1, 2. ¿Jehová Diosajj paqallqöri urutakejj kuna amtanïnsa, ukat kuna jan walis paqallqöri uru qalltajj pasäna?

 JEHOVÁ DIOSAJJ sojjtïri urun jaqenakar lurkäna uka qhepatjja, “taqe luratanakapwa uñjäna, ukanakasti wali sumapunïnwa” (Génesis 1:31). Ukampis paqallqöri uru qalltanjja, Adanampi Evampejj Supayar istʼasaw Jehová Dios contra saytʼapjjäna. Ukhamatwa juchachasisajj imperfecto jaqenakar tukupjjäna, tiempompejj jiwjjapjjarakïnwa. ¡Ukham pasatapajj wali llakkañapunïnwa!

² Adanampin Evampin juchachasitapatjja, Jehová Diosajj paqallqöri urutakejj kuntï amtkäna ukajj janiw phoqasjjaniti sañjamänwa. Paqallqöri urojja, mayni sojjta urunakjam walja waranqa maranakäñapänwa. Jehová Diosajja, uka urojj santowa sasaw säna. Ukat uka uru tukuyarojja, taqpach oraqew mä paraisor tukuyatäñapäna, perfecto jaqenakamp phoqantatäñaparakïnwa (Génesis 1:28; 2:3). Ukampis Adanampi Evampejj Dios contra saytʼapkäna uka qhepatjja, ¿kunjamsa Jehová Diosan amtapajj phoqaspachäna? Jehová Diosajj amtap phoqañatakejja, wali yatiñanïtapwa uñachtʼayañapäna.

3, 4. 1) Edén jardinan kunatï paskäna ukjja, ¿kunjamsa Jehová Diosajj wali yatiñamp askichäna? 2) Diosan yatiñapat jukʼamp yatjjatasajj ¿kunjamas jikjjatasiñäni?

³ Taqe ukanak pasatapatjja, Jehová Diosajj Adanampir Evampirojj kuna jan walinakansa uñjasipjjani ukwa säna, ukatjja kunjamsa uk askichani ukwa arsurakïna (Génesis 3:15). Kuna jan walinakatï utjawayki ukanakjja, Jehová Diosajj jukʼat jukʼatwa walja maranakan askichañapäna.  Kunapachatï taqe ukanakajj askichasjjani ukhaw ukajj phoqasjjani. Taqe ukanakjja, Jehová Diosajj wali yatiñampiw askichawayi, ukatwa ukanakat yatjjatasajj wal muspartanjja. Ukhamarus kuntï Diosajj lurawayki ukarjamajja, jan walinakasa, jiwañasa, juchanakas cheqpachapuniw chhaqtayasini. Maysa toqetjja, khitinakatï jupar jan jitheqtas servipki ukanakajj perfectoruw tukupjjarakini. Taqe ukanakajja, janïr paqallqöri urojj tukuskani ukhaw phoqasini, kuntï jaqenakatak amtawayki uksa tiempoparuw Jehová Diosajj phoqarakini.

⁴ ¡Jehová Diosajj qhawqha yatiñanisa ukajj wali musparkañapuniwa! Apóstol Pablojj akham sasaw qellqäna: ‘Diosan yatiñapajj jan yatjjatkayawa’ sasa (Romanos 11:33). Jehová Diosan yatiñapat jukʼamp yatjjatañajja, humilde chuymanïñatakiw jiwasar yanaptʼistani, kuna laykutejj jupat wal yatjjatkasas janipuniw kunapachas uk sum amuykañäniti (Job 26:14). Ukampis nayraqatajja, kunjamsa Jehová Diosajj yatiñanïtap uñachtʼayi uk yatjjatañäni.

5, 6. ¿Yatiñanïñatakejj kunatsa mä kun sum uñtʼañajj wakisi, ukat kunanaksa Jehová Diosajj yati?

⁵ Yatiñanïñampi ukat mä kun uñtʼañampejj janiw pachpäkiti. Sañäni, mä computadorajj walja archivonakwa imaspa, ukampis ukham luratapat computadorajj yatiñaniwa sasajj janiw sisksnati. Ukhamäkchisa, mä jaqejj yatiñanïñapatakejja nayraqatajj uñtʼañapawa ukat yatjjatañaparakiwa (Proverbios 10:14). Uk sum amuytʼañatakejj aka toqet parltʼañäni: jiwasatï wali usuntatäsna ukhajja, doctoran ukaruw sarsna, kuna laykutejj jupakiw maynirojj kunjam qollañsa yati. Ukhamasti, khititï mä kuns sum uñtʼki ukakiw cheqpach yatiñanïspa.

