1, 2. ¿Kuna kasta warmis janipun walïki?

 MÄ WARMIN prostituta warmïtap yatisajj llakistanwa. Kuna kawsarak ukham jan walir purtʼaspacha sasajj inas jisktʼassna. Inas jupajj abusata, wali nuwata uñjasiwaychi, ukatwa jupajj prostituta warmjam tawaqetatpach sarnaqjjaspa. Maysa toqetjja wali pobrëtap laykuw ukhaman uñjasirakispa, jan ukajj jupar wal nuwiri chachapat saraqjjasaw ukhaman uñjasispa. Aka jan wali pachanjja sapüruw ukham jan walinakajj istʼasi, ukatwa Jesucristojj yaqhep prostitutanakarojj wali munasiñamp uñjäna. Ukham lurasajj ¿kunsa uñachtʼayäna? Khitinakatï arrepentisisin jan wali luratanakap jaytapki ukanakajj jutïrin sumwa jakasipjjaspa, ukwa Jesusajj uñachtʼayäna (Mat. 21:28-32; Luc. 7:36-50).

² Jichhajj yaqha kasta prostituta warmit parltʼarakiñäni, uka warmejj munañapatwa prostituta warmjam sarnaqe. Jupajj ukham sarnaqatapat janiw phenqʼaskiti, antisas wali qollqenïña munañanïñwa muni. Ukatjja jupar sum uñjiri, wali munasiri chachañïkasas jan phenqʼaniw prostitutjam sarnaqe, uk yatiñajj wali ajjtaskañawa. Uk yatisaw Diosajj prostituta warminakat walja kuti parlistu, ukhamat kunjamsa jupajj falso religionanakar uñji uk amuyañasataki.

3. ¿Kuna toqenakatsa aka yatichäwin yatjjataskañäni?

 ³ Ezequiel 16, 23 capitulonakanjja, kunjamsa Israel markasa Judá markasa Diosat jitheqtasajj yaqha diosanakar servipjjäna uka toqetwa parli, ukham lurapjjatapajj mä prostituta warmin luratanakapampi sasiwa. Ukampis uka toqet janïr yatjjatkasajja, khitirakis prostituta warmimp sasi uk yatjjatañäni. Uka warmejja, Ezequielajj janïr naskäna Israel markas janïr utjkäna ukhat jichhakamaw ukham jan wal sarnaqaski. Bibliankir Apocalipsis libronwa uka warmejj khitisa ukajj sum qhanañchasi.

4, 5. ¿“Jachʼa Babilonia” sasajj khitinakatsa parlasktanjja? ¿Kunatsa ukham sistanjja? (Aka yatichäwi qalltan utjki uka dibujo uñjjattʼäta).

⁴ Jesusajja apóstol Juanarojj mä visionanwa “jachʼa prostituta warmirojj” uñjayäna, uka warmejj ‘Jachʼa Babilonia, prostitutanakan taykapa’ satarakiwa (Apoc. 17:1, 5). Religión pʼeqtʼirinakasa Bibliat yatjjatatanakasa, walja maranakaw uka warmejj khitisa uk yatjjatañatak wal chʼamachasiwayapjje. Jupanakajja ‘uka warmejj Babilonia markawa, Roma markawa, Iglesia catolicawa’ sasaw sapjjäna. Ukampis Jehová Diosan Testigonakapajja, nayra maranakatpachaw uka ‘jachʼa prostituta warmejj’ khitisa uk yatjjtanjja. Uka warmejja oraqpachankiri taqpach falso religionanakawa. ¿Kunatsa ukham sistanjja?

