Nayrajja apóstata Jerusalenajj cristianöpjjtwa sapki ukanakampi sasiwa sasaw qellqatanakasan qhanañchasïna. Uka markajj idolonakaruw adoräna, jan walinakamp phoqantatarakïnwa. Taqe ukanakaw kuntï cristianöpjjtwa siri religionanakajj lurapki uk amtayistu. Ukampis aka qhepa maranakanjja, Bibliat apstʼat qellqatanakasansa aka libronsa, profecianakarjamajj kunanakatï nayrajj paskäna ukanakajj jichha tiempon kunamp sasisa ukanakajj janiw qhanañchasjjeti, Biblian qhanäki ukhakiw ukham qhanañchasi. Ukampis nayra Jerusalén markajj cristianöpjjtwa sapki ukanakampi sasiwa sasajj janiw Biblian qhanañchkiti.

Aka toqet amuytʼañäni: Qalltanjja, Jerusalenan Diosarukiw adorapjjäna. Qhepatjja uka markankirinakajj apóstata jaqenakäjjapjjänwa, ukampis cristianöpjjtwa sirinakajj janiw kunapachas Jehová Diosaruk adorawayapkiti. Cristianöpjjtwa sirinakajj uñstapkäna ukhatpachaw kʼari yatichäwinak yatichapjjäna, jupanakajj 300 mara qhepanakatwa uñstapjjäna.

Jerusalenajj Babiloniampi tʼunjatäjjäna uka qhepatjja, uka markajj mayampiw Diosamp suma uñjatäjjäna, ukanwa Jehová Diosar mayamp adorasjjarakïna. Ukampis cristianöpjjtwa siri religionanakajj janiw kunapachas Diosamp katoqatäpkänti, jachʼa tʼaqesiñ tiempons wiñayatakiw tukjatäpjjani.

Yaqha diosanakar adoriri Jerusalén markar kunjamsa profecianakajj phoqasiwayi uk yatjjatasajja, inas akham amuysna: “Taqe ukanakajj cristianöpjjtwa sirinakan luratanakapwa amtayitu” sasa. Ukampis Jerusalenajj cristianöpjjtwa sapki uka religionanakamp sasiwa sañatakejj janiw Biblian mä razonas utjkiti.