 ⁶ Jehová Diosajj taqe kunwa yati, jupajj janiw qalltanïkisa ni tukuyanïkisa, “Wiñay Rey” sasin uñtʼatarakiwa (Apocalipsis 15:3). Ukhamajj kunanakatï añchhitkamajj pasawayki taqe ukanakwa jupajj sum uñtʼi. Uka toqet Bibliajj akham siwa: “Janiw khitisa ni kunas Diosatakejj imantatäkiti, khitirutejj cuenta churkañäni uka Diosatakejj taqe kunas uñjkañawa, wali qhanarakiwa” sasa (Hebreos 4:13; Proverbios 15:3). Jehová Diosajja taqe kunwa lurawayi, ukatwa luratanakaparojj sum uñtʼi, jaqejj kunanaktï qalltatpach lurawayki uksa yatirakiwa. Ukatjja sapa jaqejj kunsa piensaski, kunjamas jikjjatasi ukwa yatiraki. Cheqansa, “jupajj taqpach chuymanakwa uñakipaski” (1 Crónicas 28:9). Diosajj jiwas pachpa kuns amtirwa lurawayistu, ukatwa suma amtanakar purtan ukhajj wal kusisi. Ukhamarusa jupajj “oracionanak istʼiriwa” (Salmo 65:2). Cheqas Jehová Diosan memoriapajj wali perfectopuniwa.

7, 8. Yatiñanïtapsa amuytʼirïtapsa, ¿kunjamsa Jehová Diosajj uñachtʼayi?

⁷ Jehová Diosajj taqe kunsa yatkchejja, wali amuytʼirirakiwa. Ukatwa jupajj taqe kuns sum amuyi, ukatjja sum yatjjatasaw amtanakar puriraki. Kunatï walïki jan walïkaraki uk jupaw amti, kunatï importantëki jan importantëkaraki uks amtarakiwa. Diosajj janiw jaqenakjamajj juzgkiti, jan ukasti kunas jaqen chuymapan utji uk sum yatjjati (1 Samuel 16:7). Yatjjatktan ukarjamajja, mä kun yatiñat sipansa amuytʼirïñaw jilanki, ukampis taqe ukanakat sipansa yatiñanïñaw jukʼamp jilanki.

⁸ Maynitï yatiñanïñ munchi ukhajja, taqe kuns sumwa uñtʼañapa ukat amuytʼirirakïñapawa, ukhamatwa suma amtanakar purini. Bibliarjamajja, “yatiñanïña” arojj taqe kuns sum lurtʼaña sañwa muni. Jehová Diosajja, amtap phoqañatakejj taqe kun uñtʼasajj sumwa amuytʼi, ukatwa  taqe kunas jupatakejj sumar saranti. Cheqansa, jupajj taqe kunwa yati, taqe kunwa sum amuytʼaraki, ukhamatwa suma amtanakar puri. Ukatjja kunjamatsa mä kunajj lurasispa ukwa amtaraki, ukaw cheqpachapun yatiñanïñajja. Jehová Diosjam yatiñanejj janiw yaqhajj utjkiti, ukatwa jupat parlkasajj Jesusajj akham säna: ‘Suma luratanakapaw yatiñanïtap uñachtʼayi’ sasa (Mateo 11:19). Jehová Diosajj kunja yatiñanisa ukjja, luratanakapanwa qhan amuytanjja.

9, 10. 1) ¿Jehová Diosajj kunjamsa yatiñanïtap uñachtʼayi? 2) ¿Diosan yatiñanïtapajj kunjamsa mä celulan qhan amuyasi?

