1, 2. ¿Kuna jachʼa guerras jakʼachasisinki, kunanaksa jisktʼasiraksna? (Aka yatichäwi qalltan utjki uka dibujo uñjjattʼäta).

 WALJA waranq maranak nayratpachwa jaqenakajj kunayman guerranak utjayawayapjje, sañäni primera ukhamarak segunda guerra mundial ukanakanjja walja jaqenakaw jiwarawayapjje. Ukampis jukʼamp jachʼa guerraw utjani, uka guerrajj janiw kunjamtï markanakajj munañanakap thaqasin nuwasipki ukhamäkaniti. Cheqas “Taqe Chʼamani Diosan jachʼa urupan guerrajj apaskani” ukaw jakʼachasisinki (Apoc. 16:14). ¿Kunjamsa uka guerrajj qalltani? Jachʼa jachʼa tukuri mä enemigow Diosatakejj wali valoranïki uka oraqer mantantani. Ukham luratapatwa Taqe Kunjjar Munañani Jehová Diosajj uka enemigor qʼal tukjani. Ukham tukjäwejj janipuniw kunapachas uñjasiwaykiti.

² Ukhamäkchisa aka wakiskir jisktʼanakaw utji: ¿khitis uka enemigojja? ¿Kawkïr oraqerus mantantani? ¿Kunapachasa, kunatsa, ukhamarak kunjamsa uka oraqerojj mantantani? Ukanakajj jutïrinsa phoqaskchinejja, taqe khitinakatï Jehová Diosar aka oraqen adorktan ukanakatakiwa, ukatwa uka jisktʼanakan qhanañchäwip yatiñasajj wakisi. Ezequiel 38, 39 capitulonakanwa uka toqet qhanañchasi.

3. ¿Magog oraqenkiri Gog satäki ukat parlir profeciajj kunjamsa qhanañchasispa?

 ³ (Ezequiel 38:1, 2, 8, 18; 39:4, 11 liytʼañataki). Uka textonakan qellqatäki uka profeciajj akham sasispawa: ‘Walja maranak qhepatsti’ ‘Magog oraqenkiri Gog satäki’ ukajj Diosan markapan oraqeparuw mantanti. Ukham mantatapatwa Jehová Diosajj wal colerasi, ukatsti Gog satäki ukaruw qʼal tukjaraki. * Ukjjarusti Diosajj enemigonakapan jiwat cuerponakapjja, ‘aycha manqʼani jamachʼinakaru salvaje animalanakaruw’ churi ukhamat qʼal manqʼantapjjañapataki. Tukuyarojja Jehová Diosajj Gog sat enemigoparojj ‘mä sepultura churi’. Uka profeciajj kunjamsa akat mä jukʼarojj phoqasini uk amuyañatakejja, Gog satäki ukajj khitisa ukwa yatiñasa.

4. ¿Magog oraqenkiri Gog satäki ukajj khitisa?

⁴ Ezequielajj qhanañchkäna ukarjamajja, Magog oraqenkiri Gog satäki ukajja Jehová Diosaruk adorapki ukanakan enemigopawa. Niyakejjay Supayajj Diosar adoririnak conträchejja, ¿jupat Gog satäpacha? Walja maranakaw Bibliat apstʼat qellqatanakasajj ukhamätap qhanañchäna. Ukampis uka toqet jukʼamp yatjjatasajja, Ezequielan profeciapajj kamsañsa muni uk jukʼamp sumwa amuyjjtanjja. Yatiyañataki revistanjja Magog oraqenkiri Gog satäki ukajj janiw mä angeläkiti, jan ukasti aka oraqenkir mä enemigowa sasaw qhanañchäna. Uka enemigojja, kawkïr markanakatï Diosar adoraski uka contra saytʼapkani ukanakäniwa. * Kunatsa ukham sistan uk janïr yatjjatkasajja, Gog satäki ukajj janiw mä angeläkiti sañatakejj kuna pä razonanakas Ezequielan profeciapan utji uk yatjjatañäni.

5, 6. Magog oraqenkiri Gog satäki ukajj janiw mä angeläkiti, ¿kunjamsa Ezequielan profeciapajj ukhamätap qhanañchi?

