1-3. 1) ¿Kunsa Ezequielajj uñjäna, istʼarakïna? (Aka yatichäwi qalltan utjki uka dibujo uñjjattʼäta). 2) ¿Kunas uka visión uñjañapatakejj Ezequielar yanaptʼäna? ¿Kunsa uka visión uñjasajj luräna?

 EZEQUIELAJJ jaya pamparuw uñtäna, ukatsti kunas ukan utji uk uñjañatakiw wal chʼamachasïna, nayranakapsa wal jistʼararakïna. Kuntï uñjkäna ukajj wal musparayäna, alajjpachampi oraqempi jikiski uk cheq uñtasajj chʼiyar mä jachʼa qenay uñjäna, ukajj janiw jallu puriñatak uñstki uka chʼiyar qenayar uñtasitäkänti. Thayajj walpun norte toqet thaytʼanïna, Ezequielan isipsa ñikʼutapsa thayajj wal phustʼäna. Ukhamaruw mä jachʼa qenay uñjäna, uka taypinsti wali llijkir ninaw utjarakïna. Ukatwa Ezequielajj ‘nina taypinsti llijkiri qorimpi llijkiri qollqempi mezclatas utjkaspa ukhamänwa’ sasin säna. Uka qenayajj Ezequiel patjjankjjäna ukhajja, mä ejercitos jutkaspa ukhamaw suynatapajj wali jachʼat istʼasïna (Ezeq. 1:4, 24).

² Ezequielajj mä 30 maranakanïnwa, jupajj jan armkañ visionanak uñjañapäkäna ukanakat nayrïr visionwa uñjaskäna. Ukatsti ‘Jehová Diosan chʼamapajj’ jupjjankatapwa amuyasïna, mä arunjja Diosan espíritu santopaw jupjjankäna. Uka espíritu santow wali musparkañ visión uñjañapatakisa istʼañapatakis yanaptʼäna,  mä suma peliculat sipansa uka visionajj jukʼamp sumänwa. Ezequielajj walpun uka visión uñjasajj sustjasïna, ukatwa ‘oraqer puriñkam altʼasïna’ (Ezeq. 1:3, 28).

³ Jehová Diosajj janiw Ezequielar musparayañak munkänti. Ezequielajj uñjkäna uka nayrïr visionasa libropan qellqatäki uka yaqha visionanakasa, jupatakisa Diosan servirinakapatakis walja yatichäwinakaniwa. Ukatwa kuntï Ezequielajj uñjkäna istʼkarakïna ukanak wali amuyump yatjjatañasa.

4, 5. ¿Ezequielajj visionanak uñjkäna uka tiempon kunanakas pasäna?

⁴ Ezequiel 1:1-3 liytʼañataki. Kunanakas uka tiempon pasäna uk nayraqat amuytʼañäni. Ukhajj 613 antes de Cristo (a.C.) maränwa, kunjamtï 2 yatichäwin yateqaniwayktanjja, Ezequielajj Babiloniar apata judionakampiw Kebar sat jawira jakʼankir mä jiskʼa markan jakäna. Uka jawirajj Éufrates jawirat irpaqatänwa, ukatsti pachpa jawiraruw kutjjatjjarakïna, amuyatajj jaqenakaw uknam sarañatakejj uka jawir lurapjjpachäna.

⁵ Babiloniar apata jaqenakan Jerusalén markapajj 800 kilometronak jayankänwa. * Ezequielan tatapajj Jerusalenan sacerdotet sirvkäna uka templojja, jichhajj falso diosanakar adorañampi jan wali lurañanakampi phoqantatäjjänwa. David reyimpin Salomón reyimpin tronopas jan walit uñjatäjjänwa. Diosar jan istʼiri Joaquín sat jan wali reyisa Babiloniar apatarakïnwa. Jupa qhepat apnaqkäna uka Sedequías sat jan wali reyejj Nabucodonosor reyimp apnaqatänwa (2 Rey. 24:8-12, 17, 19).

6, 7. ¿Kunatsa Ezequielatakejj jupajj jakkäna uka maranakajj wali llakkañ tiempöpachäna?