⁵ Uka prostituta warmejja ‘oraqenkir reyinakampi’, mä arunjja gobiernonakamp qʼañu jucha luratapatwa juchañchat uñjasi. Ukhamasti uka warmejj janiw mä gobernantëkaspati. Maysa toqetjja, Jachʼa Babilonian tʼunjasitapatwa ‘oraqenkir comerciantenakajj’ wal llakisipjjani sasaw Apocalipsis librojj qhanañchi, comerciantenaka sasajja oraqpachan utjki uka jachʼa negocionakatwa parlaski. Ukhamasti uka warmejj janiw oraqpachankir jachʼa negocionakamp saskaspati. ¿Ukhamajj khitïpachasa? ‘Espiritunakampi parlasin’ jan wali luratanakapata, idolonakar adoratapata ukhamarak kʼarinak parlatapatwa jupajj juchañchat uñjasi. Ukatwa uka warmejj oraqpachankir taqpach falso religionanakawa sasin sistanjja. Ukhamarusa uka warmejj mä salvaje animaljjar qonjjatatawa sasaw Bibliajj qhanañchi, ukhamätapaw gobiernonakar yanapatap uñachtʼayi, Jehová Diosan taqe chuyma servirinakaparus jan waltʼayañatakiw arknaqaraki (Apoc. 17:2, 3; 18:11, 23, 24). Cheqpachansa falso religionanakajj nayratpachaw uka jan walinak lurasipki.

6. ¿Kunatsa Jachʼa Babiloniarojj ‘prostitutanakan taykapa’ sasin sistanjja?

⁶ Jachʼa Babiloniarojj ‘jachʼa prostituta warmi’ ukhamarak ‘prostitutanakan taykapa’ sasaw uñtʼasi. ¿Kunatsa? Falso religionajja kunayman religionanakaru, walja gruponakaru, sectanakaru jaljatätap laykuw ukham uñtʼasi. Jehová Diosajj nayra Babel jan ukajj Babilonia markan jaqenakan arup mayjtʼaykäna ukhajja, jaqenakajj falso creencianakapwa taqe cheqar apasjjapjjäna, ukhamatwa kunayman religionanakajj oraqpachan utj-jjäna. “Jachʼa Babilonia”  sutejja nayra Babilonia markatwa juti, uka markanwa walja falso religionanakajj uñstäna (Gén. 11:1-9). Ukatwa taqpach falso religionanakajj jachʼa prostituta warmin phuchanakapawa sasin sistanjja. Supayajj uka religionanak toqew jaqenakan espiritunakamp parlapjjañapatakisa, idolonakar adorapjjañapatakisa, jan ukajj yaqha ukham jan wali costumbrenakanïpjjañapatakis engañji, ukanakaw Jehová Diosan sutip qʼañuchi. Uka jan wali organizacionan utjatapatwa Diosajj markapar akham sasin ewjjtʼi: ‘Nayan markaja, janitejj jumanakajj jupamp chika juchachasiñ munapksta ukhajja, uka taypit mistjjapjjam’ sasa (Apocalipsis 18:4, 5 liytʼañataki).

7. ¿Kunatsa Jehová Diosan ewjjtʼapar istʼañasa?

⁷ ¿Jumajj Jehová Diosan uka ewjjtʼaparojj istʼtati? Jaqenakajja ‘Diosat yatjjatañ’ munasaw religionanak thaqapjje, Diosaw jaqenakarojj ukham lurawayistu (Mat. 5:3). Diosat yatjjatañ munatasjja Jehová Dios saparuk adorasaw uñachtʼaysna. Cheqas Diosan servirinakapajj kunjamtï Diosar adorasiñapäki ukham adorañwa muntanjja, ukampis Supayajj yaqha diosanakar adorañaswa muni, walja kutirakiw Supayajj Diosan servirinakapar ukham pantjasiyawayi. Ezequielajj jakkäna uka urunakanjja, Diosan markapajj walja kutiw yaqha diosanakar adorjjäna. Israel markajj kuna jan walinaktï lurkäna uka toqet lupʼiñajja, Diosan leyiparjam sarnaqañajj kunja wakiskirisa, ukhamarak Diosajj taqe kun cheqaparjam uñjirïtapa, khuyaptʼayasirïtap amuyañatakiw yanaptʼistani.