⁹ Wali yatiñani jaqenakan luratanakap uñjasajja, awisajj wal muspartanjja. Kuna laykutejj ukanakajj suma lurtʼatäsajj wali sumaw funcioni (Éxodo 31:1-3). Jaqenakan yatiñapajja Jehová Diosatwa juti, janirakiw jupjam yatiñanejj khitis utjkiti. Ukatwa David reyejj Diosar akham säna: “Nayajj wali musparkañ luratätwa, ukatwa nayajj wal musparta, jumarus jachʼañcharaksma. Luratanakamajj wali musparkañawa, uk nayajj sum yatta” sasa (Salmo 139:14). Kunjam luratätansa uka toqet jukʼamp yateqtan ukhajja, Jehová Diosajj kunja yatiñanisa uk uñjasajj walpun muspartanjja.

¹⁰ Amuytʼañataki, mä sapa celulatakwa mä wawajj utji. Ukat mä taykan purakapankkasajja, uka celulajj walja millón (100 billones) celulanakaruw jaljtjjaraki. Uka celulanakajj jan uñjkay wali jiskʼanakakiwa, mä 10.000 celulanak apthapsna ukhajja, mä qañaw jatharukïspawa. Uka jiskʼa celulanakajj wali musparkañ lurtʼatapunïpjjewa, janiw jaqen lurat mä fabricasa, ni maquinas ukar igualaskaspati. Ciencia toqet yatjjatirinakarjamajja, mä celulajj mä markar uñtatawa. Uka manqhanjja autonakasa,  telefononakasa, fabricanakasa, luz utjayir utanakas waljaw utji, punku uñjirinakasa, qʼomachirinakasa ukat jan walinakat jarkʼaqerinakas utjarakiwa. Ukhamarusa célula taypin mä gobiernos apnaqkaspa ukhamarakiwa. Ukat mä qhawqha horanakanjja, mä celulajj payaruw jaljtaspa.

11, 12. 1) Sapa celulajj kunsa lurani uk jan armañapatakejja, ¿kawkjarus informacionajj imasi, ukat kunjamsa Salmo 139:16 textojj ukhamätap uñachtʼayistu? 2) ¿Kunjamsa lejjwisajj wali musparkañ luratätas uñachtʼayi?

¹¹ Cuerponkir celulanakajj janiw mä igualakïpkiti. Taykan purakapan mä wawajj jilki ukhajja, mä celulatakwa kunayman celulanakajj waljar tukupjje. Ukatjja uka celulanakajj grup gruporuw jaljtapjjaraki, uka gruponakat yaqhepajj lejjwiru (jan ukajj lajjwiru), chʼakhanakaru, musculonakaru, nayranakaru ukat wilaruw tukupjje (jan ukajj funcionañapatak yanaptʼapjje). Ukatsti sapa celulajj kunsa lurani ukajj suma programtʼatawa, uk jan armañapatakejj pachpa célula manqhan mä parteparuw informacionajj imasi, ukajj mä “bibliotecar” uñtasitawa, ADN satarakiwa. Ukatwa David reyejj Jehová Diosan amuytʼayatäsajj akham säna: “Janïr nayajj naskayäta ukhaw nayranakamajj nayar uñjitäna, cuerpojan taqpach partenakapaw libroman qellqantatäjjäna, cuerpojan partenakapajj kuna urunakansa formasïna ukas qellqantatäjjänwa” sasa (Salmo 139:16).

¹² Cuerposan yaqhep cheqanakapajja, wali musparkañ luratapuniwa. Sañäni, lejjwisjam yaqha luratajj janiw utjkiti. Ukatwa ciencia toqet yatjjatirinakajj akham sapjje: ‘Jaqen lejjwipajj janiw akchʼas amuyañjamäkiti’ sasa. Lejjwinjja, 100.000 millones ukha neuronanakaw utji, mä arunjja galaxiasan utjki uka warawaranakar uñtat waljapuniwa. Ukatjja uka neuronanakajja, walja waranqa  neuronanakampiw mayachthapisi (conectasi). Lejjwit parlkasajja, cientificonakajj akham sapjjewa: ‘Oraqpachan utjki uka bibliotecanakan jikjjataski uka taqpach qellqatanakat sipansa, lejjwejj jukʼampwa imjjasispa jan ukajj amtaspa’ sasa. Cientificonakajja, jaqen lejjwipat walja maranakaw yatjjatawayapjje, ukampis ‘janipuniw kunapachas lejjwejj sumpach amuyaskaniti’ sasaw sapjje. Cheqansa, lejjwejj “wali musparkañ luratapuniwa”.

