14). Ukatjja Paraison wiñay jakañatakejj walja millón jiwatanakaw jaktanipjjani sasaw qhanañcharakïna (Lucas 23:43; Juan 5:28, 29; Apocalipsis 20:11-15; 21:3, 4).

21, 22. Jehová Diosan wali yatiñanïtapjja, ¿kunjamsa imantat amtapajj uñachtʼayistu?

²¹ Diosan imantat amtapajja, kunjamsa Jehová “Diosan yatiñapajj kunayman” toqet uñachtʼayasi ukwa qhanstayi (Efesios 3:8-10). Jehová Diosan yatiñapajja, kunjamsa jupajj imantat amtap arsuwayi ukat kunjamsa jupajj jukʼat jukʼat qhanañchawayistu ukanwa qhan amuyasi, ukham luratapajj wali musparkañapuniwa. Jehová Diosajj wali yatiñanïtapatwa qhawqsa amuysna ukarjamak qhanañchawayistu, ukhamatwa jiwasarojj jupar jukʼamp confiyañatak yanaptʼawayarakistu (Salmo 103:14).

²² Ukatjja Jesusar Reyïñapatak ajllisaw Jehová Diosajj wali yatiñanïtap uñachtʼayawayaraki, Jesusjam confiykay yaqhajj janiw utjkaspati. Jupajj jiwasjamaw aka oraqen jakawayi, kunayman yantʼanakanwa uñjasiwayaraki, ukatwa jaqejj kunjam luratätansa uk sum amuyi (Hebreos 5:7-9). Khitinakatï Jesusamp chik apnaqanipkani ukanakat uka pachpwa saraksna. Jesusajj jiwjjäna uka qhepatjja, Jehová Diosajj kunayman arunak parliri, kunaymanan jakasiri, kunayman markanakat jutir chacha warminakaruw ajlliwayi. Ukhamajj kuna jan walinakantï uñjaskañäni ukjja, jupanakajj kunjam askichañsa yatjjapjjewa (Efesios  4:22-24). Ukhamasti jiwasanakar entiendiri, yanaptʼañ muniri reyinakampi ukat sacerdotenakampi apnaqatäñajj wali kusiskañapunïniwa.

23. ¿Kunatsa cristianonakajj wali kusisitätanjja?

²³ Pablojj akham sasaw qellqäna: “[Diosan imantat amtapajja] nayra pachanakatsa nayra tiempo jaqenakatsa imantatänwa, jichhasti santo servirinakapar qhanañchatäjjewa” sasa (Colosenses 1:26). Kunjamtï yatktanjja, Diosan santo servirinakapajj jupan imantat amtap sum amuyjjapjje, ukatjja millón millón cristianonakaruw amuyapjjañapatak yanaptʼapjjaraki. Cheqansa, Jehová Diosaw “imantat amtap uñtʼayistu”, ukham luratapat walpun kusistanjja (Efesios 1:9). Ukhamajj kuntï yateqawayktan uk yaqhanakar yatiyapjjañäni, ukhamatwa Diosajj qhawqha yatiñanisa uk jupanakajj amuyapjjarakini.