1, 2. ¿Awisajj kunatsa Jehová Diosajj aka oraqenkir servirinakapar wakiskir uñachtʼäwinakamp yatichpacha?

 MÄ FAMILIAJJ cocinanwa mesa ladonakan qontʼatäsipki, awk taykajj wawanakaparuw Bibliat yatichasipki. Biblian mä yatichäwip amuytʼayañatakejja, tatapajj facilak amuykañ dibujonak dibujtʼasaw wawanakapar amuytʼayi. Ukham luratapatjja wawanakajj kusisitaw yateqapjje, ukarjamaw arstʼapjjaraki. Jehová Diosan yatichäwinakap amuytʼañajj uka wawanakatak chʼamäkchisa, tatapajj dibujonakampi suma arunakampiw wawanakapan amuytʼapjjañapatak yanaptʼi.

² Jehová Diosajj ukhamarakiw kunatï jan uñjaski ukanakat amuytʼañasatakejj uñachtʼäwinakampi yanaptʼistu, jan ukham yatichkistaspa ukhajj janiw amuyañ puedksnati. Sañäni, Ezequiel profetar Jupa toqet yatichañatakejja, mä visionanwa wali musparkañanak uñjayäna. 3 yatichäwinjja, uka visionan mä uñachtʼäwipatwa yatjjataniwaytanjja. Jichhajja uka visionan uñstkäna uka yaqha uñachtʼäwitwa yatjjataskañäni, uka uñachtʼäwejj kamsañsa muni uk yatiñajj kunjamsa Jehová Diosar jukʼamp jakʼachasiñatak yanaptʼistu ukwa yatjjataskarakiñäni.

3. 1) Ezequiel 1:4, 5 qellqatarjamajja, ¿kunsa Ezequielajj visionan uñjäna? (Aka yatichäwi qalltan utjki uka dibujo uñjjattʼäta). 2) ¿Kunjamtï visionanakap qellqkäna ukajj kunsa Ezequielat uñachtʼayistu?

³ Ezequiel 1:4, 5 liytʼañataki. Ezequielajj ‘pusi angelanakar uñtasitanakaw utjäna’ sasaw qhanañchi, uka angelanakajj mä jaqeru, ukhamarak leonaru, pakaru (aguilaru), tororu uñtasitänwa. Kuntï uñjkäna ukjja wali amuyumpiw Ezequielajj qellqawayi, jupajj akham sänwa: ‘Angelanakar uñtasitanakaw utjäna’ sasa. Ezequielajj walja kutiw ‘uñtasitanakawa’, ‘uñtasita’, ‘uñtatawa’, ‘uñtasitänwa’ sasin säna, ukwa Ezequiel libron nayrïr capitulop liytʼasajj amuysna (Ezeq. 1:13, 24, 26). Ezequielajja kunanakatï alajjpachan utjki, jan uñjaskaraki ukanakan uñachtʼäwipak visionan uñjaskatapwa amuyäna.

4. 1) ¿Ezequielajj visión uñjasajj kunjamas jikjjataspachäna? 2) ¿Kunsa Ezequielajj querubín angelanakat yatpachäna?

⁴ Ezequielajj visión uñjasasa istʼasasa wal musparpachäna. Visionan uñjkäna uka pusi angelanakajj ‘aqkir nina sankʼanakjamäpjjänwa’, ‘lliju llijunakjamaw’ ratuk onjjtapjjarakïna. Angelanakan chheqanakapan suynatapajj ‘jalir walja umanakar uñtasitaw istʼasïna’, ukatsti uka angelanakajj onjjtapjjäna ukhajja, ‘mä ejercitor uñtataw suynäna’ (Ezeq. 1:13, 14, 24-28; “Ezequielajj pusi angelanakwa uñjäna” sat recuadro uñjjattʼäta). Ezequielajj qhepat uñjkäna uka visionanjja, uka pusi angelanakajj ‘querubín angelanakänwa’ sasaw qhanañchi, uka kasta angelanakajj wali chʼamanïpjjewa (Ezeq. 10:2). Niyakejjay Ezequielajj sacerdotet servipkäna uka familia taypin jilschïnjja, querubinanakajj Jehová Dios jakʼankapjjatapsa, jupar servipjjatapsa sum yatpachäna (1 Crón. 28:18; Sal. 18:10).