 ⁶ Uka maranakajj Diosar confiyiri Ezequielatakejj wali llakkañ tiempöpachänwa. Babiloniar apata yaqhep judionakajj inas Diosajj armasjjpachïstuwa sasin amuyapjjchïna. Jehová Diosaruk adorañsa reyinak toqe aka oraqen apnaqki uksa, wali chʼamani jan wali Babilonia markampi falso diosanakapampiw chhaqtayapjjani sasin inas amuyapjjarakchïna.

⁷ Ukanak yatisajja, Bibliat sapak yatjjatkasajj ¿janit Ezequielan nayrïr visionapat parlki uka textonak liytʼas qalltañamajj wakiskaspa? (Ezeq. 1:4-28). Liytʼkasajj Ezequieljamas uñjkasma istʼkasma ukham amuytʼañatakiw chʼamachasïta.

8. ¿Kunsa Ezequielajj mä visionan uñjäna? ¿Uñjkäna ukajj kunamp sasisa?

⁸ ¿Kunsa Ezequielajj uñjäna? Jupajj wali musparkañ mä jachʼa carro uñjäna. Uka carrojj wali jachʼa pusi ruedanakanïnwa, ruedanak ladonjja pusi angelanakaw utjarakïna, ukham angelanakajj janiw uñjasirïkänti. Qhepatwa querubín sat angelanakäpjjatapajj qhanañchasiski (Ezeq. 10:1). Jupanak patjjanjja vidrior uñtasita mä jachʼa pisow utjäna, Diosan tronopaw uka patjjankarakïna, ¡Jehová Diosaw uka trononkäna! ¿Uka carrojj kunamp sasisa? Ezequielajj visionan uñjkäna uka carrojja, Jehová Diosan organizacionapat  mä partejj alajjpachankki ukamp sasiwa. Kunatsa ukham sistan uk jichhajj kimsa toqet yatjjatañäni.

9. ¿Jehová Diosan carropajj querubín angelanak patjjankatapajj kunsa yatichistu?

⁹ Jehová Diosaw angelanakapar apnaqe. Uka visionanjja Jehová Diosan tronopajj querubinanak patjjankiwa. Yaqha textonakanjja, Jehová Diosan tronopajj ukhamarakiw querubín angelanak patjjanki, jan ukajj jupanak taypinki (2 Reyes 19:15 liytʼañataki; Éx. 25:22; Sal. 80:1). Cheqas Jehová Diosajj janiw querubín angelanakampi qʼepnaqayasiñatakejj jupanak patjjankkiti, janirakiw yaqha cheqanakar sarañatakejj mä carro necesitkiti. Ukhamajj ¿kamsañsa uka visionajj muni? Querubín angelanakajj taqe chuymaw Diosar istʼapjje, ukatsti Diosajj amtap phoqapjjañapatakejj kawkjarus uka angelanakar khitakispawa. Mayni angelanakjamarakiw querubín angelanakajj Diosar servipjje, kuntï Jehová Diosajj amtki uksa phoqapjjaraki (Sal. 104:4). Ukatwa Diosajj jupanak patjjankkaspasa jupanakar apnaqkaspas ukham amuyasi. Taqpachanejj mä jachʼa carrompi sasipjjewa.

10. ¿Kunatsa Diosan carropan uñstki uka pusi querubín angelanakajj taqpach angelanakamp sasiwa sasin sissna?

¹⁰ Diosan carropan uñstki uka pusi querubinanakajj taqpach angelanakampi sasiwa. Ezequielajj pusi querubinanak uñjäna. Pusi sasajja taqpacha, phoqata sañwa Biblian muni. Pusi querubinanak uñstatapajja, Jehová Diosan taqpach angelanakapampi sasiwa.  Uka carron ruedanakapasa querubinanakasa walja nayranakanïpjjewa, ukaw taqpach angelanakajj kunatï pasaski uk sum uñjasipkatap uñachtʼayistu. Ezequielan arunakaparjamajja, uka carrojj wali jachʼapunïpachänwa, ukatwa musparkañ querubinanakajj jiskʼakïpkaspas ukham amuyasi (Ezeq. 1:18, 22; 10:12). Ukhamasti Diosan organizacionapat mä partejj alajjpachankki ukajj wali jachʼawa, janiw pusi querubín angelanakak utjkiti.