8-10. 1) ¿Jehová Diosan kuna arunakapas falso religionar mitisiñas jan munatap uñachtʼayistu? 2) ¿Kuna uñachtʼäwis uk amuytʼañatak yanaptʼistu?

⁸ Markapan yaqha diosanakar adorjjatapajj qhawqsa chuymap ustʼayäna uk qhanañchañatakejja, Jehová Diosajj mä prostituta warmitwa Ezequiel libron parli. Servirinakapajj kuna jan walinaktï lurapkäna uk uñjasajja, Diosajj wali chuyma ustʼatänwa, uk qellqañapatakiw Ezequielar amuytʼayarakïna. ¿Kunatsa jupanakajj prostituta warmïpkaspas ukham sispachäna?

⁹ Uka jisktʼar janïr qhanañchkasajja, Diosaruk adorañat kuntï 5 yatichäwin yatjjataniwayktan uk amtañäni. Israelitanakar churkäna uka leyinjja, Diosajj akham sänwa: ‘Janiw jumajj nayat sipansa yaqha diosanakanïñamäkiti’ sasa. Ukatjja ‘naya Jehová Diosamajja naya saparuk adorasispa uk mayir Diosätwa’ sasaw sarakïna (Éx. 20:3, 5). Qhepatjja niya uka pachwa akham sarakïna: ‘Janiw yaqha dios nayraqatan altʼasipjjañamäkiti, Jehová Diosasti jupa saparuk adorapjjaspa uk mayir Diosawa. Jïsa, jupa saparuk adorapjjaspa uk mayir Diosawa’ sasa (Éx. 34:14). ¿Kunsa uka arunakajj uñachtʼayistu? Diosaruk adorañäni ukhakiw chuymaparojj purtʼañäni.

¹⁰ Uk amuytʼañatakejj mä chacha warmit parltʼañäni. Jupanakajj qhawqsa munasipjje ukjja, luratanakampiw purapat uñachtʼayasipjjaspa. Ukampis jupanakat maynitï yaqhar uñchʼukjjaspa jan ukajj  yaqhar munasjjaspa ukhajja, esposopasa jan ukajj esposapasa chuyma ustʼatäñatakejj razonanïspawa (Hebreos 13:4 liytʼañataki). Jehová Diosar adoratasampejj ukaw pasaraki. Jupar katuyata servirinakapatï yaqha diosanakar adorjjsna ukhajja, ukhamarakiw Diosajj chuyma ustʼatäñatakejj razonanïspa. Jupan servirinakapajj yaqha diosanakar adorapki ukhajja, kunjamakis Jehová Diosajj jikjjatasi uk qhana arunakampiw Ezequiel 16 capitulon qhanañchi.

11. ¿Jerusalenatsa kunjamsa uka markajj uñstäna uka toqetsa kunsa Jehová Diosajj qhanañchäna?

¹¹ Ezequiel 16 capitulon Diosajj parlki ukaw uka libron jukʼamp jachʼajja, hebreo arun qellqatanakan jachʼäki uka profecianakat maynïrirakiwa. Ukanjja Jerusalén markatwa parli, uka markat parlkasajj jupat jitheqtiri Judá markatwa parlaski. Kunjamsa uka markajj uñstäna kunanak lurasas Diosat jitheqtäna taqe uka llakkañ sarnaqäwitwa parli. Jerusalén markajj jichhak nasita, qʼañu, apanukut wawäkaspasa ukham parlasaw Jehová Diosajj qallti. Awk taykapajj idolonakar adoriri uka oraqenkir cananeo jaqenakäpjjarakïnwa. Davidan uka marka katuntañapkamajja, Jerusalén markajj walja tiempow jebuseonakamp apnaqat uñjasïna. Jebuseonakajj cananeonakan mä tribupänwa. Jehová Diosajj jichhak nasita uka wawatjja wal sinttʼasïna, ukatwa jareqtʼäna sum uñjarakïna. Tiempompejj uka wawajja, mä arun Jerusalenajj Diosan esposapäkaspas ukhamäjjänwa. Cheqas kawkïr israelitanakatï Jerusalén markan jakapkäna ukanakajja, Moisesajj jakkäna ukhaw mä pacto Jehová Diosampejj lurjjapjjäna (Éx. 24:7, 8). Jerusalenajj Judá markan capitalapäjjäna ukhajja, Diosajj wal uka markar bendisïna, qamiriptayarakïnwa. Kunjamtï wali munañani wali qollqeni chachajj esposapar suma adornonak churkejja, ukhamarakiw Diosajj markapar sum uñjas jachʼañchäna (Ezeq. 16:1-14).