13, 14. 1) Kʼisimiranakasa ukat yaqha animalanakasa, ¿kunatsa wali yatiñamp luratäpjje, ukat ukajj kunsa Luriripat yatichistu? 2) ¿Kunjamsa kusikusin simpapajj Jehová Diosan wali yatiñanïtap uñachtʼayistu?

¹³ Janiw jaqe sapakejj musparkañ luratäktanti, Jehová Diosan mayni luratanakapas wali yatiñampi lurtʼatäpjjarakiwa. Uka toqet Salmo 104:24 textojj akham siwa: “¡Jehová Dios Tata, luratanakamajj waljapuniwa! Yatiñampiw taqe ukanak lurtajja. Oraqejj luratanakamampi phoqantatawa” sasa. Diosan yatiñanïtapajja, taqe kunanaktï uñjktan ukanakanwa qhan amuyasi. Sañäni, kʼisimiranakajj “nasïwitpach wali amuytʼasirïpjjewa” (Proverbios 30:24). Jupanakajj suma organiztʼataw grup grupo trabajipjje. Yaqhep kʼisimiranakajja, manqʼañanak lurir laqʼonakwa uywasipjje, yaqhepanakasti jupanak pachpaw manqʼañanak yapuchasipjjaraki. Cheqansa, animalanakan musparkañanak lurapjjañapatakejj Jehová Diosaw yatiñ churawayi. Amuytʼañataki, chhichhillankhanakajj jichhak uñstir avionanakat sipansa, wali musparkañapuniw jalnaqapjje. Ukatjja yaqhep jamachʼinakajj jan payiñatakejj warawaranakamp yanaptʼayasisaw wali jay sarapjje, ukatakejj oraqen utjki uka juntʼu airenakampi, oraqen utjki uka campo magneticompi jan ukajj jupanak taypin utjki uka mapampiw yanaptʼayasipjje. Cientificonakajj animalanakat mara maranakaw  wal estudiapjje, ukhamatwa kunja suma lurtʼatäpjjesa uk amuyapjje. Ukhamajja, ¿khititï uka animalanak lurawayki ukajj qhawqha yatiñanipunïpachasa?

¹⁴ Cientificonakajja, Jehová Diosan luratanakapat yateqasiñatakiw wal chʼamachasipjje. Kunapachatï kusikusin simpapa jan ukajj utap uñjtan ukhajja, walpun muspartanjja. Ukampis cientificonakaw uka simpa uñakipasajj jukʼamp musparapjje, ukajj kunjam luratapunisa uk sum amuyañatakiw wal chʼamachasipjjaraki. Kusikusin simpapajj fácil tʼaqasirjamäkaspas ukhamawa, ukhamäkchisa mä fierror uñtasit wali chʼamaniwa (fuertewa). Jiwasatï kusikusin simpap chawlla katuñ qäna ukchʼar tukuysna ukhajja, mä chhichhillankhar uñtataw mä jachʼa avionarojj saytʼayaspa. Cheqas taqe ukanakjja, Jehová Diosajj wali yatiñampiw lurawayi.

15, 16. 1) ¿Warawaranakajj kunsa Jehová Diosan yatiñapat yatichistu? 2) Angelanakapar wali sum organiztʼasajja, ¿kunjamsa Jehová Diosajj yatiñanïtap uñachtʼayistu?

¹⁵ Jehová Diosan yatiñapajj janiw oraqenak uñjaskiti. Kunjamtï capítulo 5 ukan yatjjataniwayktanjja, Jehová Diosajj warawaranaksa, planetanaksa wali sumwa organiztʼawayi, ukatjja “alajjpachanak apnaqki uka” leyinakwa uttʼayawayaraki (Job 38:33). Diosajj kunjamsa taqe ukanak uttʼayawayi ukanwa yatiñapajj qhan amuyasi. Jupajj warawaranakjja galaxianakaru, galaxianakjja gruponakaru, uka gruponakjja jukʼamp jachʼa gruponakaruw organiztʼawayi. Ukatwa Diosajj warawaranakasa  planetanakas ‘mä ejercitjamawa’ sasin qhanañchi (Isaías 40:26). Ukampis Jehová Diosajj qhawqha yatiñanisa ukjja, yaqha ejerciton utjatapaw jukʼamp uñachtʼayi.