⁵ ‘Aycha manqʼani jamachʼinakaru ukhamarak salvaje animalanakaruw manqʼapäñamatak katuyäma’ (Ezeq. 39:4). Jehová Diosajj mä markar juchañchki ukhajja, aycha manqʼani jamachʼinakaw jiwat cuerponakap manqʼantani sasaw Biblian qhanañchi. Jehová Diosajj ukhamwa israelitanakarusa yaqha markanakarusa ewjjtʼäna (Deut. 28:26; Jer. 7:33; Ezeq. 29:3, 5). Uka ewjjtʼanakajj janiw angelanakatakïkänti, jan ukasti jaqenakatakïnwa. Cheqas aycha manqʼani jamachʼinakasa salvaje animalanakasa janiw angelanak manqʼantapkaspati, jan ukasti aychwa manqʼapjje. Ukhamasti Ezequielan profeciaparjamajja, Gog satäki ukajj janiw mä angeläkaspati.

⁶ ‘Gog satäki ukarojj Israelan mä vallepan mä sepultura churäjja’ (Ezeq. 39:11). Biblianjja angelanakar sepulturaru imtʼasjjatap janiw qhanañchkiti. Antisas Supayampi demonionakampejj waranqa maranakaw mä mikʼayan (wali manqha mä pʼiyan) jistʼantatäpjjani siwa. Ukatsti nina aqaskir qotar jaqontatäpjjaniwa sarakiwa, ukajj wiñayatak jiwayatäpjjaniwa sañwa muni (Luc. 8:31; Apoc. 20:1-3, 10). Ezequielan profeciaparjamajja, Gog satäki ukarojj ‘mä sepulturaw’ aka oraqen churasi, ukhamasti janiw mä angeläkaspati.

7, 8. ¿‘Rey del norte’ ukarusa Magog oraqenkiri Gog satäki ukarus kunas pasani?

⁷ Niyakejjay Gog satäki ukajj jan mä angeläkchejja, ¿khitis Diosan enemigopajja? ¿Khitis Diosan servirinakaparojj qhep qhepa  kutin tukjañ munani? Gog satäki ukajj khitisa uk yatiñatakejja, Bibliankir pä profecianakat yatjjatañäni.

⁸ ‘Rey del norte’ (Daniel 11:40-45 liytʼañataki). Daniel profetajja kawkïr markanakas uka tiempot jichhakamajj oraqpach apnaqapjjani ukwa qhanañchäna. Mä profeciapanjja jupanakkam chʼajjwiri wali chʼamani pä reyinakatwa parläna, ukanakajj rey del sur, rey del norte ukanakawa. Nayra maranakatpachwa may maya markanakajj uka reyinakamp sasïna. Uka markanakajj walja waranqa maranakaw oraqpachan wali munañanïñatak wal chʼamachasiwayapjje. Rey del nortejj tukuy tiempon qhep qhepa kutin atackani uka toqet parlkasajja, Daniel profetajj akham sänwa: ‘Jupasti wali colerataw waljanir jiwayañataki ukhamarak tukjañataki mistuni’ sasa. Rey del nortejja Jehová Diosan servirinakapar tukjañatakiw wal chʼamachasini. * Ukampisa Diosan markap contra saytʼapkani ukhajja, rey del nortesa Magog oraqenkir Gog satäki ukasa qʼala tukjatäpjjaniwa.

9. ¿Kunas Magog oraqenkir Gog satäki ukarusa ‘oraqpachankir reyinakarusa’ pasani?

⁹ ‘Oraqpachankir reyinaka’ (Apocalipsis 16:14, 16; 17:14; 19:19, 20 liytʼañataki). Apocalipsis libronjja ‘oraqpachankir reyinakajj’ ‘reyinakans Reyipäki’ uka Jesús contraw sartapjjani sasaw qhanañchi. Niyakejjay jupanakajj alajjpachar sarañ jan puedipkchejja, Diosan Reinopar apoyapki ukanak contraw sartapjjani. Ukjjarusti ‘oraqpachankir reyinakajj’ Armagedonanwa tukjatäpjjani, ukhamatwa Diosan markapar atacapjjatap laykojj chhaqtayatäpjjani. Ukhamasti oraqpachankir reyinakajj Magog oraqenkir Gog satäki uka kikparakiw qʼala tukjatäpjjani. *

10. ¿Magog oraqenkir Gog satäki ukajj khitisa?