11. ¿Daniel profetajj kuna visionsa uñjarakïna? ¿Uka visionajj kun amuytʼañatakis yanaptʼarakistu?

¹¹ Daniel profetajj ukar uñtasitarakwa mä visionan alajjpach uñjäna. Daniel profetajj Babiloniar apatäsajj ukanwa walja maranak jakäna, jupajj ukhamarakiw mä visionan alajjpach uñjäna. Danielajj visionan uñjkäna uka carrojj ruedanakanirakïnwa. Ukampis Diosan alajjpachankir familiapajj qhawqha jachʼasa ukwa visionapan jukʼamp qhanstayi. Jupajj Jehová Dios nayraqatan saytʼat walja angelanakwa uñjäna. Akham sarakïnwa: ‘Diosarojj waranqa waranqanakaw servipjjäna, jupa nayraqatansti millón millonanakaw saytʼatäpjjarakïna’ sasa. Jupanakajj alajjpachankir Tribunalanwa sapa maynejj asientonakapan qontʼasipjjäna (Dan. 7:9, 10, 13-18). Ukhamasti Ezequiel profetajj visionan uñjkäna uka carrojj alajjpachankir taqpach angelanakampi sasiwa.

12. ¿Diosan carropat yatjjatañajj kunanakatsa jarkʼaqestu?

¹² Jiwasjam pantjasir jaqenakarojj ‘jan uñjaski ukanakat’ lupʼiñaw jan walinakat jarkʼaqestu, uk Jehová Diosajj sum yati. ¿Kunatsa ukham sistanjja? Jaqenakajj jañchi cuerponikïtanwa, ukatwa ‘kunanakatï uñjaski’ ukanakaruk chuym uchtanjja, mä arunjja kunatï sapürutak munaski mä qhawqha tiempotakikïki ukanakatakwa llakistanjja (2 Corintios 4:18 liytʼañataki). Ukham jaqëtasjja Supayajj sum yati, ukatwa akapachankir jaqenakjam amuyañasatak chʼamañchistu, ukhamat jañchin munañanakap thaqañasataki. Ukampis Jehová Diosajj wal munasistu, ukatwa munañanakasampi jan apayasiñasatakejj yanaptʼistu. Ukham yanaptʼañatakejj walja qellqatanakaw utji, Ezequielan profecianakapajj uka yanaptʼanakat mayawa. Uka profecianakajj Diosan alajjpachankir familiapajj kunja jachʼasa ukwa amtayistu. ¡Ukanakajj wali musparkañapuniwa!

13, 14. 1) ¿Visionan uñjkäna uka ruedanakajj kunjamänwa sasas Ezequielajj qhanañchi? 2) ¿Kunatsa Jehová Diosan tronopajj ruedanakanïpacha?

¹³ Ezequiel profetajj pusi querubinanakatwa nayraqat parli, 4 yatichäwinwa uka angelanakajj kunsa Jehová Diosat yatichistu uk jukʼamp yatjjataskañäni. Ezequielajj uka angelanak ladonkir pusi ruedanakwa uñjarakïna, amuyatajja ruedanakajj pusi esquinankapjjänwa (Ezequiel 1:16-18 liytʼañataki). Uka ruedanakajj crisólito sat wali suma qalar uñtasitäpjjänwa, colorapajj qʼellu jan ukajj chʼojjña qʼellu vidrior uñtasitänwa. Ukajj wali sumänwa, wal kʼajarakïna.

 ¹⁴ Ezequielajj carron ruedanakapatwa jukʼamp parli, jupajj ruedanakan mä trono uñjäna. ¡Ukajj wali musparkañänwa! Cheqas reyinakan tronopajj mä cheqankakiwa, markapanakwa autoridadanïpjjaraki. Ukampis Jehová Diosajj janiw uka reyinakjamäkiti, jupajj Taqe Kunjjar Munañaniwa. Ezequielajja Diosajj wali chʼamanïtapa, Taqe Kunjjar Munañanïtap uñjañampïskänwa (Neh. 9:6). ¡Diosajj taqe cheqanwa munañapar apnaqaspa!