¹⁶ Kunjamtï capítulo 4 ukan yatjjataniwayktanjja, Diosajj ‘ejercitonakan Jehová Diosapa’ sasin uñtʼatawa, kuna laykutejj walja millón millón angelanakaruw pʼeqtʼi. Ukham luratapatwa Diosajj qhawqha chʼamanisa ukat qhawqha yatiñanisa uk amuysna. Aka toqet amuytʼañäni: Jehová Diosampi Jesusampejj jan samartʼasaw trabajisipki (Juan 5:17). Diosan angelanakapas jan samartʼasaw wal trabajisipkaraki. Uka angelanakajja, jiwasanakat sipansa wali jilankapjjewa, jukʼamp yatiñanïpjjewa ukat wali chʼamanïpjjarakiwa (Hebreos 1:7; 2:7). Ukhamäkchisa, luratäpkäna ukhatpachaw asignacionanakapan wal trabajiwayapjje, taqe chuymarakiw Diosan ‘arunakap phoqapjje’ ukat ‘jupan munañapsa’ lurapjjaraki (Salmo 103:20, 21). Uka angelanakan kusisitäpjjañapatakisa, jan tiemponi trabajipjjañapatakis Jehová Diosaw encargasiwayi. ¡Ukham luratapajj wali yatiñanipunïtapwa uñachtʼayistu!

17, 18. ¿Kunatsa Bibliajj “jupa sapakiw yatiñan Diosajja” sasin qhanañchi, ukat kunatsa jupan yatiñapat wal muspartanjja?

¹⁷ Bibliajja, Jehová Diosan wali yatiñanïtapatwa parli, “jupa sapakiw yatiñan Diosajja” sasaw qhanañcharaki (Romanos 16:27). Jehová Diosakiw taqe kunat sipansa jukʼamp yatiñanejja, ukhamajj cheqpach yatiñajj jupatwa juti (Proverbios 2:6). Taqe luratanakapatjja, Diosajj Jesusaruw jukʼamp yatiñan lurawayi. Ukhamäkchïnsa, Jesusajj janiw jupan amuyunakapak aka oraqen yatichkänti, jan ukasti kuntï Awkipajj siskäna ukwa yatichäna (Juan 12:48-50).

 ¹⁸ Apóstol Pablojja, Jehová Diosan yatiñapat parlkasajj akham sänwa: “¡Kunja jachʼasa Diosan bendicionapajja! ¡Kunja jachʼasa Diosan yatiñapasa uñtʼañapasa! ¡Amtatanakapas jan yatjjatkayawa! ¡Thakinakapas jan amuykayarakiwa!” sasa (Romanos 11:33). Uka arunakajja, Pablojj Diosan yatiñapat wal musparatapwa uñachtʼayistu. “Kunja jachʼasa” sasin Pablojj arskäna ukajja, griego arurjamajj mä jachʼa mikʼayar uñtasitäspawa, janipuniw kunatï manqhan utjki uk uñjksnati. Jehová Diosan yatiñapampejj ukaw pasaraki, jupan yatiñap sum amuyañatakejj walsa chʼamachaskchiñänejja, janipuniw kunapachas sum amuyañ puedkañäniti, janirakiw kuntï jupajj yatki uks phoqatpach yatkañäniti (Salmo 92:5). Taqe ukanak yatisajja, jiwasajj jupat sipansa janis kunäksna ukhamwa amuyastanjja.

19, 20. 1) ¿Kunatsa Jehová Diosajj yatiñapat parlañatakejj mä pakat parlistu? 2) Kunas jutïrin pasani uk Jehová Diosakiw yatispa sasajj ¿kunatsa sissna?

¹⁹ “Jupa sapakiw yatiñan Diosajja” sañatakejj yaqha razonaw utjaraki. Kunatï jutir urunakan paskani ukanak jupakiw yatispa. Kunjamtï yatktanjja, Jehová Diosajj yatiñapat parlañatakejj mä pakatwa amuytʼayistu. Mä jachʼa pakajja (águila real), jaqet sipans jiskʼakiwa, ukampis nayranakapajj mä jaqen nayranakapat sipansa jukʼamp jachʼawa. Mä pakajj wali altot uñtanisajja, jan kunakiw oraqenkir jiskʼa animalanak katjaspa. Ukatwa Diosajj pakat parlkasajj akham säna: “Nayranakapajj wali jayaruw uñjaraki” sasa (Job 39:29). Jehová Diosan nayranakapajj ukhamarakiw wali jayar uñji, mä arunjja kunanakatï jutïrin paskani uk jupajj sumwa uñjaspa (yatispa).