¹⁰ Yatjjataniwayktan ukarjamajja Gog satäki ukajj janiw mä angeläkiti, jan ukasti kawkïr markanakatï Diosan markaparojj akat mä jukʼa tiempor atacapkani uka markanakaw Gog sasin uñtʼatäpjje. Uka markanakajj Diosan servirinakapar oraqpachan mä juntuk atacañatakiw mayachtʼasipjjani (Mat. 24:9). Ukampis Diosan markapar atacapjjañapatakejja, Supayaw uka markanakar pʼeqtʼani. Supayajj nayra maranakatpachwa Diosar adorasiñap jarkʼapjjañapatakejj markanakar chʼamañchaski (1 Juan 5:19; Apoc. 12:17). Magog oraqenkiri Gog satäki uka toqet parliri Ezequielan profeciapajja, Jehová Diosan markapar atacapkani uka markanakajj kunsa lurapjjani uka toqetwa jukʼamp qhanañchi. *

11. ¿Kawkïr oraqerutï Gog satäki ukajj mantantki uka oraqetjja Ezequielajj kamsisa?

¹¹ Kunjamtï  3 parrafon yatjjataniwayktanjja, Magog oraqenkiri Gog satäki ukajja Diosatakejj wali valoranïki uka oraqeruw mantantani, ukatwa Diosajj wal colerasini. ¿Kuna oraqetsa parlaski? Uk yatiñatakejj Ezequielan profeciapat yatjjataskakiñäni (Ezequiel 38:8-12 liytʼañataki). Ukanjja ‘kawkïr markatï espadamp tukjatäsin kuttʼankäna’, ‘markanak taypit tantachtʼatäkäna’ uka  markan oraqeparuw Gog satäki ukajj mantani sasaw qhanañchi. Khitinakatï uka oraqen Jehová Diosar adorapki ukanakatwa parlaraki. Uka profeciarjamajja uka markajj ‘khitinakatï seguro jakapki’, ‘jan khiti jarkʼaqerini, jan murallanakani, jan trancanakani, jan punkunakani’, ukhamarak ‘wali valoraninak’ imkatapki uka markawa. Cheqas oraqpachan Jehová Diosar adorapki ukanakajja, ukham oraqenwa jakasipki, ¿uka oraqejj kunamp sasisa uk kunjamatsa yatsna?

12. ¿Kunanakas nayra Israel markan askichasïna?

¹² Nayra Israel markajj mayamp sumaptayatäkäna uka toqet amuytʼañäni, Diosan markapajj ukanwa jakapjjäna, trabajipjjarakïna, ukanarakwa Jehová Diosarojj walja maranak adorapjjäna. Ukampis israelitanakajj yaqha diosanakar adorjjapjjäna ukhajja, Diosajj Ezequiel toqew jumanakan oraqemajj qʼala tukjatäniwa, chʼusa oraqer tukuyatarakïniwa sasin säna (Ezeq. 33:27-29). Babiloniar apat judionakajja arrepentisisajj markaparuw kutʼjjapjjani, ukatsti naya saparukiw mayamp adorjjapjjetani sasaw Jehová Diosajj sarakïna. Diosan bendicionapatwa Israel markajj suma oraqëjjañapäna, Edén jardinjam wali sumäñaparakïna (Ezeq. 36:34-36). Ukajj 537 antes de Cristo maranwa phoqasiñ qalltäna, ukhaw yaqha markar apata judionakajj Jerusalenar kuttʼapjjäna, ukhamat Jehová Dios saparuk mayamp adorjjañataki.

13, 14. 1) ¿Diosatak wali valoranïki uka oraqejj kunasa? 2) ¿Kunatsa uka oraqejj Jehová Diosatak wali valoranejja?