5. 1) ¿Kunjamsa querubín angelanakasa, pusi ajanunakapasa Jehová Diosajj taqe kunjjar chʼamanïtapa wali jachʼätap uñachtʼayi? 2) ¿Kunatsa uka visionajj Diosan sutipajj kamsañsa muni uk amtayistu? (Qhanañchäwi uñjjattʼäta).

⁵ Ezequiel 1:6, 10 liytʼañataki. Ezequielajja sapa querubín angelajj pusi ajanunïtapwa uñjäna: jaqe ajanuni, león ajanuni, toro ajanuni, paka ajanuni. Ukanakajja Jehová Diosajj wali chʼamanïtapa, wali jachʼätapwa Ezequielar amuytʼaypachäna. ¿Kunatsa ukham sistanjja? Uka kimsa animalanakampina jaqempina ajanunakapajja, wali chʼamanïpjjatapa wali musparkañäpjjatapwa uñachtʼayi. Torojj wali chʼamani animalawa, leonajj muspkañ animalawa, pakajj ukhamarakiwa, jaqesti Jehová Diosajj aka oraqen jakirinakat lurawayki ukanakat sipansa wali sumawa, jaqew Diosan taqe luratanakapar aka oraqen apnaqaraki (Sal. 8:4-6). Kunjamtï Ezequielajj uñjkänjja, querubinanakan ajanupan uñstkäna uka kimsa animalanakasa jaqesa, Taqe Kunjjar Munañani Jehová Diosan tronopat manqha toqenkänwa. Ukajja Diosajj kunjamsa luratanakap toqejj kuntï amtki uk phoqaspa ukwa uñachtʼayistu. * Salmonak qellqeri mä chachajja, Jehová Diosat akham sänwa: ‘Jupaw oraqjjarusa alajjpachjjarus apnaqe’ sasa (Sal. 148:13).

6. Angelanakan pusi ajanunakapajj kunampi sasisa uk amuyañatakejja, ¿kunas Ezequielar yanaptʼpachäna?

 ⁶ Ezequielajj visión uñjkäna, uka visionat amuytʼkarakïna uka qhepatwa kunjamsa Diosan nayra servirinakapajj yaqhep jaqenakar animalanakampi comparapjjäna uk amtpachäna. Sañäni, Jacob chachajj Judá yoqapat parlkasajj ‘leonan qallupawa’ sasaw säna, Benjamín yoqapatsti ‘mä lobo animalar uñtasitaw’ sasaw sarakïna (Gén. 49:9, 27). ¿Kunatsa ukham sispachäna? Judá chachasa, Benjamín chachasa, wawanakapasa uka animalanakjam chʼamani jan ajjsarirïpjjänwa. Uk yatisaw Moisesajj Diosan amuytʼayatäsin ukham qellqpachäna. Ezequielajja querubinanakan pusi ajanunakap uñjasajj inas ukham amuyarakchïna, inas uka animalanakajj kunjamäpjjesa uk amtchïna. ¿Ukham sasajj kamsañsa muntanjja?

7, 8. ¿Querubín angelanakan pusi ajanunakapajj kuna toqet parlañatakis nayrajj qellqasirïna?