12. ¿Kunjamsa Jerusalén markajj idolonakar adorañar purtʼasïna?

¹² ¿Kunas qheparojj pasäna? Jehová Diosajj akham sänwa: ‘Jumajj suma uñnaqtʼanïtam laykuw jachʼañchasiñ qallttajja, markanak taypin wali uñtʼatätam laykusti mä prostitutaruw tukuraktajja. Khititï uka cheq paskäna ukanakampiw jumajj mä prostitutjam qʼañunak walpun lurayätajja, juma pachpaw jupanakar churasiyätajja’ sasa (Ezeq. 16:15). Salomonan urunakapanjja, Diosajj wal markapar bendisïna, wali utjirinakwa churarakïna, ukatwa Jerusalén markajj wali qamiri markar tukjjäna. Taqe nayra markanakat sipansa wali uñtʼatäjjarakpachänwa (1 Rey. 10:23, 27). Ukampis Jerusalenanjja jukʼat jukʼatwa idolonakar adorjjapjjäna, Jehová Diosatsa jitheqtjjapjjarakïnwa. Salomonajj extranjera warminakapar kusisiyañatakejja, falso diosanakar adorañwa Jerusalenan utjayäna (1 Rey. 11:1-8). Salomón qhepat reyïpkäna ukanakat yaqhepajja, jukʼamp jan walinakwa lurapjjäna. Jupanakajj falso diosanakar adorasiñapatakiw markpachar wal chʼamañchapjjäna, ukhamatwa Diosan markap wal qʼañuchapjjäna. Ukham falso diosanakar adorir  uñjasajja, ‘ukanakajj janipuniw pasañapäkänti’ sasaw Jehová Diosajj säna (Ezeq. 16:16). Ukampis jan istʼasir markapajj jukʼamp jan walinakwa luraskakïna.

13. ¿Diosan markapajj kuna jan walinaksa Jerusalén markan luräna?

¹³ Markapajj kuna jan walinaktï lurkäna ukanak uñjasajja, Diosajj wal chuymap ustʼayaspachäna, markapan jan wali luratanakapatsa wal ajjtasirakpachäna. Jupajj akham sänwa: ‘Nayatak ususkayäta uka yoqanakamarus phuchanakamarus idolonakaruw sacrificiot loqtayätajja... ¿Janit prostitutjam qʼañu luratanakamampejj contentökta? Jumajj wawanakajaruw jiwaraytajja, ninar phichantasaw sacrificiot loqtaraktajja’ sasa (Ezeq. 16:20, 21). Ukham sinti jan walinak lurasitapajja, Supayajj jan sinttʼasirïtapwa uñachtʼayistu. Diosan markapar ukham jan walinak lurayasajja Supayajj wal kusispacha. Ukampis Jehová Diosajj taqe kunwa uñjaski, kuna jan walinaktï Supayajj lurawayki ukanaksa askicharakiniwa. Diosajj taqe kun cheqaparjamapuniw lurani (Job 34:24 liytʼañataki).