¹³ Kunjamtï nayra tiempon Jehová Diosaruk mayamp adorasjjänjja, ukhamwa jichha tiempon Dios saparuk adoraraktanjja. 9 yatichäwinjja, Diosan markapajj 1919 maran Jachʼa Babiloniat  mistjjatapwa yatjjataniwaytanjja. Uka maranwa Jehová Diosajj markapan suma oraqer mantapjjañapatak yanaptʼäna. ¿Uka suma oraqejj kunasa? Jehová Diosar mä paraisonjam adorktan ukawa, mä arunjja ukanwa Diosar adorañatak kunaymaninak lurtanjja, uka oraqejj jukʼat jukʼat jukʼamp sumäjjewa, segurorakiwa. Ukanjja jan ajjsarasa, mayachtʼataw jakastanjja (Prov. 1:33). Diosar serviskakiñatakis walja yanaptʼanakwa katoqtanjja, ukatjja Diosan Reinopatwa yatiyaraktanjja, ukham lurañajj wal gustistu. Jiwasajj aka arunak phoqasirwa uñjtanjja: ‘Jehová Diosan bendicionapampiw maynejj qamiripti, ukamp chikajj janiw kuna llakisiñsa jupajj apankiti’ (Prov. 10:22). Kawkinsay jakasiskchiñäni, jiwasatï Dios saparuk taqe chuyma adorañäni arunakasampis luratanakasampis uk uñachtʼayarakiñäni ukhajja, uka suma oraqenkarakiñäniwa.

¹⁴ Jehová Diosatakejja uka suma oraqejj wali valoraniwa. ¿Kunatsa? Diosaw khitinakas jupar adorapjjani uk ajllisi, ukatwa taqe servirinakaparojj ‘markanakan kunanakatï wali valoranïki’ ukham uñji (Ageo 2:7; Juan 6:44). Diosan servirinakapajja machaq jaqëñampi isthapisiñatakiw wal chʼamachasipjje, mä arunjja Jehová Diosjam suma chuymanïñatakiw chʼamachasipjje (Efes. 4:23, 24; 5:1, 2). Ukatjja Diosaruk adorañataki jupar serviñ nayrar uchañatakiw wal chʼamachasipjjaraki, ukham lurasaw Diosar jachʼañchapjjatapsa wal munasipjjatapsa uñachtʼayapjje (Rom. 12:1, 2; 1 Juan 5:3). Jehová Diosajja jupar jukʼamp serviñatak chʼamachasitas uñjasajj wal kusispacha. ¡Diosar serviñajj wali sumapuniwa! Jupar  adorañatak chʼamachasisajja wal kusisiytanjja, markaparus yanaptʼaraktanwa (Prov. 27:11).

15, 16. ¿Kunapachas Magog oraqenkir Gog satäki ukajj Diosan suma oraqepar mantantani?

¹⁵ Akat mä jukʼarojj kunjamsa mayachtʼat markanakajj Diosan wali valorani oraqepar mantantapjjani uk yatiñajj wali wakiskiriwa. ¿Kunatsa? Taqe khitinakatï Jehová Diosar adorktan ukanakaruw atacapjjestani, ukatwa kunjamas ukajj pasani uk yatiñasajj wakisi. Jichhajj aka kimsa jisktʼanakat yatjjatañäni.

¹⁶ ¿Kunapachasa Magog oraqenkiri Gog satäki ukajj Diosan suma oraqepar mantantani? Uka toqet parlir profeciajj akham siwa: ‘Walja maranak qhepatsti, markan oraqeparuw jumajj mantäta’ sasa (Ezeq. 38:8). Uka arunakarjamajja, Gog satäki ukajj akapachajj niya tukusiñampïskani ukhaw Diosan suma oraqeparojj mantani. Ak amtañäni, jachʼa tʼaqesiñ tiempojja taqpach falso religionanakar tukjaskani ukhaw qalltani. Ukhamasti falso religionajj qʼala tukjatäkani uka qhepatwa, jan ukajj Armagedonajj janïr qalltkani ukhaw Gog satäki ukajj Diosan servirinakapar qhep qhepa kutin qʼal tukjañatak atacani.

17, 18. ¿Kunsa Jehová Diosajj jachʼa tʼaqesiñ tiempon lurani?

 ¹⁷ ¿Kunatsa Gog satäki ukajj Jehová Diosan servirinakapar atacani? Ezequielan profeciaparjamajja aka pä razonatwa atacani. Maya, Jehová Diosaw amtap phoqasiñapatakejj pʼeqtʼani. Paya, Gog satäki ukajj jan wali amtanakanïniwa.