15. ¿Kunanakampsa Ezequielajj ruedanakat qhanañchäna?

¹⁵ Ruedanakajj kunja jachʼanakänsa uk uñjasajj wal Ezequielajj musparäna. Jupajj akham sänwa: ‘Ruedanakapajj musparkañ altonakänwa’ sasa. Uk amuytʼañäni, Ezequielajj kʼajkir uka jachʼa ruedanakajj kunjamänsa uk amuytʼañatakejj wal uñkatpachäna. ‘Uka ruedanakan taqpach muytpacharojj nayranakampi phoqantatänwa’ sasaw jupajj sarakïna. Ukampis uka ruedanakajj kunjamänsa ukaw jukʼamp musparkañänjja, ‘uka ruedanak manqhansti, yaqha ruedas utjkaspa ukham luratäpjjänwa’. ¿Ukajj kamsañsa munpacha?

16, 17. 1) Sapa rueda manqhan yaqha rueda utjatapajj ¿kunsa uñachtʼayi? 2) Jehová Diosan carropajj jachʼa ruedanakapampejj kawksarus sartakispawa, ¿kunsa ukajj yatichistu?

¹⁶ Ezequielajj visionan uñjkäna uka ruedanak manqhanjja yaqha ruedaw utjarakïna, ukhamatwa mayachtʼat uka ruedanakajj cruzjasitäpjjäna. Ukatwa Ezequielajj uka carrot akham sispachäna: ‘Uka ruedanakajj onjjtapjjäna ukhajja, nayrar sarantasajj jan kutjtasaw pusi toqenakar sarapjjaspäna’ sasa. ¿Kunsa ukajj Diosan carropat yatichistu?

¹⁷ Ukham jachʼa ruedanakanïsajj may muytasakiw jayankjjäna. Kunjamtï Ezequielajj visionan uñjkänjja, uka carrojj lliju llijur uñtataw onjjtäna (Ezeq. 1:14). Taqe toqer sariri jachʼa ruedanakapajj kawksarus facilak saratapwa uñachtʼayi, ingenieronakas inamayaw ukham lurañ munasipkaspa. ¡Uka carron kawksar sarañapatakis janiw frentʼañapasa ni kutjtañapas wakiskiti! Ukampis kawksarus sartani uk sum yati. Niyakejjay ruedanakajj walja nayranakanïchejja taqe kun sum uñjatapa, ukhamarak taqe toqer uñtatapwa amuytʼayistu.

18. ¿Diosan carropajj jachʼa ruedanakanïtapasa walja nayranakanïtapas kunsa amuytʼayistu?

¹⁸ Jehová Diosajj alajjpachankir organizacionapatjja, ¿Ezequielarusa markapat jan jitheqtirinakarusa kun amuytʼayañsa munäna? Kunsa añchhitkamajj uka organizacionat yateqjjtan uk amtañäni. Ruedanakan wali jachʼätapas wali kʼajkirïtapas wali muspkañawa. Niyakejjay ruedanakajj walja nayranakanïchejja, taqe kunwa uñjaski. Cheqas Diosaw taqe kun uñji (Prov. 15:3; Jer. 23:24). Ukatsti Jehová Diosajj millón millón angelanakaniwa, jupanakajj kawkjar khitatas sarapjjakispawa, ukhamat kunanakas pasaski ukanak sum uñjasin Jehová Diosar yatiyañataki (Hebreos 1:13, 14 liytʼañataki).

19. Diosan carropajj ratuk sarirïtapasa, kawksarus facilak sarirïtapasa, ¿kunsa Jehová Diosatsa organizacionapat mä partejj alajjpachankki ukatsa yatichistu?