14. Jehová Diosajj qhanañchkäna ukarjamajja, ¿Jerusalenan kullakanakapajj khitinakänsa? ¿Uka kimsa kullakanakat kawkïris jukʼamp jan walinak luräna?

¹⁴ Jerusalenajj jan wali luratanakapat janiw phenqʼaskänti, yaqha diosanakar adoraskakïnwa. Kunjamtï Jehová Diosajj siskänjja, Jerusalenajj mayni prostitutanakat sipansa jukʼamp jan walïnwa, ¿kunatsa ukham sistanjja? Jaqenakat pago katoqañat sipansa jupaw antisas pagäna (Ezeq. 16:34). Nayrajj uka oraqen jakapkäna uka tribunakajja idolonakaruw adorapjjäna, ukatwa Jerusalenajj ‘taykapjamawa’ sasin Diosajj säna (Ezeq. 16:44, 45). Jerusalenan kullakanakapat parlkasajja, jilïr kullakapajj Samaria markawa sasaw Diosajj säna. Uka markajja Jerusalenat sipansa nayraw kunayman jan walinak lurasajj prostituta warmjam sarnaqjjäna. Ukatjja Diosajj Sodoma sat mayni kullakapatwa parlarakïna. Uka markajja sinti jan walinak luratapata, jachʼa jachʼa tukutapatwa tukjat uñjasïna. Samaria, Sodoma markanakat sipansa, Jerusalenaw jukʼamp jan walinak luräna, ukwa Diosajj qhanstayañ munäna (Ezeq. 16:46-50). Jerusalén markajja Diosan ewjjtʼanakaparojj janiw istʼañ munkänti, antisas sinti jan walinakwa luraskakïna.

15. ¿Kuna amtampis Jehová Diosajj Jerusalenar castigäna? ¿Ukham castigatapajj kunjamsa markapar yanaptʼäna?

¹⁵ ¿Kunsa Jehová Diosajj luräna? Jupajj Jerusalenar akham sänwa: ‘Jumajj wal kusisiykayäta jumar wal munapkarakiyätam taqe ukanakaruw tantachtʼäjja’ sasa. Ukatsti ‘jumar wal munirinakan amparaparuw katuyäma’ sasaw sarakïna. Jerusalenarojja jupamp mayachatäpkäna uka idolonakar adoriri markanakaw tukjañapäna, uka markanakaw suma uñnaqtʼanïtapsa, kuna valoraninakatï jupan utjkäna ukanaksa aparapjjañapäna. ‘Qalanakampiw jumarojj jaqjapjjätam, espadanakapampiw jiwayapjjätam’ sasaw Diosajj säna. ¿Kunatsa Diosajj Jerusalenar ukham castigpachäna? Janiw markapar chhaqtayañ amtampejj uk lurkänti, antisas akham sänwa: ‘Prostitutjam sarnaqañam tukusiyäwa’ sasa. Ukatjja akham sarakïnwa: ‘Juma contra colerasitajajj tʼakurjjaniwa, wal colerasiñajas  jumat saraqjjaniwa, nayajj calmasjjäwa, janiw wasitat coleratäjjäti’ sasa. Kunjamtï 9 yatichäwin yatjjataniwayktanjja, markapajj Jerusalenar kutʼjjasajj jupa saparuk adoraspa ukwa Jehová Diosajj munäna. ¿Kunatsa ukham sistanjja? Jupajj akham sänwa: ‘Tawaqökayäta ukhajj jumamp mä pacto lurkayäta ukwa amtasëjja’ sasa (Ezeq. 16:37-42, 60). Markapat sipansa Diosajj janiw jupanakar apanukuñ amtkänti (Apocalipsis 15:4 liytʼañataki).

16, 17. 1) Oholá ukhamarak Oholibá warminakajj janiw cristianöpjjtwa sapki uka religionanakäpkiti sasajj ¿kunatsa sistanjja? (“Pä prostitutanaka” sat recuadro uñjjattʼäta). 2) ¿Kunanaksa Ezequiel 16, 23 capitulonakat yateqtanjja?