⁷ Biblia qellqerinakajja, Ezequielat nayrajj ¿kuna toqet parlañatakis león, paka, toro uka animalanakat qellqapjjäna? Ukatakejja Biblian uñstki uka arunakat amuytʼañäni. ‘Jan ajjsartʼiri mä chachajja, leonan chuymapjamawa’ (2 Sam. 17:10; Prov. 28:1). ‘Pakajj wali altoruw jalkati’, ‘nayranakapajj wali jayaruw uñtaraki’ (Job 39:27, 29). ‘Chʼamani mä torojja walja cosechwa utjayi’ (Prov. 14:4). Uka textonakarjamajja, jan ajjsarir leonan ajanupajj cheqapar uñjañampi sasiwa. Pakan ajanupajja, wali yatiñanïñamp sasiwa. Toron ajanupasti, wali chʼamanïñampi sasirakiwa. Ukanakajj walja kutiw Bibliat apstʼat qellqatanakasan qhanañchasiwayi.

⁸ ¿‘Jaqen ajanupajj’ kunamp sasirakisa? (Ezeq. 10:14). Uka ajanojja jaqejj kunjam chuymanisa ukamp sasispawa, animalanakajj janiw ukhamäpkiti, cheqas ‘Diosajj jupar uñtasitwa jaqer luräna’ (Gén. 1:27). Jaqenakakiw cheqpach munasiri luratäpjje, ukatwa Diosajj akham sasin jaqenakar mayïna: ‘Jehová Diosamarojj taqe chuymamampi [...] munasiñamawa’, ‘jaqe masimarojj juma kikparjam munasiñamawa’ sasa (Deut. 6:5; Lev. 19:18). Diosan uka mayitanakapar istʼtan ukhajja, taqe chuyma munasirïtaswa uñachtʼaytanjja, Jehová Diosajj qhawqha munasirisa uks uñachtʼayaraktanwa. Apóstol Juanajj akham sasaw qellqäna: ‘Diosaw nayraqat munasistu, ukatwa jiwasajj munasiñ yatiraktanjja’ sasa (1 Juan 4:8, 19). Ukhamajja ‘jaqen ajanupajj’ munasiñamp sasiwa.

9. ¿Querubinanakan pusi ajanunakapajj kunsa Diosatsa alajjpachankir familiapatsa yatichistu?

⁹ ¿Khitinakas ukham cualidadanakanïpjjaraki? Ezequielajj uñjkäna uka ajanunakajj querubinanakan ajanunakapänwa, ukhamasti uka angelanakajj khitinakarutï representki taqe ukanakaw ukham suma cualidadanakanïpjjaraki, mä arunjja Diosan alajjpachankir taqpach familiapaw ukhamäpjje (Apoc. 5:11). Niyakejjay Jehová Diosajj querubinanakar vida churchejja, uka suma cualidadanakapajj Diosatwa juti (Sal. 36:9). Ukhamasti querubín  angelanakan ajanunakapajja, Jehová Diosajj kunjamasa kunjam chuymanisa taqe ukanakwa uñachtʼayi (Job 37:23; Sal. 99:4; Prov. 2:6; Miq. 7:18). ¿Kunjamanakatsa Jehová Diosajj ukham chuymanïtap uñachtʼayi?

10, 11. ¿Diosajj kunjamanakatsa cheqapar uñjirïtapsa, yatiñanïtapsa, chʼamanïtapsa, munasirïtapsa uñachtʼayi? ¿Kunjamsa uk yatiñajj yanaptʼistu?

¹⁰ Cheqapar uñjiriwa. Jehová Diosajja ‘kunatï cheqapäki ukar munasiriwa’, ukatwa ‘jupajj jan khitirus yaqhachkiti’ (Sal. 37:28; Deut. 10:17). Ukhamasti jiwasajj kuna familiatäkstansa, jan ukajj kunjam familiansa jilsuwaykstanjja, taqeniw Diosan serviripäsna, jupar serviñatjja janiw khitis apaqkistaspati, taqenirakiw Diosan bendicionanakap wiñayatak katoqsna. Yatiñaniwa. Jehová Diosajja ‘chuymapan yatiñaniwa’, ukatwa jupajj mä suma libro taqenir churistu, uka libronjja ‘walja yatiñaw’ utji (Job 9:4; Prov. 2:7). Biblian utjki uka suma ewjjtʼanakarjam sarnaqañajja, sapürun kuna jan walinakantï uñjasktan ukanakar saykatañatakiw yanaptʼistu, sum jakasiñatakis yanaptʼarakistuwa. Chʼamaniwa. Jehová Diosajj ‘wali chʼamanirakiwa’, espíritu santop toqew ‘jaqen chʼamapat jilankki uka chʼama’ churistu, ukaw kunayman jan walinak aguantañatak chʼam churistu (Nah. 1:3; 2 Cor. 4:7; Sal. 46:1).

