1-3. 1) ¿Kunjamsa Salomonajj pä warmin jan waltʼäwip askichäna? 2) ¿Kunsa Jehová Diosajj churistaspa, ukat kuna jisktʼanakas utji?

 MÄ KUTEJJA pä warminakaw mä pachpa utan jakapjjäna. Ukatjja panpachaniw wawanïpjjäna, uka wawanakajj mä qhawqha urunakatakwa jaljtapjjäna. Ukampis maynin wawapajj akatjamatwa jiwjjäna, ukatwa panpachanejj jakaskäna uka wawatjam jiskhisipjjäna. a Janirakiw kunatï paskäna uk uñjir testigonakas utjkänti. Amuyatajja kunapunis pasäna uk yatjjatañatakiw juezanakajj chʼamachasipjjäna, ukampis janiw askichañ puedipkänti. Qhepatjja, uka pä warminakajj Salomón reyin ukaruw sarapjjäna, ukhamat jupajj mä amtar puriñapataki. ¿Kawkïr warmis cheq parlaskäna uk Salomonajj yatpachänti?

² Salomonajj uka pä warminakar sum istʼasajja, mä espada aptanipjjañapatakiw mayïna. Ukatjja “jakaskir wawarojj payar jaljapjjam, mä chikatjja aka warmir churapjjam, mä chikatsti mayni warmir churapjjarakim” sasaw sarakïna. Ukampis jakaskir wawan mamapajj wawapat sinttʼasisajj akham sasaw ruwtʼasïna: “¡Janikiy jiwayamti! ¡Jakaskir wawarojj juparuk churjjam!” sasa. Payïr warmisti, “¡wawajj janiw nayankkanis ni jumankkanisa!  ¡Payar jaljatäpan!” sasaw mayirakïna. Uk istʼasaw Salomón reyejj jakaskir wawan mamapajj khitïnsa uk yatïna, ukatwa “jupaw uka wawan mamapajja” sasin säna. Uka arunak istʼasajj walpun uka warmejj kusispachäna (1 Reyes 3:16-27).

³ ¡Salomonajj wali yatiñanipunïnwa! Ukatwa kunatï paskäna uk istʼasajj walpun musparapjjäna, “kunjamsa Diosajj cheqaparjam juzgañatak reyirojj yatiñanïñ churäna uksa amuyapjjarakïnwa”. Cheqansa, Salomonan yatiñapajj Jehová Diosatwa jutäna, jupaw Salomonarojj “wali yatiñani amuytʼasiri chuyma” churäna (1 Reyes 3:12, 28). Jiwasajj jupjam yatiñanirakïsnawa, uka toqetjja Salomonajj akham sasaw qellqäna: “Jehová Dios pachpaw yatiñjja churi” sasa (Proverbios 2:6). Cheqas khitinakatï yatiñ wal thaqapki ukanakaruw Diosajj churi. Ukampis ¿kunjamsa cheqpach yatiñ jikjjatsna? Ukat ¿kunjamsa ukarjamajj sarnaqsna?

4-7. ¿Kunanaksa Diosan yatiñap jikjjatañatakejj lurañasa?

⁴ Jehová Diosan yatiñap jikjjatañatakejja, janiw wali chʼikhi jan ukajj wali yatjjatat jaqëñajj wakiskiti. Diosajj taqeniruw yatiñap churaspa, kuna markat jutirïtansa wali yatjjattʼat jaqëtanti janicha ukajj janiw juparojj importkiti (1 Corintios 1:26-29). Ukampis jiwasaw nayraqatajj yatiñ thaqañasa, ukatwa Bibliajj “yatiñ jikjjatam” sasin ewjjtʼistu (Proverbios 4:7). Ukampis ¿kunjamsa uk lursna? Uk jichhajj pusi toqet uñjañäni.