¹⁹ Kunjamtï yateqaniwayktanjja, Diosan carropajj ratuk saririwa, kawksarus facilakwa sararaki. Aka oraqenkir gobiernonakampi,  institucionanakampi, organizacionanakampejja ¡janipuniw kunansa Jehová Diosan organizacionapat mä partejj alajjpachankki ukampejj igualäpkiti! Akapachankir organizacionanakajj janiw kawksar sarapjjatapsa yatisipkiti, ukatwa mä akatjamat kunas mayjtʼi ukhajj qʼal aynachtʼapjje, chhaqtjjapjjaraki. Ukampis Jehová Diosan carropajj janiw ukhamäkiti, niyakejjay jupa pachpa apnaqchejja, amuytʼasirïtapa kun mayjtʼipansa ratuk ukarjam lurirïtapwa uñachtʼayi. Sutipajj kamsañtï munki ukaw ukham Diosätap uñachtʼayi, jupajj amtap phoqañatakejj kunar tukuñatï wakiski ukaruw tukuspa (Éx. 3:13, 14). Uk amuytʼañäni, Jehová Diosajj markapar jarkʼaqañatakejj jankʼakiw guerran nuwasiri wali chʼamanir tukuspa, ukatsti jankʼakirakiw khuyapayasir Diosar tukuspa, ukhamat juchapat taqe chuym arrepentisipki ukanakar perdonañataki, munasiñampi uñjañatakiraki (Sal. 30:5; Is. 66:13).

20. ¿Kunatsa Jehová Diosan carropar wali respetomp uñjañasa?

²⁰ Ezequielan visionapat yatjjatasajja, sapa mayniw akham sasin jisktʼasiñasa: ‘¿Nayajj Jehová Diosan carropar wali respetompit uñjasktjja?’ sasa. Diosan carropajj cheqapuniw jichhürunakan utjaski. Jehová Diosasa, Jesucristosa, angelanakasa, kunanakatï llakisiykistu ukanak sumwa uñjasinipki. Akapachajj mä akatjamatwa mayjtʼaspa, ukampis Diosajj jankʼakiw wakisitarjam yanaptʼistani, organizacionapas jankʼakirakiw kunatï wakiski ukanak lurani, ukhamasti janiw sinti llakisiñasäki. Jehová Diosan organizacionapajj nayraruw sartaski, uk amtapuniñäni. Ezequiel profetajja ‘¡ruedanaka!’ sasin alajjpachan artʼasirwa istʼäna, inas ukajj ruedanakan sartapjjañapatakïchïna (Ezeq. 10:13). Kunjamsa Jehová Diosajj organizacionapar apnaqe ukajj wali musparkañawa, ukampis Jehová Diosajj kunjamasa ukaw jukʼamp musparkañajja.

21, 22. ¿Diosan carroparojj kunas sarnaqayi? Uk qhanañchtʼam.

²¹ Ukjjarusti Ezequielajj kunatï ruedanak patjjan utjkäna uka toqetwa parlaraki, jupajj akham siwa: ‘Vidrior uñtasit mä pisow utjäna, ukasti chhullunkhayjamaw llijïna, wali musparkañarakïnwa’ sasa (Ezeq. 1:22). Querubinanak patjjan vidrior uñtasit mä pisow utjäna, wal llijirakïna. Inas mecánica toqet yatipki ukanakajj akham jisktʼasipjjchispa: ‘¿Ruedanak patjjankki uka pisorojj kunas katjjaspacha? Niyakejjay ruedanak katjjasiñatak jan kunas utjkchitejja, ¿kunjamsa uka ruedanakajj funcionapjjpacha?’ sasa. Diosan carropajj janiw akapachan utjki uka carronakjamäkiti, ni uka carronakjamas sarnaqkiti, ¿kunatsa ukham sistanjja? Diosan carropajj mä uñachtʼäwikiwa, alajjpachan kunanakas utji uk amuytʼañasatakiwa. Jichhasti ‘kawkïr espiritutï angelanakar irpkäna uka pachpa espirituw ruedanakan utjarakïna’ siski uka arunakat amuytʼarakiñäni (Ezeq. 1:20, 21). ¿Kuna espiritutsa ukan parlaski?

 ²² Jehová Diosan wali chʼamani espíritu santopatwa parlaski. Uka chʼamaw Diosan carroparojj sarnaqayi, mayachtʼatäñapatakisa kawksar sum sarañapatakis yanaptʼaraki. Khitis uka carro apnaqe ukwa Ezequielajj uñjarakïna, kunsa uñjpachäna uk jichhajj yatjjatañäni.