¹⁸ Jehová Diosaw amtap phoqasiñapatakejj pʼeqtʼani (Ezequiel 38:4, 16 liytʼañataki). Diosajj Gog satäki ukarojj akham siwa: ‘Quijadamarojj jachʼa ganchonakampiw uchäma’ ukatsti ‘oraqej contraw apanïma’ sasa. Uka arunakarjamajja ¿Diosat servirinakapar atacapjjañapatakejj markanakar obligani? Janiwa. Jehová Diosajj janipuniw kuna jan walsa markapar lurkaspati (Job 34:12). Ukampis enemigonakapajj servirinakapar uñisipjjatapsa markapar chhaqtayañatak wal chʼamachasipjjatapsa jupajj sum yati (1 Juan 3:13). Diosajja amtanakap horasapar phoqañatakejj Gog satäki ukarojj quijadapat ganchonakampi achuntayasas qatatinkaspa ukhamäniwa. Falso religionanakajj qʼala tʼunjatäjjapjjani uka qhepatjja, inas Jehová Diosajj servirinakapar atacapjjañapataki markanakar nuktʼchini. Ukhamatwa Diosan amtaparjamajj Armagedón jachʼa guerrajj qalltani. Ukatsti Jehová Diosajj markaparuw salvani, Taqe Kunjjar Munañanïtapwa uñachtʼayani, santo sutipsa qʼomacharakiniwa (Ezeq. 38:23).

19. ¿Kunatsa Gog satäki ukajj Diosar serviñas jan munkani?

 ¹⁹ Gog satäki ukajj jan wali amtanakanïniwa. Markanakajj ‘mä sinti jan wali amta amuytʼapjjani’. Uka markanakajja Diosan servirinakapatakejj walja maranakaw wali coleratäpjje, wal uñisipjjaraki. Ukatwa Diosan servirinakapar atacapjjani, ‘jan khiti jarkʼaqerini, jan murallanakani, jan trancanakani, jan punkunakani jiskʼa markanakansa jakapkaspaʼ ukhamwa amuyapjjarakini. Uka markanakajja, Diosan markapajj ‘wali valoraninak imkataski’ ukanak ‘saqueyjaña’ ukhamarak ‘katuntasiñwa’ wal munapjjani (Ezeq. 38:10-12). ¿‘Wali valoraninaka’ sasajj kuna toqetsa parlaskpacha? Kunanakatï Diosar adorañatak yanaptʼkistu ukanakaw wali valoranejja, ukampis Jehová Diosaruk adoratasaw jukʼamp valorani. Diosar adoratas jarkʼañatakejja, markanakajj kunaymaninakwa lurapjjani, uksti Jehová Diosar adorasiñap jan munapjjatapata ukhamarak Diosan servirinakapar wal uñisipjjatapatwa lurapjjani.

20. ¿Kunjamsa Gog satäki ukajj Diosan suma oraqepar mantantani?

²⁰ ¿Kunjamsa Gog satäki ukajj Diosan suma oraqepar mantantani? Markanakajja, inas kunanaktï Diosar adorañatak lurktan ukanak jarktʼañ munapjjchistani. Ukatakejj inas kunanakatï Diosar serviñatak yanaptʼkistu ukanak apaqapjjchistani, tantachasiñ jarkʼapjjchistani, tʼaqa tʼaq sarnaqayañ munapjjchistani, predicañsa jarkʼapjjarakchistani. Ukanak lurasajja, mä paraisonsa Diosar sirvksna ukhamawa. Ukampis Supayajj markanak toqew Diosan servirinakapar chhaqtayañ munani, Diosar adorañsa chhaqtayañwa munarakini.

21. Kunatï niya pasañampïki ukanak yatiyatapatjja, ¿kunatsa Jehová Diosar wal yuspärtanjja?

²¹ Gog satäki ukajja, niyaw Diosan servirinakaparojj atakistani. Kunatï niya pasañampïski ukanak yatiyatapatjja, walpun Diosar yuspärtanjja. Ukampis jachʼa tʼaqesiñ tiempo puriñapkamajja, Jehová Diosar adorañatak chʼamachasiskakiñasawa, jupar serviñaw jakäwisan nayrankañaparaki. Ukhamatwa Diosan oraqepajj jukʼamp sumäñapatak yanaptʼañäni. Akat mä jukʼa tiemporojj kunjamsa Jehová Diosajj Armagedonan markapar salvani, sutipsa qʼomacharakini uk uñjañ wal muntanjja. Uka toqetwa jutïr yatichäwin yatjjataskañäni.