⁵ Proverbios 9:10 textojj akham siwa: “Jehová Diosar ajjsarañajj yatiñan qalltapawa” sasa. Ukhamajja, cheqpach yatiñ jikjjatañatakejj Diosaruw nayraqatajj ajjsartʼañasa. Kunjamtï yatjjataniwayktanjja, yatiñampi kuns lurañatakejj mä kunjjat sumwa yatjjatañasa ukat amuytʼirïñasarakiwa.  Diosar ajjsartʼañajja, janiw khatattʼasisa jupar serviña sañ munkiti, jan ukasti wal respetatasat Diosar taqe kunan istʼaña sañwa muni. Ukham ajjsartʼañajj wal yanaptʼistu, kuna laykutejj ukhamatwa kunatï Diosatakejj walïki uk lurañatak chʼamachastanjja. Cheqas jiwasatï Diosan ewjjtʼanakapar istʼañäni ukhajja, taqe kunas sumaw jiwasatakejj sarani.

⁶ Payïrirjamasti humilde chuymanïñasawa, ukhamatakwa Diosan yatiñap jikjjatsna (Proverbios 11:2). Humilde chuymanïñäni ukhajj janiw akanak armkañäniti: jiwasajj janiw taqe kunpun yatktanti, awisajj mä kun arsusasa piensasas pantjasikipuntanwa. Ukatwa mä kunjjat kunsa Jehová Diosajj amuyi uk yatiñ muntanjja, kuna laykutejj “Diosajj jachʼa jachʼa tukurinak contrawa, ukampis humilde chuymaninakarojj jachʼa khuyapayasiñampiw uñji” (Santiago 4:6).

⁷ Kimsïrirjamasti Diosan Arup sumwa yatjjatañasa, ukhamatakwa Diosan yatiñap jikjjatsna. Ukampis uk jikjjatañatakejj wal chʼamachasiñasawa (Proverbios 2:1-5). Pusïrirjamajj Jehová Diosaruw oración toqe jakʼachasiñasa. Jiwasatï Diosan yatiñap chuymatpach mayisiñäni ukhajja, jupajj taqe chuymaw churistani (Santiago 1:5). Ukatjja espíritu santopampiw yanaptʼarakistani. Ukhamatwa espíritu santon yanaptʼapampejj Biblian suma yatichäwinakap jikjjatañäni, jan walinak askichañatakisa, jan walinakar jan purtʼasiñasatakisa, suma amtanakar puriñatakis yanaptʼarakistaniwa (Lucas 11:13).

8. ¿Yatiñanïtasajj kunansa qhan uñjasiñapa?

⁸ Kunjamtï capítulo 17 ukan yatjjataniwayktanjja, Jehová Diosan yatiñapajj kunayman toqetwa yanaptʼistu. Ukhamajj jiwasatï Diosan yatiñap jikjjatstan ukhajja, luratanakasana ukat sarnaqatasanwa ukajj qhan uñjasiñapa. Uka toqet parlkasajj Santiago 3:17 textojj akham  siwa: “Alajjpachat jutki uka yatiña katoqer jaqejja, nayraqatajj qʼomawa, sumankiriwa, amuytʼiriwa, istʼañatakis jankʼakiwa, khuyapayasiñampi phoqantatawa, suma achunakanirakiwa, janiw yaqhachirïkiti, janirakiw kʼari chuymani jaqëkisa” sasa. Jichhajja uka toqenakatwa sum amuytʼañäni, ukampis uka toqenakat amuytʼkasajj akham sasin jisktʼasipjjañäni: “¿Alajjpachat jutki uka yatiñarjamat nayajj jakasktjja?” sasa.

9. ¿Qʼomawa siski uka arojj kamsañs muni, ukat kunatsa Santiago 3:17 textojj uka toqet nayraqat parlpacha?

⁹ “Nayraqatajj qʼomawa”. “Qʼomawa” siski uka arojja, anqatsa manqhatsa jan kuna qʼañunïña sañwa muni. Bibliajja yatiñajj chuymaruw manti sasaw qhanañchi. Ukhamajj khititï qʼañu chuymanïki, jan wali amuyunakanïki ukat jan wali amtanakanïki ukarojj janiw Jehová Diosajj yatiñap churkiti (Proverbios 2:10; Mateo 15:19, 20). Jiwasatï qʼoma chuymanïñ munstan ukhajja, jan walinakat jitheqtañasawa ukat kunatï walïki ukwa lurañasa (Salmo 37:27; Proverbios 3:7). Biblian qʼomäñ toqet nayraqat parlasitapajj wali sumapuniwa. Cheqas jiwasatï sarnaqatasansa Diosar serviñans jan qʼomäksna ukhajja, janiw Diosan mayni cualidadanakap uñachtʼayañ puedksnati.