23. ¿Ezequielajj kuna arunakampis visionap qhanañchäna? ¿Jehová Diosat qhanañchañatakejj kunatsa uka arunak walja kuti aytpachäna?

²³ Ezequiel 1:26-28 liytʼañataki. Uñjkäna uka visionajj kunjamänsa uk qhanañchañatakejja, Ezequielajj ‘uñtasitawa’, ‘uñtasitänwa’, ‘uñtasita’ sasaw walja kuti säna. Ukampis liytʼktan uka textonakanjja, uka arunakajj jukʼampiw uñsti. Ukham sasinjja kunanaktï uñjkäna ukanakat jan qhanañchañjamäki ukanak amuytʼayañatakiw ukham sispachäna. Ezequielajj akham sänwa: ‘Zafiro sat qalar uñtasitaw utjäna, ukajj mä tronor uñtasitarakïnwa’ sasa. ¿Zafiro sat chʼiyar azul qalat lurata mä tronojj kunjamäspasa uk amuytʼasmati? Mayniw uka tronon qontʼatäskäna, ‘jupasti mä jaqer uñtasitänwa’.

24, 25. 1) ¿Jehová Diosan tronop patjjan uñstkäna uka kurmejj kunsa amtayistu? 2) ¿Diosar confiyir yaqhep chachanakarojj kunjamsa ukham visionanak uñjañajj chʼamañchtʼäna?

²⁴ Tronon qontʼatäkäna ukajj janiw uñjañjamäkänti. Jehová Diosajj cinturapat alayarojj wali kʼajkir ninjamaw qhanäna, cinturapat aynacharusti mä ninar uñtasitaw qhanarakïna. Ezequiel profetajj uk uñjañatak wal chʼamachaspachäna, uñchʼukkasajj  amparapampiw jan qhansuyasiñatakejj jarkʼaqasirakpachäna. Ukjjarusti jukʼamp musparkañwa uñjarakïna, ukatwa akham säna: ‘Juparojj mä qhanaw muytpachar qhantʼarakïna, jallu urun qenayanak taypinkir kurmir uñtata’ sasa. ¿Kunjamsa kurmejj uñsti uk wali musparat uñchʼukirïtati? ¡Taqe kun Luriri Diosajj kunja muspkañasa ukwa kurmejj amtayistu! Suma coloranakani uka kurmejj Uma Juicio pasatat Jehová Diosajj sumankañatak mä pacto lurkäna ukwa amtayarakistu, ukajj wal chuymachtʼistu (Gén. 9:11-16). Wali chʼamani Diosäkchisa, sumankañ utjayir Diosawa (Heb. 13:20). Chuymapanjja sumankañaw jilanki, ukatsti jupat jan jitheqtiri servirinakaparuw uka sumankañ churaraki.

²⁵ ¿Kunsa Ezequielajj Jehová Diosan wali kʼajkirïtap uñjasajj luräna? Jupajj akham sänwa: ‘Uk uñjasajj oraqer puriñkamaw nayajj altʼasta’ sasa. Ezequielajj wal musparäna, Diosarus wal ajjsartʼarakïna, ukatwa oraqer puriñkam altʼasïna. Yaqha profetanakajj ukhamarakwa Jehová Diosat visionanak katoqasajj lurapjjerïna. Cheqas Diosan visionap ukham uñjañajj wali ajjsarkañäpachawa, janis kunäksna ukham amuyasiñjamarakïpachawa (Is. 6:1-5; Dan. 10:8, 9; Apoc. 1:12-17). Ukhamäkchïnsa Diosan visionap uñjir uka chachanakajja wali chʼamañchtʼatäpjjänwa. Ezequielas ukhamarakiw wali chʼamañchtʼatäpachäna. Ukham visionanak Biblian liytʼañajj ¿kunjamsa jiwasar yanaptʼarakistaspa?

26. ¿Kunatsa Ezequielarojj uka visión uñjañajj wal chʼamañchtʼpachäna?