¹¹ Munasiriwa. Jehová Diosajj ‘wali munasiri jan jaytjasiri Diosawa’, jupajj janipuniw jupat jan jitheqtirinakarojj jaytjkiti (Sal. 103:8; 2 Sam. 22:26). Usutäjjasasa edadanëjjasasa, janiw Jehová Diosarojj kunjamtï nayrajj sirvkayätan ukham serviñ puedjjsnati, ukhaman uñjasisajj wal llakissna. Ukampis kunanaktï Diosar munasitasat lurawayktan ukanakjja jupajj janiw armkaniti, uk yatiñajj walpun chuymachtʼistu (Heb. 6:10). Jehová Diosajja cheqapar uñjiri, yatiñani, chʼamani, munasiri ukham Diosawa, ukajj wal jichhürunakan yanaptʼistu, jutïrinsa yanaptʼaskakistaniwa.

12. ¿Diosan cualidadanakap amuysnati?

¹² Jehová Diosajj kunjamasa kunjam chuymanisa ukjja janiw sumpach amuytʼksnati, cheqas jiwasajj Diosan ‘thakinakapan thiyanakapakwa’ yattanjja (Job 26:14). ‘Janiw jiwasanakajj Taqe Chʼamani Diosat amuytʼksnati’, ‘jupajj kunja jachʼa Diosasa ukajj jan yatjjatkayawa’ (Job 37:23; Sal. 145:3). Ukatwa Diosan cualidadanakapajj jan jaktʼkayawa, janirakiw tʼaqjjtkaspati sasin sistanjja (Romanos 11:33, 34 liytʼañataki). Ezequielan visionapas ukwa qhanañcharaki (Sal. 139:17, 18). Ukan cheqätapjja ¿kunjamsa Ezequielan visionapajj qhanstayi?

13, 14. ¿Querubín angelanakan pusi ajanunakapajj kamsañsa muni? ¿Kunatsa ukham sistanjja?

¹³ Ezequielajj visionan uñjkäna uka angelanakajj janiw mä ajanunikïpkänti, jan ukasti pusi ajanunïpjjänwa. ¿Ukajj kamsañsa muni? Amtañäni, Biblianjja pusi sasajj taqpacha, jan ukajj phoqata sañatakiw jilapartejj apnaqasi (Is. 11:12; Mat. 24:31; Apoc. 7:1). Ezequielajj uñjkäna uka visionanjja, pusi sasajj 11 kutiw säna  (Ezeq. 1:5-18). ¿Kunsa ukajj amuytʼayistu? Kunjamtï pusi querubinanakajj Diosar taqe chuym serviri taqpach angelanakampi saskejja, ukhamarakiw querubinanakan pusi ajanunakapajj Jehová Diosan taqpach cualidadanakapampi sasejja. *

¹⁴ ¿Querubín angelanakan ajanunakapan uñstki ukajj janiw pusi cualidadanakakïkiti sasajj kunatsa sissna? Uk amuytʼañatakejj Ezequielan visionapan uñstkäna uka pusi ruedanakat amtañäni. Sapa ruedajj wali musparkañänwa, ukampis uka pusi ruedanakajj janiw aleq musparkañakikänti, jan ukasti taqpachajj Jehová Diosan carropan ruedanakapänwa. Niya ukhamarakiw querubinanakan taqpach ajanunakapajj Jehová Diosan taqe cualidadanakapampi sasejja, janiw pusi cualidadanakaki sañ munkiti.