10, 11. 1) ¿Kunatsa taqenimp suman jakasiñatak chʼamachasiñasa? 2) Mä jilatar chuyma ustʼayatas amuyasstan ukhajja, ¿kunsa sumankthapiñatakejj lurañasa? (Nota uñjjattʼarakïta).

¹⁰ Ukatjja “sumankiriwa”. Alajjpachat jutki uka yatiñajja, sumankañ utjayañatakiw yanaptʼistu. Sumankañajj espíritu santon mä achupawa (Gálatas 5:22). Ukatwa Jehová Diosan markapan ‘sumankañan jakasiñatakejj’ wal chʼamachastanjja (Efesios 4:3). Ukat kunapachatï maynimpi jan waltʼayastan ukhajja, jankʼakiw uk askichañatak  chʼamachastanjja. ¿Kunatsa uk lurañajj wakiskirejja? Kuna laykutejj Bibliajj akham siwa: “Sumaki jakasiñatakisa chʼamachasisipkakim. Ukhamatwa wali munasiri, sumankañ churiri Diosajj jumanakampïni” sasa (2 Corintios 13:11). Ukhamajj jiwasatï taqenimp suman jakasiñatak chʼamachasiñäni ukhajja, sumankañ churiri Jehová Diosajj jiwasampïskarakiniwa. Jilat kullakanakar sum uñjañajja, Jehová Diosamp sum apasiñatakiw yanaptʼistu. Kunjamsa sumankañ thaqerïtas uñachtʼaysna uka toqet jichhajj parltʼañäni.

¹¹ Jiwasatï mä jilataru jan ukajj mä kullakaru chuyma ustʼayatas amuyasstan ukhajja, Jesusan arunakapatwa amtasiñasa, jupajj akham sänwa: “Jumatejj altarar mä ofrenda apkasina jilamajj juma conträtap amtassta ukhajja, uka ofrendam altar nayraqatar jaytasin jilamar thaqtir saram. Jupampi nayraqat sumankthapinim,  kuttʼanisaw ofrendam loqtaskäta” sasa (Mateo 5:23, 24). Uka textorjamajja, nayraqatajj jiwasaw chuyma ustʼatäki uka jilatampi jan ukajj kullakamp parlirejj sarañasa, ukhamat jupamp sumankthapiñataki. b Sumankthapkasajj jiwasas razonanïksna ukham janiw parlañasäkiti, jan ukasti nayaw juchanïtjja sasaw sañasa. Ukham lurasaw kuna jan walitï utjki uk askichañäni, taqe chuymaw mayninakarojj perdonarakiñäni. Qhawqtï lurañ puedktan ukarjam lurasajja, Jehová Diosjam yatiñanïtaswa uñachtʼayañäni.

12, 13. 1) Santiago 3:17 texton “amuytʼiriwa” sasin traducitäki uka arojja, ¿kamsañsa muni? 2) ¿Kunjamatsa amuytʼirïtas uñachtʼaysna?

¹² “Amuytʼiriwa”. Yatjjatatanakajj akham sapjjewa: ‘Santiago 3:17 texton “amuytʼiriwa” sañatakejj kuna arutï griego arun qellqasiwayki ukajj janiw fácil traduciñjamäkiti’ sasa. Yaqhep Biblianakanjja “suma chuymani”, “pacienciani” ukat “mayninakat llakisiri” sasin traducitarakiwa. Uka arunakajja, kunjamsa maynejj yaqhanakan askip thaqe ukwa amuytʼayistu. Ukampis ¿kunjamsa amuytʼirïtas uñachtʼaysna?