¹⁶ Jehová Diosajj Ezequiel 16 capitulon wali jay parlkäna ukanjja, jupajj leyinakapa, cheqapar uñjirïtapa, wali khuyaptʼayasirïtapwa yatichistu. 23 capitulotjja uka pachpwa saraksna. ¿Kunsa cheqpach cristianonakajj ukat yateqsna? Yaqha diosanakar adorkäna uka markaparojja kuntï Diosajj qhan siskäna ukanak taqe chuymaw istʼañ muntanjja, janipuniw Judá ukhamarak Jerusalén markanakjam Jehová Diosar chuym ustʼayañ munktanti. Janirakiw idolonakarojj kunjamatsa adorañ munktanti, jiwasatak taqe kun munirïñasa, qollqe chuymäñasa idolonakar adorañampi sasirakiwa (Mat. 6:24; Col. 3:5). Aka qhepa urunakanjja, Jehová Diosan khuyapayasiñapatwa jupa saparukejj sum adorasjje, janirakiw Diosar adorañajj nayrjam mayamp qʼañuchatäkaniti. Janipuniw uk armañasäkiti. Jehová Diosajja jupan Israelapampiw ‘wiñayatak mä pacto’ lurawayi. Uka pactojja janipuniw yaqha diosanakar adorasitap laykusa, jan ukajj prostitutar uñtat jan walinak lurasitap laykus pʼakintatäkaniti (Ezeq. 16:60). Ukhamasti Jehová Diosan qʼoma markapankañ wali valoranitwa uñjañasa.

¹⁷ Ezequiel libron parlki uka prostitutanak contra Jehová Diosajj arskäna uk yatjjatjjasajja, jichhajj ‘jachʼa prostituta warmita’, mä arun Jachʼa Babiloniat kunsa yateqsna uk yatjjatañäni.

18, 19. ¿Ezequiel ukhamarak Apocalipsis libronakan parlki uka prostitutanakajj kunansa niya pachpakïpjje?

¹⁸ Jehová Diosajj pachpakïskiwa (Sant. 1:17). Jachʼa prostituta warmejj uñstkäna, mä arunjja falso religionanakajj uñstkäna ukhat jichhakamajja, kuntï lurapki ukanak Jehová Diosajj uñisiskakiwa. Kunjamtï Ezequiel libron parlki uka prostitutanakarojj juchañchaskänjja, ukhamarakiw Apocalipsis libron parlki uka ‘jachʼa prostituta warmirojj’ juchañchasini.

¹⁹ Sañäni, Ezequiel libron parlaski uka prostitutanakarojja janiw Jehová Dios pachpajj castigkänti, jan ukasti kawkïr markanakamp sarnaqasatï yaqha diosanakar adorapkäna uka markanakaw jupanakarojj castigäna. Oraqpachankir taqpach falso religionanakajja, ukhamarakiw ‘oraqenkir reyinakamp’ qʼañu jucha lurapjjatapat juchañchat uñjasi. ¿Khitis uka prostituta warmirojj castigani? Bibliarjamajja uka reyinakawa, mä arunjja gobiernonakaw ‘prostituta warmirojj uñisipjjani, utjirinakapsa taqpachwa aparapjjani,  jan isini jaytapjjani, jupanakaw jañchipsa manqʼantapjjani, ninampiw qʼal nakhantayapjjarakini’. ¿Kunatsa gobiernonakajj mä akatjamat falso religionanakar tukjapjjani? ‘Diosaw amuyupjja chuymanakapar uchani’, ukhamat jupan amtap phoqapjjañapataki (Apoc. 17:1-3, 15-17).

20. ¿Kunas Babilonian wiñayatak tukjatäñap uñachtʼayi?