15. ¿Kunsa nayrïr visionapat Ezequielajj yateqäna?

¹⁵ Nayrïr visionapanjja, Diosan jakʼapankañatakejj kunas jukʼamp wakiskirejja ukwa Ezequielajj yateqäna. Ukajj Ezequiel libro qalltankiwa. Nayraqatjja Ezequielajj akham sänwa: ‘Caldeonakan oraqepankayätwa’ sasa, ukjjarusti akham sarakïnwa: ‘Ukanwa Jehová Diosan chʼamapajj nayjjar jutäna’ sasa (Ezeq. 1:3). Ukhamasti  Ezequielajj janiw uka visión Jerusalenan uñjkänti, jan ukasti ukanwa, mä arunjja Babilonianwa uka visión uñjäna. * ¿Kunsa ukajj Ezequielar yatichäna? Jupajj Jerusalenatsa templotsa yaqha markar apatäkchïnsa, Jehová Diosajj jakʼapankaskänwa, Juparojj adoraskakispänwa. Diosajj Babilonianwa Ezequielarojj mä visionan uñstäna. ¿Kunsa ukajj Ezequielar uñachtʼayäna? Diosar adorañatakejj kawkjansa jakaskpan kuna lurañanïskpasa, ukajj janiw importantëkänti, jan ukasti kunjam chuymanïnsa, Diosar adorañ taqe chuymat munäna janicha ukaw jukʼamp importantënjja.

16. 1) ¿Kunar confiyañatakis Ezequielan visionapajj yanaptʼistu? 2) ¿Kunatsa jumajj Jehová Diosar serviñ taqe chuyma amtta?

¹⁶ Ezequielajj kuntï visionapat yateqkäna ukajja ¿kunjamsa jiwasarojj chuymachtʼarakistaspa? Jiwasatï Jehová Diosar taqe chuyma serviñäni ukhajja, kawkjansa jakaskchiñäni, wali llakitasa uñjaskchiñäni, jan ukajj kunjamansay uñjaskchiñänejja Jupajj jiwas jakʼankaskakiniwa (Sal. 25:14; Hech. 17:27). Jehová Diosajj sapa mayni servirinakaparojj wal munasi, ukatwa servirinakapajj pantjasipjje ukhajj jan jankʼak jaytjkiti (Éx. 34:6). Ukhamasti Diosajj munasiñampipuniw uñjitani, janirakiw jaytjkitaniti sasaw confiysna. Jupajj jiwas jakʼankaskapuniniwa (Sal. 100:5; Rom. 8:35-39). Ukatsti Ezequielajj Jehová Diosan santötap visionan uñjkäna uk amtañasa qhawqha chʼamanisa uk amtañasa, Jupa saparuk adorasiñapwa amtayistu (Apoc. 4:9-11). Jehová Diosajj kunjamasa kunjam chuymanisa ukanakjja, jupajj visionanak toqew amuytʼayistu, ukham luratapat walpun yuspärtanjja. Kunapachatï Jehová Diosan cualidadanakapat sum yateqtan ukhajja, juparojj jukʼampiw jakʼachastanjja, ukaw jupar taqe chuymampi taqe chʼamampi adorañatakisa serviñatakis yanaptʼistu (Luc. 10:27).

17. ¿Kuna jisktʼanakarus akjjar jutki uka yatichäwinakan qhanañchasiskani?

¹⁷ Ukampis Ezequielan tiempopanjja, Diosar adorañajj qʼañuchatäjjänwa. ¿Kunjamatsa ukajj paspachäna? ¿Kunsa Jehová Diosajj lurpachäna? ¿Kunatï nayrajj paskäna ukat kunsa yateqsna? Akjjar jutkani uka yatichäwinakanwa uka jisktʼanakar qhanañchasiskani.