¹³ Filipenses 4:5 textojj akham siwa: “Jumanakan amuytʼasirïpjjatam taqeni yatipjjpan” sasa. Uka arunakarjamajja, kunjamsa jiwas pachpat amuyastan ukajj janiw importantëkiti, jan ukasti kunjam jaqetsa mayninakajj uñtʼapjjestu ukaw jukʼamp importantejja. Mä amuytʼir jaqejja, janiw taqe kuns munañaparjam lurasiñap suykiti,  jan ukasti mayninakarojj taqe chuymaw istʼi, ukatjja wakiski ukhajj kuntï mayninakajj mayipki ukanaksa lurarakiwa. Amuytʼir jaqejj janiw qhorükiti, ni jan sinttʼasirïkisa, jan ukasti wali munasiñampiw mayninakar uñji. Cheqansa, taqeniw congregacionan ukham chuymanïñasa, jukʼampis ancianonakaw ukhamäpjjañapa. Ancianonakan munasirïpjjatap uñjasajja, jilat kullakanakajj taqe chuymaw jupanakar jakʼachasipjje (1 Tesalonicenses 2:7, 8). Taqeniw akham jisktʼasiñasa: “¿Kunjam jaqetsa uñtʼapjjetu? ¿Suma chuymaniwa, amuytʼiriwa ukat munasiriwa sasat nayjjat sapjje?” sasa.

14. ¿Kunjamsa maynejj ‘istʼañatak jankʼakïtap’ uñachtʼayi?

¹⁴ “Istʼañatakis jankʼakiwa”. Uka arunakajja Griego Arut Qellqatanakan Santiago 3:17 textonakwa uñsti. Biblia toqet yatjjattʼat mä jaqerjamajja, “istʼañatakis jankʼakiwa” siski uka arunakajj “soldadonakat” parlañatakiw apnaqasi, mä arunjja khititï “jan quejasis istʼaski” ukat “jupatak iyaw sañas jan chʼamäki” uka toqet parlañatakiw apnaqasi. Ukhamajja, alajjpachat jutki uka yatiñan jaqejja taqe chuymaw istʼasi, kuntï Bibliajj siski ukarjamas jankʼakiw kuns luraraki. Janirakiw jupajj qala chuyman jaqet uñtʼatäkiti, antisas kunapachatï maynejj Bibliamp amuytʼayi ukhajj jankʼakiw cambionak luri. ¿Jiwasat kamsasirakispasa?

15. ¿Kunas cheqpach khuyaptʼayasiñajja, ukat kunatsa Santiago 3:17 texton ‘suma achunakani’ sasin traducitäki uka ladonkpacha?

¹⁵ “Khuyapayasiñampi phoqantatawa, suma achunakanirakiwa”. c Alajjpachat jutki uka yatiñanïñatakejja  khuyapayasiñajj wali importantewa, ukatwa Santiago 3:17 textojj “khuyapayasiñampi phoqantatawa” sasin qhanañchi. Ukatjja ‘khuyaptʼayasiña’ arojj ‘suma achunakani’ sasin traducitäki uka ladonkarakiwa. Ukhamätapajja, kunjamsa mä jaqejj khuyapayasiñat yaqha jaqenak laykojj walja sumanak luri ukwa amtayistu. Mä qellqatajj uka toqet akham siwa: “Khuyapayasiña arojja, mayninakan tʼaqesitapat sinttʼasiña ukat jupanakar yanaptʼañatakejj jankʼak kuns luraña sañwa muni” sasa. Ukhamajj alajjpachat jutki uka yatiñan jaqejja, janiw jan sinttʼasirïkiti, ni qellqatarjamakis mä kuns lurkiti. Jan ukasti jaqenakatwa wal llakisi, wali munasiri ukat khuyaptʼayasiri chuymanirakiwa. ¿Kunjamsa jiwasajj khuyaptʼayasirïtas uñachtʼaysna?

16, 17. 1) ¿Kunas taqe chuyma predicañatakejj yanaptʼistu, ukat kunatsa? 2) ¿Kunjamanakatsa khuyaptʼayasirïtas uñachtʼaysna?