²⁰ Ukhamasti Jehová Diosajj gobiernonak taypiw falso religionanakarusa, cristianöpjjtwa sapki ukanakarus juchañchani. Jupanakajj wiñayatak tukjatäpjjaniwa, janiw perdonatäpkaniti, ni cambiapjjañapatakis tiempojj churatäkaniti. Kunjamtï Apocalipsis libron siskejja, Babiloniajj “jan mayampitak chhaqtayatäniwa” (Apoc. 18:21). Jachʼa Babilonian chhaqtatapatjja Diosan angelanakapajj wal kusisipjjani, akham sasaw arnaqasipjjarakini: ‘¡Jah Diosar jachʼañchapjjam! Uka markan nakhantatapatjja jewqʼejj wiñayans wiñayapatak makataskakiniwa’ sasa (Apoc. 19:3). Falso religionanakajj wiñayatak juchañchatäpjjaniwa, janipuniw jukʼamp utj-jjaniti, janirakiw Diosar adorañsa mayamp qʼañuchapkaniti.  Babiloniajj castigatäjjani tukjatäjjarakini uka qhepatjja, uka markan nakhantatapatjja jewqʼejj wiñayans wiñayapatakiw utjani.

21. ¿Jachʼa Babiloniajj tukjatäkani ukhajj kunas qalltani? ¿Jachʼa tʼaqesiñ tiempojj kunampis tukuyani?

²¹ Jachʼa Babilonia contra saytʼasajja, gobiernonakajj Diosan amtaparjamaw lurasipkani. Ukajj kun lurañtï Jehová Diosajj amtkäna uk phoqasiñapatakiw yanaptʼani. Ukapachaw jachʼa tʼaqesiñ tiempojj qalltani, ukajj janipuniw nayrajj uñjasirïkänti (Mat. 24:21). Jachʼa tʼaqesiñ tiempojj Armagedonampiw tukuyani, mä arun Diosajj aka jan wali pachamp guerrankkani ukhaw tukuyani (Apoc. 16:14, 16). Kunjamtï jutïr yatichäwinakan yatjjatkañänejja, kunjamsa ukanakajj phoqasini uk Ezequielaw sum qhanañchäna. Ukampis janïr uka toqet yatjjatkasajja Ezequiel 16, 23 capitulonakan kuna suma yatichäwinakas utji, kunjamsa ukarjam sarnaqsna uk yatjjatañäni.

22, 23. Prostituta warminakajj kunamp sasisa uka toqet yatjjatañajja, ¿Jehová Diosar kunjam adorañatakis yanaptʼistaspa?

²² Jehová Diosaruk adorapki ukanakar pantjasiyasajja, Supayajj wal kusisi. Jupajj Diosat jitheqtañaswa muni, ukhamat Ezequiel libron parlki uka prostituta warminakjam jan walinak lurañasataki. Ukampis akwa amtañasa, Jehová Diosajja jupat jitheqtasin yaqha diosanakar adorañas janipuniw munkiti (Núm. 25:11). Jiwasajj falso religionat jitheqtañatakiw wal chʼamachastanjja, kunatï Diosatakejj jan walïki ukanakamp qʼañuchasiñsa janiw munktanti (Is. 52:11). Ukatwa politicar mitisis chʼajjwir jan sarktanti, janirakiw kuna chʼajjwañanakatï akapachan utjki ukanakarus mitisktanti (Juan 15:19). Markasat jachʼañchasiñajj (nacionalismo) falso religionar mitisiñampi sasirakiwa, Supayas ukaruw chʼamañchi, ukatwa jiwasajj janipun uk lurktanti.

²³ Ukhamarus ak amtapuniñäni, Jehová Diosar wali santo qʼoma templopan serviñajj mä bendicionawa. Ukhamasti Jehová Diosan markapankatas wali valoranit uñjapjjañäni. Falso religionata jan wali lurañanakapat jitheqtañajj jichhürunakan wali wakiskiripuniwa, ukatwa uka jan walinakat jitheqtañatak jukʼamp chʼamachasiñasa.