²⁰ Biblian walja profecianakaw utji, ukanakat jilapartejj kunanakas jutïrin pasani ukanakwa sum qhanañchi, ukatwa kunas jutïrin pasani uk Diosakiw sum yatispa  sasin sistanjja. Guerranakan nuwaskasajj khitis atipjani, kawkïr markanakas wali chʼamanir tukupjjani, kawkïr markanakas tʼunjat uñjasipjjani, mä ejército pʼeqtʼirejj kunanak lurasas atipjani uka toqenakat walja profecianakwa Jehová Diosajj arsjjäna. Yamas yaqhep profecianakjja, phoqasiñapatak walja patak maranak faltkipanwa arsjjäna (Isaías 44:25-45:4; Daniel 8:2-8, 20-22).

21, 22. 1) Kunas jutïrin sapa maynir pasani uk Diosajj sumwa yatjje sasin amuyañajj ¿kunatsa jan walïki? 2) Jehová Diosajj yatiñap munasiñampiw apnaqe sasajj ¿kunatsa sissna?

²¹ Yaqhep religionanakajja, ‘kunas jutïrin sapa maynir pasani uk Diosajj sumwa yatjje’ sasaw sapjje. Ukampis ukhamäspa ukhajja, Jehová Diosajj yatiñap janis controlañ puedkaspa ukhamäspawa. Aka toqet amuytʼañäni: jumatï cantañ yatisma ukhajja, ¿sapürut jan samartʼas cantasma? Cheqas janiw uk khitis lurkaspati, Jehová Diosampejj ukaw pasaraki. Kunas jutïrin pasani uk yatkchispasa, janiw kunas sapa maynirojj jutïrin pasistani uk yatiñatakejj chʼamachaskiti. Jupatï uk luraspa ukhajja, janiw jiwas pachpajj kun amtañsa puedjjsnati. Jehová Diosajja sapa mayni amtirwa lurawayistu, ukajj jupan mä suma regalopawa, janirakiw kunäkipans uk apaqkistaspati (Deuteronomio 30:19, 20).

²² “Kunatï jutïrin paskistani uk Jehová Diosajj janïräkipanwa amtjje” sasin sapki uka jaqenakajja, ‘kuna jan walinakatï maynir paski ukajj Diosan juchapawa, jupajj yatiñap janiw munasiñamp apnaqkiti’ sasinwa amuyapjje. Ukham amuyapjjatapajj janipuniw akchʼas walïkiti, antisas Jehová Diosat Bibliajj akham siwa: “Jupajj chuymapan yatiñaniwa” sasa (Job 9:4). Cheqansa, Jehová Diosajj janiw jaqenakjam mä chuymanïkiti. Ukampis Bibliajj chuymat parlkasajja maynejj kunjamasa, kunanaksa amuyi, kunjamas jikjjatasi, khitinakarus munasi  ukanakatwa parlaski. Ukhamasti, Jehová Diosajj yatiñapsa mayni cualidadanakapsa munasiñampipuniw apnaqe (1 Juan 4:8).

23. ¿Kunatsa Jehová Diosan yatiñapar confiyañasa, ukat kunjamsa ukar confiyatas uñachtʼaysna?

²³ Jehová Diosan yatiñaparojj taqe chuymaw confiysna, kuna laykutejj jiwasat sipans jupajj wali yatiñaniwa, ukatwa Bibliajj akham sasin ewjjtʼistu: “Jehová Diosar taqe chuymamamp confiyam, jan pachpa amuyumarojj confiyasimti. Taqe thakinakaman jupat amtasipunim, jupaw cheqa thak uñachtʼayätam” sasa (Proverbios 3:5, 6). Akjjar jutki uka capitulonakanjja, Jehová Diosan yatiñapat jukʼampinakwa yatjjataskañäni, ukaw jupar jukʼamp jakʼachasiñatak yanaptʼistani.