¹⁶ Reinon suma yatiyäwinakap predicasaw khuyaptʼayasirïtas uñachtʼaysna. Jiwasajj Jehová Diosar munasitas laykuw predikir sartanjja, ukatjja jaqenakat khuyaptʼayasitasa sinttʼasitas laykuw sararaktanjja (Mateo 22:37-39). Jichhürunakanjja, walja jaqenakaw “jan awatirini ovejanakjam qʼala usuchnoqata, ananukuta” ukham uñjasipjje (Mateo 9:36). Kuna laykutejj religión pʼeqtʼirinakaw jupanakar jan sum uñjawayapkiti, kunayman kʼari yatichäwinakampiw engañjawayapjjaraki, ukatwa jupanakajj Biblian suma ewjjtʼanakapsa Diosan Reinopajj kuna bendicionanaktï apankani uks jan yatipkiti. Ukhamajj suma yatiyäwinaka jupanakan istʼapjjañapajj wali wakiskiripuniwa, uk yatisaw jupanakat wal khuyaptʼayasisajj predicañatak chʼamachastanjja.

¹⁷ ¿Kunjam toqetsa khuyaptʼayasirïtas uñachtʼayaraktanjja? Ukatakejja, Jesusajj parlkäna uka samaritano jaqejj kuntï lurkäna uk amtañäni. Jupajj thak sarkasaw lunthatanakamp  qʼala lluchʼsut mä jaqer uñjäna, ukatjja khuyapayasiñamp uñjasajj heridanakapwa qolltʼäna, mä alojasiñ utar apasaw cuidarakïna (Lucas 10:29-37). Uka sarnaqäwejja, kunjamsa mayninakat cheqpachapun khuyaptʼayasitas uñachtʼaysna ukwa yatichistu. Bibliajj akham sasaw ewjjtʼistu: “Taqenir yanaptʼapjjañäni, ukampis jiwasjam creyentëpki uka jilat kullakanakasaruw jukʼamp yanaptʼañasa” sasa (Gálatas 6:10). ¿Kunjamsa uk lursna? Mä chuymankipstat jilatarojj tantachäwinakar apasaw yanaptʼsna, jan ukajj mä viuda kullakan utap askichasaw yanaptʼaraksna (Santiago 1:27). Ukatjja khitinakatï llakitäpki ukanakarojj ‘suma arunakampiw’ chʼamañchtʼaraksna (Proverbios 12:25). Jiwasatï jaqenakar khuyapayasiñampi uñjañäni ukhajja, alajjpachat jutki uka yatiñanïtaswa uñachtʼayañäni. 

18. Diosan yatiñapanïstan ukhajja, ¿kunsa janipun lurkañäni, ukat kunatsa?

¹⁸ “Janiw yaqhachirïkiti”. Jiwasatï Jehová Diosan yatiñapanïñäni ukhajja, janiw mayninakarojj yaqha kasta jañchinïpjjatap laykusa jan ukajj yaqha markatäpjjatap laykus yaqhachkañäniti. Chuymasana ukat amuyusan mä kuna jan walis utjani ukhajja, jankʼakiw ukanak apsuñatakejj chʼamachasirakiñäni (Santiago 2:9). Cheqansa, janiw jiwasajj suma yatjjattʼatäpki, qollqenïpki, jan ukajj congregacionan walja luräwinïpki ukanakaruk sum uñjktanti. Janirakiw jan yäqatäpki uka jilat kullakanakarojj jiskʼachktanti, antisas taqeniruw respetomp uñjtanjja. Jehová Diosajj jupanakar wal munasi, ukatwa jiwasajj jupanakar munasiñatak obligatätanjja.

19, 20. 1) Griego arut ‘kʼari chuymani’ sasin traducitäki uka arojja, ¿kuna toqet parlañatakis apnaqasirïna? 2) ¿Kunjamsa “jilapurjam cheqa chuymampi” munasitas uñachtʼaytanjja, ukat ukham luratasat kuna askinakas utji?