²⁶ Diosan markapajj kunjamsa Babilonian sufrisipkäna uk uñjasajja, Ezequielajj wal llakisïna ukampis uka visión uñjañaw jupar wal chʼamañchtʼpachäna. Diosat jan jitheqtiri Jupan markapajj Jerusalenankpasa Babiloniankpasa, Diosan kʼajkir carropajj jupanak jakʼankaskänwa. Supayan apnaqata markanakatjja, janiw ni mayas Diosan alajjpachankir organizacionap contrajj saytʼkaspati (Salmo 118:6 liytʼañataki). Ukhamarusa Diosan carropajj jaqenak jakʼankatapwa Ezequielajj uñjäna. ¡Ruedanakapas oraqkamaw purïna! (Ezeq. 1:19). Markapajj jaya markar apatäpkchïnsa, kunas jupanakar pasäna ukanak sumwa Diosajj uñjaskäna. Ukhamasti wali munasiri, jan walinakat jarkʼaqeri Diosaw markaparojj cuidaskäna.

27. ¿Kunjamsa Ezequielan visionapajj jichhürunakan yanaptʼistu?

²⁷ ¿Ezequielajj uñjkäna uka visionajj jiwasar yanaptʼarakistaspati? Jïsa. Ak amtapuniñäni, Jehová Diosar jan adorasjjañapatakejj kunayman jan walinakwa Supayajj luraski. Alajjpachankir Awkisasa, organizacionapasa, sapa mayni jiwasat wali jayankkaspasa, jiwasajj saparstʼatäksnasa ukham amuyañaswa Supayajj muni. ¡Janipuniw Supayan uka kʼari amuyunakapar mä jukʼsa  creyiñasäkiti! (Sal. 139:7-12). Jehová Diosar munasiñampi respetompi uñjañatakejja, Ezequieljamarakiw walja razonanakanïtanjja. Inas jupjamajj oraqer puriñkam jan altʼaskchiñäniti, ukampis Diosan organizacionapat mä partejj alajjpachankki ukajj wal musparayistu, yamas qhawqha jachʼasa, kunja chʼamanisa, ukhamarak ratuk sarirïtapasa, taqe toqer jankʼak sarirïtapasa, kunatï wakiski ukarjam jankʼak kun lurirïtapasa wali musparkañawa.

28, 29. Aka qhepa patak maranakanjja, ¿kunanakas Jehová Diosan carropan wal saraskatap uñachtʼayistu?

²⁸ Jehová Diosan organizacionapat mä partejj aka oraqenkarakiwa. Pantjasir jaqenakas ukankapkchejja, kunanaktï Diosajj aka oraqen lurawayki ukanak amuytʼañäni. Oraqpachanjja kunanaktï jaqenakajj jan lurksna ukanak lurañatakiw Diosajj yanaptʼawayistu (Juan 14:12). ¡Diosan Reinopajj apnaqjjewa! libro liytʼañajja, kunjamsa aka qhepa patak maranakan oraqpachan predicasjje uk amtañatakiw yanaptʼistani. Ukatsti kunjamsa Diosan organizacionapajj nayrar sartaski ukwa amuyaraksna, sañäni markaparojj wali sumwa yatichistu, juicionakansa walja kutiw atiparaktanjja, tecnologian nayrar sartatapas Diosan munañap lurañatakiw wal yanaptʼarakistu.

²⁹ Aka jan wali qhepa tiemponjja, Jehová Diosaruk adorasiñapatakejj walpun servirinakapajj trabajtʼaski. Ukaw Diosan carropajj wal saraskatap amuytʼayistu. Jiwasat sapa maynejj uka organización taypinktanwa, Taqe Kunjjar Munañani Jehová Diosaruw adoraraktanjja. Ukajj mä suma bendicionawa, ¡ukham suma luräwejj janiw utjkiti! (Sal. 84:10).

30. ¿Kunsa akjjar jutki uka yatichäwin yatjjataskañäni?

³⁰ Ezequielajj uñjkäna uka visionatjja jukʼampinakwa yateqsna. Akjjar jutki uka yatichäwinjja, ‘pusi angelanakar uñtasitanakatwa’ mä arunjja pusi querubinanakatwa yatjjataskañäni. ¿Kunsa uka angelanakajj Taqe Kunjjar Munañani Jehová Diosat yatichistu?