¹⁹ “Janirakiw kʼari chuymani jaqëkisa”. Griego arut ‘kʼari chuymani’ sasin traducitäki uka arojja, mä jaqejj teatron kunaymaninak lurkäna uka toqet parlañatakiw apnaqasirïna. Nayra tiemponjja, Grecia ukat Roma markanakankir actoranakajja, teatronakan jachʼa mascaranak uchasisaw trabajipjjerïna. Ukatwa tiempompejj ‘kʼari chuymani’ arojj kun jikjjatañatak suma sum tukupki, jan ukajj jupatakik kuns jikjjatañ layku kʼarisipki ukham jaqenakat parlañatak apnaqasjjäna. Ukhamajj jiwasatï Diosan yatiñapanïstan ukhajja, janipuniw jilat kullakanakas nayraqatan mä kun jikjjatañ laykojj jan walinak lurkañäniti, antisas qhana arunakampiw jupanakar parlañäni, chuymasansa janiw jupanakat jan walinak amuykañäniti.

 ²⁰ Apóstol Pablojj “kunatï cheqäki ukar istʼapjjatam” laykojja, “jumanakajj jilapurjam cheqa” chuymampiw munasipjjañama sasaw säna (1 Pedro 1:22). Ukhamajj jilat kullakanakasarojj janiw pata chuymak munasiñasäkiti, janirakiw jupanakatakejj mä mascara uskusiñasäkiti, ni wali suma jaqes tuktʼañasäkiti, jan ukasti taqe chuymaw jupanakarojj munasiñasa. Ukhamtï lurañänejja, jilat kullakanakan chuymapwa ganasiñäni, ukatjja jupanakajj taqe chuymarakiw confiyapjjestani. Ukhamatwa congregacionan qhana arunakampi parltʼasiñasa, taqenimp sum apasiñasa, maynit maynikam taqe chuyma confiyasiñas utjani.

21, 22. 1) Salomonan Diosan yatiñaparjam jan sarnaqatapjja, ¿kunjamatsa yattanjja? 2) ¿Yatiñanïñ jarkʼaqañatakejj kunsa lurañasa, ukat kunatsa uk lurañajj wali askejja?

²¹ Alajjpachat jutki uka yatiñajj Diosan mä suma regalopawa, ukatwa uk sum cuidañatak chʼamachasiñasa. Salomón reyejj akham sänwa: “Nayan wawaja, [...] yatiñanïñsa amuytʼasirïñsa jarkʼaqam” sasa (Proverbios 3:21). Ukampis tiempompejja, jupa pachpaw uka ewjjtʼar jan istʼasajj jan walinakan uñjasïna. Kunapachatï jupajj istʼasir chuymanïna ukhajja wali yatiñanïnwa, ukampis extranjera warminakamp casarasisaw chuymap mayjtʼayäna, ukatwa cheqpach Diosar adorañat jitheqtjjäna (1 Reyes 11:1-8). Kunatï Salomonar paskäna ukajj akwa yatichistu: maynejj qhawqsa yatiskaspawa, ukampis jupatï yatiñap jan cheqaparjam apnaqkani ukhajj kunayman jan walinakanwa uñjasini.

²² ¿Kunsa yatiñ jarkʼaqañatakejj lurañasa? Sapüruw Biblia liyiñasa, kuna qellqatanaktï “suma phoqeri amuyasir” esclavojj churkistu uks liytʼañasarakiwa, ukatjja  kuntï yateqktan ukarjamaw sarnaqañasaraki (Mateo 24:45). Jehová Diosan yatiñaparjam sarnaqañajja, kunayman toqenakatwa yanaptʼistu. Nayraqatajja, jichha tiemponjja kusisit sum jakasiñatakiw yanaptʼistu. Ukjjarojja, “cheqpach jakañat” katjjarusiñatakiw yanaptʼistu. Cheqansa, Diosajj aka oraq machaqar tukuykani ukan jakañajj wali sumapunïniwa (1 Timoteo 6:19). Maysa toqetjja, wali yatiñani Jehová Diosar jakʼachasiñatakiw yanaptʼarakistu, ukaw taqe kunat sipansa wali sumajja.